1. ¿Imaraykutaj mana allinchu congregacionpi atipanakusta rikhurichinanchej?

KAY mundomanta runasqa, tukuy imata ruwanku paykunalla aswan ñaupajpi kayta munaspa. Ichá uj comercianteqa, comerciante masisninmanta nisqa aswan rejsisqa kayta munaspa wajkunata chʼaukiyanman. Ichá pelotata jaytʼaj runaqa, pujllashaspa ganaytapuni munaspa waj equipomanta kajta imanarpanman. Chayri ichá uj estudianteqa, uj sumaj universidadman yaykuytapuni munaspa, examenta qoshaspa trampata ruwanman. Cristianosqa, chay imasta ruway mana allinchu kasqanta yachanchej. Imaraykuchus chaykunaqa ‘runaj sajra munayninpa ruwasqasninmanta’ kashan (Gál. 5:19-21). Jinapis ichá wakenqa, mana reparakuspalla atipanakusta congregacionpi rikhurichishasunman. Chayrayku sumajta qhawarikuna, mana congregacionta tʼaqanachinapaj.

2. ¿Imatá kay yachaqanapi qhawarisun?

² Kay yachaqanapeqa, qhawarisun imaschus tanqayta atiwasqanchejta hermanosninchejwan atipanakupi jina kanapaj. Qhawarillasuntaj, ñaupa tiempomanta Diospa wakin kamachisnin mana chayta ruwanankupaj mayta kallpachakusqankuta. Jinapis ñaupajtaqa qhawarisun, noqanchejraj allinta qhawarikunanchej kasqanta.

3. ¿Ima tapuykunapitaj piensarinanchej tiyan?

³ Allin kanman sapa kuti kay tapuykunapi piensarinanchej: “¿Wajkunamanta aswan sumaj kasqayta yuyaspallachu kusisqa kani? ¿Imataj congregacionpi yanapakunaypaj tanqawan? ¿Wajkunamanta aswan ñaupajpi kayta munasqaychu? Chayri, ¿mayqen hermanomanta, hermanamanta aswan ñaupajpi kayta munasqaychu? Manachayrí, ¿Jehovata tukuy sonqo sirviyta munasqaychu?”. Chay tapuykunapeqa tʼukurinanchejpuni tiyan. Qhepan parrafospitaj qhawarisun imatachus Biblia nisqanta.

4. Gálatas 6:3, 4 nisqanman jina, ¿imaraykutaj mana wajkunawan kikinchakunachu?

⁴ Bibliaqa niwanchej mana wajkunawan kikinchakunata (Gálatas 6:3, 4 leey). Imaraykuchus wajkunawan kikinchakuspaqa, aswan sumaj kasqanchejta yuyakusunman. Ajinamantataj jatunchakusunman chayri pisipaj qhawakusunman. Chayrayku manapuni allinchu wajkunawan kikinchakunanchej (Rom. 12:3). Grecia suyumanta Katerina sutiyoj hermanamanta parlarina. * Pay nin: “Wakin hermanasqa noqamanta nisqa aswan kʼachitasman rijchʼakoj kanku, sumajta predicaj kanku, aswan kʼachastaj kaj kanku. Chaytaj ni imapaj valesqayta yuyachiwaj”, nispa. Jehovaqa llajtanman pusamuwarqanchej mana alajitos, alajitas kasqanchejraykuchu, mana sumajta parlasqanchejraykuchu, nitaj sumaj rejsisqa kasqanchejraykuchu. Manaqa payta munakusqanchejrayku, Wawantapis kasukuyta munasqanchejrayku (Juan 6:44; 1 Cor. 1:26-31).

5. ¿Imatá hermano Hyunmanta yachakunchej?

⁵ Chantá piensarillasunmantaj: “Hermanos, ¿wajkunawan allinta kausakojta jinachu rejsiwanku chayri sapa kuti pillawanpis phiñanakojta jinachu?”. Hermano Hyunmanta parlarina. Payqa Korea del Surpi tiyakun. Yuyajtaj congregacionninmanta pay jina cargoyoj hermanos, aswan ñaupajpi kayta munasqankuta. Pay nin: “Paykunata qhawaraj kani. Chantapis casi ni ima nisqanku allinchu rijchʼawaj”, nispa. ¿Imataj karqa hermano ajina kasqanrayku? Hermano nin: “Ajina kasqaywanqa congregacionta tʼaqanacherqani”, nispa. Wakin amigosnenqa, reparacherqanku cambianan kasqanta. Hermano Hyuntaj cambiananpaj tukuy atisqanta kallpachakorqa. Kunantaj kʼacha anciano. ¿Imatá paymanta yachakunchej? Wajkunamanta nisqa aswan ñaupajpi kayta munasqanchejta reparakunchej chayqa, chay rato cambiananchej tiyan. Ajinamanta tukuywan allinpi kausakusun.

6. Gálatas 5:26 nisqanman jina, ¿imastaj wajkunawan atipanakupi jina kanapaj tanqawasunman?

⁶ (Gálatas 5:26 leey). ¿Imastaj wajkunawan atipanakupi jina kanapaj tanqawasunman? Qhasimanta jatunchakoj runa kay. Chay jina runaqa payllapaj imatapis munan. Chantá envidiakoj runa kay. Chay jina runapis mana wajpa kapuynillantachu munapayan, manaqa chay kapuynintapis pierdenanta munan. Arí, envidiakoj runaqa, runa masinta chejnikun. Chayrayku mana qhasimanta jatunchakunapaj, nitaj envidiakunapaj maytapuni kallpachakuna. Chaykunamantaqa uj millay onqoymanta jina jarkʼakuna.

7. ¿Imataj kanman qhasimanta jatunchakojtinchej, envidiakojtinchej ima? Uj kikinchaywan sutʼinchariy.

⁷ Qhasimanta jatunchakuyta, envidiakuyta imaqa kikinchasunman avionpa gasolinanpi juchʼuy qʼopitas kasqanwan. Ichapis avionqa phawarenqa, jinapis chay qʼopitas gasolina pasanan tubitosninta tapaykojtin, motornin  sayarpanman. Aviontaj niraj aeropuertoman chayashaspa chʼallpakunman. Ajinallataj kanman Jehovata unaytaña sirvej hermanowanpis. Chay hermano qhasimanta jatunchakushan, envidiakushantaj chayqa, chay avión jina chʼallpakunman (Pro. 16:18). Ajinamanta niña Jehovata sirvenqachu, llakiypi rikhurenqa, wajkunatapis llakichenqa. ¿Imatá ruwasunman mana qhasimanta jatunchakunapaj, nitaj envidiakunapaj? Qhepan parrafospi chayta qhawarina.

8. ¿Imataj yanapawasunman mana qhasimanta jatunchakunapaj?

⁸ Mana qhasimanta jatunchakunapajqa, apóstol Pablo Filiposmanta hermanosman yuyaychasqan yanapawasunman. Pay nerqa: “Ama churanakojkuna, nitaj qhasimanta jatunchakojkunaqa kaychejchu. Astawanqa kʼumuykukoj sonqo kaspa, wajkunata qankunamanta aswan kurajta jina qhawaychej”, nispa (Fili. 2:3). Wajkunata noqanchejmanta nisqa aswan kurajta jina qhawasun chayqa, imatapis sumajta ruwayta yachasqankumanta chayri sumaj yuyayniyoj kasqankumanta kusikusun. Astawanraj kusikusun chay yachasqankuwan Jehovata sirvishasqankumanta. Paykunapis Pabloj yuyaychasqanta japʼikonqanku chayqa, allin ruwasqasninchejta astawan qhawanqanku. Ajinamanta tukuy yanapakusun congregacionpi allinta, ujchasqataj kausakunapaj.

9. ¿Imatá ruwasunman mana envidiakunapaj?

⁹ ¿Imatá ruwasunman mana envidiakunapaj? Mana tukuy imatachu ruwayta atisqanchejta reparakuna. Ajinamantaqa, mana wajkunata imapipis atipaytapuni munasunchu. Astawanpis pikunachus noqanchejmanta nisqa imatapis aswan sumajta ruwanku, paykunamanta yachakusun. Ichapis uj hermanoqa sumajta discursan. Jina kajtin imaynatachus wakichikusqanta tapurisunman. Uj hermana miskʼita waykʼuyta yachan chaytaj, imitaswanchus ajinata waykʼusqanta tapurisunman. Uj joven hermanito mana piwanpis amigos kayta atillanchu chaytaj, ichá sumaj amigosniyoj hermanowan yuyaycharichikunman. Ajinamantaqa mana envidiakusunchu, astawanpis noqanchej imatapis allinta ruwayta yachakusun.

10. ¿Ima llakiypitaj Gedeón rikukorqa?

¹⁰ Kunantaj parlarina Gedeonmanta, Efraín ayllumanta kajkunamantawan. Gedeonqa Manasés ayllumanta karqa. Paywan 300 runasninwanqa, enemigosninkuta maqanakupi atiparqanku Jehová yanapasqanrayku. Paykunaqa mana chaymanta jatunchakorqankuchu. Maqanaku pasaytataj Efraín ayllumanta kajkunaqa, Gedeonwan siminakoj rerqanku. Chay runasqa Gedeonpaj phiñasqa kasharqanku mana qallariymantapacha paykunata wajyarisqanmanta Diospa enemigosninwan maqanakoj rinankupaj. Gedeonqa maqanakupi atipasqanwan Jehovaj sutinta jatuncharqa, llajtantataj jarkʼarqa. Efraín ayllumanta kajkunataj, ayllunku aswan sumajpaj qhawasqa kanallanpi piensasharqanku (Jue. 8:1).

11. ¿Imatá Gedeón nerqa Efraín ayllumanta kajkunaman?

¹¹ Gedeonqa kʼumuykukoj sonqowan Efraín ayllumanta kajkunaman nerqa: “Manachu reparakorqankichej, qankuna noqamanta astawan ruwasqaykichejta?”, nispa. Chantá yuyaricherqa imaynatachus Jehová paykunata jatuchaj imasta ruwasqankupi yanapasqanta. Ajinamanta paykunaqa “phiñakuyninkuta thasnukorqanku” (Jue. 8:2, 3). Gedeonqa mayta kallpachakorqa mana jatunchakunanpaj, ajinamanta Diospa llajtanpi allin kausay kananpaj.

12. ¿Imatataj Efraín ayllumanta kajkunamanta, Gedeonmanta ima yachakunchej?

¹² ¿Imatataj Efraín ayllumanta kajkunamanta, Gedeonmanta ima yachakunchej? Efraín ayllumanta kajkunamantaqa yachakunchej mana aswan sumajpaj qhawasqa kayta maskʼananchej kasqanta. Manaqa Jehová Diosta jatunchananchej kasqanta. Gedeonmantataj tatas, ancianos ima mayta yachakunkuman. Pillapis paykunapaj imata ruwasqankumanta phiñasqa kashan chayqa, imamantachus ajina kashasqanta entiendenankupaj kallpachakunkuman. Chantapis ancianosqa phiñakoj hermanota yuyarichinkuman imatachus allinta ruwasqanta. Chayta ruwanankupajqa kʼumuykukoj sonqo kananku tiyan, astawanraj chay phiñasqa hermanopuni pantasqa kajtenqa. Hermanosninchejpuni pantasqa kashasqankuta rikuchinamantaqa, paykunawan allinta kausakunapaj kallpachakuna.

13. ¿Ima llakiypitaj Ana rikukorqa chanta imaynatá llakiyninta atiparqa?

¹³ Anamantañataj parlarina. Qosanqa uj levita karqa, Elcana sutiyoj. Elcanaj ujnin warmenqa Penina karqa. Jinapis payqa Anata astawan munakorqa. “Peninaqa wawasniyoj karqa, Anatajrí mana”. Chayrayku “asipayaspa Anata llakichillajpuni”. Ajinamanta “Anaqa waqallajpuni, manataj mikhojchu” (1 Sam. 1:2, 6, 7). Jinapis Bibliaqa mana ninchu Ana imaynallamantapis Peninamanta vengakuyta  munasqanta. Astawanpis Anaqa llakiyninta Jehovaman willakorqa, pay yanapananpitaj confiarqa. Mana yachanchejchu Penina cambiasqantachus manachus. Jinapis Anaqa manaña llakikorqachu, sonqontataj tiyaykucherqa (1 Sam. 1:10, 18).

14. ¿Imatá yachakunchej Anamanta?

¹⁴ ¿Imatá yachakunchej Anamanta? Pillapis noqanchejwan atipanakuyta munashan chayqa, ama pay jinallataj ruwanachu. Nitaj atipanakuytapuni munanachu. Sajramanta sajrallawantaj kutichikunamantaqa, paywan allinyakunapaj kallpachakuna (Rom. 12:17-21). Ajinallapuni kajtintaj, noqanchej sonqo tiyasqallapuni kanapaj kallpachakuna.

15. ¿Imapitaj Apoloswan Pablowan kikin karqanku?

¹⁵ Kunantaj discípulo Apolosmantawan apóstol Pablomantawan parlarina. Paykunaqa Diosmanta Qhelqasqasta allinta yachaj kanku. Iskayninku sumaj rejsisqas, sumaj yachachejkunataj karqanku. Chantapis paykunaqa ashkha runasta yanaparqanku Jesuspa discipulosninman tukunankupaj. Jinapis ni mayqenninku atipanakupi jina kayta maskʼarqankuchu.

16. ¿Imayna runataj karqa Apolos?

¹⁶ Apolosqa “Alejandriamanta karqa”. Chay lugarqa chay tiempopi sumaj rejsisqa karqa. Runaspis chayman estudiaj rej kanku. Payqa sumajta parlaj, “Diosmanta Qhelqasqatapis allinta yachaj” (Hech. 18:24). Apolos Corintopi kashajtin, wakin hermanosqa waj hermanosmanta nisqa payllata aswan allinpaj qhawarqanku, Pablotapis pisipaj qhawarqanku (1 Cor. 1:12, 13). Chaywanpis chay hermanos ajina kanankupajqa, mana Apoloschu tanqarqa. Apolos congregacionpi tʼaqanakusta rikhurichinman karqa chayqa, Pabloqa ni imarayku Corintoman ujtawan kutinanta ninmanchu karqa (1 Cor. 16:12). Apolosqa sumajta  parlasqanrayku, Diosmanta Qhelqasqatapis allinta rejsisqanrayku, sumaj willaykunata willarqa, hermanosnintapis kallpacharqa. Chantapis llampʼu sonqo runa karqa. Imajtinchus Aquilawan Priscilawan “Diospa ñanninmanta aswan sutʼita” yachachejtinku, mana phiñakorqachu (Hech. 18:24-28).

17. ¿Imaynataj karqa apóstol Pablo?

¹⁷ Apóstol Pabloqa, sumajta yacharqa Apolos Jehovapaj allinta llankʼashasqanta. Jinapis Pabloqa mana llakikorqachu hermanos Apolosta aswan allinpaj qhawasqankumanta. Corintomanta hermanosman yuyaychasqanta leerispaqa, sutʼita reparanchej Pablo kʼumuykukoj sonqo, llampʼu sonqotaj kasqanta, paymantapis maychus kajllata yuyasqanta. Wakenqa nej kanku: “Noqa Pablojta kani”, nispa. Chayta nejtinkupis payqa mana jatunchakorqachu. Astawanpis nerqa Jehovata, Jesucristota ima jatunchanankuta (1 Cor. 3:3-6).

18. Kay 1 Corintios 4:6, 7 nisqanman jina, ¿imatataj Apolosmanta, Pablomanta ima yachakunchej?

¹⁸ ¿Imatataj Apolosmanta, Pablomanta ima yachakunchej? Jehovapaj tukuy atisqanchejta llankʼashasqanchej, ashkha runastataj bautismoman chayanankupaj yanapashasqanchejqa, Jehovaj yanapaynillanwan kasqanta. Yachakullanchejtaj congregacionpi cargosniyoj kaspaqa, hermanoswan allinta, ujchasqataj kausakunapaj astawan kallpachakunanchej kasqanta. Maytapuni agradecekunchej ancianoswan siervos ministerialeswan allinta, ujchasqataj kausakunanchejpaj yanapawasqanchejmanta. Paykunaqa Bibliaman jinapuni imatapis yuyaychariwanchej. Chantapis mana allinpaj qhawasqa kaytachu maskʼanku. Manaqa yanapawanchej Jesusta kasukunanchejpaj, pay jinataj kananchejpaj (1 Corintios 4:6, 7 leey).

19. ¿Imapajtaj mayta kallpachakunanchej tiyan? (“ Ama atipanakusta rikhurichinachu” nisqa recuadrota leeriy).

¹⁹ Imata sumajta ruwayta atisqanchejpis chayri yachasqanchejpis Jehová Diosmanta jamun. Chayta japʼisqanchejman jinataj, ‘purajmanta sirvinakuyta’ atinchej (1 Ped. 4:10). Ichá yuyasunman pisillata yanapakushasqanchejta. Jinapis imaynatachus juchʼuy ladrillitoswan jatun wasita ruwakun, ajinallatataj pisi imasta ruwasqanchejwanqa, congregacionpi tukuy ujchasqa kanapaj yanapakunchej. Chayrayku, mayta kallpachakuna ama wajkunawan atipanakupi jina kanapaj. Chantapis tukuy atisqanchejta yanapakuna congregacionpi allinta, ujchasqataj kausakunapaj (Efe. 4:3).