29 watapi bautizakusqantawan. ¿Imaraykutaj chayta ninchej? Imaraykuchus Jesusqa, bautizakushaspa kausayninta Diospa altarninmanpis churaykushanman jina karqa. Chay altarqa ‘Diospa munayninwan’ ninakun (Gál. 1:4; Heb. 10:5-10). Jesús bautizakushajtinña chay altar kasqanrayku, Diospa mana rikukoj templonpis chay tiempollapitajchá sayarichisqa karqa. Imaraykuchus templopeqa uj altar kananpuni karqa. Chay templotaj ninakun, Jesuspa wañuyninnejta Diosta yupaychayta atisqanchejwan (Mat. 3:16, 17; Heb. 5:4-6).

Diospa mana rikukoj templon sayarichisqa kajtenqa, uj kuraj kaj sacerdote necesitakullarqataj. Jehová Diostaj Jesusta “atiyninwan ajllarqa, atiytataj qorqa” Kuraj kaj Sacerdote kananpaj (Hech. 10:37, 38; Mar. 1:9-11). Jinapis, ¿imaynapitaj yachanchej Jesús niraj wañupushaspa Kuraj kaj Sacerdote jina churasqa kasqanta? Chayta yachanapajqa, maykʼajchus Aaronwan, paypa cuentanmanta yaykoj sacerdoteswan, kuraj sacerdotes jina churasqa kasqankuta qhawarina.

Diosta yupaychana toldo, templopis iskay cuartosniyoj karqanku. Ujnenqa Santo Lugar sutikorqa, ujnintaj Aswan Santo Lugar nisqa karqa. Chaytataj uj cortina tʼaqaj. Moisespa Leyninman jina, chay Aswan Santo Lugarmanqa, kuraj kaj sacerdotella yaykuyta atej. Chaytataj ruwaj Perdonta Tarinapaj Pʼunchayllapi (Heb. 9:1-3, 6, 7). Aaronpis, cuentanmanta churasqa sacerdotespis, Aswan Santo Lugar nisqaman ‘cortinanta’ yaykunanku karqa. Chaypajtaj ñaupajtaña kuraj kaj sacerdotes jina churasqa kananku karqa. Diospa mana rikukoj templonpitaj, chay Aswan Santo Lugarqa, cielowan ninakun. Jesuspa aycha cuerpontaj, chay temploj cortinanwan ninakun. Jesusqa cieloman wicharinanpaj, aycha cuerponta saqenan karqa. Chayrayku ninchej, Jesús niraj wañupushaspa Kuraj kaj Sacerdote churasqa kasqanta (Heb. 10:20). Apóstol Pablo nerqa: “Cristoqa kuraj kaj sacerdote jina jamorqa”, nispa. Chantá nillarqataj: “Payqa aswan jatun, aswan sumaj kaj toldoman yaykorqa. Chay toldoqa mana makiwan ruwasqachu”. Payqa “cielomanpuni yaykorqa”, nispa (Heb. 9:11, 24).

Maypachachus Jesús cieloman ripuspa, runasrayku jichʼasqan yawarninta Diosman jaywarqa chaypacha. Jesusqa chayta ruwaspa, mosoj trato legalizakunanpaj, juntʼakuyta qallarinanpajtaj, uj tramiteta jina ruwarqa. ¿Imaynataj chay karqa?

Ñaupajtaqa, Jesús Jehová Diospa ñaupaqenman yaykorqa. Chantá runasrayku jichʼasqan yawarninta Diosman jaywarqa. Jehová Diostaj Jesuspa jaywasqanta japʼikorqa. Chay jinamanta mosoj trato legalizakorqa, juntʼakuytataj qallarerqa.

Bibliaqa mana willanchu, maykʼajpunichus Jehová Dios Jesuspa jichʼasqan yawarninta japʼikusqanta. Chayrayku mana niyta atisunmanchu, ima fechapichus mosoj trato legalizakusqanta, juntʼakuytataj qallarisqanta. Jinapis yachanchej, Jesusqa Pentecostés fiestapaj chunka día faltashajtin, cieloman ripusqanta (Hech. 1:3). Jesusqa chay chunka días ukhupi, runasrayku jichʼasqan yawarninta Jehová Diosman jaywarqa. Jehová Diostaj chayta japʼikorqa (Heb. 9:12). ¿Imaraykutaj chayta ninchej? Imaraykuchus 33 watamanta Pentecostés fiestapi, sutʼi yachakorqa mosoj trato juntʼakuyta qallarisqantaña (Hech. 2:1-4, 32, 33).

Entonces, ¿maykʼajtaj mosoj trato legalizakusqa, juntʼakuytataj qallarisqa? Maypachachus Jehová Dios, Jesuspa jichʼasqan yawarninta japʼikorqa chaypacha. Chay mosoj tratomanta Allinyachejtaj, nisunman Kuraj kaj Sacerdoteqa Jesús karqa (Heb. 7:25; 8:1-3, 6; 9:13-15).