1. ¿Imastataj Bibliata estudiashaspa yachakorqanchej?

 ¿YUYARIKUNCHEJCHU Bibliata estudiashaspa imastachus yachakorqanchej chayta? Ichapis mayta tʼukorqanchej Diosninchej sutiyoj kasqanta yachaspa. Ichá niña mancharisqachu kasharqanchej infierno mana kasqanta yachaspa, nitaj Diosninchej runasta chaypi ñakʼarichisqanta yachaspa. Chantapis maytachá kusikorqanchej wañupoj familiaresninchej kausarinpunankuta yachaspa, paykunawantaj paraisopi tinkukapunanchejta yachaspa.

2. Bibliamanta yachakuspa, ¿imastataj ruwayta qallarerqanchej ñauparinanchejpaj? (Efesios 5:1, 2).

² Diospa Palabranta estudiasqanchejman jina astawan Jehovata munakorqanchej. Chay munakuytaj yachakusqanchejman jina kausakunapaj yanapawarqanchej. Bibliaj yuyaychaykunasnin yanapawasqanchejraykutaj imatapis aswan sumajta ajllayta yachakorqanchej. Diosta kusichiyta munasqanchejraykutaj yuyayninchejta cambiarqanchej, allin kajtataj ruwayta qallarerqanchej. Imaynatachus uj wawita tatan jina imatapis ruwan, ajinallatataj noqanchejpis Tatanchej Jehová jina ruwayta qallarerqanchej (Efesios 5:1, 2 leey).

3. ¿Imastá tapurikusunman?

³ Kaykunata tapurikusunman: “Bautizakusqaymantapacha, ¿astawanñachu kunan Jehovata munakuni? Yuyasqay, ruwasqaypis, ¿astawanñachu rijchʼakun Jehovaj yuyasqanman, ruwasqanmanpis? Chaytaj, ¿sutʼichu reparakun congregacionmanta hermanosta munakusqaypi?”, nispa. Sichus munakuyninchej manaña ñaupajta jinachu kashan chayqa, ama desanimakunachu. Ñaupa tiempomanta cristianospis ajinallapitaj rikukorqanku. Jinapis Jesusqa mana chayraykuchu paykunata qhesacharqa, noqanchejtapis nillataj qhesachawasunchu (Apo. 2:4, 7). Payqa yachan Jehovata, hermanosninchejtapis qallariypi jina watejmanta munakuyta atisqanchejta.

4. ¿Imatá kay yachaqanapi yachakusun?

 ⁴ Kay yachaqanapeqa ñaupajta yachakusunchej imatachus ruwasunman Jehovata, runa masinchejtapis astawan munakunapaj. Chantá yachakusunchej imaynatachus chay noqanchejta yanapawasqanchejta, wajkunatapis yanapasqanta.

5, 6. 1) ¿Imaspitaj Pablo rikukorqa Jehovata sirvishaspa? 2) ¿Imataj Pablota yanaparqa Jehovata sirvinallanpajpuni?

⁵ Apóstol Pabloqa Jehovata sirvispa kusisqa kausakorqa. Jinapis wakin kuteqa karusta viajanan karqa, viajaytaj mana atikullajchu. Chay viajasqasninpi wakin kuteqa ‘mayuswan casi apachikorqa’, ‘suwaspis casi wañucherqanku’. Wakin kutitaj enemigosnin maqaykorqanku (2 Cor. 11:23-27). Mana chayllachu, hermanospis paykunata yanapananpaj kallpachakusqanta wakin kuti pisipaj qhawaj kanku (2 Cor. 10:10; Fili. 4:15).

⁶ ¿Imataj Pablota yanaparqa Diosta sirvinallanpajpuni? Payqa Diosmanta Qhelqasqasta leesqanwan, kausayninpi imaspichus rikukusqanwan, imaynachus Jehová kasqanmanta ashkhata yachakorqa. Pabloqa sutʼita yacharqa Jehová payta munakusqanta (Rom. 8:38, 39; Efe. 2:4, 5). Paypis Jehovata mayta munakullarqataj. Chaytataj rikucherqa “Diospaj tʼaqasqa kajkunata yanapaspa”, nitaj uj ratollachu, manaqa yanapallarqapuni (Heb. 6:10).

7. ¿Imatá ruwasunman Jehovata astawan munakunapaj?

⁷ Diosta astawan munakunapajqa, Palabranta sumajta estudiana. Bibliata leespaqa sumajta reparayta yachana imatachus chay leesqanchej Jehovamanta yachachiwasqanchejta. Leeshaspa kayta tapurikusunman: “¿Kay versiculospi reparanichu Jehová munakuwasqanta, imaraykutajchus noqapis payta munakunay kasqanta?”, nispa.

8. ¿Imaynatá Diosmanta mañakuy yanapawanchej payta astawan munakunapaj?

⁸ ¿Imatá ruwallasunmantaj Jehovata astawan munakunapaj? Sapa día orakuspa sonqonchejpi kaj chhikata willakuna (Sal. 25:4, 5). Jehovataj mañakuykunasninchejman kutichiwasunpuni (1 Juan 3:21, 22). Asiamanta uj hermana nerqa: “Qallariypeqa Jehovata munakoj kani imastachus paymanta yachakusqayraykulla. Pero mañakuykunasniyman kutichiwasqanta reparaspa astawan payta munakorqani. Chayraykutaj kusichinanpaj jinapuni imatapis ruwayta munarqani”.

9. ¿Imatá Timoteomanta yachakunchej?

⁹ Pabloqa cristianoman tukusqanmanta pisi tiemponman, joven Timoteota rejserqa. Timoteoqa sumaj cristiano karqa, Jehovata, runastapis mayta munakoj. Tiemponmantaj Pabloqa filipensesman qhelqashaspa Timoteomanta kayta nerqa: “Qankunaman kachamunaypajqa, mana pipis Timoteo jina kanchu. Payqa tukuy sonqo yanapasonqachej”, nispa (Fili. 2:20). Pablo, ¿Timoteo sumajta imatapis wakichiyta yachasqanmantachu, chayri sumaj discursosta qoyta yachasqanmantachu parlarqa? Mana. Manaqa sutʼita repararqa hermanosninta mayta munakusqanta. Congregacionesmanta hermanostaj maytachá suyaj kanku Timoteo paykunata visitarinanta (1 Cor. 4:17).

10. ¿Imatá Annawan qosanwan ruwarqanku hermanosta munakusqankurayku?

¹⁰ Noqanchejpis hermanosninchejta imaynallamantapis yanapariyta maskʼanchej (Heb. 13:16). Ñaupaj yachaqanapi Annamanta parlarerqanchej. b Sinchʼi muyoj wayra kasqantawan, paywan qosanwanqa uj familiata visitarimoj rerqanku. Chayaspataj rikorqanku chay  hermanospa wasinkoqa mana techoyoj rikhurisqanta, chayrayku chay familiajtaqa mana llimphu ropitanku kasqachu churakunankupaj. Anna nin imatachus ruwasqankuta: “Ropankuta wasiman apaspa tʼajsanporqayku. Chaymantataj planchasqetata, doblasqetata apaporqayku. Chaysitullawan yanaparejtiykupis, kunanqa paykunawan sumaj amigos kayku”, nispa. Annawan qosanwanqa munakusqankurayku chay hermanosta yanaparerqanku (1 Juan 3:17, 18).

11. 1) ¿Imaynataj hermanosninchej kanku yanaparejtinchej? 2) Proverbios 19:17 nisqanman jina, ¿imatá Jehová ruwan runa masinchejta munakusqanchejrayku yanapajtinchej?

¹¹ Wajkunata munakuspa, paykunawantaj kʼachas kaspa Jehová jina yuyashanchej, ruwashanchej ima. Chayta ruwanapaj kallpachakusqanchejtaj mana qhasipajchu. Ichapis ni jaykʼaj yachasunchu yanaparisqanchejmanta wajkuna mashkhatachus agradecekusqankuta. Asiapi tiyakoj hermanamanta watejmanta parlarina. Payqa pikunachus payta yanaparerqanku chaykunamanta yuyarikuspa nin: “Maytapuni agradecekuni predicaj pusawaj kanku chay tukuy hermanasta. Paykunaqa may kʼachaspuni noqawan karqanku. Recogej jamuwaj kanku, imitatapis invitariwajpuni kanku, wakin kutitaj almorzachimuwaj ima kanku. Chaymantataj wasiyman pusapuwaj kanku. Kunan reparani chayta ruwayqa paykunapaj mana facilllachu kasqanta, jinapis munakuywan chayta ruwaj kanku”, nispa. Ichapis mana tukuychu agradecekuwasun yanaparisqanchejmanta. Asiamanta hermanitaqa yanaparerqanku chay hermanasmanta nillantaj: “Mayta munayman yanapawarqanku chay hermanasta tukuyninkuta yanaparillaytataj. Jinapis mana yachanichu wakinninku maypichus kunan tiyakusqankuta, Jehovatajrí chayta yachan. Chayrayku paymanta mañakuni yanapariwasqankumanta paykunaman kutichipunanta”, nispa.  Arí, Jehovaqa wajkunapaj juchʼuy imitasta ruwapusqanchejtapis qhawamushan. Chay ruwasqanchejqa paypaj may valorniyojpuni, manuta jinataj kutichipuyta munawanchej (Proverbios 19:17 leey).

12. ¿Imaynatá bautizasqa hermanos congregacionman munakuyninkuta rikuchinkuman? (Fotostawan qhawariy).

¹² ¿Imaynatá uj hermano congregacionman munakuyninta rikuchinman? Hermanosta yanaparispa. Jordan sutiyoj jovenmanta parlarina. Payqa uj ancianota tapurikorqa imaynasmantachus hermanosta astawan yanapariyta atisqanta. Chay ancianotaj imaspiñachus ñauparisqanmanta felicitarqa, astawan ñauparinanpajtaj kay imasta ruwananta yuyaycharerqa: Tantakuna Wasiman ñaupajsitutapuni chayananta, wajkunata saludarinanta, tantakuykunapi comentananta, predicanapaj gruponwan llojsinantapuni, chantá hermanosta imaynallamantapis yanapariyta maskʼananta. Chay yuyaychayta japʼikusqanrayku, Jordanqa mana astawan ruwaykunata japʼinallanpajchu wakichikorqa, payqa hermanostapis astawan munakorqa. Chantapis yachakorqa niraj siervo ministerial kashaspaña hermanosta yanapayta qallarinan kasqanta, siervo ministerialña kaspataj yanapanallanpuni kasqanta (1 Tim. 3:8-10, 13).

13. ¿Imataj Christianta yanaparqa watejmanta anciano kananpaj?

¹³ Ichapis ñaupajta anciano chayri siervo ministerial karqanchej. Jehovaqa mana qonqakunchu imastachus chaypacha ruwasqanchejta, munakuywan chayta ruwasqanchejtapis (1 Cor. 15:58). Sumajtataj qhawamushan munakusqanchejrayku imastachus ruwashallasqanchejtapuni. Hermano Christianqa niña ancianochu kananta nejtinku mayta llakikorqa. Jinapis mana desanimakorqachu, payllataj nin: “Manaña ancianochu kaspapis, Jehovata munakusqayrayku atisqayta ruwanallaytapuni  nikorqani”, nispa. Tiemponmantaj watejmanta anciano karqa. Pay nin: “Qallariypeqa watejmanta anciano kanayta niwajtinku iskayrayasqa kasharqani. Jinapis kay jinata piensarikorqani: ‘Sichus Jehová khuyakuwasqanrayku watejmanta anciano kanayta munan chayqa, paytawan hermanosniytawan munakusqayrayku watejmanta anciano kasaj’, nispa”.

14. ¿Imatá yachakunchej Elenamanta?

¹⁴ Jehovaj kamachisnenqa mana testigos kajkunatapis munakullanchejtaj (Mat. 22:37-39). Georgiamanta hermananchej Elena nin: “Qallariypeqa Jehovata munakusqayraykulla predicaj kani. Jinapis Tatay Jehovata astawan munakusqayman jina, runastapis astawan munakullarqanitaj. Piensarej kani ima problemaspichus rikukushasqankupi, imasmantachus parlariyta munasqankupipis. Ajinata sapa kuti piensarisqayrayku, runasta astawan yanapariyta munarqani”, nispa (Rom. 10:13-15).

15, 16. Fotospi rikusqanchejman jina, ¿imataj kayta yachan wajkunata munakojtinchej?

¹⁵ Hermanosninchejta munakusqanchejqa wajkunatapis yanapallantaj. Coronavirus onqoy kashajtin, Paolowan warminwanqa ashkha kuraj hermanitasta yanaparqanku celularninkuta, tabletankuta apaykachayta yachakunankupaj, ajinamanta chaywan predicanankupaj. Ujnin hermanitaqa mana yachakuyta atillarqachu, jinapis yachakorqapuni. Ajinamantataj Jesuspa Wañuyninta Yuyarinapaj tantakuyman familiaresninta invitayta aterqa. Familiaresninmantataj  60 chay tantakuyman conectakamorqanku. Paolowan señoranwanqa mayta kallpachakorqanku chay hermanitaman yachachinankupaj. Chaytaj mana chay hermanitallatachu yanaparqa, manaqa familiaresnintapis. Hermanitaqa Paoloman qhelqarqa: “Maytapuni agradecekuyki noqa jina mayorcitosman yachachiwasqaykumanta. Nipuni qonqakusajchu Jehová llakikuwasqaykumanta, qankunapis pacienciawan yanapariwasqaykumanta”, nispa.

¹⁶ Paoloqa chaypi yachakorqa hermanosta munakuypuni aswan sumaj kasqanta, nitaj yachayniyoj kaychu chayri imatapis sumajta ruwayta yachaychu. Paolo nin: “Uj tiempota congregacionesta waturerqani. Hermanosqa discursosniymanta niñachá yuyarikunkuchu, jinapis yuyarikunku paykunata yanaparisqayta”, nispa.

17. ¿Imaynatá noqanchejtapis yanapallawanchejtaj wajkunata munakuy?

¹⁷ Wajkunata munakoyqa noqanchejtapis yanapallawanchejtaj. Chayta reparanchej Nueva Zelandamanta Jonathan sutiyoj hermanopi. Payqa uj sabadopi rikorqa uj precursor manchay ruphaypi sapallan chaupi pʼunchaypi predicashasqanta. Paytaj nikorqa chay precursorta sábado tardesnin acompañananta. Chay ratoqa mana repararqachu chayta ruwasqan allinnillanpajtaj kananta. Jonathan nin: “Chay kutisqa mana predicay gustawajchu, pero chay precursor sumajta yachachisqanta rikuspa, allintaj risqanta rikuspa, predicayta gustachikorqani. Chantapis sumaj amigoyman tukorqa. Payqa mayta yanapawarqa wiñay tukusqa cristiano kanaypaj, predicayta gustachikunaypaj, Jehovamanpis astawan qayllaykunaypaj”.

18. ¿Imatá Jehová munan ruwananchejta?

¹⁸ Jehovaqa munan payta, runa masinchejtapis astawan munakunanchejta. Yachakunchej jina, Jehovata astawan munakunapajqa Palabranta leerinanchej tiyan, chaypi tʼukurinanchej tiyan, sapa diataj orakunanchej tiyan. Hermanosninchejta astawan munakunapajtaj necesitasqankupi yanaparinanchej tiyan. Astawan munakuyniyoj kasun chayqa Jehovaman, hermanosninchejmanpis astawan qayllaykusun. Wiñay wiñayninpajtaj paykunawan amigos kasun.