1. ¿Imaynamantá yachanchej Jesús kamachiyta qallarisqantaña?

 KAY mundo astawan sajrayapushasqanta rikuspa, ¿creeyta atillasunmanchu kausay allinyananta? Familiasqa niña ñaupajta jinachu munanakunku. Runasqa astawan sajrayapushanku, aswan phiñas kanku, paykunallapajtaj imatapis munanku. Ashkhasqa mana autoridadespi atienekuyta atillankuchu. Jinapis chayqa rikuchiwanchej tumpamantawan kausay allinyananta. ¿Imajtin? Imajtinchus runasqa, ‘qhepa pʼunchaykunamanta’ profecía nisqanman jinapuni kashanku (2 Tim. 3:1-5). Kʼacha sonqoyoj runasqa mana negankumanchu chay profecía juntʼakushasqanta. Chay profecía juntʼakushasqantaj rikuchiwanchej Jesucristo Rey jina Diospa Gobiernonpi kamachiyta qallarisqantaña. Jinapis chay profeciaqa, Diospa Gobiernonmanta parlaj ashkha profeciasmanta ujnillan. Kay qhepa watasllapi juntʼakushasqan profeciasta ukhunchareyqa, creeyninchejta astawan sinchʼiyachenqa. Chayta kay yachaqanapi yachakusun.

2. ¿Imastá kay yachaqanapi yachakusun, chanta imaraykutaj? (Tapapi dibujomantawan parlariy).

² Kay yachaqanapeqa kay profeciasta ukhuncharisun: 1) Diospa Gobiernon maykʼajchus kamachiyta qallarisqanta reparanapaj yanapawasqanchej profeciata. 2) Cielopi Diospa Gobiernonmanta Jesús Rey kasqanta reparanapaj yanapawanchej chay profeciasta. 3) Imaynatachus Diospa Gobiernonpa  enemigosnin chinkachisqa kanankumanta parlaj profeciasta ima. Chay profecías juntʼakusqanqa uj rompecabezas jina armaykukushan, reparachiwanchejtaj ima tiempopiñachus Jehovaj churasqan horariopi kausakushasqanchejta.

3. Daniel 7:13, 14 versiculosmanta profecía, ¿imatá Jesusmanta niwanchej?

³ Daniel 7:13, 14 versiculosmanta profeciaqa niwanchej, Jesucristoqa Diospa Gobiernonmanta sumaj Rey kananta. Nillantaj tukuy nacionesmanta runasqa payta kusisqas ‘sirvinankuta’, nitaj cuentanmanta waj rey kananta. Daniel libromanta waj profeciataj nin Jesusqa qanchis tiempos tukukuyta Gobiernonta japʼinanta. ¿Yachayta atisunmanchu maykʼajchus chay kasqanta?

4. ¿Imaynatá Daniel 4:10-17 yanapawanchej maykʼajchus Jesús kamachiyta qallarisqanta yachanapaj? (Sutʼinchaynintawan qhawariy).

⁴ (Daniel 4:10-17 leey). ‘Qanchis tiemposqa’ 2.520 wataswan ninakun, qallarerqataj 607 watapi Jesús niraj jamushajtin. Chay watapi babiloniosqa Jehovaj sutinpi kamachej qhepa kaj reyta Jerusalenmanta orqhorqanku. Tukukorqataj 1914 watapi. Chay watapi Jehovaqa Gobiernonmanta Rey kananpaj Jesusta churarqa, pichus “chayta japʼinanpaj derechoyoj karqa” chayta (Eze. 21:25-27). *

5. ¿Imamanta mana iskayrayanapajtaj ‘qanchis tiemposmanta’ profecía yanapawanchej?

⁵ ¿Imaynatá kay profecía yanapawanchej? ‘Qanchis tiemposmanta’ profeciata entiendeyqa, sutʼita reparachiwanchej Jehovaqa maychus tiemponpipuni nisqasninta juntʼasqanta. Jehovaqa nerqaña maykʼajchus Gobiernonta sayarichinanta. Chay nisqan tiempopipunitaj sayaricherqa. Chayrayku mana iskayrayasunmanchu chay waj profeciaspis nisqan tiempollapitaj juntʼakunanta. Arí, Jehovaj pʼunchaynenqa ‘mana qhepata chayamonqachu’ (Hab. 2:3).

6. 1) ¿Imastaj reparachiwanchej Jesús kamachishasqantaña? 2) ¿Imaynatá Apocalipsis 6:2-8 versiculospi kaj profecía chayta rikuchillantaj?

⁶ Jesusqa wañupunan qayllata nerqa imaschus mundontinpi pasananta. Yachachisqasnintaj chayta rikuspa reparananku karqa Jesusqa cielopi kamachiyta qallarisqantaña. Pay nerqa guerras, yarqhaykuna, terremotos ima kananta. Chantapis nillarqataj ‘kaynejpi jaqaynejpi’ wañuchej onqoykuna kananta. Chaykunamanta ujnintaj coronavirus onqoy kashan. Chay imasqa Cristoj kutimunan tiempomanta señal jina kanku (Mat. 24:3, 7; Luc. 21:7, 10, 11). Jesusqa cieloman ripusqanmanta 60 watas kurajninman, apóstol Juanman chay imas pasanantapuni nillarqataj (Apocalipsis 6:2-8 leey). Tukuy chay imastaj juntʼakushan Jesús 1914 watapi Rey jina kamachiyta qallarisqanmantapacha.

7. ¿Imaraykutaj Jesús kamachiyta qallarisqantawan astawan kay mundo sajrayapun?

⁷ ¿Imaraykutaj Jesús kamachiyta qallarisqantawan astawan kay mundo sajrayapun? Apocalipsis 6:2 nin Jesusqa Rey kaytawankama Diablowan demoniosninwan ima maqanakusqanta. Apocalipsis capítulo 12 nisqanman jinataj, Satanasqa chay guerrapi atipachikorqa, paywan demoniosninwantaj kay jallpʼaman wijchʼuchikamorqanku. Satanastaj may phiñasqa kasqanrayku kay jallpʼapi runaswan rabianta pagachikuyta qallarerqa. Chayrayku  Bibliaqa nin: “Ay jallpʼamanta”, nispa (Apo. 12:7-12).

8. ¿Imaynatá yanapawanchej Diospa Gobiernonmanta profecías juntʼakushasqan?

⁸ ¿Imaynatá kay profecías yanapawanchej? Kay mundo astawan sajrayasqan, runaspis astawan sajrayasqankoqa reparachiwanchej Jesús Rey jina kamachiyta qallarisqantaña. Chayrayku runas paykunallapaj imatapis munasqankuta rikuspa chayri astawan sajrayasqankuta rikuspa llakikunamantaqa, yuyarikuna ajina kasqankuwan Bibliaj profecianta juntʼashasqankuta. Chayqa rikuchin Diospa Gobiernon kamachishasqantaña (Sal. 37:1). Armagedón astawan qayllamusqanman jinataj kay mundoqa astawan sajrayallanqapuni (Mar. 13:8; 2 Tim. 3:13). Mayta agradecekunchej munakuyniyoj Tatanchej Jehovaman, kay mundopi imaraykuchus chay imas kashasqanta entiendechiwasqanchejmanta.

9. Daniel 2:28, 31-35 versiculospi profecía, ¿imatataj nin qhepa kaj atiyniyoj gobiernomanta, chanta maykʼajtaj kamachiyta qallarerqa?

⁹ (Daniel 2:28, 31-35 leey). Kay profeciaqa kay tiempopi juntʼakushan. Rey Nabucodonosorpa mosqokusqanqa imaschus qhepa pʼunchaykunapi pasananta rikucherqa, Jesús kamachiyta qallarisqantawan. Biblia nisqanman jina qhepa kaj atiyniyoj gobiernopis kay jallpʼapi Jesuspa enemigosninmanta ujnin kanan karqa. Chay gobiernoqa ninakun fierromantawan tʼurumantawan ruwasqa chakiswan. Chay atiyniyoj gobiernotaj kamachishanña. Kamachiytataj qallarerqa Primera Guerra Mundial kashajtin, maypachachus Reino Unidowan Estados Unidoswan ujchaykukorqanku chaypacha. Nabucodonosorpa mosqoyninmanta lanteqa iskay imasta reparachiwanchej  kay qhepa kaj atiyniyoj gobiernomanta. Chaytaj ñaupaj gobiernosmanta waj jina kasqanta rikuchin.

10. 1) ¿Imajtintaj Danielpa profecianman jina kay qhepa kaj atiyniyoj gobierno mana munayninta ruwayta atillanchu? 2) ¿Imamantá allinta qhawarikunanchej tiyan? (“ Pajtataj tʼuruman chajrukusunman” nisqa recuadrota leeriy).

¹⁰ Ñaupaj kaj, chay mosqoymanta ñaupaj kaj atiyniyoj gobiernosqa oromanta jina, qolqemanta jina uj metalllamanta karqanku. Reino Unidowan Estados Unidoswantaj fierrowan tʼuruwan chajrusqa karqanku. Tʼuroqa ninakun “runaspa mirayninwan” (Dan. 2:43, sutʼinchaynin). Kay tiempopi sutʼita rikushanchej runasqa elecciones kajtin nisqankutapuni valechiyta munasqankuta. Derechosninkuta valechiyta munaspa campañasta ruwanku, marchasta ruwanku, sindicatospi organizasqas kanku. Chayrayku kay qhepa kaj atiyniyoj gobiernoqa mana munayninta ruwayta atillanchu.

11. Reino Unidowan Estados Unidoswan kamachishasqanku, ¿imaynatá reparachiwanchej tukukuy tiempopiña kausakushasqanchejta?

¹¹ Iskay kaj, Reino Unidowan Estados Unidoswan lantej chakinwan ninakusqankurayku, manaña paykunaj qhepanta waj atiyniyoj gobierno kanqañachu. Paykuna kanku qhepa kaj atiyniyoj gobierno. Chay atiyniyoj gobiernotataj Diospa Gobiernon Armagedonpi waj gobiernostawan khuska chinkachenqa (Apo. 16:13, 14, 16; 19:19, 20). *

12. Danielpa profecian, ¿imata nisqantaj sonqochawanchej, suyakuytapis qowanchej?

¹² ¿Imaynatá kay profecía yanapawanchej? Danielpa profecianqa tukukuy tiempopi kausakushasqanchejmanta waj imastawan nin. 2.500 watas ñaupajtaña Danielqa nerqa Babiloniaj qhepanta waj tawa atiyniyoj gobiernoswan kananta. Chay atiyniyoj gobiernospa jallpʼasninkupitaj Diospa llajtanmanta ashkhas tiyakunanku karqa chayri Diospa llajtanta chay gobiernos qhatiykachananku karqa. Chantapis nillarqataj Reino Unidowan Estados Unidoswanqa qhepa kaj atiyniyoj gobierno kananta. Chayta yachayqa sonqochawanchej, yanapawanchejtaj suyakunapaj Diospa Gobiernon tumpamantawan tukuynin gobiernosta chinkachinanta, chay gobiernollañataj kay jallpʼata kamachinanta (Dan. 2:44).

13. 1) Apocalipsis 17:9-12 nisqanman jina, ¿pikunatataj Biblia sutichan “pusaj kaj rey” nispa, chanta “chunka reyes” nispa? 2) ¿Imaynatá chay profecía juntʼakun?

¹³ (Apocalipsis 17:9-12 leey). Primera Guerra Mundial kasqanrayku qhepa pʼunchaykunamanta Bibliaj waj profecian juntʼakullarqataj. Mundontinmanta kamachejkunaqa munarqanku jallpʼantinpi allin kausay kananta. Chayrayku 1920 watapi enero killapi Sociedad de Naciones nisqata rikhuricherqanku, 1945 watapitaj octubre killapi cuentanmanta Naciones Unidas nisqata rikhuricherqanku. Chay organizaciontataj sutichakun “pusaj kaj rey” nispa. Jinapis mana atiyniyoj gobiernochu, gobiernos apoyasqankuraykulla atiyta japʼin. Chay gobiernostataj Bibliaqa sutichan “chunka reyes” nispa.

14, 15. 1) Apocalipsis 17:3-5, ¿imatataj Jatun Babiloniamanta nin? 2) Llulla religionpi kajkunamanta ashkhas, ¿imatataj ruwashanku?

¹⁴ (Apocalipsis 17:3-5 leey). Jehovaqa Apóstol Juanman mosqoypi jina rikucherqa uj khuchi warmita, nisunman Jatun Babiloniata. Chaytaj tukuynin llulla religioneswan ninakun. ¿Imaynatá chay rikusqan juntʼakun? Llulla religionesqa ashkha watastaña gobiernoswan llankʼanku, paykunatataj apoyanku. Jehovataj tumpamantawan chay gobiernospa sonqonkuman churanqa paypa munayninta ruwanankupaj. Chay ‘chunka reyesqa’  nisunman chay gobiernosqa, tukuynin llulla religionespa contranpi churakuspa tukuyninta chinkarparichenqanku (Apo. 17:1, 2, 16, 17).

¹⁵ ¿Imajtintaj nisunman Jatun Babilonia chinkachisqa kananpajña kashasqanta? Chayta yachanapajqa ñaupa tiempopi Babilonia llajtamanta yuyarikuna. Chay llajtaqa jatun Éufrates mayuwan sumaj jarkʼasqa karqa. Apocalipsis libroqa Jatun Babiloniapi kajkunata ‘yakuswan’ kikinchan (Apo. 17:15). Jinapis nillantaj chay yakus chʼakipunanta. Chaywantaj nishan mundontinmanta tukuy llulla religionesmanta ashkhas llojsipunankuta (Apo. 16:12). Kunantaj chay profeciaqa juntʼakushan. Ashkha runasqa llulla religionmanta llojsipushanku, waj imaspitaj problemasninkupaj yanapata maskʼashanku.

16. Maykʼajchus Naciones Unidas rikhurisqanta entiendey, maykʼajtajchus Jatun Babilonia chinkachisqa kananta entiendey, ¿imaynatá yanapawanchej?

¹⁶ ¿Imaynatá kay profecías yanapawanchej? Naciones Unidas rikhurisqan, llulla religionesmanta ashkha runas llojsipushasqankupis, sutʼita rikuchillantaj qhepa pʼunchaykunapipuni kausakushasqanchejta. Jatun Babiloniata jarkʼaj ‘yakus’ chʼakipushajtinpis, mana  chaychu llulla religionesta chinkachenqa. Nerqanchej jina Jehová Diosqa chunka reyespa sonqonkuman, nisunman Naciones Unidasta apoyaj gobiernospa sonqonkuman churanqa paypa munayninta ruwayta. Chay nacionesqa ujllapi llulla religionesta chinkarparichenqanku, chaytaj kay mundomanta runasta tʼukushajta saqerpanqa (Apo. 18:8-10). * Jatun Babilonia chinkachisqa kasqanqa mundontinmanta runasta mancharichenqa, chantapis ichá problemasta apamonqa. Jehovaj llajtantaj kay iskay imasrayku kusikonqa: Llulla religionqa, pichus unaymantaña Jehová Diospa enemigon, chinkachisqa kanqa, tumpitamantawantaj kay sajra mundomanta kacharichisqa kasun (Luc. 21:28).

17, 18. 1) ¿Imatá ruwasunman creeyninchejta astawan sinchʼiyachinapaj? 2) ¿Imamantataj qhepan yachaqanapi yachakusun?

¹⁷ Danielqa nerqa ‘cheqa yachayqa astawan ashkhayananta’. Jinapunitaj kashan. Kunanqa kay tiemponchejmanta profeciasta astawan sutʼitaña entiendenchej (Dan. 12:4, 9, 10). Chay profecías maychus kasqanman jina juntʼakusqanta yachaspaqa, Jehovata, Palabrantapis astawan jatunpaj qhawanchej (Isa. 46:10; 55:11). Chayrayku creeyninchejta sinchʼiyachinallapuni Bibliata sumajta estudiaspa, wajkunatapis Jehová Diosman qayllaykunankupaj yanapaspa. Jehovaqa paypi atienekojkunata jarkʼanqa, ‘sonqo tiyaykuytataj qonqa’ (Isa. 26:3).

¹⁸ Qhepan yachaqanapi yachakusun, qhepa pʼunchaykunapi Diospa llajtan imastachus ruwananmanta wakin profeciasta. Chaypi yachakusun jina chay profeciasqa sutʼita rikuchillantaj qhepa pʼunchaykunapipuni kausakushasqanchejta. Yachakullasuntaj Reyninchej Jesusqa payta qhatikojkunata ñaupajman pusashasqantapuni.