1. ¿Imatataj apóstol Pablo yuyarqa, yacharqataj?

APÓSTOL Pabloqa, cuerpon maukʼayashasqanta nerqa. Nillarqataj cheqan kajta ruwananpaj mayta kallpachakunan kasqanta. Chantapis Jehová Diosqa, mana Pabloj munasqanman jinapunichu mañakuyninman kutichej. Chay tukuy imasrayku, Pabloqa wakin kutis llakikorqa, pisi kallpayoj kasqantataj yuyarqa (2 Cor. 4:16; 12:7-9; Rom. 7:21-23). Chantapis Pabloman churanakojkunaqa, payta pisi kallpayoj * runata jina qhawaj kanku. Paytaj chayta yacharqa. Jinapis Pabloqa wajkuna pisipaj qhawajtinkupis, pantaj runa kasqanmanta llakikojtinpis, mana yuyarqachu ni imapaj valesqanta (2 Cor. 10:10-12, 17, 18).

2. Kay 2 Corintios 12:9, 10 nisqanman jina, ¿imatataj Pablo yacharqa?

² Apóstol Pabloqa, pisi kallpayoj runapis atiyniyoj kayta atisqanta yacharqa (2 Corintios 12:9, 10 leey). Jehová Diosqa Pabloman nerqa: “Atiyneyqa pisi kallpayoj kasqaykipi astawan rikuchikun”, nispa. Diosqa chaywan nisharqa, Pabloman necesitasqan kallpata qonanta. Chayrayku kay yachaqanapeqa, yachakusun imaynatachus Jehová Dios Pablota kallpachasqanta. Jinapis ñaupajtaqa, yachakusun runas imaymanasta niwajtinchej mana llakikunachu kasqanta.

3. ¿Imaraykutaj runas imaymanasta niwajtinchej kusikunanchej tiyan?

³ Ni pipis munanchejchu, runas imaymanasta nispa kʼumuykachachinawanchejta. Ichá wakin runasqa imaymanasta niwanchej, asipayawanchejtaj. Chaymanta anchata llakikusunman  chayqa, kallpanchej pisiyanman (Pro. 24:10). Chayrayku runas churanakuspa imatapis niwajtinchej, apóstol Pablo jina ‘kusikuna’ (2 Cor. 12:10). ¿Imaraykutaj kusikuna tiyan? Imaraykuchus chayqa, Jesuspa discipulosnin kasqanchejta rikuchin (1 Ped. 4:14). Jesusqa discipulosnin qhatiykachasqa kanankuta nerqa (Juan 15:18-20). Chaytaj ñaupa tiempopi juntʼakorqapuni. Griegospa yachachisqankuta qhatej runasqa, cristianosta pisipaj qhawaj kanku, sonso runas kasqankutataj nej kanku. Judiospis cristianos “mana yachakuyniyoj, mana kasuy runaslla kasqankuta” nej kanku. Apóstol Pedromanta, Juanmantawan chayta nerqanku (Hech. 4:13). Runasqa cristianosta pisipaj qhawaj kanku, mana piniyojta jinataj. ¿Imaraykutaj ajinata qhawaj kanku? Paykunaqa mana politicaman satʼikojchu kanku, nitaj soldado kanankupajpis wakichikojchu kanku. Chantapis runasqa paykunata chejnikoj kanku.

4. ¿Imatataj ñaupa cristianos ruwarqanku runas paykunata pisipaj qhawajtinkupis?

⁴ Ñaupa cristianosqa, runas paykunata pisipaj qhawajtinkupis Jesusta qhatillarqankupuni. Chantapis runasman predicallarqankupuni. Apóstol Pedrowan Juanwanqa, Jesuspa discipulosnin kasqankurayku, paymanta yachachisqankurayku ima qhatiykachasqas karqanku. Jinapis paykunaqa, Jesuspa sutinrayku ñakʼarisqankumanta kusikorqanku (Hech. 4:18-21; 5:27-29, 40-42). Ñaupa tiempomanta cristianosqa, mana imamantapis pʼenqakunankuchu karqa. Paykunaj ruwasqankoqa kunankama yanapashawanchej. Paykunata chejnikoj runaspa ruwasqankurí, wakin runasllata yanaparqa. ¿Imaraykutaj chayta ninchej? Chay cristianosmanta wakenqa, Bibliaj wakin librosninta qhelqarqanku. Chay librostaj may chhika runasta yanapashallanpuni. Chantapis paykunaqa, Diospa Gobiernonmanta runasman yachacherqanku. Chay Gobiernotaj cielopi kamachishanña, pisimantawantaj kay jallpʼatawan kamachenqa (Mat. 24:14). Paykunata qhatiykachaj atiyniyoj gobiernorí, unayña chinkapun. Jinapis wañupunankukama Diosta sirvej cristianosqa, cielopi reyesña kashanku. Paykunaman churanakoj runasrí wañupunkuña. Chay runas kausarimonqanku chaytaj, Diospa Gobiernonpa kamachiyninpi kananku kanqa. Chay Gobiernomantaqa chejnikusqanku cristianosllataj parlarqanku (Apo. 5:10).

5. Juan 15:19 nisqanman jina, ¿imaraykutaj kay mundonmanta runas pisipaj qhawawanchej?

⁵ Kunanpis wakin runasqa, pisipaj qhawawanchej, asipayawanchejtaj. Paykunaqa sonso runas kasqanchejta niwanchej. ¿Imaraykutaj ajinata niwanchej? Imaraykuchus mana paykuna jinachu yuyanchej. Noqanchejqa llampʼu sonqos kanapaj, kasukoj runastaj kanapaj kallpachakunchej. Kay mundomanta runastajrí, jatunchakoj runasta, mana kasukoj runastapis jatunpaj qhawanku. Chantapis noqanchejqa mana politicaman satʼikunchejchu, nitaj cuartelman rinchejchu. Kay mundomanta runasqa, mana paykuna jina kasqanchejrayku pisipaj qhawawanchej (Juan 15:19 leey; Rom. 12:2).

6. ¿Imatataj Jehová Dios kamachisninnejta ruwashan?

⁶ Kay mundomanta runas pisipaj qhawawajtinchejpis, Jehová Diosqa tʼukuna imasta noqanchejnejta ruwashan. ¿Imastataj kay tiempopi ruwashan? Jallpʼantinpi ni jaykʼaj jina willakunanpaj kamachisninta yanapashan. Kamachisnenqa mundontinpi astawan ruwakoj revistasta, may chhika parlaykunapi orqhoshanku. Chantapis may chhika runasta Bibliawan yanapashanku aswan sumajta kausakunankupaj. Tukuy chay imasmantaqa, Jehová Dioslla jatunchasqa kanan tiyan. Imajtinchus payqa chay tʼukuna imasta ruwananpaj, kay mundopi pisipaj qhawasqa runasta ajllarqa. Jinapis, ¿Jehová Dios sapa ujninchejta atiyninwan yanapawasunmanchu? Jina kajtin, ¿imatataj  ruwananchej tiyan yanapanawanchejpaj? Chayta yachanapaj, qhepan parrafospi Pablomanta kinsa imasta yachakusun.

7. ¿Imatataj apóstol Pablomanta yachakusunman?

⁷ ¿Imatataj apóstol Pablomanta yachakusunman? Jehová Diosta sirvinapajqa, mana kallpanchejpichu, nitaj imatachus ruwayta yachasqanchejpichu atienekunanchej kasqanta. Apóstol Pabloqa Tarso llajtapi wiñakorqa. Chay llajtataj Romaj ujnin provincianpa jatun llajtan karqa. Tarso llajtaqa may qhapaj llajta karqa, may rejsisqa universidadniyojtaj. Chantapis Pablotaqa Gamaliel sutiyoj runa yachacherqa. Chay runataj judiospa religionninku ukhupi may jatunpaj qhawasqa karqa. Apóstol Pabloqa chay tukuy imasrayku jatunchakunman karqa, paypa yachasqallanpitaj atienekunman karqa (Hech. 5:34; 22:3). Chantapis Pabloqa, judíos ukhupi manchay sumajpaj qhawasqa karqa. Payllataj nerqa: “Noqaqa suyuypi ashkha wiña masisniymanta nisqaqa, judiospa religionninkupi astawan ñauparisharqani”, nispa (Gál. 1:13, 14; Hech. 26:4). Jinapis Pabloqa, mana may kasqanta yuyakorqachu.

8. 1) Filipenses 3:8 nisqanman jina, ¿imaynatataj Pablo saqesqan imasta qhawarqa? 2) ¿Imaraykutaj Pablo ‘pisi kallpayoj kasqanmanta kusikorqa’?

⁸ Apóstol Pabloqa ashkha imasrayku kay mundopi jatunpaj qhawasqa kayta atinman karqa. Jinapis chay imasta saqeporqa, ‘qʼopata jinataj’ qhawarqa (Filipenses 3:8 leey). Pabloqa cristiano kasqanrayku, ashkha llakiykunapi rikukorqa. Judío masisnenqa payta chejnikorqanku (Hech. 23:12-14). Romamanta llajta masisninpis seqʼoykucherqanku, carcelmantaj wisqʼaykucherqanku (Hech. 16:19-24, 37). Chantapis Pabloqa pantaj runa kasqanrayku, allin kajta ruwananpaj mayta kallpachakunan kasqanta yacharqa (Rom. 7:21-25). Jinapis payqa Jesusta qhatillarqapuni, runas chejnikojtinkupis, pantasqanrayku llakikojtinpis. Pabloqa ‘pisi kallpayoj kasqanmanta kusikorqa’. Imaraykuchus pisi kallpayoj kajtin, Diosqa atiyninwan yanapaj (2 Cor. 4:7; 12:10).

9. ¿Imaraykutaj mana yuyanachu tiyan Jehová Diosta mana sirviyta atisqanchejta?

⁹ Jehová Dios atiyninta qonawanchejpajqa, mana yuyanachu tiyan kallpayoj chayri escuelayoj kananchej kasqanta. Nillataj yuyanachu tiyan, sumaj llajtamantapuni chayri qhapajpuni  kananchej kasqanta. Jehová Diosta sirvinapajqa, mana chay imastachu necesitanchej. Diospa llajtanpeqa, ‘runaj qhawayninman jina mana ashkhachu yachayniyojkuna kanchej, mana ashkhachu atiyniyojkuna kanchej, nitaj ashkhachu sumaj familiapi nacekorqanchej’. Astawanpis Jehová “Diosqa kay mundopi pisi kallpayojpaj qhawasqa kajkunata ajllarqa” (1 Cor. 1:26, 27). Chayrayku mana kallpayoj, mana escuelayoj, mana sumaj llajtamantachu, nitaj qhapajchu kanchej chayqa, mana yuyanachu tiyan Jehová Diosta mana sirviyta atisqanchejta. Imaraykuchus Jehová Dios atiyninwan yanapawasun. ¿Imaynatá pay yanapasunman? Runas iskaychachinawanchejpaj jina imatapis tapuwajtinchej, Jehová Diosqa imapichus creesqanchejmanta mana manchachikuspa parlanapaj yanapawasun. Chaypajtaj paymanta mañakunanchej tiyan (Efe. 6:19, 20). Mana jampiy atina onqoyniyoj kanchej chaytaj, Jehová Diosqa payta sirvinallapajpuni kallpata qowasun. Chaypajtaj paymanta mañakunallanchejtaj tiyan. Sapa kuti Jehová Dios yanapawasqanchejta reparajtinchejqa, creeyninchej astawan sinchʼiyanqa, astawan kallpayojtaj kasun.

10. ¿Imaraykutaj Hebreos 11:32-34 versiculospi Diospa kamachisninmanta, waj kamachisninmantawan yachakunanchej tiyan?

¹⁰ Apóstol Pabloqa Diospa Palabranta sapa kuti estudiaj. Chaypitaj yachakorqa Jehová Diosta tukuy sonqo yupaychaj kamachisninmanta. Pabloqa hebreo cristianosman qhelqashaspa nerqa, Diospa ñaupa tiempo kamachisninmanta yachakunankuta. Chay qhelqasqan cartapeqa, Diosta tukuy sonqo sirvej runasmanta uj jatun lista rikhurin (Hebreos 11:32-34 leey). Chaykunamanta ujqa rey David. Paymanqa mana enemigosnillanchu churanakorqanku, manaqa wakin amigosninpis. Apóstol Pabloqa ichá paypa kausayninpi tʼukurispa kallpachakorqa. ¿Imaraykutaj chayta ninchej? Chaypajqa rey Davidpa kausayninmanta yachakusun. Chantá yachakullasuntaj, imaynatachus noqanchejpis Pablo jina ruwanata.

11. ¿Imaraykutaj runaj qhawayninman jina David pisi kallpa karqa? (Kay revistaj tapanpi dibujota qhawariy).

¹¹ Goliatqa sumaj maqanakoj soldado karqa. Chayrayku “Davidta rikuytawan, pisipaj payta qhawarqa”, asipayarqataj. Goliatqa manchay jatun runa karqa, sumaj armasniyoj, sumajtataj maqanakuyta yachaj. Davidtajrí lloqallitullaraj karqa, nitaj maqanakunanpajpis wakichisqachu karqa. Runaj qhawayninman jina, Davidqa pisi kallpa karqa. Jinapis payqa may kallpayoj karqa. Imaraykuchus Davidqa, Jehová Dios yanapananpi atienekorqa. Jehová Diostaj Goliatta atipananpaj yanaparqa (1 Sam. 17:41-45, 50).

12. ¿Ima problemayojtaj David karqa?

¹² Aswan qhepaman Davidqa, waj problemayoj karqa. Chaytaj mayta llakicherqa. Davidqa Jehová Diospa churasqan reyta tukuy sonqo kasukorqa. Chay reyqa Saúl karqa. Payqa Davidta qallariypi sumajpaj qhawarqa. Jinapis aswan qhepaman, Saulqa manaña llampʼu sonqochu karqa, Davidmantataj envidiakorqa. Chayrayku Davidta sufricherqa, wañuchiytataj munarqa (1 Sam. 18:6-9, 28, 29; 19:9-11).

13. Rey Saúl qhasimanta Davidta sufrichejtin, ¿imatataj David ruwarqa?

¹³ Rey Saúl qhasimanta Davidta sufrichejtinpis, Davidqa payta jatunpaj qhawallarqapuni. Imaraykuchus yacharqa Jehová Dios Saulta rey kananpaj ajllasqanta (1 Sam. 24:6). Davidqa Saúl sufrichisqanmanta mana Jehová Diosta juchacharqachu. Astawanpis chay llakiyta aguantananpaj, pay kallpata qonanpi atienekorqa (Sal. 18:1, qallariyninpi qhelqasqa ima).

14. ¿Imaraykutaj ninchej Pabloj llakiykunasnin Davidpa llakiykunasninman rijchʼakusqanta?

¹⁴ Apóstol Pabloj llakiykunasnenqa, Davidpa  llakiykunasninman rijchʼakorqa. Pabloj enemigosnenqa, paymanta nisqa aswan atiyniyoj karqanku. Religionta kamachejkunamanta ashkhas, autoridades ima payta chejnikoj kanku. Paykunaqa Pablota seqʼoykucherqanku, carcelmantaj wisqʼaykucherqanku. Chantapis imaynatachus Davidta wakin amigosnin sufricherqanku, ajinallatataj Pablotapis wakin cristianos sufricherqanku. Paykunamanta wakintaj contranpipuni sayaykorqanku (2 Cor. 12:11; Fili. 3:18). Jinapis Pabloqa mana chay llakiykunawan atipachikorqachu. Payqa runas churanakojtinkupis predicallarqapuni. Wakin hermanos llakichejtinkupis, paykunata munakullarqapuni. Chantapis Jehová Diosta wañupunankama sirverqa (2 Tim. 4:8). Chay tukuy imasta ruwarqa Jehová Dios atiyta qosqanrayku, manataj paypa kallpanraykuchu.

15. ¿Imatataj ruwayta munanchej, chanta imaynatá chayta ruwasunman?

¹⁵ Ichá noqanchejtapis colegiomanta, trabajomanta compañerosninchej chayri mana testigo familiaresninchej asipayawanchej, manaqa churanakuwanchej. Manachayrí ichá congregacionmanta pillapis sonqonchejta nanachiwarqanchej. Ajina kajtin, apóstol Pablomanta, Davidmantawan yuyarikuna. Noqanchejpis paykuna jinallataj, “sajra kajta allin kajwan” atipasunman (Rom. 12:21). Jinapis chaypajqa, mana noqanchejman churanakojkunawan maqanakunanchejchu tiyan, imaynatachus David Goliatwan maqanakorqa, ajinata. Astawanpis sajra kajta atipanapajqa, runasman Jehová Diosmanta, Bibliamantawan yachachiyta munanchej. ¿Imaynatá chayta ruwasunman? Runaspa tapuykunasninkuman Bibliawan kutichina. Contranchejpi sajrata ruwajkunawan kʼachas kana, respetanataj. Tukuy runaspaj allin kajta ruwana, enemigosninchejpajpis (Mat. 5:44; 1 Ped. 3:15-17).

16, 17. ¿Imatataj Pablo mana qonqarqachu?

¹⁶ Apóstol Pabloqa niraj cristianoman tukushaspa, machu machu joven karqa, Jesuspa discipulosnintataj qhatiykachaj (Hech. 7:58; 1 Tim. 1:13). Payqa chaypacha Saulo sutiwan rejsisqa karqa, cristianostataj mayta ñakʼarichej. Jinapis Jesuspuni niña chayta ruwajta saqerqachu. ¿Imaynamantá? Saulo cristianosta qhatiykachaj rishajtin, Jesusqa cielomantapacha parlapayamorqa, ciegoyacherqataj. Pablotaj  watejmanta rikunanpaj, qhatiykachasharqa chay runaswan yanapachikunan karqa. Chayrayku Ananías ñawisninta kicharej rejtin, Pabloqa kʼumuykukoj sonqowan yanapachikorqa (Hech. 9:3-9, 17, 18).

¹⁷ Aswan qhepamantaj, Pabloqa cristianos ukhupi may rejsisqa karqa. Jinapis Damascoman rishajtin, imatachus Jesús payman yachachisqanta ni jaykʼaj qonqarqachu. Pabloqa kʼumuykukoj sonqollapuni karqa. Chayrayku hermanoswan hermanaswanpis tukuy sonqo yanapachikorqa. Chantapis hermanos yanaparisqankutapuni nerqa (Col. 4:10, 11).

18. ¿Imaraykutaj mana yanapachikuyta munallasunmanchu?

¹⁸ ¿Imatá apóstol Pablomanta yachakusunman? Diospa llajtanman yaykumushaspaqa, ashkha imasta mana yachajchu kanchej. Chayrayku manchayta munaj kanchej wajkuna yanaparinawanchejta (1 Cor. 3: 1, 2). ¿Ajinallapunichu kanchej? Jehová Diosta unaytaña yupaychashanchej chayqa, ichapis ashkha imastaña yachanchej. Chayraykutaj ichapis mana wajkunawan yanapachikuyta atillanchejchu. Chaytaj astawanraj kanman, yanapayta munawanchej chay hermano, noqanchejmanta aswan mosojllaraj kajtin. Jinapis Jehová Diosqa, ashkha kutispi hermanosnejta chayri hermanasnejta kallpachawanchej (Rom. 1:11, 12). Chayrayku Jehová Dios kallpata qonawanchejpajqa, hermanosninchejwan yanapachikuna tiyan.

19. ¿Imaraykutaj Pablo tʼukuna imasta ruwarqa?

¹⁹ Apóstol Pabloqa cristianoman tukuspa, tʼukuna imasta ruwarqa. Payqa chayta ruwarqa kʼumuykukoj sonqo kasqanrayku, Jehová Diospitaj atienekusqanrayku. Sichus kallpayoj, qhapaj, escuelayoj chayri sumaj llajtamanta kasqanpi atienekunman karqa chayqa, mana chay imasta ruwayta atinmanchu karqa. Pablotaj chayta sumajta yacharqa. Noqanchejpis apóstol Pablo jina ruwana. ¿Imaynatá chayta ruwasunman? 1) Jehová Diospi atienekuna, 2) Diospa ñaupa tiempo kamachisninmanta yachakuna, 3) hermanosninchejwan yanapachikuna. Chayrayku pisi kallpas kasqanchejta yuyaspaqa, ama llakikunachu. Imaraykuchus Jehová Dios kallpata qowasunchej.