Jehová Diosqa casarakojkuna kusisqas, sumaj ujchasqastaj kausakunankuta munan (Mat. 19:4-6). Casarakuyta munashanchej chay, ¿imaynatá allin qosata chayri allin warmita tarisunman? Jehová Diosqa yachan imatachus ruwananchejta allin rinawanchejpaj noviashajtinchej, casarakojtinchej ima. Chayrayku Bibliapi sumajta yuyaychawanchej. Chayta japʼikusun chayqa, kusisqa kausakusun. Chaypajtaj wakin yuyaychaykunata qhawarina.

Yachanchej jina, “tukuy imamanta nisqaqa runaj sonqonmin aswan chʼawka, nitaj chaypaj jampi kanchu” (Jer. 17:9). Uj jovenwan uj sipaswan casarakuyta munajtinkoqa, rejsinakuyta qallarispa ichá purajmanta usqhayllata munanakuyta qallarinkuman. Mana yuyaychakuspallataj imatapis ajllankuman chayri ruwarpankuman. Anchata munanakusqankuraykulla casarakuyta ajllajkunaqa, aswan qhepaman llakiykunallapi rikukunkuman (Pro. 28:26). Chayrayku mana allinchu kanman noviosqa qallariymantapacha mayta munanakusqankuta ninakunanku chayri niraj allinta rejsinakushaspa casarakunankumantaña parlananku.

Proverbios 22:3 nin: “Yuyayniyojqa sajra kajta rikuspa, pakakun; mana yuyayniyojrí sajraman chimpaykun, chantaqa ñakʼarin”, nispa. ¿Imajtintaj mana allinchu Internetnejta rejsinakunapaj wakichisqa paginaspi piwanpis rejsinakuy? Wakenqa chaynejta rejsinakusqankurayku aswan qhepaman repararqanku chay rejsisqanku runa engañaykusqanta. Chantapis wakin runasqa Internetpi waj sutiswan rejsichikunku wajkunata engañanankupaj, qolqeta suwanankupaj ima. Wakin kuteqa chayta ruwajkuna Jehovaj testigon kasqankuta niyta yachanku.

Chantapis Internetnejta piwanpis rejsinakuspaqa waj llakiykunapi rikukullasunmantaj. Chay programasmanta wakenqa, wakichisqa kashan iskay entiendenakusqankuman rijchʼakoj runaspaj jina. Jinapis chayqa runata engañanallapaj. Chayrayku runaspa wakichisqanku programaspi atienekoyqa mana allinchu kanman. Imajtinchus piwanchus casarakunata ajllayqa mana pujllakuy jinachu. Chantapis chay programasqa, mana Bibliapi yuyaychaykuna jina sumajta yanapawasunmanchu (Pro. 1:7; 3:5-7).

Proverbios 14:15 ajinata yuyaychawanchej: “Uj wampu runaqa pejpa nisqantapis japʼikullan; yuyayniyoj runarí allintaraj qhawakun maynintachus  rinanta”, nispa. Chayrayku niraj pichus sumaj qosa chayri sumaj warmi kananta nishaspa, allintaraj payta rejsinanchej tiyan. Jinapis Internetnejllata paywan parlaspaqa, mana allinta rejsiyta atisunmanchu. Chantapis Internetnejtaqa imaynachus kasqanta, imatachus ruwasqanta qhawaspa chayri ashkha mensajesta apachinakuspapis manapuni sumajta rejsinakuyta atisunmanchu. Wakenqa Internetnejta paykunapaj jina qosata chayri warmita tarisqankuta yuyarqanku. Jinapis uyapura rejsinakuspaqa mana yuyasqankuman jinachu kasqanta repararqanku.

Uj salmista nerqa: “Llulla runaswan ni jaykʼaj kawsakorqanichu, nitaj puraj uyaswanqa tantakorqanichu”, nispa (Sal. 26:4). Ashkha runasqa wajkunawan allinpaj qhawachikuyta munaspa, Internetpi paykunamanta llulla imasta churanku. Chaytataj allillanpaj qhawanku. Internetnejta chayri mensajesnejtaqa mana sutʼita willawasunmanchu imayna runapunichus kasqankuta. Ichá wakin runasqa ninkuman Jehovaj testigon kasqankuta. Jinapis, ¿bautizasqachu kanku? ¿Kallpachakunkuchu Jehovaman astawan qayllaykunankupaj? ¿Congregacionninkumanta hermanos paykunata allinpajchu qhawanku? Chayri, ¿sajra imastachu ruwanku? ¿Amigosninchej kanankupaj jinatajchu kanku? (1 Cor. 15:33; 2 Tim. 2:20, 21). Chantapis Bibliaj nisqanman jina casarakunankupaj, ¿nichu imapis jarkʼan? Chaykunataqa yachananchejpuni tiyan. Chaytataj yachasunman payta sumajta rejsej testigoswan parlarispa (Pro. 15:22). Chantapis Diospa kamachisnenqa, ni yuyallasunmanpischu ‘uj yugollapi ujchakuyta mana creejwan’ (2 Cor. 6:14; 1 Cor. 7:39).

Yachakunchej jina, Internetnejta rejsinakunapaj wakichisqa paginaspi piwanpis rejsinakuspaqa llakiyllapi rikhurisunman. Chantá, casarakuyta munajkuna, ¿imaynatá sumaj qosata chayri sumajta warmita tarinkuman? Jehovaj testigosnenqa wajkunata rejsiyta atinchej reunionesman, asambleasman, waj tantakuykunaman ima rispa (2 Cor. 6:14; 1 Cor. 7:39).

Kay jatun onqoy COVID-19 nisqa kasqanrayku mana reunionesman, nitaj asambleasmanpis riyta atinchejchu. Jinapis computadoranejta chayri celularnejta reunionesman conectakunchej. Chaypitaj waj soltero hermanosta chayri soltera hermanasta rejsiyta atinchej. Chantapis sumajta discursasqanta chayri comentasqanta uyariyta atinchej (1 Tim. 6:11, 12). Reunión pasaytataj juchʼuy salitaspi parlarikuyta atinchej. Chantapis rejsiyta atillasunmantaj waj hermanoswan parlarikunapaj Internetnejta conectakuspa. Ajinamanta pitachus qhawakushasqanchejta allinta rejsisunman, imaynachus wajkunawan kasqantapis reparasunman (1 Ped. 3:4). Ajinamanta tiemponwan reparasun noqanchej jinallatajchus chayri manachus Diosta yupaychayta munasqanta. Reparallasuntaj noqanchejpaj jinachus manachus kasqanta.

Uj soltero chayri uj soltera casarakuyta munaspa Bibliaj yuyaychasqanta kasukonqa chayqa, casarakuspa kusisqa kausakonqa. Proverbios 18:22 nin: “Pichus casarakunampaj warmita tarejqa allin kayta tarin, chaywantaj Tata Diosqa kʼacha yanapayninta payman rikuchin”, nispa.