1, 2. ¿Imatá uj anciano yachakorqa hermanosta yuyaychariymanta?

 UJ PACHA iskay ancianos, uj hermanata visitarej risqanku. Chay hermanaqa unayña mana reunionesman rishasqachu. Ujnin ancianoqa chay hermanapaj Bibliamanta ashkha textosta leeripusqa, imaraykuchus reunionesman rinapuni kasqanmanta. Payqa yuyarqa ajinamanta hermanata kallpacharisqanta. Jinapis ripushajtinkuña hermana nerqa: “Yachawajchejchus imaynachus kashasqayta”, nispa. Chay ancianosqa, hermana ima problemasniyojchus kashasqanta mana tapurispalla yuyaycharqankupacha. Ajinamanta yuyaycharisqankuwanqa mana hermanata yanaparqankuchu.

² Ashkha textosta hermanapaj leeripoj ancianoqa nin: “Hermana chayta niwajtiykoqa, waturikusqaykuta pisipaj qhawashasqanta yuyarqani. Chaymantaraj repararqani textosta leepunaymantaqa, imaynachus kashasqanpi piensarinay kasqanta. Allin kanman karqa tapurinay: ‘¿Imaynataj kashanki? ¿Imaynatá yanapariykiman?’”, nispa. Chay ancianoqa imachus chay kutipi pasasqanmanta maytapuni yachakorqa. Kunanqa chay anciano hermanosta entienden, maytataj yanapan.

3. ¿Pikunataj congregacionpi yuyaychariyta atinkuman?

 ³ Ancianosqa congregacionpi michejkuna kanku. Chayrayku paykunaqa pillapis congregacionpi yuyaycharinata necesitajtin, yuyaycharinankupuni tiyan. Jinapis wakin kutisqa, congregacionmanta hermanospis wajkunata yuyaycharinallankutaj kanqa. Ichapis uj amigonchejta Bibliawan yuyaycharinanchej kanqa (Sal. 141:5; Pro. 25:12). Chayrí ichá uj hermanaqa, paymanta aswan joven hermanasman, Tito 2:3-5 nisqan imasta yuyaycharinan kanqa. Chantapis tatasqa wawasninkuta  sapa kuti yuyaycharinankupuni tiyan, kʼamirinankutaj tiyan. Chayrayku kay yachaqana ancianospaj astawan wakichisqa kajtinpis, tukuyta yanapawasun pillatapis yanaparinapaj jina, kallpacharinapaj jinataj yuyaycharinapaj. Imaraykuchus ajinata yuyaychareyqa, wajkunaj ‘sonqonkuta kusirichin’ (Pro. 27:9).

4. ¿Ima tapuykunamantaj kay yachaqanapi kutichisun?

⁴ Kay yachaqanapeqa imaynatachus yuyaychariyta yachanapaj, tawa tapuykunaman kutichisun. ¿Imaraykutaj uj hermanota chayri hermanata yuyaychariyta munanchej? ¿Yuyaycharinatapunichu necesitashan? ¿Pitaj yuyaycharinan kanman? ¿Imatá ruwasunman sumajta yuyaycharinapaj?

5. ¿Maykʼajtaj uj hermano chayri uj hermana ancianoj yuyaycharisqanta japʼikuyta atillanqa? (1 Corintios 13:4, 7).

⁵ Ancianosqa hermanosta munakunku. Chayrayku paykunaqa mayqen hermanollapis wistʼuykushajtin, payta munakusqankurayku yuyaycharinku (Gál. 6:1). Uj anciano pillatapis yuyaycharinan kajtenqa, allin kanman imatachus apóstol Pabloj nisqanpi piensarinan. Pay nerqa: ‘Munakuyniyoj runaqa pacienciayoj, kʼachataj. Tukuy imata aguantan, tukuy imata creen, tukuy imata suyan, tukuy imapi sinchʼita sayan’, nispa (1 Corintios 13:4, 7 leey). Uj anciano niraj pitapis yuyaycharishaspa chay versiculospi tʼukurenqa chayqa, munakuywan, kʼachallamantataj yuyaycharenqa. Uj hermano chayrí uj hermana, anciano payta munakusqanrayku yuyaycharisqanta reparanqa chayqa, yuyaycharisqanta japʼikuyta atillanqa (Rom. 12:10).

6. ¿Imatataj Pablomanta yachakusunman?

⁶ Ancianosqa apóstol Pablomanta mayta yachakunkuman. Payqa Tesalonicamanta hermanos yuyaycharinata necesitajtinku yuyaycharerqapuni. Jinapis paykunaman qhelqarqa chay cartasninpeqa, ñaupajta paykunaman nerqa munakuywan llankʼaspa, sinchʼita sayaspataj allinta ruwashasqankuta. Chantapis payqa imaynachus kashasqankupi piensarerqa. Paykunamantaj nerqa: “Qhatiykachasqa kaspapis, llakiykunapi rikukuspapis sinchʼita sayankichej”, nispa (1 Tes. 1:3; 2 Tes. 1:4). Paykunaman nillarqataj waj cristianos paykunata rikuspa kikillantataj ruwashasqankuta (1 Tes. 1:8, 9). Tesalonicamanta cristianosqa, Pablo ajinata kallpacharejtin maytachá kusikorqanku. Paykunaqa sutʼita repararqanku Pablo mayta munakusqanta. Chayrayku imatachus Pablo iskaynin cartasninpi paykunaman yuyaychasqanta, tukuy sonqo japʼikorqanku (1 Tes. 4:1, 3-5, 11; 2 Tes. 3:11, 12).

7. ¿Imajtintaj uj hermano mana uj yuyaychayta japʼikuyta atillanmanchu?

⁷ ¿Imataj kanman pillatapis mana kʼachallamanta yuyaycharejtinchej? Uj experienciayoj anciano nerqa: “Wakin hermanosqa yuyaycharejtinchej phiñarpakunku. Chaytaj pasan mana kʼachallamanta yuyaycharisqanchejrayku”, nispa. Chayta nisqanmantaqa yachakunchej, munakuywan yuyaychawajtinchejqa japʼikuyta atillasqanchejta.

8. ¿Imapitaj uj anciano piensarinan tiyan niraj pitapis yuyaychashaspa?

⁸ Ancianosqa mana wajkunata imallamantapis yuyaychanankupachachu tiyan. Paykunaqa niraj yuyaycharishaspa kay tapuykunapi piensarinanku tiyan: “¿Yuyaycharinaypunichu kanman? ¿Imatachus ruwashasqan nipunichu allin? ¿Bibliaj nisqantapunichu mana kasukushan chayri imatachus noqa mana ruwaymanchu chayllatachu ruwashan?”. Sumaj yuyayniyoj ancianoqa mana ‘imatapis  parlarparillanchu’ (Pro. 29:20). Uj ancianoqa ichapis mana yachayta atillanqachu, uj hermanota yuyaycharinanpunichus manachus kasqanta. Jina kajtenqa waj ancianowan parlarinman chay hermano Bibliaj nisqanta pʼakishasqantapunichus manachus qhawaykurinankupaj, ajinamanta chayman jina yuyaycharinankupaj (2 Tim. 3:16, 17).

9. ¿Imaynatataj ancianos Pablo jina pʼachallikuymanta, kʼachanchakuymanta ima pillatapis yuyaycharinkuman? (1 Timoteo 2:9, 10).

⁹ Kaypi piensarina. Ichapis uj ancianoqa uj hermano imaynatachus vistikusqanmanta chayrí kʼachanchakusqanmanta llakisqa kashanman, piensarinmantaj: “¿Kay hermano yuyaycharinata necesitashanpunichu?”, nispa. Payqa yachan mana imatapis munasqanman jinallachu ruwanan kasqanta. Chayrayku waj ancianota chayrí creeypi sinchʼi sayasqa hermanota tapurikunman, khuskataj qhawaykurinkuman vistikuymanta, kʼachanchakuymantawan imatachus Pablo nisqanta (1 Timoteo 2:9, 10 leey). Pabloqa mana nerqachu imastachus ruwana kasqanta, imastatajchus mana ruwanachu kasqanta. Astawanpis payqa nerqa Diospa Palabran yuyaychasqanman jina maychus kajta, allin yuyaywantaj pʼachallikuna kasqanta. Payqa yacharqa hermanos Diospa Palabran yuyaychasqanman jina pʼachallikuyta, kʼachanchakuyta ima ajllayta atisqankuta. Ancianosqa pillatapis yuyaycharinankupaj sumajta qhawarinanku tiyan maychus kajtachus, allin yuyaywantajchus manachus pʼachallikushasqanta.

10. Creeypi sinchʼi sayasqa kaspapis, ¿tukuychu kikinta imatapis ajllanchej?

¹⁰ Creeypi sinchʼi sayasqa iskay hermanosqa, mana kikintapunichu imatapis ajllanku. Jinapis mana nisunmanchu ujnenqa allinta yuyasqanta, ujnintaj pantasqa kashasqanta. Chayrayku ama hermanosta ninachu imachus noqanchejman allin rijchʼawasqanchejta ruwanankuta (Rom. 14:10).

11, 12. Uj anciano pitapis yuyaycharinan kajtin, ¿imapitaj ñaupajta piensarinan tiyan chanta imaraykutaj?

¹¹ Pillapis yuyaycharinatapuni necesitashan chayqa, ¿pitaj yuyaycharinman? Uj ancianoqa uj casada hermanata chayrí uj jovencitota, uj jovencitata niraj yuyaycharishaspa, allin kanman familiamanta umawan parlarinan. * Ichapis pay yuyaychariyta munanqa chayrí ancianos yuyaycharishajtinku pay chaypi kayta munanqa.  Kinsa parrafopi parlarerqanchej jina, uj joven hermana yuyaycharinata necesitajtenqa, ichapis allin kanman uj kuraj hermana yuyaycharinan.

¹² Uj ancianoqa kaypi piensarinallantaj tiyan: “¿Allinchu kanman noqa yuyaycharinay  chayri waj ancianochu yuyaycharinman?” Pisipaj qhawakoj hermanoqa, pay jina pisipaj qhawakorqa chay ancianoj yuyaychasqanta ichapis japʼikullanqa. Imajtinchus chay ancianoqa entiendeyta atillanqa imaynachus chay hermano kashasqanta. Jinapis tukuynin ancianos, hermanosta yanapananku tiyan Bibliaj nisqanman jina kausakunankupaj. Mayqen hermanollapis wistʼuykushan chayqa, mayqen ancianollapis yuyaycharinanpuni tiyan.

13, 14. ¿Imaraykutaj ancianos allinta uyariyta yachananku tiyan?

¹³ Allinta uyariyta yachana. Uj anciano pillatapis yuyaycharinanpaj wakichikushan chayqa, kaykunapi piensarinan tiyan: “¿Yachanichu hermano imaynachus kashasqanta? ¿Yachanichu ima llakiykunapichus rikukushasqanta? ¿Ima yanapatataj kunitan astawan necesitashan?”.

¹⁴ Tukuy yuyaychajkunaqa Santiago 1:19 nisqanman jina ruwananku tiyan. Chaypi nin: “Sapa ujpis allinta uyariyta yachanan tiyan, manataj mana yuyaychakuspalla parlananchu tiyan, nitaj usqhayllata phiñakunanchu tiyan”, nispa. Uj ancianoqa mana yuyananchu tiyan, pitapis yuyaycharinanpaj paymanta tukuy imatañapuni yachasqanta. Imajtinchus Proverbios 18:13 nin: “Pipis manaraj allinta uyarishaspa usqhayllata kutichikojqa, wampu jina parlan, chaytaj jatun pʼenqay”, nispa. Pitapis yuyaycharinapajqa paytaraj tapurina, chaymantataj sumajta uyarina. Kay yachaqanaj qallariyninpi parlarerqanchej chay ancianoqa, chayta ruwanan kasqanta yachakorqa. Payqa reparakorqa imatachus wakichikusqanmanta niraj parlaykushaspa, hermanataraj kay jinata tapurinan kasqanta: “¿Imaynataj kashanki? ¿Imaynatá yanapariykiman?”, nispa. Ancianos imaynachus hermanos kashasqankuta yachanankupaj tukuy atisqankuta kallpachakonqanku chayqa, paykunata yanapariyta, kallpachariyta ima atillanqanku.

15. ¿Imaynatá ancianos Proverbios 27:23 nisqanta juntʼankuman?

¹⁵ Sumajta hermanosta rejsina. Kay yachaqanaj qallariyninpi yachakorqanchej jina, pitapis sumajta yuyaycharinapajqa mana textosllatachu leepunanchej tiyan, nitaj imastachus ruwanallankutachu ninanchej tiyan. Hermanosmanqa sutʼita rikuchinanchej tiyan, paykunamanta llakikusqanchejta, entiendesqanchejta, yanapariytataj munasqanchejta (Proverbios 27:23 leey). Chayrayku ancianosqa kallpachakunanku tiyan, hermanoswan hermanaswan sumaj amigos kanankupaj.

16. ¿Imatá ancianos ruwananku tiyan yuyaychasqankuta hermanos japʼikunankupaj?

¹⁶ Wakin hermanosqa yuyankuman, ancianos kʼaminallankupaj paykunawan parlasqankuta. Ancianostaj mana ajinata hermanosta yuyachiyta munankuchu. Chayrayku ancianosqa hermanoswan parlarinanku tiyan, llakiypi rikukojtinkutaj yanaparinanku tiyan. Uj experienciayoj anciano nin: “Ancianos chayta  ruwajtinkoqa, hermanoswan sumaj amigos kanqanku. Ajinamanta hermanosta yuyaycharinanku kajtin yuyaychariyta atillanqanku”, nispa. Chantapis yuyaychachikoj hermanoqa, imatachus anciano nisqanta japʼikuyta atillanqa.

17. ¿Ima kutispitaj ancianos astawan pacienciakunanku tiyan, kʼachastaj kananku tiyan?

¹⁷ Pacienciakuna, kʼachataj kana. Wakin kutisqa ichá uj hermano chayrí uj hermana, Bibliawan yuyaychasqanchejta mana japʼikonqachu, chayrí mana usqhayta kasukonqachu. Ajina kajtin ancianosqa mana phiñakunankuchu tiyan, manaqa astawan pacienciakunanku tiyan, kʼachastaj kananku tiyan. Paykunaqa Jesús jina kananku tiyan. Jesusmantaqa uj profeciapi nerqa: “Mana lajrasqa caña huecallatapis pʼakenqachu, nitaj ñakʼayllataña laurashaj mechallatapis wañuchenqachu”, nispa (Mat. 12:20). Chayrayku ancianosqa Jehovamanta mañakunkuman, yuyaycharishanku chay hermanota chayrí chay hermanata yanaparinanta, chay yuyaychayta necesitasqantapuni reparananpaj, kasukunanpajtaj. Ichapis yuyaychayta japʼej hermanoqa, piensarinanraj kanqa imatachus anciano yuyaycharisqanpi. Ancianos pacienciakonqanku, kʼachastaj kanqanku chayqa, yuyaychayta japʼej hermanoqa imatachus yuyaychasqankupi astawan piensarenqa, manataj imaynatachus yuyaychasqankupichu. Ancianospa yuyaycharisqankoqa Bibliaj nisqanman jinapuni kanan tiyan.

18. 1) ¿Imajtintaj kay yachaqanapi yuyaychakusqanman jina mana ruwayta atillasunmanchu? 2) Recuadropi kaj fotopi rikunchej jina, ¿imamantataj uj tatamama parlarishanku?

¹⁸ Pantasqanchejmanta yachakuna. Tukuypis pantanchejpuni. Chayrayku imatachus kay yachaqanapi yuyaychakusqantaqa, ichá mana ruwayta atillasunchu (Sant. 3:2). Wakin kutisqa pantasunchejpuni. Jinapis pantasqanchejmanta yachakunanchej tiyan. Hermanosninchej munakusqanchejta reparanqanku chayqa, ruwaspa chayrí parlaspa sonqonkuta nanachejtinchej, perdonayta atillawasun (“ Tataspaj yuyaychay” nisqa recuadrota leeriy).

19. ¿Imaynatataj hermanosninchejta kusirichisunman?

¹⁹ Kay yachaqanapi yachakunchej jina, wajkunata yanaparinapaj jina yuyaychareyqa mana atikullanchu. Yuyaycharejkunapis, yuyaychayta japʼejkunapis pantaj runas kanchej. Chayrayku kay yachaqanapi yuyaychaykunata amapuni qonqanachu. Pitapis yuyaycharina kajtenqa, yanapariyta munaspapuni yuyaycharina. Chantapis sumajta qhawarikuna, uj hermano yuyaycharinatapunichus manachus necesitashasqanta, noqanchejpunichus chayrí wajchus yuyaycharinantapis. Yuyaycharishanchej chay hermanota sumajta tapurina, sumajtataj uyarina. Ajinamanta yachasun imaynachus kashasqanta. Chantapis tukuy atisqanchejta kallpachakuna, imaynachus kashasqankuta entiendenapaj. Hermanosninchejwan kʼachas kana, sumaj amigosninkumantaj tukuna. Hermanosninchejtaqa yanaparinapaj jinapuni yuyaycharina. Ajinamanta ‘sonqonkuta kusichisun’ (Pro. 27:9).