Noqanchejmanta Jehová dakun
¿IMAYNATÁ yachasunman Jehová noqanchejmanta dakusqanta? Biblia nisqanrayku. Kay 1 Pedro 5:7 nin: “Diosman saqeychej tukuy phutikuyniykichejta, imaraykuchus payqa qankunamanta dakun”, nispa. ¿Imastaj rikuchin Jehová noqanchejmanta dakusqanta?
DIOSQA MIKHUNATA QOWANCHEJ
Jehová yachachiwanchej k’acha, khuyakuyniyoj ima kayta.
Jehovaqa kʼacha kaykunasniyoj, chaykunatataj sumaj amigospi maskʼanchej. Sumaj amigosqa munakunku, khuyakunku ima. Sapa pʼunchaytaj Jehová runasta munakusqanta, khuyakusqanta ima rikunchej. Sutʼincharinapaj, payqa, “sajra runaspaj, kʼacha runaspajpis intinta llojsichimun. Kikillantataj parachimun tukuypaj, allin runaspaj, sajra runaspaj ima” (Mat. 5:45). Parachimusqanrayku, intita llojsichimusqanrayku ima, Jehovaqa mikhuna patapi uywawanchej, sonqosninchejtataj kusiywan juntʼachin (Hech. 14:17). Arí, Jehovaqa mikhunata may ashkhata poqochin, mikhuna patapi uywawasqanchejraykutaj mayta kusikunchej.
Chantá, ¿imaraykutaj ashkha runas yarqhaymanta ñakʼarinku? Suyunkupi gobiernos atiyniyoj, qolqeyoj kanankupaj astawan kallpachakusqankurayku, nitaj ni imata ruwankuchu runas sumajta kausakunankupaj. Jehová Diostaj tumpamantawan tukuy ima sajra ruwayta chinkachenqa. Gobiernospa cuentanmantataj, gobiernonta apamonqa, Wawantaj rey kanqa. Nitaj pipis yarqhaymanta wañonqachu. Chaykamataj Jehovaqa cheqa sonqo kamachisninman necesitasqankuta qonqa (Sal. 37:25). Chaytaj Jehová Dios noqanchejmanta dakusqanta rikuchin.
MASHKHA UNAYTAPIS UYARILLAWANCHEJ
Jehová yachachiwanchej sumajta uyariyta.
Uj sumaj amigoqa noqanchejwan kananpaj tiempochakun. Chantá imamantachus parlariyta munanchej chaymanta, noqanchejwan mashkha unaytapis parlarillan. Sumaj amigoqa llakiyninchejta, phutiyninchejta willajtinchej sumajta uyariwanchej. ¿Imatá Jehovamanta nisunman? ¿Sumaj amigo jinachu uyariwanchej? ¡Arí! Mañakuyninchejtataj uyariyta munan. Chayrayku Biblia nin: “Mana saykʼuspa, Diosmanta mañakullaychejpuni”, nispa (Rom. 12:12; 1 Tes. 5:17).
¿Mashkha unaytataj mañakuykunasninchejta Dios uyariwanchej? Chayta yachanapaj imatachus Biblia nisqanta qhawarina. Sutʼincharinapaj, Jesusqa niraj apostolesninta ajllashaspa “sutʼiyanankama mañakorqa” (Luc. 6:12). Jesusqa Diosmanta mañakushaspa pikunatachus apostolesninpaj ajllananpaj sapa uj yachachisqanpa pantayninpi, kʼacha kaykunasninpi ima sumajtachá tʼukurerqa. Sumajta ajllananpajtaj tatanmanta yanapata mañakorqa. Sutʼiyaytataj yacharqa sumajta ajllasqanta. Jehovaqa mañakuykunata uyarin, tukuy sonqo mañakusqanchejtataj uyariyta munan (Sal. 65:2). Pillapis llakiyninmanta unayta willarejtin, payqa uyarillan.
DIOSQA PERDONAYTA MUNAWANCHEJ
Jehová yachachiwanchej wajkunata perdonayta.
Wakin kutisqa sumaj amigospis mana perdonanakuyta atillankuchu. Unaytaña amigos kajkunapis mana perdonanakuyta yachasqankurayku niña amigoschu kanku. Jinapis Jehovaqa perdonawanchej. Biblianejtataj llampʼu sonqosta perdonninta maskʼanankupaj wajyarin. Imaraykuchus, ‘tukuy juchata kantumanta pampachan’ (Isa. 55:6, 7). ¿Imataj perdonanawanchejpaj tanqan?
Mayta munakuwasqanchejrayku perdonawanchej. Kay “pachapi kaj chhikata munakusqanrayku” wawan Jesusta kachamorqa juchamanta, jucharayku ñakʼarisqanchejmanta ima kacharichinawanchejpaj (Juan 3:16). Chantapis Jesusta kachamusqanrayku, munakun chay runasta tukuy sonqo perdonayta atillantaj. Apóstol Juan qhelqarqa: “Juchasninchejtachus Diosman willakunchej chayri, juchasninchejta pampachanqa, nisqanta juntʼaj, cheqantaj kasqanrayku”, nispa (1 Juan 1:9). Jehová perdonawasqanchejrayku paywan amigosllapuni kayta atinchej. Chaytaj, mayta kusichiwanchej.
NECESITASHAJTINCHEJPUNI YANAPAWANCHEJ
Jehová yachachiwanchej necesitajkunata yanapanata.
Sumaj amigoqa, wajkunata necesitashajtinkupuni yanapan. Jehovapis kikillantataj ruwan. Biblia nin: “[Diospa mayqen kamachin] urmaspapis, mana urmasqachu qhepakonqa, imaraykuchus Tata Diosqa makinmanta japʼin”, nispa (Sal. 37:24). Jehovaqa imaymanamanta yanapawanchej. Imachus Santa Cruz nisqa churupi kasqanta qhawarinachej, chay churu Caribe nisqapi kashan.
Chaypitaj uj sipasitata banderata mana napaykusqanrayku compañerosnin ñakʼarichej kanku. Payqa Jehovamanta yanapata mañakuspa, chay chʼampayta atipananta nerqa. Clasespi uj imamanta parlarinanta nejtinkutaj, imajtinchus banderata mana napaykusqanmanta parlarerqa. Biblia yachachisqanmanta librituy nisqa librowantaj, sutʼincharerqa imaynatachus Sadracpa, Mesacpa, Abednegojpa kausayninku imapichus creesqanmanta sutʼinchayta munananpaj yanapasqanta. Nerqataj: “Jehová chay kinsa hebreosta jarkʼarqa, qori lantita mana yupaychayta munasqankurayku”, nispa. Chay librota tukuy compañerosninman saqeyta munarqa, 11 compañerosnillan chay librota japʼikorqanku. Creesqanmanta sutʼinchananpaj Jehová kallpata, yachayta ima qosqanmanta, ¡mayta kusikorqa!
Noqanchejmanta Jehová mana dakusqanta yuyaspaqa, imatachus Salmo 34:17-19; 55:22; 145:18, 19 versículos nisqanpi tʼukurina. Unaytaña Jehovata sirvej hermanosta tapurina imaynatachus Jehová paykunata qhawasqanmanta willarinawanchejta. Jehovaj yanapayninta necesitaspaqa, mañakuna. Jehová noqanchejmanta dakusqantataj reparasun.