Jehovaqa profeta Ezequielnejta kamachisnin Sumaj Jallpʼaman kutinankuta, watejmanta uj nación jina sumaj ujchasqa kanankuta ima nerqa. Chantapis Ezequielnejta nillarqataj kay qhepa pʼunchaykunapi Diosta yupaychajkuna, uj llajta jina sumaj ujchasqa kanankuta.

Jehovaqa Ezequielta iskay kʼaspispi qhelqananta nerqa. Ujninpi qhelqanan karqa: “Judá ayllupaj, chantá payman tantakamorqanku, chay israelitaspajwan”, nispa. Ujninpitaj: “K’aspin, Efrainpa tukuynin Israel ayllu Josejpatawan, tantakamojkunajtawan”, nispa. Iskaynin kʼaspistaj Ezequielpa ‘makinpi ujlla kananku’ karqa (Eze. 37:15-17).

 ¿Ima niyta munan “Efraín” suti? Efraín aylloqa, Israelpa 10 ayllusninmanta aswan atiyniyoj, may rejsisqataj karqa. Chay 10 ayllusmanta ñaupaj kamachejtaj Efraín ayllumanta Jeroboam karqa (Deu. 33:13, 17; 1 Rey. 11:26). Chay aylloqa Josej sullkʼa wawan Efrainmanta rikhurerqa (Núm. 1:32-35). Chayrayku 10 ayllusmanta parlanapaj ‘Efrainpa kʼaspin’ nisqa oqharikorqa. Ashkha watas ñaupajta Ezequiel niraj chay profeciamanta parlashajtin, 740 watapi Jesús niraj jamushajtin, asiriosqa 10 ayllusta japʼikaporqanku, chaypi tiyakojkunatataj presosta apakaporqanku (2 Rey. 17:6). Qhepamantaj asiriosta, babilonios atipaykorqanku. Ezequiel iskay kʼaspismanta profeciata qhelqashajtintaj, casi tukuy israelitas Babiloniaj llajtasninpi tiyakusharqanku.

Kay 607 watapi Jesús niraj jamushajtin, babilonios ura ladomanta iskay ayllusta japʼikaporqanku, chaypi tiyakojkunatataj Babiloniaman apakaporqanku. Chunka ayllusmanta puchojkunatapis apakapullarqankutajchá. Judá ayllumanta reyesqa, ura ladomanta iskay ayllusta kamacherqanku. Sacerdotespis Judapi tiyakorqanku, Jerusalén templopi llankʼasqankurayku (2 Cró. 11:13, 14; 34:30). Chayrayku Judá ayllupaj kʼaspeqa, ura ladomanta iskay aylluswan ninakorqa.

¿Maykʼajtaj chay iskay kʼaspis ujchaykukorqanku? Israelitas 537 watapi Jesús niraj jamushajtin templota watejmanta sayarichinankupaj Jerusalenman kutejtinku. Nisunman pata ladomanta 10 aylluspa sutinpi, ura ladomanta iskay aylluspa sutinpi Jerusalenman Babiloniapi presochasqa kasqankumanta kutejtinku. Israel llajtaqa manaña tʼaqasqachu kasharqa. Watejmanta israelitasqa Jehovata ujchasqa yupaycharqanku (Eze. 37:21, 22). Isaías, Jeremías profetasqa, israelitas ujchasqas kanankuta nillarqankutaj (Isa. 11:12, 13; Jer. 31:1, 6, 31).

¿Imatá Ezequiel cheqa yupaychaymanta nerqa? Jehová kamachisninta ujllaman tukuchinanta nerqa (Eze. 37:18, 19). ¿Chay profecía kay tiempopi juntʼakunchu? Arí. Kay 1919 watapi juntʼakuyta qallarerqa. Niraj chay wata kashajtintaj, Satanasqa Diospa kamachisninta wiñaypaj tʼaqanachiyta munarqa. Jinapis 1919 watapi pisimanta pisi sayarerqanku, ujchaykukorqanku ima.

Chay tiempopi Diospa casi tukuynin kamachisnin Jesuswan khuska reyes, sacerdotes ima kayta aterqanku (Apo. 20:6). Paykunaqa Judá ayllupaj kʼaspi jina karqanku. Jinapis Diospa wakin kamachisnin kay Jallpʼapi wiñaypaj kausakuyta suyakorqanku. Tiempo pasasqanman jinataj, kay Jallpʼapi wiñaypaj kausakuyta suyakojkunaqa ashkhayarqanku (Zac. 8:23). Paykuna Josejpa kʼaspin jina karqanku.

Ajllasqa cristianos, Jallpʼapi tiyakuyta suyakojkuna ima Jehovata ujchasqas yupaychashanku. Jesucristotaj reyninku, paymanta parlaspataj Ezequiel profecianpi ‘kamachiy David’ nispa nerqa (Eze. 37:24, 25). Jesusqa Tatanmanta mañakorqa imaynatachus paywan, tatanwan ujchasqa kashanku, ajina ujchasqas yachachisqasnin kanankupaj yanapananta (Juan 17:20, 21). * Chantapis Jesusqa nerqa ‘juchʼuy tropa ovejasnin’, ‘waj ovejasnin’ ima uj tropalla kanankuta. Paykunataj kʼata michejninkoj qhepanta rinanku karqa (Juan 10:16). Jesús nisqanman jina cielopi chayri kay Jallpʼapi kausakuyta suyakuspapis, tukuyninchej ujchasqas kashanchej.