1. ¿Imaynamantataj Jehová llajtanman pusamuwarqanchej?

¿IMAYNAPÍ Jehovaj testigonman tukorqanchej? Ichá tatasninchej, trabajomanta chayri escuelamanta compañeronchej manachayrí uj testigo wasimanta wasi predicashaspa ‘sumaj willaykunata’ willariwarqanchej (Mar. 13:10). Chaymantataj uj hermano chayri uj hermana Bibliamanta yachachinawanchejpaj tiempochakorqa, kallpachakorqataj. Ajinapi Jehová Diosta munakorqanchej, pay munakuwasqanchejtataj yachakorqanchej. Ajinamanta Jehová Diosqa llajtanman pusamuwarqanchej. Kunantaj Jesucristoj yachachisqan kasqanchejrayku, wiñaypaj kausakuyta suyakushanchej (Juan 6:44). Jehová Diosqa uj hermanonejta chayri uj hermananejta paymanta cheqa kajta yachachiwarqanchej. Chantapis saqewarqanchej payta yupaychananchejta. Chaymantataj mayta agradecekunchej.

2. ¿Imatá kay yachaqanapi yachakusun?

² Cheqa kajta yachasqanchejrayku, wajkunata yanapayta atinchej kausayman pusaj ñanta noqanchejwan khuska rinankupaj. Ichapis predicaytaqa mana manchachikunchejchu. Jinapis ichá manchachikunchej pillamanpis Bibliamanta yachachiyta. Jina kajtenqa, kay yachaqanamanta wakin yuyaychaykuna yanapawasun. Kay yachaqanapeqa yachakusun, imaraykuchus runasman yachachinanchej kasqanta. Yachakullasuntaj Bibliamanta runasman yachachiyta mana atinchejchu chay, imatachus ruwanata. Jinapis ñaupajtaqa yachakusun, sumaj willaykunata predicananchej kasqanta, yachachinanchejtaj kasqanta.

3. ¿Imaraykutaj sumaj willaykunata predicanchej?

³ Jesusqa kay jallpʼapi kashaspa yachachisqasninman kamacherqa, ñaupajtaqa Diospa Gobiernonmanta sumaj willaykunata  predicanankuta. Yachacherqataj imaynatachus chayta ruwanankuta (Mat. 10:7; Luc. 8:1). Payqa, yachachisqasninman nerqa imatachus ruwanankuta runas sumaj willaykunata uyarejtinku chayri mana uyarejtinku (Luc. 9:2-5). Chantapis nillarqataj kay jallpʼaj kʼuchusnintinpi willanankuta “tukuy laya runas yachanankupaj” (Mat. 24:14; Hech. 1:8). Paykunaqa, runas uyariyta munajtinkupis manapis, Diospa Gobiernonmanta, imatachus chay Gobierno ruwananmanta ima willanankupuni karqa.

4. Mateo 28:18-20 nisqanman jina, Diospa Gobiernonmanta sumaj willaykunata predicaspapis, ¿imatawan ruwananchej tiyan?

⁴ Chantapis Jesusqa yachachisqasninman kamachillarqataj runasman yachachimunankuta, paykunapis kamachisqanta kasukunankupaj. Wakin runasqa ninku, Jesuspa kamachisqanqa jaqay tiempollapaj kasqanta. Jinapis chayqa mana jinachu. Imajtinchus Jesusqa nerqa chay sumaj willaykunata, yachachisqasnin willanallankutapuni “kay mundoj imasnin tukukunankama” (Mateo 28:18-20 leey). Jesusqa uj kuti 500 kuraj tantasqa discipulosninman rikhurerqa. Chay kutipisina paykunata kamacherqa willamunankuta (1 Cor. 15:6). Chantapis Jesusqa, apóstol Juanman uj mosqoypi jina sutʼita nerqa, tukuy yachachisqasnin runasman Jehovamanta yachachinanku kasqanta (Apo. 22:17).

5. Kay 1 Corintios 3:6-9 nisqanman jina, ¿imawantaj apóstol Pablo predicayta, yachachiyta ima kikincharqa?

⁵ Apóstol Pabloqa predicayta, yachachiyta ima tarpuywan kikincharqa. Ajinamanta sutʼincharqa mana mujitusllatachu tarpuna kasqanta. Payqa Corintomanta hermanosta yuyaricherqa: “Noqa plantarqani, Apolostaj qarparqa [...]. Qankunataj Diospa chajran kankichej, mayqentachus pay llankʼashan chay”, nispa (1 Corintios 3:6-9 leey). ‘Diospa chajranpi’ trabajajkunaqa, mana mujitusllatachu tarpunchej, manaqa qarpanchej, pʼutumojtintaj cuidanchej (Juan 4:35). Jinapis yachanchej Dioslla chay mujitusta wiñachisqanta.

6. Estudionchejman Bibliamanta yachachishaspa, ¿imapajtaj yanapananchej tiyan?

⁶ Noqanchejqa maskʼanchej “wiñay kausayta japʼinankupaj allin sonqoyoj” kajkunata (Hech. 13:48). Runas Jesuspa yachachisqasninman tukunankupajqa, paykunata yanapananchej tiyan, 1) Bibliamanta yachakushasqanta entiendenankupaj, 2) chaypi creenankupaj, 3) yachakusqankuman jinataj kausanankupaj (Juan 17:3; Col. 2:6, 7; 1 Tes. 2:13). Paykunataqa tukuy hermanos yanapasunman reunionesman jamojtinku kʼachamanta napaykuspa, allin jamusqa kasqankutataj nispa (Juan 13:35). Ichapis Bibliamanta yachachej hermano chayri hermanaqa estudionta yanapananpaj tiempochakunan, kallpachakunantaj kanqa. Ichapis estudionqa llulla creenciasninta chayri “sumaj jarkʼachasqa perqasman rijchʼakoj” costumbresninta saqenan kashan (2 Cor. 10:4, 5). Wakin estudiosqa ashkha killaspi llulla creenciasninkuta, costumbresninkuta ima saqenku. Chaymantataj bautizakuyta atinku. Jinapis paykunata cambianankupaj yanapasqanchejqa mana qhasichu.

7. ¿Imaraykutaj runasman Diosmanta willanchej, yachachinchejtaj?

⁷ ¿Imaraykutaj runasman Diosmanta willanchej, yachachinchejtaj? Chayta ruwanchej Jehovata munakusqanchejrayku. Jesusqa kamacherqa predicanata, yachachinata ima. Chayta kasukunapaj tukuy atisqanchejta kallpachakuspaqa, Diosta munakusqanchejta rikuchinchej (1 Juan 5:3). Jehová Diosta  munakusqanchejrayku wasimanta wasi predicaj riyta qallarerqanchej. Chaytataj ichá mana atillarqanchejchu. Chantapis qallariypi predicashaspaqa, runaswan parlariyta ichá manchachikorqanchej. Jinapis Jesuspa kamachisqanta kasukusqanchejrayku predicarqanchej. Kunantaj ichá niña anchata manchachikunchejchu. Jinapis Bibliamanta yachachiytañataj manchachikushasunman. Chaypajqa Jehovamanta yanapata, kallpata ima mañakuna. Ajinamanta Jehovaqa yanapawasun runasman Bibliamanta yachachiyta munanapaj.

8. Marcos 6:34 nisqanman jina, ¿imaraykutaj runasman yachachillanchejtaj?

⁸ Chantapis runasman cheqa kajta yachachillanchejtaj, paykunata munakusqanchejrayku. Uj kuti Jesuswan discipulosninwanqa, diantinta predicasqankurayku, ancha saykʼusqas kasharqanku. Chayrayku chʼinnejman samarikoj rerqanku. Jinapis chaypeqa ashkha runas suyashasqanku. Jesusqa paykunata khuyakuspa “tukuy imata yachacherqa” (Marcos 6:34 leey). Jesusqa saykʼusqa kashaspapis yachachillarqapuni, paykunata khuyakusqanrayku, yanapaytataj munasqanrayku. Payqa yacharqa chay runas mayta sufrishasqankuta, allin kausaytataj necesitasqankuta. Kay tiempomanta runaspis chayllatataj necesitanku. Imaraykuchus paykunaqa chinkasqas, saqerpayasqastaj kashanku mana michejniyoj ovejas jina. Apóstol Pablo nerqa paykunaqa “kay mundopi mana suyakuyniyoj, mana Diosniyojtaj” kashasqankuta (Efe. 2:12). Chantapis paykunaqa wañuyman pusaj ñanta rishanku (Mat. 7:13). Maypichus predicanchej chaynejpi tiyakoj runasqa, ni imata Diosmanta yachankuchu. Paykunataqa munakusqanchejrayku, khuyakusqanchejraykutaj yanapayta munanchej. Arí, paykunataqa yanapasunman Bibliamanta yachachispa.

9. Filipenses 2:13 nisqanman jina, ¿imaynatá Jehová yanapawasunman?

⁹ Bibliamanta yachachinapajqa, tiempochakuna tiyan. Ichá chayrayku manchachikunchej pillamanpis Bibliamanta yachachiyta. Jina kajtenqa, Jehovaman willakuna imaynachus kashasqanchejta. Mañakunataj pillatapis Bibliamanta estudiachiyta munananchejpaj yanapanawanchejta (Filipenses 2:13 leey). Apóstol Juan nerqa, Diosqa munayninman jina mañakojtinchej uyarinawanchejtapuni (1 Juan 5:14, 15). Chayrayku yachanchej, Jehová yanapanawanchejta runasman Bibliamanta yachachiyta munananchejpaj.

10, 11. ¿Imaraykutaj Bibliamanta yachachiyta mana atisqanchejta yuyasunman?

¹⁰ Diosmanta yachachimunanchejpuni kasqanta yachanchej. Jinapis, ichá mana atillanchejchu. Chayrayku qhawarisun imaschus jarkʼashawasqanchejta. Qhawarillasuntaj imastachus ruwanata predicanallapajpuni, yachachinallapajpunitaj.

¹¹ Ichá yuyanchej mana munasqanchejman jinapunichu ruwayta atisqanchejta. Wakin hermanosqa viejitosña kanchej chayri onqosqas kashanchej. Jinapis, ¿imatá ruwasunman? Kay jatun onqoy COVID-19 nisqa kashajtin, yachakorqanchej telefononejta chayri Internetnejta Bibliamanta runasman yachachiyta atisqanchejta. Chayrayku ichá wasinchejmantapacha pillamanpis Bibliamanta yachachiyta qallarisunman. Wakin runasqa Bibliamanta yachakuyta munanku. Jinapis mana atinkuchu predicashanchej chay horaspi yachakuyta. Paykunaqa ichá sutʼiyayta chayri chʼisiyayta yachakunankupaj tiempituyoj kanku. Chayrayku allin kanman chay horaspi yachachinanchejpaj tiempochakunanchej. Jesuspis Nicodemoman chʼisinpi yachacherqa. Imaraykuchus  Nicodemoqa chay horaspi yachakuyta munarqa (Juan 3:1, 2).

12. Bibliamanta yachachinapaj mana wakichisqachu kashasqanchejta yuyanchej chay, ¿imastaj yanapawasunman?

¹² Ichá yuyanchej Bibliamanta yachachinapaj mana wakichisqachu kashasqanchejta. Ichá yuyanchej yachachinapaj niraj allintachu yachasqanchejta chayri niraj sumajtachu yachachiyta atisqanchejta. Jinapis kinsa imas yanapawasun. Ñaupaj kaj, Jehovaqa yachan wakichisqa kashasqanchejta wajkunaman yachachinapaj (2 Cor. 3:5). Iskay kaj, Jesusqa ‘tukuy atiyta cielopi jinallataj kay jallpʼapipis japʼerqa’. Paytaj runasman yachachinata kamachiwanchej (Mat. 28:18). Kinsa kaj, Jehová Dios, hermanosninchej ima yanapawasunman. Jehovaqa Jesusta yanaparqa runasman yachachinanpaj, noqanchejtapis yanapallawasuntaj (Juan 8:28; 12:49). Chantapis parlarisunman predicanapaj grupomanta encargado hermanowan, uj precursorwan chayri uj experienciayoj hermanowan. Paykunaqa yanapawasun pillamanpis Bibliamanta yachachiyta qallarinapaj. Chantapis estudiosninkuman acompañaspaqa, yachakusunman sumajta Bibliamanta yachachiyta.

13. ¿Imaraykutaj waj jinasmanta yachachiyman yachaykukunanchej tiyan?

¹³ Ichá yuyanchej waj jinasmanta chantá mosoj publicacioneswan yachachiyta mana atinanchejta. Kunanqa waj jinamanta Bibliamanta yachachinchej. Chaypajqa Wiñaypaj kusisqa kausakuy nisqa librowan yanapachikushanchej. Chay librowan yachachinapajqa sumajta wakichikunanchej tiyan. Chantapis pisi parrafosllata leenchej, estudionchejwantaj astawan parlarinchej. Yachachishaspaqa videosta rikuchinchej, Internetpi kapuwasqanchej yanapaswantaj yanapachikunchej, kay JW Library^® nisqanwan jina. Chaykunata niraj allintachu apaykachayta yachanchej chaytaj, hermanoswan yanapachikusunman. Yachanchej jina, runasqa imatapis waj jinamanta ruwayman mana yachaykukuyta atillanchejchu. Jinapis Jehová Dioswan hermanosninchejwanqa, yanapawasun Bibliamanta waj jinamanta yachachinanchejpaj. Chayta ruwaytaj astawan gustawasun. Uj precursor nerqa, waj jinamanta yachachisqanchejqa, “may sumaj kasqanta yachakojpaj jinallataj yachachejninpajpis”.

14. 1) Maypichus predicanchej chaynejpi ni pi uyariyta munawajtinchej, ¿imaraykutaj predicanallanchejpuni tiyan? 2) ¿Imaynatá sonqochawanchej 1 Corintios 3:6, 7 versiculospi nisqan?

¹⁴ Ichá yuyanchej maypichus predicanchej chaynejpi ni pi Bibliamanta yachakuyta munasqanta. Wakin runasqa, Diosmanta willasqanchejta mana uyariyta munankumanchu. Wakintaj ni predicajtapis saqewasunmanchu. Jinapis, ¿imaraykutaj predicanallanchejpuni tiyan? Kay mundoqa sapa día cambiashan, chayrayku runaspa kausayninpis cambiashallantaj. Chantapis Diosmanta willasqanchejta mana uyariyta munawarqanchejchu chaykunaqa, ichapis aswan qhepaman yachakuyta munanqanku (Mat. 5:3). Wakin runasqa aswan ñaupajpi ni imarayku publicacionesninchejta japʼikuyta munaspapis, Bibliamanta yachakuyta qallarerqanku. Jehovaqa ‘cosechaj Dueñon’ kasqanrayku, munan plantanallanchejtapuni, qarpanallanchejtapunitaj. Jinapis pay mujuta wiñachin (Mat. 9:38; 1 Cor. 3:6, 7). Ni piman Bibliamanta yachachishanchejchu chaypis, Jehová Diosqa kallpachakusqanchejta allinpaj qhawan, manataj mashkhatachus ruwasqanchejtachu. Chayta yachaytaj mayta sonqochawanchej. *

15. ¿Imaynataj Jehová sientekun uj runa Bibliamanta yachakojtin, yachakusqantataj wajkunaman willarejtin?

¹⁵ Jehová Diosqa mayta kusikun uj runa Bibliamanta yachakojtin, yachakusqantataj wajkunaman willarejtin (Pro. 23:15, 16). Chantapis maytachá kusikullantaj kay tiempopi tukuy atisqanchejta predicajtinchej, yachachejtinchej ima. Kay jatun onqoy kajtinpis, septiembre de 2019 watamanta agosto de 2020 watakama 7.705.765 estudiosta ruwarqanchej. Ajinamanta 241.994 runasta yanaparqanchej Jehová Diosman kausayninkuta qopunankupaj, bautizakunankupaj ima. Paykunapis wajkunata yanapallanqankutaj Jesuspa discipulosninman tukunankupaj (Luc. 6:40). Jehová Diosqa, mayta kusikun runasman paymanta yachachejtinchej.

16. ¿Imata ruwanapajtaj kallpachakusunman?

¹⁶ Runasman Jehová Diosta munakuyta yachachinapajqa, mayta kallpachakunchej. Jinapis Jehová yanapawanchej paymanta yachachinapaj. Chayrayku allin kanman uj runallamanpis Bibliamanta yachachinapaj kallpachakunanchej. Atikojtenqa, tukuy predicasqanchej runasman Bibliamanta yachachiyta munasqanchejta nisunman. Ichapis paykunaqa yachakuyta munanqanku. Jehová Diostaj chayta ruwanapaj kallpachakusqanchejmanta bendeciwasunpuni.

17. ¿Imaynataj sientekusun pillamanpis Bibliamanta yachachispa?

¹⁷ Bibliamanta wajkunaman willariy, yachachiy imaqa, may sumajpuni. Chayta ruwaspataj mayta kusikunchej. Apóstol Pabloqa, Tesalonicamanta ashkha runasta Jesuspa discipulosninman tukunankupaj yanaparqa. Chayta ruwasqanrayku may kusisqapuni kashasqanmanta kayta nerqa: “Señor Jesuspa kutimunan tiempopi, ¿imataj kanqa suyakuyniyku, kusikuyniyku chayri kusikuna pilluyku paypa ñaupaqenpiri? ¿Manachu qankuna kankichej? Arí, qankuna kankichej sonqo juntʼasqa kayniyku, kusikuyniykutaj”, nispa (1 Tes. 2:19, 20; Hech. 17:1-4). Kay tiempopipis ashkha cristianosqa pay jinallataj kusikunku. Hermana Stephaniemanta parlarina. Paywan qosanwanqa, ashkha runasta bautizakunankupaj yanaparqanku. Pay nin: “Maytapuni kusikunchej runasta Jehová Diosman kausayninkuta qopunankupaj yanapaspaqa”, nispa.