1. ¿Imatá Jehová munan kay tiempopi ruwakunanta?

 KAY tiempopeqa Jehová munan Gobiernonmanta sumaj willaykunata jallpʼantinpi willakunanta (Mar. 13:10; 1 Tim. 2:3, 4). Kay llankʼayqa Jehová Diospata. May importante kasqanraykutaj, payqa munasqa Wawanpa cargonman chay llankʼayta churan. Chayrayku mana iskayrayasunmanchu tukukuy chayamojtin, chay llankʼay may sumajta ruwakusqanmanta Jehová kusikunanmanta (Mat. 24:14).

2. ¿Imatá kay yachaqanapi yachakusun?

² Jesusqa ‘allin kamachi yuyayniyojnejta’ sumaj yachachiykunata mikhunata jina qoshawanchej, ni jaykʼaj jinataj sumaj willaykunata apanapaj wakichishawanchej. Kay yachaqanapitaj chayta yachakusun (Mat. 24:45). Chantá yachakullasuntaj imasta ruwaspachus sapa ujninchej Jesusta, allin kamachi yuyayniyojtapis yanapakunanchejta.

3. ¿Imata ruwananpajtaj Jesús atiyta japʼerqa?

³ ¿Imaynapí yachanchej Jesús predicacionmanta cargoyoj kasqanta? Jesusqa niraj cieloman ripushaspa, wakin yachachisqasninwan tantakorqa Galilea orqopi. Paykunamantaj nerqa: “Diosqa tukuy atiyta qowan cielopi, jinallataj kay jallpʼapipis”, nispa. Chaymantataj paykunata nerqa: “Chayrayku riychej, tukuy nacionesmanta runasta discipulosniyman tukuchimuychej”, nispa (Mat. 28:18, 19). Chayrayku nisunman Jesusqa predicacionmanta cargoyoj kananpajpis atiyta japʼillasqantataj.

4. ¿Imaynapí yachanchej Jesús predicacionmanta cargoyoj kashasqanta?

 ⁴ Jesusqa nerqa ‘tukuy nacionespi’ predicakunanta, runastapis yachachisqasninman tukuchikunanta. Chantapis yachachisqasninta nillarqataj: “Qankunawan tuta pʼunchay kasaj, kay mundoj imasnin tukukunankama”, nispa (Mat. 28:20). Chayta nisqanqa sutʼita rikuchin chay tiempomantapacha kunankama Jesús predicacionmanta cargoyoj kasqanta.

5. ¿Imaynatá juntʼashanchej Salmo 110:3 versiculopi nisqanta?

⁵ Jesusqa mana iskayrayarqachu kay mundoj imasninpa tukukuynin tiempopi ashkha willajkuna kananmanta. Payqa yacharqa salmista kayta nisqan juntʼakunantapuni: “Soldadosniykita guerraman pusanki chay pʼunchaypi, kamachisniykeqa wakichisqa kanqanku yanapakunankupaj” (Sal. 110:3). Noqanchejpis sumaj willaykunata willashanchej chayqa, Jesustawan allin kamachi yuyayniyojtawan yanapakushanchej, chay profeciatataj juntʼashanchej. Sumaj willaykunata willakushajtillanpunipis, wakin kuteqa mana facilchu.

6. ¿Imaraykutaj mana facilchu Diospa Gobiernonmanta willakunan?

⁶ Diospa Gobiernonmanta willajkunamanqa runas churanakunku. Diospa contranta oqharikojkuna, religionesta kamachejkuna, politicospis predicacionmanta llullasta parlanku. Sichus familiaresninchej, rejsisqasninchej, trabajomanta compañerosninchej chay llullasta creenkuman chayqa, Jehovata sirviyta, predicaytapis saqechiyta munawasunman. Wakin nacionespi enemigosninchejqa manchachiyta munawasunman, imata ruwaykunawanchejta niwasunman, presochawasunman, carcelmanpis wisqʼaykuwasunman. Chaytaj mana tʼukuchiwanchejchu. Imajtinchus Jesusllataj nerqa: “Sutiyraykutaj tukuy naciones chejnisonqachej”, nispa (Mat. 24:9). Runas ajinata chejniwasqanchejqa rikuchin Jesús jina ruwasqanchejta, Jehovataj allinpaj qhawawasqanchejta (Mat. 5:11, 12). Ajinata churanakunawanchejpajtaj Diablo tanqashan. Jinapis Jesús paymanta aswan atiyniyoj. Jesuspa yanapayninwanqa sumaj willaykuna tukuy nacionesmanta runasman chayashan. Qhawarina imaynatachus chayta ruwakushasqanta.

7. ¿Imajtín nisunman Apocalipsis 14:6, 7 juntʼakushasqanta?

⁷ ¿Imaraykutaj mana atikullantajchu sumaj willaykunata willay? Runas imaymana parlayniyoj kasqankurayku. Jesusqa apóstol Juanman mosqoypi jina rikuchispa nerqa sumaj willaykunaqa tukuy laya parlayniyoj runasman chayanantapuni (Apocalipsis 14:6, 7 leey). Chayrayku may chhika runas sumaj willaykunata parlayninkupi uyariyta atinku. Kay tiempopeqa mundontinmanta may chhika runas Bibliamanta yachachiykunata jw.org nisqapi leeyta atinku, 1.000 kuraj parlaykunapi kasqanrayku. Diospa Llajtanta Kamachejkunaqa runasta yachachinapaj Wiñaypaj kusisqa kausakuy librota 700 kuraj parlaykunapi traducikunanta ninku. Chantapis Bibliaj yachachiykunasninta mikhunata jina orqhokullantaj ashkha videospi mana uyariyta atejkunapaj. Cieguitospajpis publicaciones braillepi kallantaj. Sutʼita rikushanchej Bibliaj profeciasnin juntʼakushasqantapuni. “Nacionesmanta tukuy laya parlayniyoj” runas ‘llimphu parlayta’ yachakushanku, nisunman Bibliaj cheqa yachachiykunasninta (Zac. 8:23; Sof. 3:9). Tukuy chaytaqa Jesús sumajta ruwachishan.

8. ¿Imatataj ashkha runas ruwashanku predicasqanchejrayku?

⁸ Kay tiempopeqa Jehovaj llajtanpi 8 millonesmanta astawanña kanchej, 240 suyuspi, lugarespi imataj kashanchej. Sapa watataj may chhika runas bautizakushallankupuni. Chantapis bautizakojkunaqa ‘mosoj kausaywan  pʼachallikunku’, nisunman sumaj cristianos jina kausakuyta yachakunku (Col. 3:8-10). Ashkhasqa chʼichi kausayninkuta saqepunku, niña phiña runaschu kanku, niña wajkunata chejnikunkuchu, niñataj nacionninkuman sayasqachu kanku. Isaías 2:4 versiculopi profeciaqa juntʼakushanpuni, ‘manaña guerrapi maqanakuyta yachakushankuchu’. Mosoj kausaywan pʼachallikunapaj kallpachakusqanchejrayku, runasta yanapanchej Diospa llajtanman yaykumunankupaj, sutʼitataj rikuchinchej kamachejninchej Jesucristota qhatikushasqanchejta (Juan 13:35; 1 Ped. 2:12). Chaytataj ruwayta atinchej Jesuspa yanapaynillanwan.

9. ¿Imatataj Jesús Mateo 24:45-47 versiculospi ñaupajmantaña nerqa?

⁹ (Mateo 24:45-47 leey). Jesusqa ñaupajmantaña nerqa kay tukukuy pʼunchaykunapi ‘allin kamachi yuyayniyojta’ churananta, Diospa palabranmanta yachachinawanchejpaj. Chayrayku suyasunman chay kamacheqa kay tiemponchejpi sinchʼita trabajashananta, ajinapunitaj kashan. Jesusqa uj grupo ajllasqa cristianosnejta Diospa llajtanman, yachakuyta munajkunamanpis tiemponpi mikhunata qoshan, nisunman sumaj yachachiykunata. Paykunaqa mana creeyninchejmanta patrones kasqankutachu yuyakunku (2 Cor. 1:24). Astawanpis Jesucristota Diospa llajtanmanta “kamachejta jina, comandanteta jina” qhawanku (Isa. 55:4).

10. Dibujospi rikhurej librosmanta, ¿mayqentaj yanapasorqa Jehovata sirviyta qallarinaykipaj?

¹⁰ Jaqay 1919 watamantapacha allin kamachi yuyayniyojqa ashkha publicacionesta wakicherqa, sumaj yachachiykunata mikhunata jina runasman munarichinapaj. 1921 watapi allin kamachi yuyayniyojqa El Arpa de Dios nisqa librota wakicherqa, yachakuyta munajkunaman  Bibliaj wakin yachachiykunasninta yachachinapaj. Aswan qhepamantaj waj publicacionesta wakichikullarqataj. ¿Ima publicaciontaj yanapasorqa Tatanchej Jehovata rejsinaykipaj, munakunaykipajpis? Ichapis yanapasorqa “Sea Dios veraz” libro, La verdad que lleva a vida eterna libro, Usted puede vivir para siempre en el paraíso en la Tierra libro, El conocimiento que lleva a vida eterna libro, ¿Imatapunitaq Biblia yachachin? libro, ¿Imastá Biblia yachachiwanchej? libro chayri Wiñaypaj kusisqa kausakuy mosoj libro. Chay librosqa runasta Jesuspa discipulosninman tukuchinapaj may sumaj karqa, maychus tiemponpipunitaj llojserqa.

11. ¿Imajtintaj khamuna mikhunata tukuy necesitanchej?

¹¹ Mana Bibliamanta yachakojkunallachu khamuna mikhunata necesitanku, tukuyninchej necesitanchej. Apóstol Pablo nerqa: “Khamuna mikhunatajrí, wiñay tukusqa runaspaj”, nispa. Pabloqa nillarqataj chay yachakusqanchejman jina ruwaspa, “imachus allin, imatajchus mana allin kasqanta” reparayta atinanchejta (Heb. 5:14). Kay tiempomanta runasqa millay chʼichi kausayta allillanpaj qhawanku. Chayrayku mana atikullanchu Jehovaj kamachiykunasninta kasukuy. Jinapis Jesusqa sinchʼi creeyniyojllapuni kananchejpaj, sumaj yachachiykunata wakichichipuwanchej. Chay yachachiykunataj Diospa Palabranmanta orqhosqa kashan. Allin kamachi yuyayniyojtaj, Jesús kamachisqanman jina chay mikhunata wakichin, tukuy runasmantaj chayachin.

12. ¿Imaynatataj Jesús jina Diospa sutinta jatunchanchej?

¹² Noqanchejpis Jesús jinallataj Diospa sutinta jatunchanchej (Juan 17:6, 26). 1931 watamantapacha, Biblia nisqanman jina Jehovaj testigosnin sutita apanchej. Ajinamanta rikuchinchej Diospa sutenqa noqanchejpaj  may importante kasqanta, Tatanchej Jehovaj sutinwantaj rejsisqa kayta munasqanchejta (Isa. 43:10-12). Chay watapi octubre killamantapacha, inglés parlaypi Torremanta Qhawaj revistaj tapanpi Jehovaj sutinta churakuyta qallarerqa. Chantapis Mosoj Jallpʼapi Kausajkunapaj Diospa Palabran Bibliapeqa, maychus kananman Diospa sutinta churaykapunku. Cristiano nichikoj iglesiastajrí, Jehová Diospa sutinta ashkha Bibliasninkumanta orqhorpanku.

13. ¿Imajtintaj niwaj Jesús allin kamachi yuyayniyojnejta yanapashawasqanchejta? (Juan 6:68).

¹³ Jesusqa allin kamachi yuyayniyojnejta kay jallpʼapi Diospa llajtanta sayaricherqa, Jehovallata yupaychanankupaj. ¿Imaynataj sientekunki Diospa llajtanpi kasqaykimanta? Ichapis apóstol Pedro jina niwaj. Payqa Jesusta nerqa: “¿Pimantaj ripuykumanri? Nisqasnillayki wiñay kausayman pusan”, nispa (Juan 6:68). Sichus Jehovaj llajtanta mana rejsisunmanchu karqa chayqa, imachus noqanchejmanta kanmanpis karqa. Diospa llajtannejta Jesucristoqa sumaj yachachiykunata mikhunata jina qowanchej. Chantapis sumaj yachachejkuna kanapaj wakichiwanchej, mosoj kausaywan pʼachallikunanchejpajpis yanapawanchej, ajinamanta Jehovata kusichinanchejpaj (Efe. 4:24).

14. Diospa llajtanpi kasqaykirayku, ¿ima yanapatataj japʼerqanki coronavirus onqoy rikhurejtin?

¹⁴ Jesusqa llakiy tiempos kajtin, imatachus ruwananchejta yachananchejpaj sumajta yuyaychawanchej. Chaytaj sutʼita rikukorqa kay coronavirus onqoy rikhurejtin. Kay mundomanta ashkhasqa mana yacharqankuchu imatachus ruwanankuta. Jesustajrí cuidakunanchejpaj sumaj yuyaychaykunata qowarqanchej.  Yuyaychawarqanchej runas ukhupi kaspa barbijota churakunanchejta, runasmanta karitullapitaj kananchejta. Chantapis ancianosta kamachikorqa congregacionninkumanta tukuy hermanosta wajyarinankutapuni, sumajtataj qhawarinankuta imatachus necesitasqankuta kausakunankupaj, Jehovamanta mana karunchakunankupajpis (Isa. 32:1, 2). Diospa Llajtanta Kamachejkunapis willaykunasninkupi yuyaychariwanchej, kallpachariwanchej ima.

15. 1) ¿Ima kamachiykunatataj japʼillarqanchejtaj kay coronavirus onqoy tiempopi tantakunanchejpaj, predicananchejpajpis? 2) ¿Imaynataj predicasqanchejpi riwarqanchej?

¹⁵ Kay coronavirus onqoy tiempopeqa, sumaj kamachiykunata japʼillarqanchejtaj imaynatachus tantakunanchejmanta, predicananchejmantapis. Tantakuykunasninchejta, jatun tantakuykunasninchejtapis niraj imapi Internetnejta ruwayta qallarerqanchej. Chantapis casi tukuyninchej cartanejta, telefononejta predicayta qallarerqanchej. Jehovataj maytapuni bendeciwanchej. Ashkha sucursalesqa ninku mosoj willajkuna astawan yapakusqankuta. Ashkha hermanostaqa may sumajpuni rerqa kay tiempopi (“ Jehová predicasqanchejta bendecin” nisqa recuadrota leeriy).

16. ¿Imamantataj mana iskayrayanchejchu?

¹⁶ Ichapis wakinninchejqa yuyarqanchej, kay coronavirus onqoymanta Diospa llajtanqa anchatañataj cuidashawasqanchejta. Jinapis kutin kutita rikorqanchej chay kamachiwasqanchejqa may sumajpuni kasqanta (Mat. 11:19). Tʼukurinapuni Jesús munakuywan pusashawasqanchejpi. Ajinamanta mana iskayrayasunchu ima kajtinpis Jehovawan Jesuswanqa noqanchejwanpuni kanankumanta (Hebreos 13:5, 6 leey).

17. ¿Imaynataj sientekunki Jesús kamachejninchej kasqanmanta?

¹⁷ Jesús kamachejninchej kasqanqa sumaj bendicionpuni. Diospa llajtanpeqa tukuy ladomanta kaspapis, waj nacionmanta kaspapis, waj parlayniyoj kaspapis ujchasqas kanchej. Diosmanta yachachiykunata sumaj mikhunata jina japʼishanchej, wakichisqastaj kashanchej predicanapaj. Sapa ujninchej kallpachakushallanchejpuni mosoj runa kaywan pʼachallikunapaj, wajkunata munakunapajpis. Jesús kamachejninchej kasqanmanta maytapuni kusikunchej.