ÑAUPA tiempopi novios casarakunankupaj parlasqaña kajtinkoqa, novioqa noviaj familianman paganan karqa. Payqa noviamanta pagayta atej valorniyoj imasta, animalesta chayrí qolqeta. Wakin kutistaj trabajonwan pagayta atej. Jacobpis chayta ruwarqa Raquelwan casarakunanpaj. Payqa suegronman nerqa, Raquelrayku qanchis watasta paypaj trabajapunanta (Gén. 29:17, 18, 20). ¿Imaraykutaj chay tiempopi noviamanta pagaj kanku?

Bibliamanta wakin imasta estudiaj Carol Meyers nin: “Noviaqa casarakuytawan niña wasinpi ruwanasninta ruwayta atejchu. Chayraykusina novioqa noviaj familianman pagaj. Imaraykuchus chajrapi trabajaj familiasqa, paypa yanapanta necesitajpuni kanku”, nispa. Chantapis noviamanta pagakusqanqa, iskaynin familias astawan ujchasqa kausakunankupaj yanapayta atinman karqa. Ajinamanta llakiypi kajtinku, iskaynin familias purajmanta yanapanakuyta aterqanku. Chantapis noviamanta pagakusqanqa, sutʼita rikuchej noviaqa casarananpaj parlasqaña kasqanta. Rikuchillajtaj noviataqa manaña tatanchu cuidananta, manaqa qosallanña.

Noviamanta pagayqa mana imatapis rantikuy jinachu karqa. Instituciones del Antiguo Testamento nisqa libro nin: “Noviaj familianman qolqeta chayrí waj imata pagayqa, casarakuyta munaj israelitapaj, noviata rantiyman rijchʼakunman karqa. Jinapis chayqa mana warmita rantikuy jinachu karqa. Manaqa noviaj cuentanmanta jaywapuy jina karqa”, nispa.

Kay tiempopipis wakin suyuspeqa casarakojkuna noviamanta pagankuraj. Cristiano tatas mana munasqankutapunichu warmi wawankumanta pagachikonqanku chayqa, runasqa reparanqanku ‘mana nisqankutapuni valechiyta munaj runaschu kasqankuta’ (Fili. 4:5; 1 Cor. 10:32, 33). Ajinamanta rikuchenqanku mana ‘qolqeta munakojkunachu kasqankuta’ (2 Tim. 3:2). Mana ashkhata mañajtinkoqa, novioqa pagayta atillanqa, manataj ashkha watastachu casarakunanpaj suyakonqa qolqeta alcanzachinankama. Chantapis novio precursor chayqa, mana precursor kayta saqenqachu qolqeta alcanzachinanpaj trabajananrayku.

Wakin lugarespeqa noviamanta paganapaj leyes tiyan. Chay lugarespi cristiano tatasqa leyesta kasukunku. Paykunaqa chayta ruwanku Diosninchej autoridadesta kasukunanchejta munasqanrayku. Chantapis Jehovaqa munallantaj, kamachiykunasninman mana churanakoj leyesta kasukunanchejta (Rom. 13:1; Hech. 5:29).