Kaypi tʼukurina: Uj hermanoj wawan wañuchikorqa. Chayrayku hermanoqa may llakisqa kasharqa, tapukorqataj: “¿Dios yacharqañachu kay llakiypi kanaykuta? ¿Paychu kay llakiyta ajllarqa noqawan warmiywan aguantanaykuta yachasqanrayku?”, nispa. Kay tiempopeqa tukuypis llakiypi rikukusunpuni. Jinapis, ¿yuyanachu kanman llakiyninchejmanta Jehová juchayoj kasqanta?

Imatachus 1 Corintios 10:13 nisqanta allinta estudiaspaqa, cuentata qokusun mana chaytachu Biblia yachachisqanta. Bibliaqa mana ninchu Jehová ñaupajta qhawasqanta imastachus aguantayta atisqanchejta, chayman jinataj llakiyta ajllapuwasqanchejta. ¿Imaraykú chayta ninchej? Tawa imasta qhawarina.

Ñaupaj kaj, Jehovaqa ajllayta atinanchejpaj ruwawarqanchej. Payqa imatachus ruwanata ajllananchejta munan (Deu. 30:19, 20; Jos. 24:15). Jehovata kusichinapaj jina imatapis ajllasun chayqa, pay yanapawasunpuni (Pro. 16:9). Jinapis mana allinta ajllajtinchejqa, llakiypi rikukusunchej (Gál. 6:7). Sichus Jehová ajllanman ima llakiypichus rikukunanchejta chayqa, mana ajllajta saqeshawasunmanchu.

Iskay kaj, Jehovaqa “kaymanta jinalla” imapis kasqanmanta mana jarkʼawanchejchu (Ecl. 9:12). Uj runaqa mayllapipis, ima ratollapis accidentakuyta atinman. Jesuspis uj accidentemanta parlarqa, nerqataj Siloepi torre urmaykuspa 18 runasta wañurachisqanta. Jesusqa sutʼita rikucherqa chay runas wañusqankumanta mana Dioschu juchayoj kasqanta (Luc. 13:1-5). Uj accidente kajtenqa, mana allinchu kanman yuyananchej Dios ajllasqanta pichus kausananta, pitajchus wañunanta.

Kinsa kaj, sapa uj rikuchinanchej tiyan Jehovaman kʼaskasqa kasqanchejta. Satanasqa Diosta  interesraykulla sirvisqanchejta nerqa. Chantá nillarqataj, llakiypi rikukuspa Diosmanta karunchakunanchejta (Job 1:9-11; 2:4; Apo. 12:10). Jehová Dios wakin llakiykunamanta jarkʼawasunman chayqa, rikuchinman Satanás cheqallata parlashasqanta.

Tawa kaj, Jehovaqa imachus noqanchejmanta kananta yachayta atispapis, mana chayta ruwanchu. Diosqa imachus qhepaman kananta yachayta munaspaqa, yachayta atinman (Isa. 46:10). Jinapis Biblia nin jina, Jehovaqa mana tukuy imatapunichu yachayta ajllan (Gén. 18:20, 21; 22:12). ¿Imaraykú? Payqa munakuwanchej, cheqan kajta ruwan, ajllasqanchejtataj respetayta munan (Deu. 32:4; 2 Cor. 3:17).

Chantá, ¿ima niyta munasharqa Pablo, “Diosqa [mana] saqesonqachejchu mana sayay atinata tanqasqa kanaykichejta” nispa? Chayta nispaqa, llakiypi kashajtinchej imaynatachus Jehová yanapawasqanchejmanta parlasharqa. Manataj parlasharqachu imatachus Jehová ruwasqanmanta niraj llakiypi kashajtinchej. * Jehovapi atienekusun chayqa, pay yanapawasunchej ima llakiytapis aguantanapaj (Sal. 55:22). ¿Imaraykutaj chayta ninchej? Chayta iskaynejmanta qhawarina.

Ñaupaj kaj, ima llakiypi kasqanchejpis ‘kallpanchejman jinalla’. Chayqa niyta munan, Satanaspa mundonpi kausakusqanchejrayku llakiykuna kanantapuni. Chayrayku tukuyninchej llakiypi rikukusunpuni. Jinapis Jehovapi atienekusun chayqa, aguantayta atisunchej, nitaj Diosmanta karunchakusunchu (1 Ped. 5:8, 9). Pabloqa niraj 1 Corintios 10:13 versiculota qhelqashaspa, israelitas chʼin lugarpi kashaspa imaspichus rikukusqankumanta parlarqa (1 Cor. 10:6-11). Jehovapi atienekoj israelitasqa, llakiykunata aguantayta aterqanku. Jehovapi mana atienekojkunarí, mana kasukorqankuchu, paymantataj karunchakorqanku.

Iskay kaj, “Diosqa cheqamin”, ima nisqantapis juntʼan. ¿Ima niyta munan chay? Jehová kamachisninta imaynatachus qhawasqanpi tʼukurispaqa, rikunchej Jehová paykunata mana saqerparisqanta. Jehovaqa payta munakojkunata, kamachisqanta juntʼajkunata ima yanapan (Deu. 7:9). Payqa nisqanta juntʼanpuni (Jos. 23:14). Chayrayku Jehovaqa mana saqenqachu uj llakiypi mana aguantayta atinanchejkama kananchejta, yanapawasuntaj. Chayta ruwananmantataj ama iskayrayanachu.

Jehovapi atienekojtinchej, ¿imaynatá yanapawasun? Payqa llakiykunasninchejta chinkachiyta atinman. Jinapis Pablo nisqanman jina, Jehovaqa llakiykunapi kashajtinchej aguantanapaj yanapawasun. ¿Imaynatá chayta ruwan? Paymanta mana karunchakunapaj kallpata qowanchej. Imaynatachus chayta ruwasqanta qhawarina.

• Jehová Diosqa “sonqochawanchej tukuy llakiyninchejpi” (2 Cor. 1:3, 4). Payqa sonqo tiyasqa kanapaj yanapawasunman Palabrannejta, atiyninnejta, allin kamachi yuyayniyojnejta ima (Mat. 24:45; Juan 14:16, 17; Rom. 15:4).

• Jehovaqa atiyninwan yanapawasunman (Juan 14:26). Diospa atiynenqa, allinta ajllanapaj yuyarichiwasunman kamachisninpa kausayninkuta, Bibliaj yuyaychaykunasninta ima.

• Jehová Diosqa angelesnejta yanapawasunman (Heb. 1:14).

• Jehovaqa hermanosnejta yanapawasunman. Hermanosqa imatapis noqanchejpaj ruwaspa kallpachawasunman, sonqochawasunmantaj (Col. 4:11).

¿Imatataj yachakunchej 1 Corintios 10:13 versiculomanta? Yachakunchej, mana Jehovachu ima llakiytapis ajllapuwasqanchejta. Chantá yachakullanchejtaj, Jehovapi atienekojtinchej, ima llakiytapis aguantananchejta. Arí, ima llakiypi kajtinchejpis, Jehovaqa paymanta mana karunchakunapaj yanapawasunpuni.