1, 2. 1) ¿Ima kutispitaj mana perdonayta atillasunmanchu? 2) ¿Imaynatá Denise rikucherqa perdonasqanta?

 ¿NICHU perdonayta atillanchej? Ashkhasqa mana perdonayta atillanchejchu, astawanraj ruwasqankuwan chayri nisqankuwan sonqonchejta maytapuni nanachiwajtinchej. Chaywanpis perdonayta atisunman, phiñakuytapis qhepaman saqeyta atisunman. Denise a sutiyoj hermanamanta parlarina, payqa tʼukunapaj jinapuni uj runata perdonarqa. 2017 watapi paywan familianwanqa Jehovaj testigosninpa centralninkuta visitaj rerqanku. Kutipushajtinkutaj uj auto paykunaman chocarqa, chofer chay autota mana controlayta atisqanrayku. Deniseqa desmayarparqa, rijchʼarispataj yacharqa wawasnin manchay accidentasqa kashasqankuta, qosan Briantaj wañupusqanta. Chaypi imaynachus kashasqanmanta pay nerqa: “Manchay llakisqapuni kasharqani, nitaj imatapis ruwayta aterqanichu”, nispa. Aswan qhepaman Deniseqa yacharqa, paykunaman chocarqa chay automanta choferqa mana juchayojchu kasqanta, nitaj machasqachu, nitaj drogasqachu kasqanta. Chayrayku Deniseqa Jehovamanta mañakorqa sonqon tiyaykunanpaj yanapananta, amataj chay runawan phiñakunanpaj.

² Juzgadopeqa nerqanku chay choferqa mana munaspalla runa wañuchi rikhurisqanta. Chantapis nerqanku juchayoj rikhurejtenqa carcelman rinanta. Chaywanpis juezqa Deniseta nerqa pay declaraj rinan kasqanta. Chay declarasqanpi yachakunman karqa chay runa juchayojchus manachus kasqanta. Pay nin: “Imachus pasasqanmanta watejmanta yuyarikuspa maytapuni llakikorqani, chayqa karqa uj heridatapis watejmanta kichaykuwankuman jina, chaymantaj may chhika kachitapis jichʼaykuwankuman jina”, nispa. Chaymanta uj mashkha semanitasnillanman Deniseqa juzgadoman rerqa. Chaypitaj declararqa paykunaman  chocarqa chay choferpa ñaupaqenpi. ¿Imatá pay declararqa? Payqa juezmanta mañakorqa chay runata khuyakunanta. b Parlayta tukojtintaj juezqa waqayta qallarerqa, nerqataj: “25 watastaña juez kashani, nitaj ni pitapis ajinata nejta uyarerqanichu. Llakiypi rikhurejpa familianqa ni jaykʼaj mañakunchu juchayoj runata khuyakunata, kunanpuni ajinata nejta uyarishani. Qanqa manchay munakuyniyoj kanki, perdonaytataj yachanki”, nispa.

 3. ¿Imataj Deniseta yanaparqa perdonananpaj?

³ ¿Imataj Deniseta yanaparqa perdonananpaj? Jehovaj perdonninpi tʼukurisqan (Miq. 7:18). Jehovaj perdonninmanta tukuy sonqo agradecekusun chayqa, wajkunata perdonayta munasun.

 4. ¿Imata ruwananchejtataj Jehová munan? (Efesios 4:32).

⁴ Jehovaqa mana michʼakuspa perdonawanchej, munantaj kikillantataj ruwananchejta (Efesios 4:32 leey). Jehová munan pikunachus sonqonchejta nanachiwanchej chaykunata tukuy sonqo perdonananchejta (Sal. 86:5; Luc. 17:4). Kay yachaqanapeqa kinsa imasmanta parlarisun, chaykunataj yanapawasun wajkunata perdonanapaj.

AMA YUYANACHU SONQONCHEJ MANA NANASQANTA

 5. ¿Imaynataj sientekusunman pillapis sonqonchejta nanachiwajtinchej? (Proverbios 12:18).

⁵ Ichá pipis imata ruwaspa, chayri imata nispa sonqonchejta mayta nanachiwasunman. Astawanraj sonqonchej nananman uj sumaj amigonchej, chayri uj familiarninchej chayta ruwawajtinchej (Sal. 55:12-14). Wakin kutispi sonqonchejqa maytapuni nanawasunman, uj espadapis tʼojsiwasunman jina (Proverbios 12:18 leey). Ichapis chay nanayninchejta ñitʼiykukullasunman, chayri ichá yuyasunman sonqonchej mana nanawasqanchejta. Chaytaj kanman uj cuchillowan clavaykuwajtinchej mana ni imata ruwaspa qhawakuy jina. Mana ni imata ruwajtinchejqa, sonqonchej nanasqallapuni kanqa, mana thañiyta atenqachu.

 6. Pillapis sonqonchejta nanachiwajtinchej, ¿imatá ruwayta yachanchej?

⁶ Pillapis sonqonchejta nanachiwajtinchejqa, ichapis qallariypi phiñakusunman. Biblia nin chay pasanawanchejtapuni, jinapis yuyaychawanchej mana phiñakuyninchejwan atipachikunanchejta (Sal. 4:4; Efe. 4:26). ¿Imarayku? Imaraykuchus imachus sonqonchejpi kashan chayman jina imatapis ruwayta yachanchej, phiñakojtinchejtaj mana allin imasta ruwanchej (Sant. 1:20). Yuyarikuy, qallariypeqa phiñakunchejpuni, jinapis phiñasqallapunichus manachus kaytaqa, sapa uj ajllananchej tiyan.

 7. Pillapis sonqonchejta nanachiwajtinchej, ¿imaynataj sientekusunman?

⁷ Pillapis sonqonchejta nanachiwajtinchejqa, ichapis mana phiñakullasunmanchu. Ann sutiyoj hermana nin: “Juchʼuyllaraj kashajtiy tatayqa mamayta saqerparispa, niñeraywan casarakorqa. Yuyarqanitaj noqata saqerpariwasqanta. Tatay waj wawasniyojña kajtintaj, niña wawanta jinañachu qhawawasqanta yuyarqani. Ni pi munakuwasqanta yuyaspa wiñakorqani”, nispa. Georgette sutiyoj hermanaqa qosan payta engañasqanta yachaspa, imaynachus sientekusqanmanta nin: “Sonqo pʼakisqa qhepakorqani, paywanqa juchʼuymantapacha amigos karqayku, precursores jinataj khuska llankʼarqayku”, nispa. Naomi sutiyoj hermanataj nin: “Ni jaykʼaj yuyarqanichu qosay sonqoyta nanachinawanta. Payqa niwarqa  pornografiata pakayllamanta qhawashasqanta. Chayta yachaspa wasanchasqa, engañasqataj sientekorqani”, nispa.

 8. 1) ¿Imaraykutaj perdonananchej tiyan? 2) ¿Imaspitaj perdonay yanapawanchej? (“ Pipis qhasillamanta sinchʼi llakiypi rikhurichiwajtinchej” nisqa recuadrota qhawariy).

⁸ Mana noqanchejchu cuentayoj kanchej imatachus wajkuna ruwasqankumanta chayri nisqankumanta. Jinapis noqanchej cuentayoj kanchej imatachus chay kutispi ruwananchejmanta. Pillapis sonqonchejta nanachiwajtinchej, ¿imata ruwaytaj aswan allin? Perdonay. ¿Imarayku? Jehovata munakusqanchejrayku. Payqa munan wajkunata perdonananchejta. Chantapis phiñasqallapuni kasun chayqa, nitaj perdonasunchu chayqa, ichá imatapis sonso jina ruwasun, chayri ichá chayqa onqoykuchiwasun (Pro. 14:17, 29, 30). Christine sutiyoj hermana nin: “Sonqoyta nanachillawasqankupi yuyaspaqa, mana anchata asinichu, mana sumajta alimentakunichu, manataj sumajtachu puñukuni. Chantapis mana controlakuyta atillanichu. Chaytaj mana yanapawanchu qosaywan, wajkunawanpis allinta apanakunaypaj”, nispa.

 9. ¿Imaraykutaj mana phiñasqallapunichu kananchej tiyan?

⁹ Sonqonchejta nanachiwanchej chay runa mana perdonta mañakuwajtinchejrí, ¿imatá ruwasunman? Imatapis ruwananchej tiyan sonqonchej mana siga nananawanchejpaj. 7 parrafopi Georgettemanta parlarerqanchej, pay nin: “Qosaywan divorciakusqaymantaqa, unaytaraj phiñasqallapuni karqani. Phiñakuyniyta saqejtiytaj, recién sonqoy tiyaykorqa”, nispa. Mana phiñasqallapunichu kajtinchejqa, sonqonchej manaña phiñakuywan juntʼachu. Chantapis chayqa allinninchejpaj, siga ñaupajman rinchej, watejmantataj kusisqa kausakunchej (Pro. 11:17). Ichapis reparakunchejña phiñasqa kashasqanchejta. Chaywanpis manaraj perdonanapaj wakichisqachu kashanchej chay, ¿imatá ruwasunman?

AMA PHIÑASQALLAPUNI KANACHU

10. ¿Imaraykutaj sonqonchej sanoyananpaj tiempota necesitanchej? (Dibujostawan qhawariy).

¹⁰ ¿Imatá ruwasunman mana phiñasqallapunichu kanapaj? Ñaupajtaqa tiempo pasananta saqena. Uj runa sinchʼita accidentakusqanpi piensarina. Doctor jampisqantawan, tiempo pasanan tiyan sanoyapunanpaj. Noqanchejpis sonqonchej sanoyananpaj tiempo pasananta necesitanchej, ajinamanta sonqomantapacha perdonanapaj wakichisqas kasunchej (Ecl. 3:3; 1 Ped. 1:22).

11. ¿Imaynatá Jehovamanta mañakuy yanapawasunman perdonanapaj?

 ¹¹ Chantaqa Jehovamanta mañakuna perdonanapaj yanapanawanchejta. c Annmanta 7 parrafopi parlarerqanchejña. Payqa orakusqan yanapasqanmanta nin: “Jehovamanta mañakorqani familiaypi tukuyniykuta perdonanawaykuta imastachus mana allintachu ruwasqaykumanta. Chaymantataj tatayman, señoranmanwan uj cartata apacherqani. Chaypi paykunata nerqani perdonasqaytaña”, nispa. Ann nin chayta ruwayqa mana facilchu kasqanta. Pay nillanpuni: “Jehová jina perdonanaypaj kallpachakusqayrayku, munayman tatay, señoranwan Jehovamanta yachakunankuta”, nispa.

12. ¿Imaraykutaj Jehovapi atienekunanchej tiyan, nitaj sonqollanchejpichu? (Proverbios 3:5, 6).

¹² Chantapis Jehovapi atienekuna, mana sonqollanchejpichu (Proverbios 3:5, 6 leey). Jehovaqa yachan imachus noqanchejpaj allin kasqanta (Isa. 55:8, 9). Payqa ni jaykʼaj mañawasunchu imachus noqanchejpaj mana allinchu kasqanta. Chayrayku sichus Jehová perdonananchejta niwanchej chayqa, mana iskayrayananchejchu tiyan chayqa allinninchejpaj kasqanmanta (Sal. 40:4; Isa. 48:17, 18). Sonqollanchejpi atienekusunchej chaytaj, ichapis ni jaykʼaj perdonayta atisunchu (Pro. 14:12; Jer. 17:9). Naomimanta 7 parrafopi parlarerqanchejña, pay nin: “Qallariypeqa yuyarqani qosay pornografiata qhawasqanmanta ni imarayku perdonanaychu kasqanta. Yuyarqani watejmanta sonqoyta nanachinawanta, chayri may jinataña sufrichiwasqanta qonqapunanta. Noqa yuyarqani Jehová entiendellawasqanta. Jinapis tiempowan repararqani Jehová imaynachus kashasqayta entiendesqanqa, mana niyta munanchu chayta allillanpaj qhawasqanta. Payqa yachan imaynachus kashasqayta, sonqoy nanasqa kasqantaj mana chay ratochu sanoyapunanta. Jinapis pay munan perdonanayta”, nispa. d

ALLIN KAJTA RUWANA

13. Romanos 12:18-21 nisqanman jina, ¿imatá ruwananchej tiyan?

¹³ Pillapis sonqonchejta mayta nanachiwarqanchej chayqa, ¿imaynatá rikuchisunman  perdonasqanchejta? Ichapis yuyasunman manaña chaymanta parlananchejchu kasqanta. Jinapis chayqa mana perdonaychu. Astawanpis uj hermano sonqonchejta nanachiwarqanchej chayqa, paywan allinyakunanchej tiyan (Mat. 5:23, 24). Phiñakunamanta nisqaqa khuyakuna, phiñasqallapuni kanamanta nisqataj perdonana (Romanos 12:18-21 leey; 1 Ped. 3:9). ¿Imataj yanapawasunman chayta ruwanapaj?

14. ¿Imata ruwanapajtaj kallpachakunanchej tiyan, chanta imarayku?

¹⁴ Sonqonchejta nanachiwarqanchej chay runata Jehová jina qhawanapaj kallpachakuna. Jehovaqa allin ruwasqasninkuta qhawan (2 Cró. 16:9; Sal. 130:3). Kayta ama qonqanachu: Uj runapi allin kajta maskʼasun chayqa, allin kajtapuni tarisun, mana allin kajta maskʼasun chaytaj, mana allin kajllata tarisun. Chayqa noqanchejmanta kashan. Wajkuna allin imasta ruwasqankuta qhawaspaqa, perdonayta atillasun. Hermano Jarrod nin: “Aswan facilta perdonayta atini uj hermano mana allinta ruwasqanta, allin imasta ruwasqasninwan kikinchaspa”, nispa.

15. ¿Imaraykutaj “perdonayki” nispa ninanchej may sumaj?

¹⁵ Chantapis kayta ruwasunman: Pichus sonqonchejta  nanachiwanchej chayta “perdonayki” nisunman. ¿Imaraykú chayta ruway may sumaj? Naomi nin: “Qosay tapuwarqa: ‘¿Perdonawankiñachu?’, nispa. ‘Perdonaykiña’ nispa niyta munashajtiytaj, mana niyta atillarqanichu. Chaypi repararqani niraj perdonasqatachu perdonasqayta, tiempowanraj ‘perdonayki’ nispa niyta aterqani. Ni jaykʼaj yuyarqanichu chayta nisqay qosayta, noqatapis mayta yanapanawaykuta. Qosayqa kusiymanta waqarikorqa, sonqoytaj phaj niwarqa. Chay kutimantapacha paypi watejmanta atienekorqani, kunantaj watejmanta sumaj amigos kayku”, nispa.

16. ¿Imatá perdonmanta yachakunchej?

¹⁶ Jehová munan perdonananchejta (Col. 3:13). Jinapis wakin kutisqa ichapis mana perdonayta atillasunmanchu. Pero kay imasta ruwasunchej chayqa perdonayta atillasunchej: ama yuyanachu sonqonchej mana nanasqanta, mana phiñasqallapunichu kana, allin kajtataj ruwana (“ Kay kinsa imas yanapawasun perdonanapaj” nisqa recuadrota qhawariy).

PERDONAYQA MAYTA YANAPAWANCHEJ

17. ¿Imaynatá perdonay yanapawanchej?

¹⁷ Ashkha imasrayku perdonananchejpuni tiyan. Wakinmanta parlarina. Uj kaj, perdonaspaqa Tatanchej Jehová jina ruwashanchej, paytataj kusichinchej. Payqa may khuyakuyniyojpuni (Luc. 6:36). Iskay kaj, Jehová mana michʼakuspa perdonawasqanchejmanta agradecekusqanchejta rikuchinchej (Mat. 6:12). Kinsa kaj, onqoykunamanta jarkʼakunchej, sumaj amigosniyojtaj kanchej.

18, 19. ¿Imataj kanman wajkunata perdonajtinchej?

¹⁸ Perdonajtinchejqa tʼukunapaj jina allin imas kanman. Denisemanta watej parlarina. Payqa mana yacharqachu paykunaman chocarqa chay choferqa, juzgadomanta llojsiytawan wañuchikuyta yuyashasqanta. Denise payta perdonasqantaj maytapuni tʼukucherqa. Chayrayku chay runaqa Jehovaj testigosninwan Bibliamanta yachakuyta qallarerqa.

¹⁹ Ichapis yuyasunman wajkunata perdonayqa mana atikullasqanta. Jinapis perdonayqa, imamanta nisqapis aswan sumajpuni (Mat. 5:7). Chayrayku kallpachakuna Jehová jina perdonasqata perdonanapaj.