Sumaj Manka Llutʼajninchej Jehovata jatunpaj qhawana
“Tata Dios, qan[...] manka llutʼaj jina kanki. Chayrayku noqaykoqa tukuyniyku makisniykej ruwasqasnin kayku” (ISA. 64:8).
1. ¿Imaraykú Jehová uj Sumaj Manka Llutʼaj?
NOVIEMBRE de 2010 watapi, Inglaterra suyupi may unayniyoj yuru vendekushajtin uj runa 70 millones dolaresta jina pagayta munarqa. Chay yuruqa China suyupi ruwasqa karqa. Chay jina kʼachituta, may valorniyojta, manka llutʼaj runa llinkʼi tʼurullamanta ruwasqanqa tʼukunapaj jina. Jehovaqa manka llutʼaj runa jina, pay jinaqa mana pipis kanchu. Bibliaqa Jehová ñutʼu jallpʼamanta Adanta ruwasqanta nin (Gén. 2:7). Adanqa juntʼa runa karqa, Diospa wawantaj, Jehová jina kʼacha kaykunata rikuchiyta atinanpajtaj ruwasqa karqa (Luc. 3:38).
2, 3. ¿Imaynatataj pesachikoj israelitas jina ruwasunman?
2 Adanqa Diospa contranpi oqharikuspa, niña wawanchu karqa. Chaywanpis Adanpa mirayninmanta ashkhas, Jehovata Kamachejninkuta jina qhawarqanku (Heb. 12:1). Paykunaqa llampʼu sonqowan Jehovata kasukorqanku. Ajinamanta Satanasta qhesacharqanku, Jehovata tatankupaj qhawasqankuta, cheqanchananta munasqankuta ima rikucherqanku (Juan 8:44). Jehovaman cheqa sonqo kasqankoqa, pesachikoj israelitas imatachus nisqankuta yuyarichiwanchej. Paykuna nerqanku: “Tata Dios, qanmin Tatayku kanki. Noqaykoqa llinkʼi tʼuru jinalla kayku, qantaj manka llutʼaj jina kanki. Chayrayku noqaykoqa tukuyniyku makisniykej ruwasqasnin kayku”, nispa (Isa. 64:8).
3 Noqanchejpis pesachikoj israelitas jina ruwanapaj kallpachakunchej, Jehovata llampʼu sonqowan kasukunapaj ima. Jehová tatanchej kasqanta niytataj may jatunpaj qhawanchej. Munanchejtaj Jehová cheqanchanawanchejta. Chayrayku tapurikusunman: “¿Sumaj llinkʼi tʼuru jinachu kani, Jehová may valorniyoj tʼuru vasoman tukuchinawanpaj? ¿Imaynatá hermanosta qhawani? ¿Reparanichu Jehová paykunata cheqanchashallasqantapuni?”, nispa. Chayta ruwanapajtaj, Jehová manka llutʼaj jina imastachus ruwasqanmanta kinsa imasta qhawarina. Imaynatachus ajllan pikunatachus cheqanchananta. Chantá imaraykuchus cheqanchananta. Imaynatachus cheqanchananta ima.
JEHOVÁ AJLLAN PIKUNATACHUS CHEQANCHANANTA
4. ¿Imaynatá Jehová ajllan pikunatachus payman pusananpaj? Uj kikinchaywan sutʼinchay.
4 Jehovaqa runasta mana noqanchej jinachu ñawisninpa rikusqallanta qhawan. Manaqa imaynachus sonqonku kasqanta qhawan (1 Samuel 16:7b leey). Cristiana congregacionta rikhurichishajtintaj, chay sutʼi rikukorqa. Jehovaqa, pisipaj qhawasqa runasta payman, wawanman ima pusarqa (Juan 6:44). Chaykunamanta ujnintaj Saulo sutiyoj uj fariseo karqa, payqa jatunchakoj, sajra runa karqa, cristianosta qhatiykachaj, paykunamantataj llullasta parlaj (1 Tim. 1:13). Jinapis Jehovaqa Sauloj sonqonta rikorqa, sumaj llinkʼi tʼuru jina kasqantataj qhawarqa (Pro. 17:3). Chayrayku ‘kamachin kananpaj’ ajllarqa, “mana judío kajkunaman, reykunaman, jinallatataj israelitasmampis” willamunanpaj (Hech. 9:15). Jehovaqa waj runastapis ajllallarqataj, sapa ujninkutataj cheqancharqa sumaj tʼuru vasota jina, “jatun pʼunchayllapi oqharinapaj” (Rom. 9:21). Chay runasmanta wakintaj suwas karqanku, machaj kanku, khuchichakoj ima kanku (1 Cor. 6:9-11). Diosmanta yachakuspataj creeyninkuta sinchʼiyacherqanku, saqerqankutaj Jehová cheqanchananta.
5, 6. 1) Jehovata Sumaj Manka Llutʼajninchejta jina qhawasun chay, ¿imaynatá pikunamanchus predicanchej chay runasta qhawasun? 2) Jehovata Sumaj Manka Llutʼajninchejta jina qhawasun chay, ¿imaynatá hermanosta qhawasun?
5 Cheqan runasta Jehová payman pusananpi, ajllananpi ima atienekunchej. Chayrayku hermanosta, pikunamanchus predicanchej chay runasta ima mana juzganchejchu. Imatachus Michael ruwasqanta qhawarina. Pay nin: “Jehovaj testigosnin wasiyman jamojtinku, manapis paykunata rikuymanchu jina punkuta wisqʼarpaj kani. Paykunawan machu machu runataj kaj kani. Aswan qhepamantaj uj familiata rejserqani, chay familia imaynatachus kausakusqankoqa mayta tʼukuchiwarqa. Astawanraj tʼukorqani chay familia Jehovaj testigosnin kasqankuta yachaspa. Sumajta kausakusqankoqa, Jehovaj testigosninmanta imaraykuchus mana allintachu yuyasqayta tapurikunaypaj yanapawarqa. Repararqanitaj mana yachaspalla, wajkuna llullasta parlasqankuraykulla paykunamanta sajrata yuyasqayta”, nispa. Michaelqa Jehovaj testigosninta astawan rejsiyta munaspa, Bibliamanta yachakuyta qallarerqa. Tiemponmantaj bautizakorqa, Jehovapajtaj tiempo juntʼasqata llankʼayta qallarerqa.
6 Jehová Diosta Sumaj Manka Llutʼajninchejta jina qhawasun chayqa, hermanosta pay jina qhawasun. Sapa ujninkutataj sumaj cristianos kanankupaj yanapashallasqantapuni qhawasun. Payqa imachus sonqonchejpi kasqanta qhawan, yachantaj mana wiñaypajchu pantaj runas kananchejta. Yachallantaj imayna runasmanchus tukuchiyta atiwasqanchejta (Sal. 130:3). Allin ñawiwan hermanosta qhawaspaqa, Jehová jina ruwashanchej. Chantapis Jehovawan khuska llankʼasunman hermanosta congregacionpi ñauparinankupaj yanapakuspa (1 Tes. 5:14, 15). Kay ruwaypitaj ancianos ñauparinanku tiyan (Efe. 4:8, 11-13).
¿IMARAYKUTAJ JEHOVÁ CHEQANCHAWANCHEJ?
7. ¿Imaraykú Jehová kʼamiwasqanchejta jatunpaj qhawananchej tiyan?
7 Ichá pillatapis nejta uyarerqanchej: “Wawasniyoj kasparaj tatasniy kʼamiwasqankuta jatunpaj qhawarqani”, nispa. Machu runas kasparaj tatasninchej kʼamiwasqanchejta aswan jatunpaj qhawanchej, imaraykuchus yachanchej munakuwasqanchejrayku kʼamiwasqanchejta (Hebreos 12:5, 6, 11 leey). Jehovaqa wawasnin kasqanchejrayku mayta munakuwanchej. Chayrayku pacienciawan kʼamiwanchej, cheqanchawanchej ima. Munantaj allin imasta ajllananchejta, kusisqa kananchejta, tatanchejta jina munakunanchejta ima (Pro. 23:15). Mana munanchu juchasninchejmanta mana pesachikusqanchejrayku ñakʼarinanchejta, wañunanchejta ima (Efe. 2:2, 3).
8, 9. 1) ¿Imaynatá Dios kay tiempopi yachachishawanchej? 2) ¿Imaynatá mosoj pachapi yachachillawasunpuni?
8 Niraj Jehovata rejsishaspa, ichapis mana kusichinanchejpaj jinachu kausakorqanchej. Jinapis ñaupa kausayninchejta saqepunapaj pay yanapawarqanchej, kunantaj sumaj cristianos kanchej (Isa. 11:6-8; Col. 3:9, 10). Sonqo tiyasqa, ujchasqa llajtannejtataj sumajta yachachishawanchej, cheqanchashawanchej ima. Sajra pachapi kausakuspapis, llajtanpi may jarkʼasqas kanchej. Mana munakuyniyoj familiapi uywasqa hermanospis, Diospa llajtanpi hermanos munakojtinku mayta kusikunku (Juan 13:35). Tukuypis wajkunata munakuyta yachakorqanchej. Astawantaj Jehová Diosninchejta rejsinchej, munakuwasqanchejraykutaj mayta kusikunchej (Sant. 4:8).
9 Mosoj pachapi Jehová kamachishajtin, Jallpʼantinpi Payllata yupaychasunchej ujchasqas, sonqo tiyasqastaj. Chantapis mana onqoy kanqachu, ni wañuy, ni machuyay, ashkha bendicionestataj japʼisunchej. Chay tiempopeqa Jehová tʼukunapaj jina yachachillawasunpuni, cheqanchallawasunpuni, mayqentachus mana yachallanchejpischu imaynatapunichus ruwananta (Isa. 11:9). Chantapis Diosqa yuyayninchejta, cuerponchejta ima mosojyachenqa. Ajinamanta munasqanman jina paymanta sumajta yachakuyta, kasukuyta ima atillasun. Chayrayku Jehová cheqanchanawanchejta saqenallapuni. Mayta agradecekusqanchejta rikuchinachej, chay jinamanta munakuyninta rikuchiwasqanchejmanta (Pro. 3:11, 12).
¿IMAYNATÁ JEHOVÁ CHEQANCHAWANCHEJ?
10. ¿Imaynatá Jesús, Jehová jina pacienciayoj kasqanta, sumajta imatapis ruwasqanta rikucherqa?
10 Imaynatachus manka llutʼaj runa makinpi kaj llink’i tʼuruta sumajta rejsin, ajinallatataj Jehovapis sumajta rejsiwanchej. Yachan pantaj runas kasqanchejta, maykamallachus imatapis ruwayta atisqanchejta, imastachus cristianos jina ruwayta atisqanchejta ima. Chayman jinataj cheqanchawanchej (Salmo 103:10-14 leey). Jehová imaynatachus qhawawasqanchejta aswan sutʼita yachasunman, imaynatachus Jesús apostolesta pantajtinku qhawasqanpi. Apostolesqa wakin kutis siminakoj kanku, mayqenninkuchus kurajpaj qhawasqa kananmanta. Chaypi kashasunman karqa chay, ¿imatataj apostolesmanta yuyasunman karqa? Ichá yuyasunman karqa, mana sumaj llinkʼi tʼuru jinachu kasqankuta. Chaywanpis Jesusqa mana jinatachu yuyarqa. Yacharqataj yuyayninkuta tijranankupaj yanapayta atisqanta. ¿Imaynatá? Kʼachamanta, pacienciawan yuyaychaspa, llampʼu sonqo kaspa ima (Mar. 9:33-37; 10:37, 41-45; Luc. 22:24-27). Jesús kausarimusqanmanta qhepaman apostolesqa Diospa atiyninta japʼerqanku, manañataj llakikorqankuchu mayqenninkuchus kurajpaj qhawasqa kananmanta. Astawanpis imatachus Jesús kamachisqanta juntʼanankupi yuyarqanku (Hech. 5:42).
11. 1) ¿Imaynatá David rikucherqa Diospa makinpi llinkʼi tʼuru jina churakusqanta? 2) ¿Imaynatá pay jina ruwasunman?
11 Jehovaqa Biblianejta, atiyninnejta, congregacionnejta ima cheqanchashawanchej. Biblia cheqanchanawanchejta munanchej chayqa, leenanchej tiyan, leesqanchejpitaj tʼukurinanchej tiyan, kasukunapajtaj yanapata mañakunanchej tiyan. Rey David Jehovaman nerqa: “Puñunaypi sirisqa kashaspa, qanmanta yuyarikuni, qampitaj [tʼukurini]”, nispa (Sal. 63:6). Chantá qhelqallarqataj: “Tata Diosta yupaychasaj, pay yuyaychawasqanrayku. Sonqoy ukhupi chʼisisnin pay kʼamiwan”, nispa (Sal. 16:7). Rikunchej jina Davidqa Jehovaj makinpi llinkʼi tʼuru jina churakorqa. Payqa Jehovaj yuyaychaykunasninpi tʼukurej, Jehovaj yuyaychasqanta mana japʼikuyta atillaspapis, yuyasqanta, sonqonpi kasqanta cheqanchananta saqerqa (2 Sam. 12:1-13). ¿Imaynatá David jina llampʼu sonqos kasunman, kasukusunman ima? Tapurikuna: “¿Bibliata leespa tʼukurinichu, saqenichu Jehovaj yuyaychaykunasnin yuyayniyta, sonqoyta ima cheqanchananta? ¿Aswan sumajta ruwayta atiymanrajchu?”, nispa (Sal. 1:2, 3).
12, 13. ¿Imaynatá Jehová cheqanchawanchej atiyninnejta, congregacionnejta ima?
12 Diosqa atiyninwan imaymanamanta cheqanchawasunman. Sutʼincharinapaj, Jesús jina ruwanapaj, espirituj poqoyninta rikuchinapaj ima yanapawasunman (Gál. 5:22, 23). Espirituj poqoyninmanta ujnenqa munakuy. Jehovata munakusqanchejrayku, payta kasukuyta, cheqanchanawanchejta ima munanchej. Imaraykuchus tukuy ima kamachiwasqanchej allinninchejpaj kasqanta yachanchej. Chantapis Diosqa atiyninnejta kallpata qowanchej kay sajra pachamanta runas jina mana yuyanapaj (Efe. 2:2). Apóstol Pablopi tʼukurina. Payqa joven kashaspa, judiospa religionninkuta kamachejkuna jina yuyaj. Jinapis manaña jinata yuyananpaj Jehová atiyninwan yanaparqa. Chayrayku aswan qhepaman qhelqarqa: “Imallapipis tarikuspa, atipayta atisajpuni, kallpachawajniy [Dios kasqanrayku, NM]” nispa (Fili. 4:13). Noqanchejpis Jehovamanta atiyninta tukuy sonqo mañakunanchej tiyan, paytaj mañakusqanchejta uyarenqa (Sal. 10:17).
Jehovaqa ancianosnejta cheqanchawanchej, chayrayku yuyaychawasqanchejta japʼikuna. (12, 13 parrafosta qhawariy).
13 Jehovaqa ancianosnejta, congregacionnejta cheqanchallawanchejtaj. Sutʼincharinapaj, ancianosqa mayqennillanchejpis juchaman urmanayashasqanchejta reparaspa, allin ñanman kutirichinawanchejpaj yanapayta munawanchej. Nitaj yuyayninkuman jinallachu yuyaychawanchej (Gál. 6:1). Astawanpis paykunaqa llampʼu sonqos kanku, Diosmantataj yachayta, sumaj yuyaytawan mañakunku. Yuyaychanawanchejpajtaj Bibliapi, publicacionesninchejpi ima yanapasta maskʼanku. Ancianos munakuywan, kʼachamanta imaynatachus p’achallikushasqanchejmanta yuyaychariwajtinchej, Jehová munakuwasqanchejta yuyarikuna. Jehovaj yuyaychayninta kasukusun chayqa, cheqanchanawanchejpaj makinpi llinkʼi tʼuru jina churakusun. Chaytaj allinninchejpaj kanqa.
14. Jehová cheqanchanawanchejpaj atiyniyoj kaspapis, ¿imaynatá imatachus ruwayta munasqanchejta ajllajta saqewanchej?
14 Imaynatachus Jehová cheqanchawasqanchejta entiendespaqa, hermanosninchejwan allinta kausakusun. Chantapis willanchej chaypi runasta, Bibliamanta yachakojkunata ima Jehová jina qhawasun. Ñaupa tiempopi manka llutʼaj runaqa imatachá ruwayta munan chayta niraj ruwashaspa llinkʼita sumajta llimphucharqoj, rumisnintapis pallarqoj. Jehovapis makinpi llinkʼi tʼuru jina churakojkunata yanapan. Jinapis runasta kausayninkupi imatapis ajllanankuta saqen. Nitaj runaswan munajta mana munajta kasuchikunchu. Astawanpis pisimanta pisi leyesninmanta yachachin, saqentaj paykuna ajllanankuta kausayninkuta tijrachiytachus manachus.
15, 16. ¿Imaynatá Bibliamanta yachakojkuna Jehová cheqanchananta munasqankuta rikuchinku? Sutʼinchay.
15 Tessie sutiyoj hermana imatachus ruwasqanta qhawarina, payqa Australiapi tiyakun. Payman Bibliamanta yachachej hermana nin: “Tessieqa yachachejtiy sumajta entiendej. Jinapis mana ñaupareqachu, nitaj tantakuykunamanpis rejchu. Chayrayku sumajta tʼukuriytawan, Jehovamanta yanapata mañakuytawan, manaña yachachinayta ajllarqani. Tʼukunapaj jinataj, Bibliamanta yachachishajtiy willariwarqa kausayninta imaraykuchus mana tijrachishasqanta. Qolqerayku pujllay mayta gustasqanrayku puraj uya jina sientekusqanta, chay pujllayta saqepunanta ima niwarqa”, nispa.
16 Ñaupa amigosnin Tessie hermanata asipayajtinkupis, payqa pisi tiemponman tantakuykunaman riyta, kʼacha kaykunata rikuchiyta ima qallarerqa. Tiemponmantaj bautizakorqa, wawitasnin juchʼuysitusllaraj kajtinkupis precursora regular karqa. Cheqamantapuni Bibliamanta yachakoj, kausayninta tijrachejtin, Jehovaqa payman qayllaykun, sumaj tʼuru vaso jina kananpajtaj yanapan.
17. 1) ¿Imaraykú kusikunki Jehová Sumaj Manka Llutʼajniyki kasqanmanta? 2) ¿Imatá qhepan yachaqanapi yachakusunchej?
17 Kunanpis runasqa wakin lugarespi tʼurumanta may kʼachitu imasta makisninkuwan ruwankuraj. Ajinallatataj Jehovapis pacienciawan cheqanchanawanchejpaj yuyaychawanchej, chantá imaynatachus chay yuyaychaykunata japʼikusqanchejta sumajta qhawan (Salmo 32:8 leey). ¿Reparanchejchu Jehová sapa ujninchejmanta llakikusqanta? ¿Reparanchejchu allinllawan cheqanchawasqanchejta? ¿Imataj yanapawasun Jehovaj makinpi llinkʼi tʼuru jina churakunallapajpuni? ¿Imatá ruwananchej tiyan mana chʼaki tʼuru jina kanapaj? ¿Imatá tatas ruwankuman wawasninkuta Jehová cheqanchananpaj? Chaymanta qhepan yachaqanapi yachakusunchej.