¿REPARANKICHU kay mundomanta ashkha runas paykunalla allinpaj qhawasqa kayta munasqankuta, wakin imastapis paykunalla japʼiyta munasqankuta? Sumajpajña qhawasqa kaspapis, aswan sumajpajraj qhawasqa kayta maskʼanku. Bibliaqa nerqaña, kay qhepa pʼunchaykunapi runas paykunallapi yuyanankuta, malagradecidostaj kanankuta, chayrayku chayqa mana tʼukunapajchu (2 Tim. 3:2).

Runasqa mana kunallanchu ajina kanku. Adanwan Evawanqa yuyarqanku derechoyoj kasqankuta paykunallamanta ajllanankupaj imachus allin, imatajchus mana allin kasqanta. Chayraykutaj runasqa manchayta sufrishanchej. Ashkha watasninmantaj Judamanta rey Uziasqa yuyarqa templopi inciensota qʼoshñichiyta atisqanta. Chay yuyasqantaj nipuni allinchu karqa, chayta ruwananpaj mana derechoyojchu kasqanrayku (2 Cró. 26:18, 19). Fariseoswan saduceoswantaj yuyarqanku, Abrahanpa mirayninmanta kasqankuraykulla Dios paykunata aswan allinpaj qhawanan kasqanta (Mat. 3:9).

Kay tiempopipis runasqa paykunallapaj imatapis munanku, paykunallapitaj yuyanku. Chay chaupipi kausakusqanchejrayku, noqanchejpis paykuna jinallataj ruwayta qallarisunman (Gál. 5:26). Yuyasunman ima ruwaytapis noqanchejpuni japʼinanchej kasqanta, wajkunapis aswan sumajpajpuni qhawanawanchej kasqanta. ¿Imatá ruwasunman chay jina yuyay mana chimpanawanchejpaj? Ñaupajtaqa entiendenanchej tiyan imaynatachus Jehová chayta qhawasqanta. Bibliaj yuyaychaykunasninmanta iskayta qhawarina.

 Jehovalla niyta atin imata japʼinapajchus derechoyoj kasqanchejta. Wakin imasmanta parlarina.

• Jehovaqa munan familia ukhupi warmis qosankuta respetanankuta, qosastaj warminkuta munakunankuta (Efe. 5:33). Casadosqa derechoyoj kanku qosanku chayri warminku paykunallata munarikunankupaj (1 Cor. 7:3). Tatasqa derechoyoj kanku wawasninkuwan kasuchikunankupaj. Wawastaj derechoyoj kanku tatamamanku paykunata cuidananpaj, munakuywantaj uywananpaj (2 Cor. 12:14; Efe. 6:2).

• Congregacionmanta ancianosqa, sinchʼita trabajasqankurayku derechoyoj kanku respetananchejpaj (1 Tes. 5:12). Jinapis ancianosqa mana derechoyojchu kanku hermanosta ñawillankupi purichinankupaj (1 Ped. 5:2, 3).

• Diosqa gobiernosman atiyta qon impuestosta cobranankupaj, munantaj paykunata respetananchejta (Rom. 13:1, 6, 7).

Jehovaqa may munakuyniyoj kasqanrayku ashkha imasta qowanchej, mana chaykunata japʼinanchejpaj jina kajtinchejpis. Juchasapa kasqanchejrayku wañunanchej tiyan (Rom. 6:23). Chaywanpis Jehová jatun munakuyniyoj kasqanrayku, ashkha allin imasta regalota jina qowanchej (Sal. 103:10, 11). Payqa jatun khuyakuyninraykulla ima bendiciontapis, ima ruwaytapis qowanchej (Rom. 12:6-8; Efe. 2:8).

Ama kay mundomanta runaspaj yuyasqankuwan chimpachikunachu. Mana reparakuspalla, yuyasunman wajkunamanta nisqa aswan ashkha imasta japʼinanchej kasqanta. Jesusqa uj kikinchaymanta parlaspa nerqa chay yuyay facilta chimpaykuyta atiwasqanchejta. Chay kikinchaypi parlarqa uva huertayoj runamanta. Payqa peonesta minkʼakusqa, nisqataj uj denario qolqeta diantinmanta pagananta. Chantá waj peonestawan minkʼakusqa. Chʼisiyaykuytataj tukuyninkuman uj denario qolqetakama pagapusqa, uj horallata trabajajkunamanpis. Tutamantapachaña trabajajkunaqa suyasharqanku paykunaman astawan pagananta, diantinta ruphaypi llankʼasqankurayku (Mat. 20:1-16). Jesusqa chay kikinchaywan discipulosninta nisharqa imatachá Dios paykunaman qon, chaywan kusisqas kausakunankuta.

Agradecekuna, amataj yanapachikuyllatachu suyana (1 Tes. 5:18). Apóstol Pablo jina kana, payqa Corinto congregacionmanta hermanosmanta  mana yanapata mañakorqachu, chayta ruwananpaj derechoyoj kajtinpis (1 Cor. 9:11-14). Yanapachikuyllata suyanamantaqa agradecekuna tukuy ima japʼisqanchejmanta.

Kʼumuykukoj sonqos kana. May kasqanta yuyakoj runaqa, kapusqanmantapis aswan ashkha imastaraj japʼinan kasqanta yuyan. Chay jina yuyayqa veneno jina, kʼumuykukoj sonqo kaytaj jampi chaypaj.

Profeta Danielmantaqa kʼumuykukoj sonqo kayta yachakusunman. Payqa sumaj familiamanta karqa, allin rijchʼayniyoj, sumaj yuyayniyoj, habilosotaj. Chayraykutaj yuyanman karqa ima ruwaykunatachus qosqankuta japʼinanpuni kasqanta, allinpaj qhawasqapunitaj kanan kasqanta (Dan. 1:3, 4, 19, 20). Jinapis payqa kʼumuykukoj sonqo karqa, chayraykutaj Jehovapaj may munasqa karqa (Dan. 2:30; 10:11, 12).

Amapuni kay mundomanta runas jina runaykachanachu, nitaj noqallanchejpichu yuyana. Astawanpis ima bendicionestachus Jehová qowanchej chaywan sonqo juntʼasqa kana. Chay imastaqa jatun khuyakuyninraykulla qowanchej.