MOISESPA Leyninpi nisqanman jina, Jehovaqa israelitas payman jurkʼutasta, paloma irpasta ofrendata jina jaywanankuta saqellaj. Chay iskay pʼesqostaqa ofrendasmanta parlaj leyespi iskayninkutapuni oqharikun. Israelitastaj mayqellantapis jaywayta atej kanku (Lev. 1:14; 12:8; 14:30). Chaytaj may allin karqa. Imaraykuchus jurkʼutastaqa wakin kutis mana tarikuyta atikullajchu. ¿Imajtin?

Jurkʼutasqa Israelpi qʼoñi tiempollapi sayanku. Imaraykuchus paykunaqa chiri tiempo qallarejtinkama, octubre killa chaynejta Israelpa sur ladosninpi kaj qʼoñi lugaresman ripunku. Chaymantataj Israelpi qʼoñi tiempo qallarejtin kutinpullankutaj (Cant. 2:11, 12; Jer. 8:7). Chayrayku israelitasqa chiri tiempopi ofrendasninkuta jaywanankupaj, mana jurkʼutasta tariyta atillajchu kanku.

Palomastajrí mana waj ladosman ripunkuchu. Chayrayku Israelpeqa watantinta kajpuni. Chantapis palomastaqa runas uywakuyta yachaj kanku (Juan 2:14, 16, kikinchay). Uj libro nin: “Palestinaj llajtasninpi, ranchitosninpipis runasqa palomasta uywakojpuni kanku. Sapa wasipi palomaspaj wasisitusta ruwajpuni kanku. Chaytaj wasi perqaspi juskʼus karqa”, nispa (Isaías 60:8, kikinchay).

¿Imatá chay Jehovamanta yachachiwanchej? May munakuyniyoj kasqanta, atisqanchejman jinallataj imatapis mañawasqanchejta. Payqa israelitas wakin killas mana jurkʼutasta tarispa, paloma irpasta jaywanankuta saqerqa.