Armeniamanta Haykanush sutiyoj warmi, wasin chaypi documentosta tarikorqa. Chay documentos ukhupitaj bancomanta qolqeta orqhonapaj tarjetas, ashkha qolqepiwan kasharqa. Chaytataj qosanman willarqa. Chay warmi, qosan ima niraj bautizasqaschu karqanku, jinapis willayman llojsejña kanku.

Paykunaqa qolqemanta pisisqas, manutaj kasharqanku. Chaywanpis paykunaqa chay documentospi kaj direccionman qolqeta aparqanku. Chay documentosta chinkachikoj runa, familian imataj, mayta tʼukorqanku chay qhariwarmi qolqenkuta apapusqankumanta. Chay qhariwarmeqa Bibliamanta yachakushasqankurayku kutichipusqankuta nerqanku. Chantapis Jehovaj testigosnin imapichus creesqankumanta willarqanku, publicacionestapis saqerqanku.

Documentosta chinkachikoj familiaqa, Haykanushman qolqeta qoyta munarqa, Haykanushtaj mana japʼikuyta munarqachu. Qʼayantintaj documentosta chinkachikoj runaj warmenqa Haykanushpa wasinman rerqa. May agradecesqas kashasqankuta rikuchinanpajtaj diamantesniyoj anillota qoyta munarqa.

Documentosta chinkachikoj familia jina, ashkha runas Haykanush, qosan ruwasqankumanta mayta tʼukunkuman karqa. Jehová Diosrí, ¿imaynatá chay ruwasqankuta qhawarqa? ¿Allinchu karqa ajinata ruwasqanku?

Kay tapuykunamanqa kutichiyta atillanchej. Imaraykuchus yachanchej Jehová jina kʼacha kaykunata rikucheyqa, aswan sumaj Jehovapaj diamantesmanta, qorimanta, waj valorniyoj imasmanta nisqaqa. Jehovaqa imatachus runas mana valorniyojpajchu qhawanku chayta may valorniyojpaj qhawan (Isa. 55:8, 9). Kamachisnintaj Pay jina kʼacha kaykunata rikuchinankupaj kallpachakusqanku may valorniyoj kasqanta yuyanku.

Imatachus Biblia yachayniyoj kaymanta, yuyayniyoj kaymanta nisqanta qhawarina. Proverbios 3:13-15 nin: “Kusikuyniyojmin pichus yachayta tarejqa, pichus yuyayta japʼejqa. Chaypa ganasqanqa aswan allinmin qolqemanta nisqaqa, poqoynimpis aswan allin qorimanta nisqaqa. Yachayqa aswan sumajmin valorniyoj rumismanta nisqaqa; tukuy ima munasqasniykipis manapuni yachaywanqa ninakunchu”, nispa. Cheqamantapuni Jehovaqa kay kʼacha kaykunata jatunpaj qhawan, valorniyoj rumismanta nisqaqa.

¿Imatataj nisunman cheqan kajta ruwaymanta?

Jehovaqa cheqan kajtapuni ruwan, nitaj ‘llullakunchu’ (Tito 1:2). Apóstol Pablotapis yuyaycharqa, ñaupa tiemponmanta hebreo cristianosman qhelqananpaj. Pablo qhelqarqa: “Diosmanta mañapuwayku ari. Yachayku mana juchachana sonqo yuyayniyoj kasqaykuta, munallaykutaj tukuy imapi allinta puriyta”, nispa (Heb. 13:18).

Jesucristopis kausayninwan rikucherqa cheqan kajtapuni ruwasqanta. Uj kuti kuraj sacerdote Caifás, payman nerqa: “Kawsashaj Diospa sutimpi niwayku: Qanchu Cristo, Diospa Churin kanki?”, nispa. Jesusqa cheqan kajta ruwarqa, nerqataj Mesías kasqanta. Jatun juntapi runas Diospa contranpi sajrata rimasqanta nispa wañuchinankuta yachaspapis cheqantapuni parlarqa (Mat. 26:63-67).

Noqanchejrí, qolqeta astawan japʼinanchejrayku imapipis llullakojtinchej, ¿cheqan kajtachu ruwashasunman?

Kay qhepa pʼunchaykunapi cheqan kajta ruwayta mana atillanchejchu, imaraykuchus ashkha runas ‘qolqeta’, “imallatapis paykunallapaj” munanku (2 Tim. 3:2-4). Qolqe pisiyajtin chayri llankʼay mana kajtin ashkha runas suwakunku, chʼaukiyanku chayri waj sajra imasta ruwanku. Kay jina ruwaytaj tukuynejpi rikukun, ashkha runas imallatapis tarinapajqa sajra imasta ruway allillan kasqanta yuyasqankurayku. Wakin cristianospis “qolqe japʼiymanta wañusqas” kasqankurayku mana allin imasta ruwanku. Chayraykutaj congregacionpipis manaña allinpajchu qhawasqas kanku (1 Tim. 3:8; Tito 1:7).

Chaywanpis casi tukuy cristianos Jesús jina ruwanku. Reparankutaj kʼacha kaykunata rikuchiy aswan allin kasqanta, ima valorniyoj imasta japʼinankumanta nisqaqa. Chayrayku cristiano jovenesqa mana examenespi copiakunkuchu sumaj notasta orqhoyta munaspa (Pro. 20:23). Cheqan kajta ruwasqanchejrayku ichá mana Haykanush jinachu imatapis japʼisunchej. Jinapis Jehovaqa cheqan kajta ruway allin kasqanta nin. Kaytaj yanapawanchej sonqo yuyayninchej llimphu kananpaj, chaytaj may valorniyoj.

Gagik kausaynin rikuchiwanchej cheqan kajta ruway may sumaj kasqanta. Pay nin: “Niraj Jehovaj testigon kashaspa uj jatun empresapi llankʼarqani. Chay empresamanta dueñotaj impuestota mana pagayta munaspa, mashkhatachus ganasqanmanta mana cheqantachu willaj. Chay empresapi gerente jina llankʼasqayraykutaj gobiernopaj llankʼaj runawan parlanay karqa. Empresapi mashkhatachus ganakushasqanta pakananpajtaj chay runaman lluk’iykoj kani. Chayraykutaj chʼaukiyaj runata jina rejsiwaj kanku. Diosmanta yachakuspataj, chay empresapi sumajta ganakuspapis manaña ñaupajpi jinachu ruwarqani. Astawanpis uj negociota kicharerqani. Ley nisqanman jinataj chay negocioyta maychus kajta anotacherqani, tukuy impuestostapis pagarqani”, nispa (2 Cor. 8:21).

Gagik nillanpuni: “Empresapi ganakusqaymanta negocioypeqa khuskallantaña ganakuni, familiayta uywaytataj mana atillarqanichu. Chaywanpis kunanqa aswan kusisqa kashani. Jehovaj ñaupaqenpitaj mana juchachaj sonqo yuyayniyoj kani. Kausayniywanqa iskaynin wawasniyman yachachini allin imasta ruwanankupaj. Congregacionpipis llankʼaykunata japʼini. Gobiernopaj llankʼaj runaspis, noqawan khuska llankʼajkunapis manaña chʼaukiyaj runata jinachu rejsiwanku”, nispa.

Jehovaqa kʼacha kaykunata rikuchispa, cheqan kajta ruwaspa ima payta jatunchajkunata munakun (Tito 2:9, 10). Chayta ruwajtinchejtaj, yanapanawanchejta nin. Pay rey Davidta yuyaycharqa kayta qhelqananpaj: “Noqa wayna karqani, kunantaj machuña kani; ni jaykʼajpis kʼacha runataqa wijchʼusqata rikorqanichu, nitaj wawasnintapis khuyayta mañakojtaqa”, nispa (Sal. 37:25).

Chay cheqa kasqanta rikuchin Rutpa kausaynin. Rutqa suegranta viejitaña kasqanrayku mana saqerparerqachu, astawanpis tukuy sonqo Noemiwan qhepakorqa. Israel llajtamantaj riporqa, chaypitaj Jehová Diosta yupaychayta aterqa (Rut 1:16, 17). Rutqa cheqan kajta ruwarqa, wajcha runaspaj ley nisqanman jinataj chajmakuspa mayta llankʼarqa. Jehovaqa Rutta, Noemita ima ni jaykʼaj saqerparerqachu, imaynatachus aswan qhepaman Davidta mana saqerparerqachu ajinata (Rut 2:2-18). Chaywanpis Jehovaqa mana necesitasqallantachu  Rutman qorqa, manaqa rey David, suyasqa Mesías ima mirayninmanta jamunanpaj ajllarqa (Rut 4:13-17; Mat. 1:5, 16).

Kunanpis wakin cristianosqa imastachus necesitasqankupaj mana ganakuyta atillankuchu. Chaywanpis kallpachakunku mayta llankʼanankupaj, kʼuchis kanankupaj ima, mana cheqan kajta ruwaspa llankʼanankumanta nisqaqa. Ajinamanta Jehovaj kʼacha kaykunasninta rikuchiy, cheqan kajta ruway imaqa aswan sumaj, kapuyniyoj kanamanta nisqaqa (Pro. 12:24; Efe. 4:28).

Rut jina, pachantinmanta cristianosqa Jehová atiyninwan yanapanawanchejpi atienekusqanchejta rikuchinchej. Tukuy sonqotaj Jehovaj nisqanpi atienekunchej. Jehová nerqa: “Mana wijchʼurparisqaykichu, nitaj saqerparisqaykichu”, nispa (Heb. 13:5). Jehovaqa ashkha kutispi rikucherqa cheqan kajta ruwajkunata yanapayta atisqanta, yanapallanqapunitaj. Kamachisninman necesitasqankuta qonanta nisqantataj juntʼanpuni (Mat. 6:33).

Runasqa diamantesta, waj imastawan valorniyojpaj qhawanku. Chaywanpis Jehovaqa cheqan kajta ruwasqanchejta, kʼacha kaykunasninchejta ima, may valorniyoj rumimantapis aswan valorniyojpaj qhawan.