1. Kay 3 Juan 3, 4 nisqanman jina, ¿imataj mayta kusichiwanchej?

APÓSTOL Juanqa, cristianosman tukunankupaj yanaparqa chay runasta, wawasninta jina qhawarqa. Paykunaqa Jehová Diosta tukuy sonqo sirvishallarqankupuni. Apóstol Juantaj chayta yachaspa mayta kusikorqa. Jinapis chay cristianosqa, chʼampaykunapi rikukusharqanku. Chayrayku apóstol Juanqa, tukuy atisqanta ruwarqa paykunaj creeyninkuta kallpachananpaj. Noqanchejpis wawasninchejman chayri waj runasman Bibliamanta yachachillanchejtaj. Paykuna kausayninkuta Jehová Diosman qopuspa, payta sirvillankupuni chaytaj, mayta kusikunchej (3 Juan 3, 4 leey).

2. ¿Imapajtaj apóstol Juan cartasta qhelqarqa?

² Apóstol Juanqa 98 watapi ichapis Éfeso llajtapi chayri chay qayllapi tiyakorqa. Chaytaj ichá karqa, Patmos islapi presochasqa kasqanmanta kacharipusqankutawan. Juanqa chay tiempopi Jehová Diospa atiyninwan kinsa cartasta qhelqarqa. Payqa chay cartasta qhelqarqa, cristianos Jesuspi creenallankupajpuni, cheqa kajpi purinallankupajpuni ima.

3. ¿Ima tapuykunamantaj kay yachaqanapi kutichisun?

³ Kay 98 watapajqa, apostolesmanta Juanllaña kausasharqa. Paytaj mayta llakikorqa congregaciones ukhupi llulla yachachejkuna rikhurisqankumanta (1 Juan 2:18, 19, 26). * Chay llulla cristianosqa, Diosta rejsisqankuta nej kanku. Jinapis Jehová Diospa kamachiykunasninta mana kasukusharqankuchu. Chayrayku kay yachaqanapi, imatachus apóstol Juan chay tiempopi cristianosman nisqanta yachakusun. Chayta yachakushaspataj, kay kinsa tapuykunaman kutichisun: ¿Ima niyta munan cheqa kajpi puriy? ¿Imastaj chay cheqan ñanmanta orqhowasunman? ¿Imaynatá purajmanta yanapanakusunman cheqa kajpi purinallapajpuni?

4. Kay 1 Juan 2:3-6 chanta 2 Juan 4, 6 nisqanman jina, ¿imatá ruwananchej tiyan cheqa kajpi purinapaj?

⁴ Diospa ñannillantapuni purinapajqa, Bibliaj yachachiykunasninta yachananchej tiyan. Chantapis Jehová Diospa “kamachisqasninta” kasukunanchej tiyan (1 Juan 2:3-6; 2 Juan 4, 6 leey). Jesusqa Jehová Diosta tukuy imapi kasukorqa, noqanchejpis kikinta ruwananchejpaj. Chayrayku Jesús jina ruwaspaqa, Jehová Diosta kasukusun (Juan 8:29; 1 Ped. 2:21).

5. ¿Imapitaj creenanchej tiyan?

⁵ Cheqa kajpi purinallapajpuneqa, Jehová Dios cheqa kajtapuni parlasqanpi creenanchej tiyan. Chaytataj ruwasunman, Bibliaj nisqanmanta mana iskayrayaspa. Chantapis Jesuspuni Mesías kasqanta creenanchej tiyan. Ashkha runasqa, mana creenkuchu Diospa Gobiernonpi Jesús Rey kananpaj ajllasqa kasqanta. Apóstol Juanqa, “ashkha chʼaukiyajkuna” rikhurinankuta nerqa. Paykunataj pisi creeyniyoj kajkunata pantachinanku karqa. Chay pisi creeyniyojkunaqa kanku, Bibliapi Jehová Diosmanta, Jesusmantawan yachakusqankuta, niraj sutʼinchayta atejkuna (2 Juan 7-11). Apóstol Juanqa, chʼaukiyaj runasmanta nerqa: “¿Pitaj chay llullari? ¿Manachu chay llullaqa nin Jesusqa mana Cristochu kasqanta?”, nispa (1 Juan 2:22). Chay runas mana pantachinawanchejpajqa, Diospa Palabranta estudiananchej tiyan. Chayta ruwaspalla Jehová Diosta, Jesusta ima sumajta rejsisunchej (Juan 17:3). Paykunata sumajta rejsispataj, cheqa kajpi kashasqanchejmanta mana iskayrayasunchu.

6. ¿Imamantataj jóvenes qhawarikunanku tiyan?

⁶ Tukuy cristianos qhawarikunanchej tiyan, runaspa yachachiykunasninku mana pantachinawanchejpaj (1 Juan 2:26). Jovenestaj astawanraj qhawarikunanku tiyan. Franciamanta Alejandraqa * 25 watasniyoj. Paytaj nin: “Colegiopi kashajtiy, kausay jinallamanta rikhurisqanta, waj imastawan yachachiwarqanku. Chay yachachiykunataj allillan kaspa jinarqa. Chayrayku Bibliaj nisqan cheqachus manachus kasqanmanta iskayrayarqani. Jinapis Bibliata mana qhawarispalla, profesoresniyta creenayqa mana allinchu kasqanta piensarqani”, nispa. Alejandraqa La vida... ¿cómo se presentó aquí? ¿Por evolución, o por creación? nisqa librota estudiarqa. Chay librota estudiaytawan, niña iskayrayarqachu. Pay nin: “Noqapuni repararqani Bibliaj nisqan cheqapuni kasqanta. Yacharqanitaj  Bibliaj nisqanta kasukuspalla, sonqo tiyasqa, kusisqataj kausakunayta”, nispa.

7. ¿Imapajtaj kallpachakuna tiyan, chanta imaraykutaj?

⁷ Wakin hermanosqa sumaj cristianosman rijchʼakunku. Jinapis Diospa chejnisqan imasta ruwanku. Tukuy cristianos mana paykuna jina kanapaj kallpachakunanchej tiyan, jóvenes chayri kurajkuna kaspapis. Apóstol Juanqa, mana puraj uyas kanata nerqa. Chaywanqa nisharqa, cheqa kajpi purishaspa millay kausayniyoj kananchejqa, mana allinchu kasqanta (1 Juan 1:6). Jehová Dios allinpaj qhawanawanchejta munanchej chayqa, rikushawanchejmanpis jina kausakunanchej tiyan. Paypa qhawayninpeqa tukuy ima sutʼipacha kashan. Chayrayku Jehová Diosmantaqa, ni ima juchatapis pakayta atisunmanchu (Heb. 4:13).

8. ¿Imapajtaj kallpachakunanchej tiyan?

⁸ Kay mundomanta runasqa, juchata niña sajrapajchu qhawanku. Chayrayku mana paykuna jina kanapaj kallpachakuna tiyan. Apóstol Juan nerqa: “Sichus ninchej: ‘Mana juchayojchu kanchej’, nispa chayqa, noqallanchejtaj chʼaukiyakushanchej”, nispa (1 Juan 1:8). Juanpa tiemponmanta llulla cristianosqa nej kanku: “Juchata ruwajtinchejpis Diosqa allinpaj qhawallawasun”, nispa. Kunanpis ashkha runas kikillantataj ninku. Diospi creesqankuta nispapis, imastachus pay juchapaj qhawasqanta ruwallanku. Jehová Dios khuchichakuy juchamanta imatachus nisqantapis mana kasukunkuchu. Chayrayku khuchichakuy juchata ruwallanku, ninkutaj: “Sapa ujpis munasqanman jina kausayta atin”, nispa.

9. Bibliaj nisqanta kasukuy, ¿jovenesta yanapanchu?

⁹ Kunanpis casi tukuy jovenesqa, millay kausayniyoj kayta allinpaj qhawanku. Chayrayku cristiano jovenesqa, kallpachakunanku tiyan colegionkumanta chayri trabajonkumanta compañerosninku jina mana kanankupaj. Alejandro sutiyoj jovenqa, mana compañerosnin jina kananpaj kallpachakorqa. Pay nin: “Colegiopi  kashajtiy, wakin sipaskunaqa paykunawan puñuykunayta munaj kanku. Mana piwan purisqayraykutaj qʼewa niwaj kanku”, nispa. Joven kanki chayqa, ichá qanpis ajinapi rikukushanki. Jina kajtin, ama kayta qonqaychu: Bibliaj nisqanta kasukunki chayqa, pisipaj qhawakuymanta, onqoykunamanta, llakiykunamanta ima librakunki. Jehová Diospis allinpaj qhawasonqa. Juchaman tanqasqa kaspa mana urmankichu chayqa, allin kajta ruwayman yachaykukunki. Kay mundomanta runas imatachus qhariwarmi puñuykuymanta yuyasqankoqa, Satanasmanta jamun. Chayrayku mana paykuna jina yuyaspaqa, ‘Kuraj Supayta atipanki’ (1 Juan 2:14).

10. ¿Imaynatá 1 Juan 1:9 yanapawanchej Jehová Diosta llimphu sonqowan sirvinapaj?

¹⁰ Yachanchej Jehová Dioslla imachus jucha kasqanta ninanpaj derechoyoj kasqanta. Chayrayku imatachus juchapaj qhawasqanta mana ruwanapaj kallpachakunchej. Juchallikunchej chaytaj, chay juchanchejta Jehová Diosman willakunchej (1 Juan 1:9 leey). Jatun juchapi urmanchej chaytaj, ancianosmanta yanapata mañakunchej. Imajtinchus Jehová Diosqa, paykunata churan yanapanawanchejpaj (Sant. 5:14-16). Munasqa Tatanchej Jehovaqa, Wawanta kachamorqa juchasninchejrayku wañunanpaj. Chayrayku Jehová Dios juchanchejta perdonawasqanchejta niwanchej chayqa, perdonawanchejpuni, watejmantataj llimphu sonqowan sirviyta atisunman. Chayrayku mana allinchu kanman, ñaupa juchasninchejmanta yuyarikunallanchejpuni (1 Juan 2:1, 2, 12; 3:19, 20).

11. ¿Imatá ruwasunman Satanás mana iskayrayachinawanchejpaj?

¹¹ Diospa llajtanta wasanchajkunata mana uyarinanchejchu tiyan. Cristianos rikhurisqankumantapacha, Supayqa Diosta sirvejkunata iskayrayachiyta munan. Chaypajtaj chʼaukiyaj runasmanta valekun. Chayrayku imachus cheqa, imatajchus llulla kasqanta reparayta  yachananchej tiyan. * Enemigosninchejqa Internetman, redes sociales nisqaman ima llulla imasta churanku. Paykunaqa chay imasta churanku, Jehová Diosninchejmanta, hermanosninchejmantawan uj jinasta yuyachinawanchejpaj. Ama chay llulla parlaykunata uyarinachu, nitaj leenachu. Imaraykuchus chaykunaqa Satanasmanta jamun (1 Juan 4:1, 6; Apo. 12:9).

12. ¿Imaraykutaj creeyninchejta sinchʼiyachina tiyan?

¹² Satanás mana urmachinawanchejpajqa, Jesuspi sinchʼita creenanchej tiyan. Creenallanchejtaj tiyan, imaynatachus Jehová Dios munayninta Jesusnejta juntʼasqanpi. Chantá creenallataj tiyan, Jehová Dios allin kamachi yuyayniyojnejta yachachiwasqanchejpi (Mat. 24:45-47). Chay imaspi creenapajqa, Diospa Palabranta sapa kuti estudiana. Chayta ruwajtinchej, creeyninchejqa sumaj saphichasqa sachʼa jina kanqa. Apóstol Pabloqa Colosas llajtamanta cristianosman nerqa: “Imaynatachus Cristo Jesusta Señorniykichejpaj rejsikaporqankichej, ajinallatataj payta kasukuspallapuni kausaychej. [...] Paypi uj sachʼa jina sumaj saphichasqas, sayachisqastaj kaychej. Chantapis creeypi sinchʼita sayaychej”, nispa (Col. 2:6, 7). Creeypi sinchʼi sayasqa kajtinchejqa, Satanaswan paypa makinpi kajkunawanqa mana urmachiwasunchu (2 Juan 8, 9).

13. ¿Imamantataj mana tʼukunanchejchu tiyan?

¹³ Kay mundomanta runas chejnikuwajtinchejqa, mana tʼukunanchejchu tiyan (1 Juan 3:13). Apóstol Juan nerqa, ‘mundontinmanta runas Kuraj Supaypa makinpi kasqankuta’ (1 Juan 5:19). Kay mundoj tukukuynin astawan qayllamusqanman jina, Satanasqa astawan phiñasqa kashan (Apo. 12:12). Chayrayku payqa mana reparayllata urmachiyta munawanchej khuchichakuy juchawan, Diospa llajtanta wasanchajkunaj parlasqankuwan ima. Jinapis sutʼimanta urmachiyta munallawanchejtaj. Chaypajtaj runaswan qhatiykachachiwanchej. Satanasqa yachan, paypaj pisi tiempollaña kasqanta. Chayrayku tukuy imata ruwashan niña predicananchejpaj, Diospi manaña creenanchejpaj ima. Chantachá ashkha suyuspi gobiernosqa, hermanosninchejta Jehovata yupaychajta mana saqenkuchu, chayri wakin imasllata ruwajta saqenku. Jinapis chay lugaresmanta hermanosninchejqa, sinchʼita sayashallankupuni. Chaywantaj rikuchishanku, Satanás imata ruwajtinpis payta atipayta atisqankuta.

14. ¿Imatá ruwasunman hermanosninchej cheqa kajpi sayanallankupajpuni?

¹⁴ Hermanosninchej cheqa kajpi sayanallankupajpuneqa, paykunata khuyakunanchej tiyan (1 Juan 3:10, 11, 16-18). Paykunataqa mana tukuy ima allin kajtillanchu munakunanchej tiyan, manaqa llakiykuna chayri problemas kajtinpis. Ichapis ujnin hermanonchejpa familiarnin wañupun. Jina kajtin, payta sonqocharisunman chayri imaynallamantapis yanaparisunman. Manachayrí ichapis sinchʼita parasqanrayku chayri waj llakiyrayku hermanosninchejpa wasinku, manaqa salonninku urmaykun. Jina kajtin, wasinkuta chayri salonninkuta allinchaysisunman. Hermanosninchejta munakusqanchej, khuyakusqanchejpis mana simillamantachu kanan tiyan, manaqa ruwasqanchejpi rikukunan tiyan.

15. Kay 1 Juan 4:7, 8 nisqanman jina, ¿imatataj ruwananchej tiyan?

¹⁵ Hermanosninchejwan munanakuspaqa, munakuyniyoj Tatanchejpa wawasnin kasqanchejta rikuchinchej (1 Juan 4:7, 8 leey). ¿Imaynatá hermanosninchejta munakusqanchejta rikuchisunman? Paykunata perdonaspa. Pillapis sonqonchejta nanachiwanchej chayqa,  payta munakusqanchejrayku perdonananchej tiyan. Chay ruwasqantataj qonqapunanchej tiyan (Col. 3:13). Hermanonchej Aldoqa chayta ruwarqa. Uj hermanoqa, Aldo waj llajtamanta kasqanrayku mana allintachu paymanta parlasqa. Hermano Aldotaj chay hermanota mayta respetaj. Chayrayku chay hermanoj nisqan sonqonta mayta nanachisqa. Aldo nin: “Jehová Diosmanta mayta mañakorqani chay hermanota mana chejnikunaypaj”, nispa. Jinapis Aldoqa mana chayllatachu ruwarqa. Payqa chay hermanota paywan predicaj llojsinanpaj invitasqa. Paywan predicashaspataj, Aldoqa chay hermanoman nisqa sonqonta nanachisqanta. Aldo nin: “Chayta willajtiy, hermanoqa perdonta mañakuwarqa. Payqa imatachus nisqanmanta arrepientesqapuni kasharqa. Parlasqanpi sutʼi yachakorqa. Chantá allinyakaporqayku, chay problematataj qonqaporqayku”, nispa.

16, 17. ¿Imatataj ruwayta munanchej?

¹⁶ Apóstol Juanqa hermanosta mayta munakorqa, munarqataj creeyninku sinchʼi kananta. Chaytaj qhelqasqan kinsa cartaspi sutʼi rikukun. Cristowan khuska gobernamunankupaj tukuy ajllasqa kajkunaqa, apóstol Juan jinallataj munakuwanchej. Chaytaj mayta kusichiwanchej (1 Juan 2:27).

¹⁷ Kay yachaqanapi imatachus yachakusqanchejman jina ruwana. Cheqa kajpi purinallapuni, Jehová Diostataj tukuy imapi kasukuna. Diospa Palabranta estudiana, imatachus yachakusqanchejpitaj creena. Jesuspi creesqanchejta wiñachina. Runaspa yachachiyninkuta qhesachana. Diospa llajtanta wasanchajkunatataj ama uyarinachu. Ama puraj uyas kanachu. Juchapi mana urmanapajpis kallpachakuna. Jehová Dios llimphu kausayniyoj kanapaj imatachus kamachiwasqanchejta kasukuna. Hermanosninchejtapis creeypi sinchʼita sayanankupaj yanapana. Chaypajtaj sonqonchejta nanachiwajtinchej perdonana, yanapata necesitajtinkutaj yanaparina. Chay imasta ruwaspaqa, ima kajtinpis cheqa kajpi purillasunpuni.