Papasuywan mamaywanqa allin catolicospuni karqanku. Diospa sutin Jehová kasqanta Bibliapi yachakuytawantaj, Jehovaj testigosninman tukorqanku, Diostataj sonqo kʼajaywan yupaycharqanku. Papasoyqa manaña Jesusmanta santosta ruwajchu, wasiykupitaj ura kaj plantapi Tantakuna Wasita ruwarqa, carpinteriamanta yachasqanrayku. San Juan del Monte llajtitapi, chay karqa ñaupaj kaj Tantakuna Wasi. Chay llajtitaqa kashan Filipinaspa capitalnin Manila llajtapi.

1952 watapi nacekorqani, tatasniytaj juchʼuymantapacha Jehovamanta yachachiwarqanku, tawa kuraj hermanosniyta jina, kinsa kuraj hermanasniyta jinataj. Wiñasqayman jina, tatayqa niwarqa sapa día Bibliamanta uj capitulota leerinayta, wakin publicacionesninchejtataj estudiachiwaj. Wakin kuti tatasneyqa congregacionesta waturejkunata, betelitastapis wasiykupi alojarej kanku. Chay hermanos experienciasninkuta willariwajtiyku mayta kusikoj kayku, may kallpachasqastaj kaj kayku. Chay yanapawarqayku Jehovata sirviyta kausayniykupi ñaupajman churanaykupaj.

Tatasniymanta yachakorqani Jehovata tukuy sonqo sirvina kasqanta. 1971 watapitaj, mamitay uj onqoywan wañupusqantawan, papasuywan noqawanqa precursores jina sirviyta qallarerqayku. 1973 watapitaj 20 watasniyoj kashajtiy, papasuyñataj wañuporqa. Tatasniyta mayta faltachasqayrayku sapallay sientekorqani. Jinapis Biblia qowasqanchej ‘suyakoyqa kausayniypi barco sayachina gancho jina, mana iskayrayaspa sinchʼita sayanaypaj yanapawarqa’ mana llakiywan atipachikunaypaj, nitaj Jehovamantapis karunchakunaypaj (Heb. 6:19). Papasuy wañupusqanmanta pisi tiemponmantaj, precursor especial kanayta niwarqanku Coron islapi, chayqa Palawan sutiyoj provinciapi kashan.

21 watayoj kashaspa Coron islaman chayarqani. Llajtallapi tiyakusqayrayku maytapuni tʼukorqani chay islapi luz mana ancha kasqanmanta, yaku mana tukuy wasispichu kasqanmanta, autospis  motospis may pisisitulla kasqanmanta. Chaypi uj mashkha hermanos kajtinpis, mana precursor compañeroy kapuwarqachu, wakin kutitaj sapallay predicaj kani. Ñaupaj killastaqa maytapuni faltacharqani familiayta, amigosniytapis. Sapa tuta waqay ñawilla cielopi estrellasta qhawaj kani. Chay asignacionniyta saqepuspa wasiyman kutipuyta munaj kani.

Chay kutispi sapitallay kashaspa, imaynachus kashasqayta Jehovaman willarikoj kani. Yuyarikoj kani Bibliapi, publicacionesninchejpipis kallpachanawanpaj jina imasta leesqayta. Sapa kuti piensarej kani Salmo 19:14 versiculopi. Repararqanitaj Jehovata kusichej imaspi tʼukurejtiy, nisunman ruwasqasninpi, kʼacha kaykunasninpi tʼukurejtiy, payqa “pakakunay Chhanka, Salvawaj Diosniytaj” kananta. Uj Atalayapi “Usted nunca está solo” nisqa yachaqana llojsimorqa, chaytaj maytapuni yanapawarqa. a Chaytaqa kutin kutita leerqani. Sapallay kashajteyqa Jehovallawanpis kashayman jina karqa. Ajinamanta Jehovaman orakuyta, estudiayta, tʼukuriyta ima aterqani.

Coron islaman chayasqaymanta pisi tiemponman anciano kayta qallarerqani. Sapallay anciano kasqayraykutaj Diosmanta Parlayta Yachanapaj tantakuyta, Willayta Yachanapaj Tantakuyta, Bibliamanta Yachaqanapaj tantakuyta, Torremanta Qhawaj revistata estudianapaj tantakuytapis noqalla apaykachaj kani. Chantapis sapa semana discursota qoj kani. Ajina ocupasqa kaspataj manaña sapaychu sientekoj kani.

Coronpi predicayqa may sumajpuni karqa. Tiemponmantaj wakin estudiosniy bautizakorqanku. Jinapis wakin jarkʼaykunas kaj. Maypichus predicanay karqa chayman chayanaypajqa, wakin kutis khuskan diata purej kani, maypichus puñukunayta mana yachaspalla. Congregacionneyqa ashkha islitasta predicanan karqa, chaykunamantaj botepi rej kayku, yaku mayta qhollchoqeyajtinpis. Noqataj ni nadaytapis yacharqanichu. Jinapis Jehovapuni cuidawarqa, yanapawarqataj. Chaymantaraj repararqani Jehová wakichishawasqanta waj jatun pruebaspaj.

1978 watapi Papúa Nueva Guineaman kachawarqanku, chaytaj Australiaj norte ladonpi kashan. Papúa Nueva Guinea suyoqa manchay lomarara, casi España chhikallantaj. Chay suyupi tres millones runas jinalla tiyakojtinkupis, 800 kuraj parlaykunata parlaj kasqanku. Chaywanpis casi tukuy runaspuni Nueva Guineapi parlakusqan pidgin parlayta parlaj kasqanku, nisunman tok pisin parlayta.

Ñaupajtaqa capitalnin Port Moresbyman kachawarqanku, inglés congregacionman. Chay congregacionpitaj mana unaytachu karqani. Tok pisin congregacionman ripuspaqa, chay parlayta yachakuyta qallarerqani. Yachakusqayman jina predicaj kani, chay yanapawarqa chay parlayta usqhayllata yachakunaypaj. Pisi tiemponmantaj tok pisinpi discursosta qosharqaniña. Papúa Nueva Guineaman chayasqaymanta niraj watanman, congregacionesta waturej kanayta niwarqanku. Nipuni chayta yuyarqanichu. Visitanay karqa tok pisin congregacionesta, chaykunaqa ashkha jatun provinciaspi karqa.

Chay congregaciones may karuspi kasqanrayku, ashkha asambleas de circuitota wakicherqani, chayraykutaj viajaspallapuni kaj kani. Qallariypeqa chay suyuta, parlayninkuta, costumbresninkutapis mana anchata rejsisqayrayku sapallay  sientekorqani. Ancha lomarara kasqanrayku ñanninta mana viajayta atikullajchu. Chayrayku uj congregacionmanta waj congregacionman rinaypajqa casi sapa semana avionpi viajaj kani. Wakin kuteqa thanta avionpi noqalla pasajero kaj kani. Chay kutispeqa botepi rishaspa jinallataj mancha manchalla viajaj kani.

Chay lugarespeqa pisi runaslla telefonosniyoj kaj kanku. Chayrayku cartasnejllata congregacioneswan parlaj kani. Ashkha kutispeqa niraj chay cartasniy chayashajtin, noqaraj ñaupajta chayaj kani. Chayrayku chay lugarmanta runasta tapurikuspa hermanosta maskʼaj kani. Hermanosta tarejtiytaj paykunaqa may munakuywan japʼikuwaj kanku, maytataj agradecekuwaj kanku. Chaytaj yuyarichiwaj mana qhasichu kallpachakushasqayta. Ashkha imaynasmanta Jehová yanapawarqa, chaytaj payman astawan qayllaykuchiwarqa.

Bougainville islapi ñaupaj kaj tantakuyman rejtiy, uj qhariwarmi chimpaykamuwarqa, may kusisqaspuni. Tapuwarqankutaj “¿Yuyarikuwaykuchu?” nispa. Noqataj paykunata rejserqorqanipacha. Port Moresbyman recienllaraj chayashaspa paykunata predicarqani, estudiosniytaj karqanku. Pisi tiemponmantaj chay lugarmanta hermanoman pasaporqani, bautizakusqankuñataj. Chayqa uj sumaj bendicionpuni noqapaj karqa kinsa watasta Papúa Nueva Guineapi sirvishajtiy.

Coronmanta 1978 watapi niraj ripushajtiy, uj sumaj hermanata rejserqani. Payqa may kʼacha, trabajadora karqa, sutikorqataj Adel. Payqa sapallan iskaynin wawasninta uywasharqa Samuelta, Shirleytawan, mamitantapis payllataj cuidasharqa, chantapis precursora regular karqa. Mayo de 1981 watapitaj Filipinasman kuterqani paywan casarakunaypaj. Casarakuytawantaj iskayniyku precursores regulares jina sirverqayku familiaykuta uywaspa.

Familiayojña kajtiypis 1983 watapi watejmanta precursor especialta sutichawarqanku. Asignawarqanku Linapacan islaman, chayqa Palawan provinciapi kashan. Chay isla karitupi kajtinpis, testigos mana kajtinkupis chayman riporqayku. Chaypi uj watata jina kasqaykutawan Adelniypa mamitan wañuporqa. Mana anchata llakikunaykupaj astawan predicarqayku. Ashkha estudiosniyku ñauparishasqankurayku, repararqayku uj Tantakuna Wasi necesitakushasqantaña. Jinapi uj juchʼuy Tantakuna Wasita ruwarqayku. Maytapuni kusikorqayku chay islaman chayasqaykumanta kinsa watasnillanman Jesuspa Wañuyninta Yuyarinapaj tantakuyman 110 runas jamusqankumanta. Chay runasmanta ashkhastaj ripusqaykutawan bautizakorqanku.

1986 watapi Culion sutiyoj islaman asignasqa karqani. Chaypitaj uj lugarpi lepra onqoyniyoj runaspuralla kausakorqanku. Chay qhepatataj Adelniytapis nerqanku precursora especial kananta. Qallariypeqa lepra onqoyniyoj runasta predicayta manchachikoj kayku, cuerponku manaña sano runajta jinachu kasqanrayku. Chaywanpis chay lugarmanta publicadores niwarqayku tratamientota ruwasqankutaña, manañataj onqoyninkuta chimpachinawaykupaj jinañachu kasqankuta. Chay lepra onqoyniyojkunamanta wakenqa uj hermanaj wasinman tantakuykunaman jamoj kanku. Ratolla  paykunata predicayman yachaykukorqayku. Chay onqoyniyoj runasqa yuyaj kanku Diospis runaspis paykunata chejnikusqanta, chayrayku Biblia sumaj suyakuyta qowasqanchejmanta paykunaman willarispa maytapuni kusikorqayku. Paykunaqa maytapuni kusikoj kanku aswan qhepaman sanitos kanankuta yachaspa, noqaykupis mayta kusikoj kayku (Luc. 5:12, 13).

Wawasniyku Culionman yachaykukuyta atinankupaj Coronmanta iskay sipas hermanasta pusakorqayku, ajinamanta wawasniyku sumaj amigosniyoj kanankupaj. Tawantinku may kusisqas wajkunaman Bibliamanta yachachej kanku. Paykunaqa ashkha wawasta estudiachej kanku, noqawan Adelniywantaj tatasninkuta estudiachej kayku. Wakin kutisqa 11 familiastapuni estudiachej kayku. Pisi tiemponmantaj may chhika runas sumajta ñauparishasqankurayku, uj mosoj congregacionta rikhuricherqayku.

Qallariypeqa chay lugarpi sapallay anciano karqani. Chayrayku sucursalqa niwarqa Culionpi pusaj publicadores karqa paykunapaj sapa semana tantakuykunata ruwanayta, Marily ranchitopi 9 publicadorespajpis kikillantataj ruwanayta. Chay ranchitoman chayanaykupajqa kinsa horastapuni viajanayku karqa marninta. Tantakuy tukukojtintaj, familiantin lomasninta horasta chakipi rej kayku Halsey sutiyoj ranchitopi runasman Bibliamanta yachachinaykupaj.

Tiempowantaj ashkha runas testigoman tukorqanku Marilypi, Halseypipis, chayrayku iskaynin ranchitospi Tantakuna Wasita ruwarqayku. Linapacanpi jinallataj hermanos, yachakuyta munaj runaspis casi tukuy materialesta churarqanku, paykunataj astawan trabajarqanku. Marilypi ruwakusqan Tantakuna Waseqa 200 runaspaj karqa, jatun tantakuykunata ruwanapajtaj jatunyachiyta atikoj.

1993 watapi wawasniyku jatunña kajtinku, noqawan Adelniywan Filipinaspi congregacionesta waturiyta qallarerqayku. 2000 watapitaj Escuela de Entrenamiento Ministerial nisqaman invitawarqanku, chay escuelamanta yachachej kanaypaj wakichinawankupaj. Mana chaypaj jinachu kasqayta yuyaj kani, Adelniytaj kallpachawajpuni, yuyarichiwajtaj Jehová chayta ruwayta atinaypaj kallpata  qonawanta (Fili. 4:13). Payqa onqosqa kaspapis asignacionninta sumajta juntʼasharqa, chayrayku maychus chayllata nishawarqa.

2006 watapi chay escuelapi yachachej kashajtiy, Adelniyta nerqanku párkinson onqoyniyoj kasqanta. Chayta yachaspa ni imanakuyta aterqaykuchu. Adelniyta nerqani payta cuidanaypaj asignacionniykuta saqepunaykuta, paytaj niwarqa: “Ama jina kaspa, uj doctorllata maskʼapuway atiendenawanpaj. Jehovaqa asignacionninchejta juntʼanapaj yanapallawasunpuni”, nispa. Payqa sojta watata Jehovata sirvillarqapuni mana quejakuspa. Manaña puriyta atispataj silla de ruedasninpi predicallajpuni. Ñakʼayllataña parlashaspataj uj iskay palabritasllatapis tantakuykunapi comentajpuni. Hermanosqa sumajta aguantashasqanmanta mensajitosta apachimullajpuni kanku, 2013 watapitaj wañuporqa. Adelneyqa 30 watas kurajta munakuyniyoj sumaj compañeray karqa, wañupojtintaj watejmanta llakikorqani, sapallaytaj sientekorqani.

Adelneyqa ni munanmanchu karqa asignacionniyta saqepunayta, chayrayku chay asignacionniypi siga karqani. Ashkha ruwanaspi yanapakusqayrayku mana sapallaychu sientekorqani. 2014 watamanta 2017 watakama, willajta mana saqewarqanchejchu chay suyuspi, tagalo parlaypi congregacionesta visitarqani. Chaymantataj chay parlaymanta congregacionesllatataj visitarqani Taiwanpi, Estados Unidospi, Canadapi ima. 2019 watapitaj Indiapi, Tailandiapiwan, inglés parlaypi, Diospa Gobiernonmanta Willajkunapaj Escuelapi yachachej karqani. Chay asignacionesniyta ruwaspa may kusisqa kaj kani. Jehovata astawan sirvispa aswan kusisqa kani.

Uj lugarman sirvej rispa hermanoswan chay rato yachaykukoj kani, chayrayku mana chaymanta ripuyta atillajchu kani. Chaywanpis chay kutispi yachakorqani Jehovapi tukuy sonqo atienekuyta. Kutin kutita reparani pay yanapawasqanta, chaytaj yanapawan asignacionniy cambiajtin tukuy sonqo chayta ruwanaypaj. Kunanqa Filipinaspi precursor especial jina sirvishani. Mosoj congregacionniypi kusisqa kani, hermanosqa familiay jina kanku, munakuywantaj cuidawanku. Maytapuni kusikuni Samuelwan Shirleywan mamanku jinallataj Jehovata tukuy sonqo sirvishasqankumanta (3 Juan 4).

Kausayniypeqa ashkha pruebaspi rikukorqani, munasqa warmisitaytapis rikorqani chay onqoywan sufrispa wañupusqanta. Chantapis ashkha cambiosman yachaykukunay karqa. Jinapis rikorqani Jehovaqa ‘mana karupichu kashasqanta sapa ujninchejmanta’ (Hech. 17:27). “Jehová Diospa makenqa mana juchʼuychu” kamachisninta yanapayta, kallpachayta mana atinanpaj jinaqa, may karupi tiyakojtinkupis (Isa. 59:1). Maytapuni agradecekuni Jehová pakakunay Chhanka kasqanmanta, tukuy kausayniypitaj noqawanpuni kasqanmanta. Ni jarkʼaj sapallaychu karqani.