Cielopi kaj angeleswan. Paykuna Jerusalén thuñikunanpaj yanaparqanku. Paykunallataj Armagedonpi kay sajra pacha chinkachisqa kananpaj yanapanqanku. Ezequiel imatachus mosqoypi rikusqanta, ¿imaraykú waj jinamanta entiendenanchej kasqanta sut’inchakunan tiyan?

Jerusalenqa 607 watapi thuñisqa karqa Jesús niraj jamushajtin. Niraj chay wata kashajtintaj Jehovaqa Ezequielman uj mosqoypi jina rikucherqa imachus chay llajtawan kananta. Ezequieltaj chay mosqoypi sajra imasta ruwashasqankuta rikorqa. Jinallataj sojta runasta, sapa ujtaj armayoj karqanku. Paykunawantaj lino nisqa yuraj p’achayoj runatapis rikullarqataj, pichus chumpinpi qhelqana imasniyoj kasharqa (Eze. 8:6-12; 9:2, 3). Chay runamantaj Dios nerqa: “Jerusalén llajta ukhunta purispa, uj señalta frentesninkuman churaykuy, pikunachus chay llajtapi tukuy millay imas ruwakusqanmanta qhaparispa waqashanqanku, chay runasman”, nispa. Chantá Ezequielqa chay sojta runasman, mana señalniyoj runasta wañuchinankuta nejta uyarillarqataj (Eze. 9:4-7). ¿Imatá chay mosqoymanta yachakunchej? ¿Pitaj chumpinpi qhelqana imasniyoj runa?

Chay profeciata Ezequielqa 612 watapi rikorqa, Jesús niraj jamushajtin. Chay profeciataj ñaupaj kutipi phishqa watanman juntʼakorqa, Jehová Babiloniamanta soldadosta Jerusalenta thuñinankuta saqeshajtin. Ajinamanta Jehovaqa mana kasukoj llajtanta babiloniosnejta castigarqa (Jer. 25:9, 15-18). Chaywanpis, ¿imataj karqa tukuy millay imas ruwakusqanmanta qhaparispa waqaj cheqa sonqo judiosmanta? Jehová salvakunankupaj jarkʼarqa.

Chay mosqoypeqa Ezequiel mana pi runamanpis frentesninkuman uj señalta churarqachu. Nillataj Jerusalén thuñikunanpajpis yanapakorqachu. Manaqa ángeles Jerusalén thuñisqa kananpaj ñaupajman aparqanku. Chay profeciaqa imachus cielopi kasqanta yachanapaj yanapawanchej. Jehovaqa angelesninman mana sajra runasta chinkachinankupaj wakichikunallankutachu kamacherqa, manaqa cheqan runasta salvanankupajpis. *

Chay profeciaqa qhepamanpis juntʼakullanqataj. Ñaupaj wataspi publicacionesninchejpi sutʼinchaj kanchej, chumpinpi qhelqana imasniyoj runaqa kay Jallpʼapiraj kaj ajllasqa cristianoswan ninakusqanta. Chantá nillajtaj kanchej willayninchejta uyarejkunaman, mana wañunankupaj frentesninkuman señalta churakushasqanta. Jinapis reparanchej chay profecía waj jinamanta sutʼinchakunan kasqanta. Imaraykuchus kunallanraj, Mateo 25:31-33 versiculosta estudiarqanchej, rikorqanchejtaj manchay ñakʼariy tiempopi Jesús runasta juzgananta. Chay tiempopi ovejasta, cabrasmanta tʼaqakonqa. Ovejaswan ninakoj runasqa mana wañonqankuchu, cabraswan ninakoj runastaj wañonqanku.

¿Imatataj Ezequiel mosqoypi jina rikusqanmanta yachakunchej? Phishqa imasta qhawarina.

1. Niraj Jerusalén thuñisqa kashajtin, Ezequiel, Jeremías, Isaías ima, imachus Jerusalén llajtawan kananmanta willarqanku. Paykunaqa qhawaj soldados jina karqanku. Kunantaj Jehovaqa uj juchʼuy qotu ajllasqa cristianosnejta, llajtanman yachachishan, niraj manchay ñakʼariy tiempo qallarishajtin, imachus kay pachawan kananmanta wajkunaman willachishan. Cheqamantapuni cheqa yachachiykunata mikhunata jina tukuy japʼejkunaqa, Jehová kay sajra pachawan imatachus ruwananmanta willashanku (Mat. 24:45-47, NM).

2. Ezequielqa Jerusalén thuñikushajtin ni pimanpis salvakunanpaj frentenman uj señalta churarqachu.  Nillataj Diospa kamachisninpis kay tiempopi pimanpis churankuchu. Manaqa Diosllamanta willashanku, chaytataj angelespa yanapayninwan ruwashanku (Apo. 14:6).

3. Ezequielpa tiemponpi salvakojkuna jina, pikunachus aswan qhepaman salvakojkunaj frentesninkupipis mana uj marcapunichu kanqa. ¿Imatá ruwananku tiyan runas manchay ñak’ariy tiempopi mana wañunankupaj? Kay sajra pachata Jehová chinkachinanta uyarispa, Cristo jina ruwananku tiyan, Jehová Diosman kausayninkuta qonanku tiyan, Cristoj wauqesnintataj Diosmanta willamuspa yanapananku tiyan (Mat. 25:35-40). Chay runasqa manchay ñak’ariy tiempopi marcasqas kanqanku mana wañunankupaj.

4. Chumpinpi qhelqana imasniyoj runaqa Jesuswan ninakun. Manchay ñakʼariy tiempopitaj may chhika runasman ovejaspaj qhawasqa kajtinku uj señalta jina churanqa. Ajinamantataj chay runasqa Jallpʼapi wiñaypaj kausakonqanku (Mat. 25:34, 46). *

5. Armasniyoj sojta runasqa, angeleswan ninakunku, pikunatachus Jesús kamachishan. Chay ángeles, Jesús ima tumpamantawan tukuy nacionesta, sajra ruwaykunatawan chinkachenqanku (Eze. 9:2, 6, 7; Apo. 19:11-21).

Kay imasta sumajta entiendeyqa Jehová sajra runasta chinkachishajtin, cheqan runasta mana chinkachinanpi atienekunapaj yanapawanchej (2 Pedro 2:9; 3:9). Chantapis yuyarichiwanchej kay tiempopi predicay may sumaj kasqanta. Imaraykuchus tukuy runas kay pacha chinkachisqa kananmanta uyarinanku tiyan, niraj tukukuy jamushajtin (Mat. 24:14).