UJ PROBLEMAPI rikukushajtiyki, ichá repararqanki ni pi yanaparisusqanta. ‘Kausay may llakiy kasqanrayku, maytataj sajrayasqanrayku’ sapanchej rikukusunman, llakikusunmantaj (2 Tim. 3:1). Jinapis ajina llakiypi kashaspaqa, wajkunawan yanapachikuyta atisunman. Bibliaqa nin ‘llakiypi kashajtinchej’ sumaj amigos yanapanawanchejta (Pro. 17:17).

Apóstol Pablotaqa amigosnin viajesninpi acompañarqanku, waj jinasmantapis yanaparqanku (Col. 4:7-11). Romapi preso kashajtin, mana ruwayta atisqan imasta amigosnin ruwaporqanku. Epafroditoqa necesitasqan imasta Pablopaj apaporqa, chaytaqa Filiposmanta hermanos apacherqanku (Fili. 4:18). Tiquicotaj Pablo preso kashaspa congregacionespaj qhelqasqan cartasta aparqa (Col. 4:7). a Pabloqa alquilakusqan wasipi wisqʼasqa kaspapis, chaymantataj carcelpi kaspapis, amigosnin yanapasqankurayku congregacionesta sigue kallpachayta aterqa. Noqanchejrí, ¿imaynatá sumaj amigos kasunman?

Kay tiempopi ashkha hermanosqa ruwasqankuwan rikuchinku sumaj amigos kasqankuta. Elisabetmanta parlarina. Payqa Españapi precursora regular. Mamanta cancerniyoj kasqanta, nitaj sanoyapunanta nejtinku, uj hermana kʼachitu mensajesta textosniyojta apachillajpuni, ajinamantataj sumaj amigan kasqanta rikucherqa. Elísabet nin: “Mensajesta apachimuwasqanpi repararqani mana sapaychu kashasqayta, kallpatataj qowaj ñaupajllamanpuni rinaypaj”, nispa (Pro. 18:24).

Hermanoswan aswan sumaj amigos kasunman predicacionpi chayri tantakuykunapi yanaparispa. ¿Atisunmanchu uj machitu hermanonchejta tantakuykunaman chayri predicacionman pusariyta? Chayta ruwaspa purajmanta sumajta kallpachanakusunman (Rom. 1:12). Chaywanpis wakin hermanitosninchejqa mana wasinkumanta llojsiyta atinkuchu. ¿Imaynatá paykunapaj sumaj amigos kasunman?

Wakin hermanosqa onqosqa kasqankurayku chayri waj imasrayku mana tantakuyman riyta atinkuchu. Ajinapi rikukorqa hermanonchej David. Payqa cancerniyoj kasqanrayku sojta killa kurajta quimioterapiata ruwarqa. Chay tratamientota ruwashajtin, paywan señoran Lidiawanqa videollamadanejta tantakuykunaman conectakoj kanku.

¿Imaynatá congregacionmanta hermanos paykunata yanaparqanku? Tantakuykuna tukukusqantawan wakin hermanosqa salonmantapacha paykunawan  videollamadanejta parlarej kanku. Davidwan Lidiawan tantakuykunapi comentajtinkutaj, hermanosqa kʼachitu mensajesta apachispa paykunata kallpacharej kanku. Chayta ruwasqankurayku Davidwan Lidiawanqa repararqanku amigosninkupaj may munasqa kasqankuta.

Wasinkumanta mana llojsiyta atejkunawan, ¿predicayta atisunmanchu? Paykunapaj tumpitallatapis tiempocharikuspa, reparachisunman mana paykunamanta qonqakusqanchejta (Pro. 3:27). ¿Atisunmanchu paykunawan predicariyta cartanejta chayri telefononejta? Chantapis ichá ancianosqa ninkuman videollamadanejta conectakuyta atisqankuta willayman llojsinapaj tantakuyman. Davidwan Lidiawanqa ajinata conectakuyta atisqankumanta mayta agradecekorqanku. David nin: “Hermanos willayman llojsishajtinku conectakuspaqa, uyarej kayku Bibliamanta sutʼinchakusqanta, oraciontapis. Chay imasta uyarispallaraj mayta kallpachakorqayku”, nispa. Uj estudionchej kajtintaj, ¿nichu wakin kuti pusasunman mana wasinmanta llojsiyta atej hermanoj wasinman chaypi estudiachinanchejpaj? Chaywanpis hermanotaraj tapurina estudionchejta wasinman pusananchej allinchus manachus paypaj kasqanta.

Wasinkumanta mana llojsiyta atej hermanospaj tiempocharikuspaqa, aswan sumajta paykunata rejsinchej, aswan sumaj amigosmantaj tukunchej. Diospa Palabranta runaspa sonqonkuman chayanankupaj sumajta apaykachasqankuta reparaspa, paykunata aswan jatunpaj qhawanchej. Hermanosninchejta ajinata yanaparispaqa, aswan ashkha amigosniyoj kasunman (2 Cor. 6:13).

Pablotaqa amigon Tito sonqocharqa paywan kaspa (2 Cor. 7:5-7). Chayqa rikuchiwanchej mana parlasqallanchejwanchu amigosninchejta sonqochayta atisqanchejta, manachayqa paykunawan kaspa, paykunata yanaparispa ima (1 Juan 3:18).

Rusiamanta hermanosninchejqa sumajta purajmanta yanapanakunku, paykunamantaqa mayta yachakusunman. Sergueimanta, señoran Tatianamantawan parlarina. Policiaqa wasinkuman yaykorqa revisananpaj, chaymantataj paykunata apakaporqanku tapuykachanankupaj. Ñaupajtaqa Tatianataraj kachariporqanku, paytaj wasinman kutiporqa. Serguéi nin: “Wasiman chayasqantawankama uj mana manchikoj hermana chay rato rikhurimusqa. Chaymantataj waj hermanospiwan jamuspa wasiykuta kʼuchunchaysiwarqayku”, nispa.

Serguéi nillantaj: “Proverbios 17:17 nisqan mayta gustawan, chaypi nin: ‘Sumaj amigoqa tukuy tiempo munakuyniyoj, llakiy kajtintaj uj hermanopis kanman jina yanapakun’. Kunanraj qhatiykachasqa kaspa sutʼita reparani chaypi nisqan ajinapuni kasqanta, sapallaymantaqa nipuni aguantayta atiymanchu. Jehovaqa mana manchachikoj amigosta qowan, paykunaqa ima kajtinpis noqallawanpuni kayta yachanku”. b

Kay llakiy tiempopi kausakusqanchejrayku amigosninchejpa yanapayninta necesitanchejpuni. Manchay ñakʼariy tiempopitaj astawanraj necesitasun. Chayrayku kunanmantapacha tukuy atisqanchejta ruwana sumaj amigos kanapaj (1 Ped. 4:7, 8).