1. ¿Imaraykutaj wakichisqa kananchej tiyan?

JESUSQA wañuchinankupaj uj chʼisi faltashajtin, kay mundomanta runas discipulosninta chejnikunankuta nerqa (Juan 17:14). Diosta yupaychayman churanakojkunaqa, chay tiempomantapacha cristianosta qhatiykachanku (2 Tim. 3:12). Kay mundoj tukukuynin astawan qayllamusqanman jinataj, runasqa astawan churanakuwasun (Mat. 24:9).

2, 3. 1) ¿Allinchu kanman piensananchej imaynatachus runas sufrichinawanchejpi? 2) ¿Imastá kay yachaqanapi yachakusunchej?

² Runas qhatiykachawajtinchej sinchʼita sayanapaj, ¿imatataj kunanmantaña ruwasunman? ¿Allinchu kanman piensananchej imaynatachus runas sufrichinawanchejpi? Mana. Chayllapi piensasunman chayqa, niraj qhatiykachasqa kashaspa manchachikusunman, llakikusunmantaj. Chay kajtintaj Jehová Diosmanta karunchakusunman (Pro. 12:25; 17:22). Chantapis runata manchachikoyqa uj tojlla jina. ‘Enemigonchej Kuraj Supaytaj’, chaywan urmachiyta munawanchej (1 Ped. 5:8, 9). Chayrayku, ¿imatá ruwasunman qhatiykachayta aguantanapaj?

³ Kay yachaqanapi yachakusun, imaynatachus Jehová Diosmanta sumajta japʼikunata, imaraykuchus chayta ruwanapuni kasqantawan. Chantá yachakullasuntaj, imatachus ruwananchej kasqanta mana manchachikunapaj. Yachakullasuntaj runas chejniwajtinchej imatachus ruwananchej kasqanta.

4. Hebreos 13:5, 6 nisqanman jina, ¿imamantá mana iskayrayanachu tiyan, chantá imapajtaj chay yanapawasun?

⁴ Jehová Diosqa munakuwanchej, ni jaykʼajtaj saqerpariwasunchu. Chaymanta ama iskayrayanachu (Hebreos 13:5, 6 leey). Pasaj wataspi La Atalaya revista nerqa: “Diosta sumajta rejsej runaqa, ima pruebapi kaspapis Jehovapi atienekonqa”, nispa. Chayqa ajinapuni. Sinchʼita sayanapajqa, Jehová Diosta  munakuna, paypitaj tukuy sonqo atienekuna. Amataj yuyanachu pay mana munakuwasqanchejta (Mat. 22:36-38; Sant. 5:11).

5. ¿Imatá ruwasunman Jehová Diosninchej munakuwasqanchejta reparanapaj?

⁵ Jehová Diosman kʼaskakunapaj Bibliata sapa día leena (Sant. 4:8). Bibliata leeshaspaqa, imastachus Diosninchej nisqanta, ruwasqanta ima reparana. Ajinamanta yachasun munakuyniyoj, khuyakuyniyoj, kʼachataj kasqanta (Éxo. 34:6). Wakin runasqa mana creeyta atillankuchu Diosninchej paykunata munakusqanta, paykunata ni pi munakusqanrayku. Ajinata yuyanchej chayqa, sapa día uj listata ruwana Diosninchej khuyakuwasqanchejmanta, noqanchejwan kʼacha kasqanmanta ima (Sal. 78:38, 39; Rom. 8:32). Kausayninchejpi, Bibliata leesqanchejpiwan tʼukurisun chayqa, chay listapi ashkha imasta anotayta atisun. Jehová Diosninchej imastachus noqanchejpaj ruwasqanta jatunpaj qhawasun chayqa, payman astawan kʼaskaykusun (Sal. 116:1, 2).

6. Salmo 94:18, 19 nisqanman jina, ¿imaynatá Diosmanta tukuy sonqo mañakuy yanapawanchej?

⁶ Diosmanta sapa día mañakuna. Uj tata wawitanta munakuywan abrazaykusqanpi piensarina. Wawitaqa imastachus chay pʼunchaypi ruwasqanta, mana manchachikuspa tatanman willarin. Noqanchejpis Tatanchej Jehovawan sapa día parlarisun chayqa, chay wawita jina mana ni imamanta manchachikusunchu (Salmo 94:18, 19 leey). Chayrayku ‘Jehová Diospa ñaupaqenpi paran paranta waqarikuna’. Munakuyniyoj Tatanchej Jehovaman llakiyninchejta, imastachus manchachikusqanchejtapis willarina (Lam. 2:19). Chayta ruwasun chayqa, payqa ‘sonqo tiyaykuyta qowasunchej, mayqentachus runas mana entiendeyta atinkuchu, chayta’ (Fili. 4:6, 7). Diosmanta astawan mañakuspaqa, astawan payman qayllaykusun (Rom. 8:38, 39).

7. ¿Imaraykutaj mana iskayrayanachu Diospa Gobiernon bendicionesta apamunanmanta?

⁷ Diospa Gobiernon bendicionesta apamunanmanta, ama iskayrayanachu (Núm. 23:19). Chay bendiciones juntʼakunanmanta iskayrayasun chayqa, Satanaswan paypa atiyninpi kajkunawan facilta manchachiwasun (Pro. 24:10; Heb. 2:15). ¿Imatataj ruwasunman Diospa Gobiernonpi astawan atienekunapaj? Chay Gobierno ima bendicionestachus apamunanta estudiana, jinallataj chay bendiciones juntʼakunantapuni imaschus rikuchisqantapis. Chayta astawan entiendenapaj, Stanley Jones sutiyoj hermanomanta parlarina. Payqa Diosta yupaychasqanrayku, 7 watasta carcelpi wisqʼasqa karqa. * ¿Imataj aguantananpaj yanaparqa? Pay nerqa: “Diospa Gobiernon ima bendicionestachus apamunanmanta mana tumpallatapis iskayrayarqanichu. Chaytaj aguantanaypaj kallpachawarqa”, nispa.  Diospa nisqasninpi sinchʼita creesun chayqa, payman astawan qayllaykusun, nitaj imatapis manchachikusunchu (Pro. 3:25, 26).

8. Reunionesta imaynatachus qhawasqanchej, ¿imatá rikuchin?

⁸ Ama reunionesman faltakunachu. Tantakuykunaqa Jehová Diosman astawan qayllaykunapaj yanapawanchej. Reunionesta jatunpajchus manachus qhawasqanchejqa, qhatiykachasqa kajtinchej aguantananchejtachus manachus rikuchin (Heb. 10:24, 25). ¿Imaraykutaj chayta ninchej? Kunan imitaraykullapis reunionesman mana rinchejchu chayqa, ¿imatá ruwasun autoridades niña tantakojta saqewajtinchej? Jinapis reunionesman riyta ni ima jarkʼanawanchejta saqesunchu chayqa, churanakuy kajtinpis rillasunpuni. Chayrayku reunionesta kunanmantapacha jatunpaj qhawana. Chayta ruwasun chayqa, runas churanakuwajtinchejpis, gobiernos jarkʼawajtinchejpis, runasta kasunamantaqa Diosta kasukusun (Hech. 5:29).

9. Bibliamanta textosta umanchejpi japʼiy, ¿qhatiykachasqa kajtinchej yanapawasunmanchu?

⁹ Gustawasqanchej textosta umanchejpi japʼina (Mat. 13:52). Imatapis qonqallanchej chaypis, Jehová Diosqa atiyninwan yanapawasun chay textosta yuyarikunanchejpaj (Juan 14:26). Alemania oriental nisqapi uj hermanota carcelpi wisqʼarqanku, nitaj piwanpis parlajta saqerqankuchu. Pay nerqa: “Bibliamanta may chhika versiculosta umaypi japʼisqayqa, mayta yanapawarqa. Sapallay kashajtiypis, chay versiculospi tʼukurispa mana llakikorqanichu”, nispa. Hermanonchejqa ashkha textosta umanpi japʼisqanrayku aguantarqa, manataj Jehová Diosmanta karunchakorqachu.

10. ¿Imaraykutaj takiykunata umanchejpi japʼina kasqa?

¹⁰ Jehová Diosta jatunchanapaj takiykunata umanchejpi japʼina. Filipos llajtapi Pablowan Silaswan wisqʼasqa kashajtinku, umankupi japʼisqanku takiykunawan Diosta alabarqanku (Hech. 16:25). Unión Soviética nisqamanta hermanosninchejpis, Siberiaman apasqa kajtinku, takiykunawan creeyninkuta kallpacharqanku. Hermananchej Mariya Fedunqa chayta yuyarispa nin: “Takina libromanta yachakusqayku takiykunata takerqayku, mayqenkunatachus umaykupi japʼerqayku chaykunata”, nispa. Hermananchejqa chay takiykuna paykunata kallpachasqanta nerqa, jinallataj Jehovaj qayllallanpipuni kanankupaj yanapasqantapis. Takina libronchejpi chayri jw.org^® nisqapi kapuwasqanchej takiykuna, ¿kallpachawanchejchu? Jina kajtenqa, chay takiykunata  umanchejpi japʼina (“ Mana manchachikuspa qanpi suyasaj” nisqa recuadrota leeriy).

11, 12. 1) Kay 1 Samuel 17:37, 45-47 nisqanman jina, ¿imaraykutaj David, Goliatta mana manchachikorqachu? 2) ¿Imatá Davidmanta yachakusunman?

¹¹ Qhatiykachay jamojtin aguantanapajqa, mana manchachikojkuna kananchej tiyan. Ichapis yuyanchej manchachikoj runas kasqanchejta. Jinapis valientes kananchejqa mana jatun runa kanamantachu, nitaj kallpayoj kanamantachu, nillataj imatapis ruwayta yachanamantachu kashan. Davidmanta yachakuna. Davidqa jovencitollaraj kashaspa, Goliatwan maqanakuyta mana manchachikorqachu. Payqa Goliatmanta nisqa aswan juchʼuylla, pisi kallpayojtaj karqa. Chantapis mana armasniyojchu karqa, ni espadanpis kaporqachu. Chaywanpis Davidqa mana manchachikuspa, chay jatunchakoj runawan maqanakoj correrqa.

¹² ¿Imaraykutaj David mana manchachikorqachu? Payqa yacharqa Jehová Dios yanapanantapuni (1 Samuel 17:37, 45-47 leey). Davidqa mana nerqachu: “Goliatqa jaqay chhikan, noqataj kay chhikitan kani”, nispa. Astawanpis pay yuyarqa: “Goliatqa Jehová Diospa ñaupaqenpi ni imapischu”, nispa. ¿Imatá Davidmanta yachakunchej? Valientes kanapajqa, iskay imasta ruwananchej kasqanta. Ñaupajtaqa Jehová Dios yanapanawanchejpi atienekuna. Chantá ama qonqanachu tukuy atiyniyoj Jehová Diosninchej, enemigosninchejmanta nisqa aswan atiyniyoj kasqanta (2 Cró. 20:15; Sal. 16:8). Qhepan parrafospi yachakusun, qhatiykachasqa kashaspa mana manchikunapaj imatachus kunanmantaña ruwananchej kasqanta.

13. ¿Imatataj ruwana kasqa mana manchachikoj kanapaj?

¹³ Diospa Gobiernonmanta runasman willayqa, mana manchachikoj kanapaj yanapawasun. Predicayqa Jehovapi atienekunapaj, runasta mana manchachikunapaj ima yanapawanchej (Pro. 29:25). Imaynatachus mikhusqanchej kallpayoj kanapaj yanapawanchej, ajinallatataj predicaypis mana manchachikoj kanapaj yanapawanchej. Chayrayku predicana wasimanta wasi, ashkha runas kanku chaypi, negociospi, chayri mayllapipis. Kunanmantaña mana manchachikuspa predicasun chayqa, autoridades jarkʼawajtinchejpis predicallasunpuni (1 Tes. 2:1, 2).

14, 15. ¿Imatá yachakusunman hermananchej Nancymanta, hermananchej Valentinamantawan?

 ¹⁴ Iskay hermanasmanta parlarina. Paykunaqa may valientes karqanku, nitaj Jehová Diosta wasancharqankuchu. Ujnin hermananchejqa Nancy Yuen sutikun. Payqa uj metro khuskanniyojllata miderqa, nitaj pitapis manchachikullajchu. * Hermana Nancyqa Diospa Gobiernonmanta willasqanrayku, China suyupi 20 watas kurajta carcelpi wisqʼasqa karqa. Chay suyumanta autoridadesqa, payta tapusqankutawan “may tercapuni” kasqanta nerqanku.

¹⁵ Valentina Garnovskaya sutiyoj hermanamantañataj parlarina. Paytaqa Unión Soviética nisqapi kinsa kutita carcelman wisqʼaykorqanku, tukuyninpitaj 21 watasta presochasqa karqa. * Predicallaytapuni munasqanrayku, autoridadesqa payta “maleantemantapis aswan maleante” kasqanta nerqanku. Chay iskay hermanasninchejtaqa, Jehovaj yanapayninpi creesqanku valientes kanankupaj yanaparqa.

16. ¿Imataj yanapawasun valientes kanapaj?

¹⁶ Rikunchej jina, mana manchachikoj kanapajqa mana kallpanchejpichu, nitaj imastachus ruwayta atisqanchejpichu atienekunanchej tiyan. Astawanqa Jehová Dios yanapanawanchejpi, noqanchejraykutaj maqanakunanpi atienekunanchej tiyan (Deu. 1:29-31; Zac. 4:6). Chaymin yanapawasun valientes kanapaj.

17, 18. Juan 15:18-21 nisqanman jina, ¿imaraykutaj runas chejnikuwanchej?

¹⁷ Tukuypis wajkuna respetanawanchejta munanchej. Jinapis ama yuyanachu, mana rejsisqa kaspaqa mana valesqanchejta. Jesús nerqa: “Kusisqa kankichej noqarayku runas chejnisojtiykichej, qharqosojtiykichej, rimasojtiykichej, sajra runata jina qhesachasojtiykichejpis”, nispa (Luc. 6:22). ¿Imatá Jesús niyta munarqa?

¹⁸ Jesusqa mana nisharqachu, runas chejniwajtinchej kusikunanchejta, manaqa imachus noqanchejwan kananta nisharqa. Runasqa chejnikuwanchej  mana paykuna jina kasqanchejrayku, Jesuspa yachachisqanman jina kausasqanchejrayku, sumaj willaykunata predicasqanchejrayku ima (Juan 15:18-21 leey). Noqanchejqa Jehová Diosta kusichiyta munanchej. Payta munakusqanchejrayku runas chejnikuwanchej chayqa, mana llakikunchejchu.

19. ¿Imatataj apostolesmanta yachakusunman?

¹⁹ Runas imata nejtinkupis chayri imata ruwajtinkupis, Jehovaj testigosnin kasqanchejmanta, ama pʼenqakunachu (Miq. 4:5). Jesuspa apostolesninmanta yachakoyqa, runasta mana manchachikunapaj yanapawasunman. Jesús wañupusqantawan, apostolesqa Jerusalenpi qhepakorqanku. Paykunaqa judiosta kamachejkuna paykunata chejnikusqankuta yacharqanku (Hech. 5:17, 18, 27, 28). Jinapis sapa día temploman rillajpuni kanku, Jesusmantataj yachachej kanku (Hech. 5:42). Paykunaqa runata manchachikuywan mana atipachikorqankuchu. Noqanchejpis escuelapi, trabajopi, chayri mayllapipis Jehovaj testigosnin jina rejsichikusun chayqa, niña runasta manchachikusunchu (Hech. 4:29; Rom. 1:16).

20. ¿Imaraykutaj apóstoles kusisqallapuni karqanku, runas paykunata chejnikojtinkupis?

²⁰ ¿Imaraykutaj apóstoles kusisqa karqanku? Paykunaqa yacharqanku, Diospa munayninta ruwasqankurayku chejnisqas kasqankuta. Chaytataj jatunpaj qhawarqanku (Luc. 6:23; Hech. 5:41). Chaymanta qhepaman apóstol Pedro nerqa: “Cheqan runas kasqaykichejrayku ñakʼarinkichej chaypis, kusisqa kankichej”, nispa (1 Ped. 2:19-21; 3:14). Runasqa allin kajta ruwasqanchejrayku chejniwanchej. Chayta sutʼita yachaspaqa, chejnisqas kaspapis Jehová Diosta sirvillasunpuni.

21, 22. 1) ¿Imatataj kunanmantaña ruwananchej tiyan? 2) ¿Imatá qhepan yachaqanapi yachakusun?

²¹ Mana yachanchejchu maykʼajchus qhatiykachasqa kananchejta, nillataj yachanchejchu maykʼajchus autoridades Diosta yupaychajta niña saqenawanchejta. Chaywanpis kunanmantaña wakichikunanchej tiyan. Chaytataj ruwasunman Jehová Diosman kʼaskaykuspa, valientes kanapaj kallpachakuspa, runas chejnikuwajtinchejpis Diosta sirvispallapuni ima. Kunanmantapacha wakichikuspaqa, aswan qhepaman sinchʼita sayasun.

²² ¿Imatá ruwasun autoridades niña Jehová Diosta yupaychajta saqewajtinchej? Qhepan yachaqanapi yachakusun, Bibliaj mayqen yuyaychaykunasninchus yanapanawanchejta.