BIBLIAPEQA Diospa ashkha kamachisninpa nisqanku qhelqasqa kashan. Paykunaqa ‘noqanchej jinalla’ karqanku (Sant. 5:17). Apóstol Pablo sonqomantapacha nerqa: “Cheqan kajta ruwayta munashajtiy, sajra kajlla noqapi kashan”. “¡Ay, imanallasajtaj!”, nispa (Rom. 7:21-24). Ichá noqanchejpis apóstol Pablo jinallataj ninchej. Juchasapa kayninchejwan maqanakushanchej chayqa, Pabloj nisqan mayta kallpachawasunman.

Apóstol Pabloqa Jesús kausayninta qosqanmanta nerqa: ‘Diospa Wawanqa munakuwarqa, noqaraykutaj kausayninta qorqa’, nispa (Gál. 2:20). Pabloqa Jesús payrayku wañusqanmanta mana iskayrayarqachu. Jinapis noqanchejqa, ichapis wakin kutis Jesús noqanchejrayku wañusqanmanta iskayrayanchej.

Ñaupa juchasninchejrayku pisipaj qhawakunchej chayqa, Jehová Dios mana munakuwasqanchejta, nitaj perdonawasqanchejta yuyasunman. Jesús sapa ujninchejrayku kausayninta qosqantapis, mana creeyta atillasunmanchu. ¿Munanchu Jesús ajinata yuyananchejta? ¿Imataj yanapawasunman Jesús sapa ujninchejrayku kausayninta qosqanta entiendenapaj? Qhepan parrafospi chay tapuykunaman kutichisun.

Jesusqa sapa ujninchejrayku wañusqanta entiendenanchejta munan. ¿Imaynatá chayta yachanchej? Lucas 23:39-43 versículos chayta willariwanchej. Chaypi nisqanman jina, Jesuspa ladonpi kʼaspipi warkhusqa suwa runaqa, juchanrayku ñakʼarishasqanta nerqa. Chay runaqa manchaytachá juchallikorqa. Imaraykuchus chay tiempopeqa, jatun juchasta ruwajkunallata kʼaspipi warkhuspa wañuchej kanku. Chay suwa runaqa, llakiypi kasqanrayku Jesusta rogakorqa: “Jesús Gobiernoykiman yaykuspa, noqamanta yuyarikunki ari”, nispa.

Jesustajrí may nanaywan kashaspapis, chay suwa runata qhawarinanpaj kutirikorqa. Chantá munakuywan nerqa: “Cheqatapuni kunan niyki: Noqawan paraisopi kanki”, nispa. Jesusqa chay runata niyta atinman karqa: “Kausayniytataj qosaj ashkha runasta kacharichinaypaj”, nispa (Mat. 20:28). Jinapis payqa chay suwa runata entiendechiyta munarqa, payrayku kausayninta qonanta. Chayrayku munakuywan nerqa: ‘Noqawan kanki’, nispa. Chaymantataj nerqa, kausayninta qosqanrayku paraisopi wiñay kausayta japʼinanta.

Chay suwa runaqa, mana Diosta sirviyta aterqachu. Jinapis Jesusqa chay runaman nerqa, kausayninta payrayku qoshasqanta. Ajinallatataj kay tiempomanta cristianosman niwanchej. Imaraykuchus noqanchejqa, Diosta sirvishanchej. Ñaupajta juchallikorqanchej chaypis, ¿imatá ruwasunman Jesús sapa ujninchejrayku kausayninta qosqanta entiendenapaj?

Pabloqa uj sumaj llankʼayta japʼisqanrayku, Jesús payrayku wañusqanta entienderqa. Pay nerqa: “Agradecekuni atiyta qowaj Señorninchej Cristo Jesusman. Imaraykuchus payqa noqapi atienekorqa, uj llankʼayta qowaspa. Ñaupajtaqa Diospa contranpi  sajrata rimaj kani, llajtanta qhatiykachaj kani, machu machu runataj karqani”, nispa (1 Tim. 1:12-14). Jesusqa Pablota khuyakusqanrayku, munakusqanrayku, paypi atienekusqanrayku ima, payman uj sumaj llankʼayta qorqa. Pablotaj chayta sutʼita entienderqa. Jesusqa noqanchejmanpis uj sumaj llankʼayta qowanchej (Mat. 28:19, 20). Chay llankʼayta qowasqanchej, ¿yanapawanchejchu Jesús noqanchejrayku wañusqanmanta Pablo jina mana iskayrayanapaj?

Hermanonchej Albertmanta parlarina. Payqa casi 34 watasta qharqosqa karqa. Pay nin: “Juchasniyta mana qonqayta atinichu. Jinapis predicaj llojsispaqa, Pabloman jina Jesús uj sumaj llankʼayta qowasqanta yuyarikuni. Chaytaj mayta kusichiwan, yanapawantaj mana pisipaj qhawakunaypaj. Kunanqa yachani Jehová Dios perdonawasqanta, watejmantataj wiñay kausayta suyakushani”, nispa (Sal. 51:3).

Allan sutiyoj hermanonchejmanta parlarina. Niraj Jehová Diosta rejsishaspa, payqa pitapis maqarpallaj, sajra ruwaykunatataj ruwaj. Pay nin: “Wajkunata sufrichisqaymanta yuyarikullanipuni. Wakin kutistaj mayta llakikuni. Jinapis Jehová Diosman mayta agradecekuni, noqa juchasapata sumaj willaykunata predicajta saqewasqanmanta. Runas predicasqayta sumajta uyariwasqankoqa, Jehová Dios munakuyniyoj, may kʼachataj kasqanta yuyarichiwan. Payqa noqa jina kausayniyoj runasta, noqanejta yanapashan. Chaytataj sutʼita reparani”, nispa.

Tukuy atisqanchejta predicasqanchejqa, allin kajta ruwanapaj, allin imaspi yuyanapajtaj yanapawanchej. Chaytaj rikuchiwanchej Jesús khuyakuwasqanchejta, munakuwasqanchejta, noqanchejpitaj atienekusqanta.

Ichapis sonqonchejqa, Satanaspa mundon chinkachisqa kanankama ñaupa juchasninchejmanta juchachallawasunpuni. ¿Imatá ruwasunman?

Jean sutiyoj hermananchejmanta parlarina. Sipas kashaspa payqa puraj uya karqa. Sonqontaj chaymanta sapa kuti juchachallanpuni. Pay nin: “Mayta sonqochawan ‘Diosqa sonqonchejmanta aswan kuraj kasqanta’ yachay”, nispa (1 Juan 3:19, 20). Jehová Dioswan Jesuswanqa juchasapas kasqanchejta entiendenku. Chayta yachayqa mayta sonqochawanchej. Paykunaqa mayta munakuwanchej. Jehovaqa Wawanta kachamorqa juchankumanta pesachikoj runasrayku wañunanpaj. Jesuspis chayraykullataj kausayninta qorqa. Chayta ama qonqanachu (1 Tim. 1:15).

Jesús sapa ujninchejrayku kausayninta qosqanmanta mana iskaychakunapaj, iskay imasta ruwana. Ñaupajtaqa imaynatachus Jesús juchasapa runasta qhawasqanpi tʼukurina. Chantá qowasqanchej llankʼayta juntʼanapaj, tukuy atisqanchejta kallpachakuna. Chay imasta ruwaspaqa, Pablo jina nisun: Jesusmin “munakuwarqa, noqaraykutaj kausayninta qorqa”, nispa.