1, 2. ¿Imaraykutaj runas ñaupaj kaj parrafomanta joven jina kanchej?

 MANCHAY qhapaj tatasniyoj jovenpi piensarina. Paymanqa uj pʼunchay willanku tatasnin uj accidentepi wañupusqankuta. Chantapis chay jovenqa enterakun tatasnenqa qolqenkuta qʼalata wayrarpachisqankuta, may chhika manutaj kasqankuta. Chayrayku chay jovenqa mana qolqetachu herenciata jina japʼin, manachayqa manusllata. Paytataj nishanku usqhayllata chay manusta pagananta. May chhikatapuni debesqanraykutaj ni jaykʼaj pagayta atenqachu.

² Tukuy runas chay joven jinallataj kanchej. Ñaupa tatasninchej Adanwan Evawanqa mana pantayniyoj runas karqanku, uj kʼachitu huertapitaj tiyakorqanku (Gén. 1:27; 2:7-9). Paykunaqa kusisqa, wiñaypaj kausakuyta atinkuman karqa. Jinapis chay kʼachitu lugarmanta wijchʼuchikorqanku, niñataj wiñaypaj kausakuyta aterqankuchu. ¿Ima herenciatataj wawasninkuman saqerqanku? Biblia niwanchej: “Uj runanejta [Adannejta] jucha kay mundoman yaykumorqa, juchanejtataj wañuy yaykumorqa. Ajinamanta wañoyqa tukuy runasman chayarqa, tukuyninku juchallikusqankurayku”, nispa (Rom. 5:12). Adanqa juchata herenciata jina saqewarqanchej, chaytaj wañuyman apawanchej. Chay juchaqa may chhika manu jina, nitaj mayqenninchejpis chayta pagayta atisunmanchu (Sal. 49:8).

 3. ¿Imaraykutaj juchasninchej ‘manus jina’ kanku?

³ Jesusqa juchasninchejta ‘manuswan’ kikincharqa (Mat. 6:12, sutʼinchaynin; Luc. 11:4). Juchallikuspaqa Jehovaman manu rikhurinchej, chay manunchejtataj payman pagananchej tiyan. Jehovachus chay juchasninchejta perdonanawanchejpaj  ni imata ruwanmanchu karqa chayqa, juchasninchejmantaqa wañuyllawan pagasunman karqa (Rom. 6:7, 23).

 4. 1) Ni pi yanapawajtinchej, ¿imataj noqanchejwan kanman? (Salmo 49:7-9). 2) Biblia jucha palabrata oqharejtin, ¿imastaj niyta munan? (“ Jucha” nisqa recuadrota qhawariy).

⁴ Noqallanchejmantaqa ni jaykʼaj watejmanta japʼiyta atisunmanchu imatachus Adanwan Evawan pierderqanku chaytaqa (Salmo 49:7-9 leey). Ni pi yanapawajtinchejqa mana suyakuyta atisunmanchu wiñaypaj kausakuyta, ni kausarimuytapis. Animales jinallataj wañupuspa niña ujtawan kausarimusunmanchu (Ecl. 3:19; 2 Ped. 2:12).

 5. ¿Imaynatá Jehová yanapawarqanchej manunchejta pagananchejpaj? (Tapapi dibujota qhawariy).

⁵ Ñaupaj kaj parrafopi parlarerqanchej chay jovenpi watejmanta piensarina. ¿Imaynataj chay jovenpa sonqon kashanman uj qhapaj runa tukuynin manusninta pagapunanta nejtin? Maytachá agradecekunman, mana iskayrayaspatajchá yanapachikunman. Kikillantataj Tatanchej Jehovaqa, mayta munakuwasqanchejrayku uj sumaj regalota qowanchej, chaytaj Adanmanta juchata manuta jina japʼisqanchejta pagan. Jesusqa chay regalomanta parlaspa nerqa: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:16). Chantapis chay regalorayku Jehovawan sumaj amigos kayta atinchej.

 6. ¿Imatá kay yachaqanapi yachakusun, chanta imapajtaj chay yanapawasun?

⁶ ¿Imaynatá chay sumaj regalowan yanapachikusunman perdonta tarinapaj? Chay tapuyman kutichinapajqa Biblia wakin palabrasta oqharisqanta ukhuncharisun, imatachus niyta munasqantapis. Chay imaspi tʼukuriytaj Jehová perdonanawanchejpaj imastachus ruwasqanmanta astawan agradecekunapaj yanapawasun.

¿IMAPAJ? DIOSWAN ALLINYACHISQA KANAPAJ

 7. 1) ¿Imatawantaj Adanwan Evawan pierderqanku? 2) ¿Imatataj Adanmanta, Evamantawan mirajkuna mayta necesitanchej? (Romanos 5:10, 11).

⁷ Adanwan Evawanqa mana wiñaypaj kausakullaytachu pierderqanku, manachayqa Tatanku Jehovawanpis niña amigos kayta aterqankuchu. Niraj juchallikushaspaqa Diospa familianmanta karqanku (Luc. 3:38). Chaywanpis Jehovata mana kasukusqankurayku, chay familianmanta wijchʼusqa karqanku, chaytaj niraj wawasniyoj kashajtinku karqa (Gén. 3:23, 24; 4:1). Chayrayku mirayninkumanta kajkunaqa Jehovawan allinyachisqa kayta necesitanchej (Romanos 5:10, 11 leey). Nisunman Jehovawan watejmanta amigos kayta necesitanchej. Uj libro nisqanman jina, kay versiculopi “allinyachisqa”  kanamanta parlasqanqa griego parlaypi niyta munan “uj enemigowan amigos ruwakuy”. Jehovataj paywan allinyakunanchejpaj pay noqanchejwan allinyakuyta maskʼarqa. Chaytaj tʼukunapaj jinapuni. ¿Imaynatá chayta ruwarqa?

¿IMAYNAMANTA? DIOS AMIGOSNIN KANANCHEJPAJ IMATACHUS RUWASQANNEJTA

 8. ¿Imatataj Jehová ruwarqa?

⁸ Jehovaqa uj jaywanata jaywakunanta nerqa juchasapa runas paywan watejmanta amigos kayta atinanchejpaj. Chaytaj kanman uj imata kikin valorniyoj imawan cambiay jina. Ajinamanta imatachus pierdekusqanta watejmanta japʼiyta atikun. Griego Qhelqasqaspipis parlallantaj imatachus Jehová ruwasqanmanta runas paywan “allinyakunankupaj” (Rom. 3:25).

 9. ¿Imatataj Jehová ruwarqa israelitas juchasninkumanta perdonta tarinankupaj?

⁹ ¿Imatataj Jehová israelitaspa tiemponkupi ruwarqa juchasninkumanta perdonta tarinankupaj, paywantaj sumaj amigos kanankupaj? Payqa nerqa Perdonta Tarina Pʼunchaypi kuraj kaj sacerdote llajtarayku uywa wañuchisqasta jaywananta. Chaytataj watapi uj kutillata ruwaj. Chay jaywanastaj mana israelitaspa juchasninkuta qʼalata llimphuchayta atejchu, animales mana runas jinallatajchu kasqankurayku. Jinapis Jehovaqa juchasninkuta perdonananpaj wakichisqapuni kasharqa israelitas kay imasta ruwajtinku: arrepientekojtinku, Dios mañasqanman jinataj jaywanasta jaywajtinku (Heb. 10:1-4). Chantapis Perdonta Tarina Pʼunchaypi, waj kutispipis ofrendasta jaywasqankoqa paykunata yuyarichej juchasapas kasqankuta, juchasninkuta qʼalata pampachananpajtaj waj jaywanata necesitasqankuta.

10. ¿Imatataj Jehová ruwarqa juchasninchej perdonasqa kananpaj?

¹⁰ ¿Imatataj Jehová ruwarqa runaspa juchasninku perdonasqa kananpaj? Saqerqa Wawan “uj kutillata wiñaypaj jaywasqa” kananta, “ashkha runaspa juchasninkuta apananpaj” (Heb. 9:28). Jesusqa kausayninta qorqa ‘ashkha runasta kacharichinanpaj’ (Mat. 20:28). Imachus kacharichiy kasqanmanta astawan parlarina.

PRECIO: KACHARICHIY

11. 1) Biblia nisqanman jina, ¿imataj niyta munan kacharichiy? 2) ¿Ima kinsa imastataj juntʼanan karqa kacharichiy preciota pagaj runa?

¹¹ Biblia nisqanman jina, Jehovaqa kacharichinawanchejpaj uj precio pagasqa kananta nerqa. a Ajinamanta juchasninchej perdonasqa kayta atinanpaj, amigosnintaj kayta atinanchejpaj. ¿Ima preciotataj pagakunan karqa, runas imatachus Adán pierdesqanta watejmanta japʼinanchejpaj? Yachanchej jina Adanwan Evawanqa mana juchayoj kausayninkuta, wiñaypaj kausakuyta atisqankutawan pierderqanku. Chayrayku kacharichiy kananpajqa chay pierdesqanku preciollatataj pagakunan karqa (1 Tim. 2:6). Chay preciotataj pagayta atinman karqa kay kinsa imasta ruwayta atej runa: 1) mana juchayoj runa, 2) kay jallpʼapi wiñaypaj kausakuyta atej runa, 3) kausayninta noqanchejrayku qoyta munaj runa. Chay imasta juntʼaj runalla, kausayninta qoyta atinman karqa imatachus Adán pierderqa chayta watejmanta japʼinanchejpaj.

12. ¿Imaraykutaj Jesús kacharichiyta atiwarqanchej?

¹² Jesusqa kay kinsa imasrayku kacharichinawanchejpaj preciota pagayta aterqa: 1) Payqa mana juchayoj karqa, “mana ima juchatapis ruwarqachu” (1 Ped. 2:22). 2) Chayrayku  kay jallpʼapi wiñaypaj kausakuyta aterqa. 3) Payqa kausayninta qoyta munarqa, noqanchejraykutaj wañuyta (Heb. 10:9, 10). Jesusqa mana juchayoj runa karqa, imaynachus ñaupaj kaj runa Adanpis niraj juchallikushaspa mana juchayoj karqa ajina (1 Cor. 15:45). Chayrayku wañuyninwanqa Adanpa juchanmanta maychus necesitakusqan preciota pagayta aterqa, Adanpa pierdesqanta watejmanta japʼinanchejpaj (Rom. 5:19). Ajinamanta Jesusqa “qhepa kaj Adán” karqa. Manaña waj mana pantayniyoj runa necesitakunchu imatachus Adán pierdesqanmanta pagananpaj. Jesusqa “pay kikin uj kutillata jaywaykukorqa, wiñaypajtaj” (Heb. 7:27; 10:12).

13. ¿Imaraykutaj Jehovawan sumaj amigos kayta atinchej?

¹³ ¿Imaraykutaj Jehovawan sumaj amigos kayta atinchej? Payqa juchasninchej perdonasqa kayta atinanpaj uj imata ruwarqa. Jesusqa mana pantayniyoj kausayninta qorqa, ajinamanta juchasninchej pampachasqa kananpaj maychus necesitakusqan preciota pagarqa (Efe. 1:7; Heb. 9:14).

¿IMATAJ CHAYRAYKU TIYAN? JUCHASNINCHEJ PERDONASQA, CHEQAN RUNASPAJTAJ QHAWASQA KANCHEJ

14. ¿Imatataj ukhuncharisunchej, chanta imapajtaj chay yanapawasun?

¹⁴ Imatachus Jehová noqanchejrayku ruwasqan, ¿imaynatá yanapawanchej? Chay tapuyman kutichinapajqa, Bibliapi iskay palabrasta oqharisqan ima niytachus munasqanta ukhuncharisunchej. Ajinamanta aswan sumajta entiendesun imatachus ruwananchej kasqanta Jehovaj perdonninta tarinapaj.

15, 16. 1) Biblia nisqanman jina, ¿imatataj ruwakorqa “kacharichisqa” kananchejpaj? 2) Juchamanta, wañuymantawan kacharichisqa kayta atisqanchejta yachaspa, ¿imayná sientekunchej?

¹⁵ Bibliaqa nin kacharichinawanchejpaj uj preciota pagakusqanta. Apóstol Pedro nerqa: “Qankunaqa ñaupa tatasniykichejmanta qhasi manakaj kausayta japʼerqankichej. Yachankichej jinataj, chay kausayniykichejmantaqa mana qolqewanchu, nitaj orowanchu kacharichisqa karqankichej, mayqenkunachus tukukapunku chaykunawan. Astawanqa Cristoj may valorniyoj yawarninwan kacharichisqa karqankichej, mana imanasqa llimphu corderoj yawarninwan jina”, nispa (1 Ped. 1:18, 19).

¹⁶ ‘Juchawan wañuywanqa’ maytapuni sufrichiwanchej, Cristo kausayninta qosqanraykutaj chaykunamanta kacharichisqa kayta atinchej (Rom. 5:21). Jehovaman, Jesusmanwan maytapuni agradecekunchej Jesuspa may valorniyoj yawarninwan chayri kausayninwan kacharichiwasqanchejmanta (1 Cor. 15:22).

17, 18. 1) ¿Ima niytá munan ‘cheqan runaspaj’ qhawasqa kay? 2) ¿Imaynatá yanapawanchej ‘cheqan runaspaj’ qhawasqa kasqanchej?

¹⁷ Cheqan runaspaj qhawasqa kasqanchejqa niyta munan, manaña ima manupis kasqanchejta, tukuy ima manunchejqa pagasqaña kasqanta. Chaytaj mana niyta munanchu Jehová cheqan kamachiykunasninta pʼakisqanta. Jehovaqa mana imata ruwasqanchejraykuchu cheqan runaspaj qhawawanchej. Chantapis payqa mana qhawakullanchu ima juchata ruwasqanchejtapis. Chaywanpis Jehovaqa juchasninchejta perdonananpaj wakichisqa kashan, paywan Jesuswan kacharichinawanchejpaj imatachus ruwasqankupi creejtinchej (Rom. 3:24; Gál. 2:16).

¹⁸ ¿Imaynatá yanapawanchej Jehová cheqan runaspaj qhawawasqanchej? Wakin cristianosqa cielopi Jesuswan khuska kamachimunankupaj ajllasqa kanku, Diospa wawasninmantaj tukunku (Tito 3:7; 1 Juan 3:1). Paykunaj juchasninkoqa perdonasqaña, manapis ni  jaykʼaj juchallikunkumanchu jina. Chayrayku Diospa Gobiernonmanta kayta atinku (Rom. 8:1, 2, 30). Waj cristianostaj kay jallpʼapi wiñaypaj kausakuyta suyakushanku. Paykunaqa Diospa amigosnin kanku, juchasninkupis perdonasqallataj (Sant. 2:21-23). May chhika runasmanta kajkunaqa Armagedonta kausashaj pasanqanku, paykunataj ni jaykʼaj wañuyta suyakushanku (Juan 11:26). ‘Cheqan runasmanta, mana cheqan runasmanta’ wañojkunapis kausarimonqanku (Hech. 24:15; Juan 5:28, 29). Tiempowantaj kay jallpʼapi kausakoj tukuy Jehovaj kamachisnin, “Diospa wawasnin jina kacharichisqa kanqanku, chaytaj may sumajpuni” (Rom. 8:21). Yachakunchej jina, Tatanchej Jehová kacharichinawanchejpaj imatachus ruwasqanqa, paywan allinyakunapaj yanapawanchej. Chaytaj may sumaj bendicionpuni.

19. ¿Imaynatá yanapawanchej imatachus Jehovawan Jesuswan noqanchejrayku ruwasqanku? (“ Jehovaj perdonnin” nisqa recuadrotawan qhawariy).

¹⁹ Qallariypi parlarerqanchej chay jovenqa tukuy imanta pierderqa, may chhika manutaj rikhurerqa. Chay chhika manuntataj ni jaykʼaj pagayta aterqachu. Noqanchejpis ñaupajtaqa ajinapi rikukorqanchej. Chaywanpis Jehová yanapawasqanchejrayku, kacharichinawanchejpaj imatachus ruwasqanrayku, may chhika preciotataj pagasqanrayku, manaña ajinapichu rikukunchej. Jesucristopi creesqanchejrayku juchamantawan wañuymantawan kacharichisqa kayta atinchej. Chantapis juchasninchejqa qʼala pampachasqa kayta atin, manapis ni jaykʼaj juchallikusunmanchu jina. Chantapis aswan sumajqa Tatanchej Jehovawan sumaj amigos kayta atisqanchej.

20. ¿Imatá qhepan yachaqanapi yachakusun?

²⁰ Imatachus Jehovawan Jesuswan noqanchejrayku ruwasqankupi tʼukurispaqa, maytapuni paykunaman agradecekunchej (2 Cor. 5:15). Manachus yanapawasunman karqa chayqa, ni ima suyakuyniyojpis kasunmanchu karqa. Qhepan yachaqanapeqa Bibliamanta wakin kikinchaykunata ukhuncharisun. Chaytaj yanapawasun imaynatapunichus Jehová sapa ujninchejta perdonawasqanchejta entiendenapaj.