Tatayqa Canadamanta Iglesia Unidapi pastor karqa. Chayrayku noqata, hermanaytawan sapa domingo paqarin kachawaj kayku, wawasta Bibliamanta yachachej kanku chayman. Las oncetataj paywan cultoman rej kayku. Tardesnintaj mamaywan salonman rej kayku. Chaypitaj repararqayku chay iskay religionesqa ni imapi kikinchu kasqankuta.

Mamayqa Bibliamanta yachakusqanta Bob Hutchesonman, warmin Marionmanwan willarerqa, paykunaqa sumaj amigosnin karqanku. Paykunapis testigollamantaj tukorqanku. 1958 watapeqa Bobwan Marionwan noqata, kinsa wawasninkutawan Asamblea Internacionalman pusawarqanku. Chay asambleaqa sutikorqa “Voluntad Divina”, pusaj diastataj Nueva Yorkpi ruwakorqa. Kunan sutʼita reparani asambleaman pusawasqankoqa paykunapaj mana facilchu kasqanta. Noqapajtaj chay kuti pusawasqankoqa may kusiypuni karqa, maytataj agradecekuni.

Jovencitu kashaspaqa uj ranchitopi tiyakorqani animalesta cuidaspa, chaytaj mayta gustawaj. Chayrayku veterinario kanaypaj estudiayta munarqani. Mamaytaj chayta uj ancianoman willarqosqa, paytaj noqawan parlarqa. Chay ancianoqa kʼachallamanta yuyarichiwarqa ‘qhepa pʼunchaykunapi’ tiyakushasqanchejta. Tapuriwarqataj: “Universidadman ashkha watasta rejtiyki, ¿nichu Jehovamanta karunchakuwaj?”,  nispa (2 Tim. 3:1). Chaypi piensariytawantaj niña universidadman rinayta nikorqani.

Pero colegiota tukuytawanqa mana yacharqanichu imatachus ruwanayta. Sabadosnin, domingosnintaj predicaj llojsejpuni kani. Pero predicayqa mana anchata gustawajchu. Chayrayku yuyarqani precursor kayqa mana noqapajchu kasqanta. Tataywan tioywanqa mana testigoschu karqanku, munarqankutaj semanantinta uj rejsisqa empresapi trabajanayta. Chay empresaqa Torontopi karqa. Tioytaj chaypi uj sumaj cargoyoj karqa. Chayrayku noqapis chay trabajoman yaykorqani.

Chay empresapeqa tutasnintin trabajaj kani, diantintataj mana testigo runaswan kaj kani. Chayrayku niña predicacionman, reunionesmanpis anchata rejchu kani. Chaypachaqa aweloywan tiyakorqani, paypis manallataj testigochu karqa. Wañupojtintaj waj wasita maskʼakunay karqa.

Bobwan señoranwanqa noqapaj tatasniy jina karqanku, paykunawan tiyakunaytataj niwarqanku. Paykuna asambleaman pusawarqanku. Paykunaqa yanapawarqanku Jehovaman astawan qayllaykunaypaj. 1960 watapitaj wawanku Johnwan khuska bautizakorqani. Chaymantataj Johnqa precursor karqa, chayrayku noqapis astawan predicayta munarqani. Hermanosqa ñauparishasqayta rikorqanku. Tiemponmantaj Diosmanta Parlayta Yachanapaj tantakuymanta encargadota churawarqanku. a

1966 watapeqa Randi Bergewan casarakorqani. Payqa precursora karqa, sonqo kʼajaywantaj predicaj, chantapis predicajkuna astawan necesitakun chayman riyta munarqa. Congregacionesta waturej hermanoqa noqaykuwan parlarerqa, niwarqaykutaj Orilliapi kaj (Ontario) congregacionman yanapakoj rinaykuta. Chaymantaj riporqayku.

Warmisitay sonqo kʼajaywan predicasqanta rikuspa, noqapis pay jinallataj kayta munarqani. Chayrayku Orillia llajtaman chayaytawan precursor kayta qallarerqani, sumajta yachachinaypajtaj kallpachakorqani. Bibliawan yachachispa, runastaj entiendesqankuta rikuspa may kusisqa karqani. Orilliapi uj qhari warmita yanapayqa uj sumaj bendición karqa.  Paykunaqa Jehovaj munayninman jina kausakuyta qallarerqanku, paymantaj kausayninkuta qoporqanku.

Uj pacha Torontoman rerqani, chaypitaj rejserqani Arnold MacNamarata. Payqa Betelpi ñaupajman apaj hermanosmanta ujnin karqa. Pay tapuriwarqa “¿precursores especiales kayta munawajchejchu?” nispa. Noqataj chay rato nerqani: “Arí, pero mana Quebecpichu, ¿í?”, nispa. Chayta nerqani Canadapi inglesta parlajkuna jina yuyasqayrayku. Paykunaqa Quebecpi tiyakoj llajta masisninkuta chejnikoj kanku francesta parlasqankurayku. Chay tiempopeqa runas gobiernoj contranta oqharikorqanku. Paykunaqa manaña munarqankuchu Quebec provincia Canadá partemanta kananta.

Arnoldtaj niwarqa: “Sucursalqa precursores especialesta Quebecllaman kachashan”, nispa. Chay ratotaj nerqani “ya” nispa. Yacharqaniña Randiqa chayman sirvej riyta munasqanta. Tiemponmantaj repararqani chayman rispa may sumajtapuni ruwasqaykuta.

Phishqa semanata clasesta pasarqayku francesta yachakunaykupaj. Chaymantataj uj qhariwarmitawan khuska Rimouskiman kachawarqayku. Chayqa Montrealmanta norte ladoman 540 kilometrospi jina kashan. Francés parlaytaqa niraj allintachu parlarqani. Chaytaj sutʼi reparakorqa uj tantakuypi willaykunata leeshajtiy. Chaypeqa ninay karqa qhepan asambleapeqa “Austriamanta hermanos” jamunankuta, jinapis nisqani “suri hermanos” jamunankuta.

Rimouskipeqa mana chay qhariwarmillawanchu tiyakorqayku. Chay wasipeqa tiyakullarqankutaj tawa soltera hermanas, familia Huberdeau, iskay warmi wawasninku ima. Chay wasitaqa chay familia alquilakusqanku, qanchis cuartosniyojtaj karqa, enteroykumantataj alquilerta pagaj kayku. Chay wasej machonesnin, perqasninpis yuraj kasqanrayku “Yuraj Wasi” nej kayku. Chaypeqa 12, 14 jina tiyakorqayku. Señoraywanqa precursores especiales kasqaykurayku sutʼiyaymanta chʼisinkama predicaj kayku. Paykunamantataj mayqennillankupis chiri tiempopipis chʼisiyaykunankama acompañawajpuni kayku, chaymantataj mayta agradecekuyku.

Chay precursoreswan khuska kaspa uj familia jinapuni karqayku. Ninata japʼichiytawan muyuyninpi chukuykuyta yachaj kayku. Uj diataj waykʼukuytapuni yachaj kayku pierogista. Chayqa empanaditas jina karqa, munasqaykutataj chayman juntʼaykuchej kayku. Uj hermanoqa tocayta yachaj, sábado chʼisisnintaj chaywan takirej, tusurejtaj kayku.

Rimouskipeqa ashkhas Bibliamanta yachakuyta qallarerqanku. Mayta kusikorqayku phishqa watasllapi ashkha estudios bautizakusqankumanta, congregacionpipis 35 publicadoresman chayarqayku.

Quebecpi kasqaykoqa mayta yanapawarqayku aswan sumajta predicanaykupaj. Rikorqayku imaynatachus Jehová predicacionpi yanapawasqaykuta, ni imatataj faltachiwasqaykuta. Chantapis francesta parlajkunata aswan allinta rejserqayku. Imaynatachus parlakusqanku, culturankupis mayta gustawarqayku. Chaytaj yanapawarqayku waj culturasniyoj runasta munakunaykupaj (2 Cor. 6:13).

Tiemponmantaj sucursalqa tapuriwarqayku: “¿Tracadieman ripuwajchejchu?”, nispa. Chay llajtitaqa mar kantupi kashan, Nueva Brunswickpa inti llojsimuynin ladopi. Nipuni chayman kachanawaykuta yuyarqaykuchu. Chaypachallaraj uj wasita alquilakunaykupaj contratota firmarqayku, wakin diastataj profesormanta uj escuelapi trabajaj kani. Chantapis chaypachasllaraj ashkha estudiosniyku predicaj llojsisharqankuña, Tantakuna Wasipis chaypi ruwakusharqa. Chayrayku Tracadieman ripuytaqa mana ajllayta atillarqaykuchu.

 Chay semana tukukuytataj Tracadieman rinaykumanta Jehovawan maytapuni parlarerqayku. Chaymantataj Tracadieman rerqayku, repararqaykutaj mana Rimouski jinachu kasqanta. Nikorqaykutaj: “Jehová kaypi sirvinanchejta munan chay, ¿imajtín mana kaypi sirvisunmanchuri?”, nispa. Jehovata pruebaman churarqayku, repararqaykutaj imaynatachus pay yanapawasqaykuta (Mal. 3:10). Randiqa Jehovata mayta munakun, nitaj payllapichu yuyan, kusisqa uyitallapunitaj. Chayrayku Tracadieman ripuyta atillarqayku.

Tracadiepeqa Robert Rosslla anciano karqa. Paywan warmisitan Lindawanqa precursores jina chayman yanapakoj risqanku. Kuraj wawitanku nacekojtintaj qhepakullarqankupuni. Wawitankuta uywaspa may ocupasqa kaspapis mayta kallpachawarqayku. Paykunaqa wajyarikuwajpuni kayku, sonqo kʼajaywantaj predicaj kanku.

Iskay watastaña Tracadiepi precursores kashajtiyku, mana suyashajtillayku congregacionestañataj waturinaykuta niwarqayku. Inglés parlaypi congregacionesta qanchis watastaña visitashajtiyku, Quebecpi francés parlaypi congregacionesta visitamunaykuta niwarqayku. Chaypeqa Léonce Crépeault superintendente de distrito karqa. Payqa discursota qojtiy felicitawajpuni. b Chaymantataj niwaj: “¿Imatataj ruwawaj discursosniyki aswan sumaj kananpaj?”, nispa. Pay yanapariwasqanrayku discursosneyqa aswan sumaj karqa, entiendenapaj jinallataj.

1978 watapi Montrealpi Asamblea Internacional ruwakorqa, sutikorqataj “Fe Victoriosa”. Chay asambleamantaqa yuyarikunipuni. Asambleaspeqa yanapakoj kani Departamento de Alimentos nisqapi. Chay kutipitaj suyarqayku 80 mil runas asambleaman jamunankuta. Jinapis chay kutipeqa tukuy ima waj jina karqa: waykʼunapaj máquinas waj karqa, waj jina mikhunasta waykʼukunan karqa, waj jinamantataj. Kapuwarqaykutaj ruedasniyoj 20 jatuchaj heladeras. Jinapis wakin kuteqa mana funcionajchu kanku. Chantapis chay estadiomanqa tukuy imata wakichinaykupaj mana tiemponpi yaykuyta aterqaykuchu. Imajtinchus asambleaj ñaupaj dianqa pelotata jaytʼajkuna chay estadiota alquilakusqanku. Chayrayku chaupi tutataña yaykorqayku. Niraj sutʼiyashajtintaj hornosta japʼichinaykuña karqa desayunota wakichinaykupaj. Maytapuni saykʼorqayku. Pero mayta yachakorqani noqawan khuska sinchʼita llankʼarqanku chay hermanosmanta. Paykunaqa wiñay tukusqa cristianos karqanku, nitaj phiñarpakullajchu kanku. Chayqa yanapawarqayku aswan ujchasqa  kanaykupaj, wakinwantaj kunankama amigosllapuni kayku. May sumajpuni karqa Quebecpi chay asamblea ruwakusqanqa. 1940, 1950 watas chaynejpi testigosqa chaypi qhatiykachasqa kasqanku enemigosninku mayta chejnikusqankurayku.

Montrealpi jatun tantakuykuna ruwakusqanpeqa mayta yachakoj kani waj superintendentesmanta. Uj kuteqa David Splane uj asambleamanta superintendente karqa. Payqa kunan Diospa Llajtanta Kamachejkunamanta ujnin. Waj kutipitaj noqañataj asambleamanta superintendente karqani, Davidtaj mayta yanapawarqa.

36 watastapuni congregacionesta waturispa karqayku. 2011 watapitaj Congregacionmanta Ancianospaj Escuelapi yachachej kanayta niwarqanku. Iskay watasllapi 75 camaspipuni puñorqayku. Chayta ruway mana atikullajtinpis kusisqa kasharqayku. Semana tukukuytaqa ancianos mayta agradecekuwaj kayku. Imajtinchus paykunaqa sutʼita repararqanku Diospa Llajtanta Kamachejkunaqa paykunamanta llakikusqankuta Jehovamanta mana karunchakunankupaj.

Chaymantataj Diospa Gobiernonmanta Willajkunapaj Escuelapi yachachinayta niwarqanku. Ashkha kutispi estudiantesqa saykʼusqas, tumpa llakisqas jina kasharqanku. Imajtinchus chaypeqa 7 horasta jina clasesta pasanku, tareastataj kinsa horasta sapa día ruwanku, sapa semanataj tawa, phishqa asignacionesta wakichikunku. Noqawan ujnin yachachejwantaj, estudiantesman nej kayku Jehovaj yanapaynillanwan tukuy imata ruwayta atinankuta. Paykunaqa mayta tʼukoj kanku Jehovapi atienekojtinku yuyasqankumantapis astawanraj ruwasqankumanta. Chaytataj ni jaykʼaj qonqakusajchu.

Mamay wajkunamanta llakikusqanrayku estudiosnin ñauparerqanku, papasuypis cambiarqa. Mamay wañupusqanmanta kinsa diasninman papasoyqa salonman jamorqa discursota uyarej. Chaytaj mayta tʼukuchiwarqayku. Chaymantapachataj 26 watasta reunionesman rillarqapuni. Payqa ni jaykʼaj bautizakorqachu, pero ancianosqa niwarqanku ñaupajtapuni salonman chayaj kasqanta.

Mamayqa ruwasqanwan mayta yachachiwarqayku noqata, kinsa hermanasniytawan. Kinsantin hermanasniy qosankuwan Jehovata sirvishanku. Iskayqa Betelpi yanapakushanku: ujnin Portugalpi, ujnintaj Haitipi.

Kunanqa precursores especiales jina Hamiltonpi (Ontario) sirvishayku. Congregacionesta waturishaspaqa mayta gustawaj kayku hermanosta revisitasninkuman, estudiosninkuman acompañay. Kunantaj mayta kusikuyku estudiosniyoj kasqaykumanta, ñauparishasqankumanta ima. Chantapis congregacionmanta hermanosta sumajta rejsiyta atiyku, maytataj kallpachakuyku imaynatachus Jehová llakiypipis kusiypipis paykunata yanapasqanta rikuspa.

Hermanos imaynatachus yanapariwasqaykupi piensarispaqa mayta agradecekuyku. Noqaykupis kallpachakuyku wajkunamanta mayta llakikunaykupaj, paykunatataj niyku Jehovata astawan sirviyta atisqankuta (2 Cor. 7:6, 7). Uj familiapi mamanku, iskay wawasninku ima precursores karqanku. Papasunkutataj tapurerqani: “¿Precursor kaypi piensarerqankichu?”, nispa. Paytaj niwarqa kinsantinkuta yanapashasqanta precursores kanankupaj. Noqataj tapurerqani: “¿Manachu Jehová aswan sumajta cuidanman qanmanta nisqaqa?”, nispa. Payta nerqani precursor kayta qallarinanta, sojta killanmantaj precursorña karqa.

Noqaykoqa “qhepa wawasmanpis” parlarillasqaykupuni Jehová ‘tʼukuna imasta ruwasqanmanta’, munaykutaj paykunapis noqayku jina kusisqa Jehovata sirvinankuta (Sal. 71:17, 18).