1. ¿Imajtintaj ninchej Jehová llajtanman pusaykamuwasqanchejta?

JEHOVÁ DIOSQA, sapa ujninchejta llajtanman pusaykamuwarqanchej (Juan 6:44). ¿Imaraykú chayta ninchej? Jehová Diosqa, kay mundomanta tukuy runaspa sonqonkuta qhawashaspa, sonqonchejpi repararqa payta tukuy sonqo munakuyta atisqanchejta (1 Cró. 28:9). Jehová Diosqa sapa ujta sumajta rejsiwanchej, entiendewanchej, munakuwanchejtaj. Chayta yachayqa mayta sonqochawanchej.

2. ¿Imaynatá yachanchej Jehová sapa ujta munakuwasqanchejta?

² Jehová Diosqa sapa ujninchejta munakuwanchej, jinallataj tukuynin hermanosninchejtapis. Chayta sutʼita entiendenapaj, Jesuspa ujnin kikinchayninmanta parlarina. Payqa uj pacha Jehovata uj michejwan kikincharqa. Pay nerqa: “Uj runa 100 ovejasniyoj kashajtin, sichus uj ovejan chinkanman chayqa, ¿manachu 99 ovejasninta orqopi saqespa, chinkasqa ovejanta maskʼamunman? Cheqatapuni niykichej, chinkasqa ovejanta tarikapuspaqa, chay ovejanmanta astawan kusikun”, nispa. Sutʼita reparanchej, chay michejqa ovejanta tarikapuspa kusikusqanta manataj phiñakusqantachu. ¿Imatá chaymanta yachakunchej? Jehovaqa sapa uj ovejitanta mayta munakusqanta. Jesús nerqa: “Cielopi kashaj Tatayqa, mana munanchu ni ujpis kay juchʼuykunamanta chinkananta”, nispa (Mat. 18:12-14).

3. ¿Imasmantataj kay yachaqanapi yachakusun?

³ Ni imarayku munasunmanchu hermanosninchejpa sonqonkuta nanachiytaqa. Chayrayku, ¿imatá ruwasunman mana sonqonkuta nanachinapaj? Chayri, ¿imatá ruwasunman wajkuna sonqonchejta nanachiwajtichej? Kay yachaqanapeqa chay tapuykunaman  kutichisun. Jinapis ñaupajtaqa, Mateo 18 capitulopi ‘juchʼuykuna’ nispa, pikunamantachus parlashasqanta yachakusun.

4. ¿Pikunataj ‘juchʼuykuna’ kanku?

⁴ ‘Juchʼuykuna’ nispaqa, Jesuspa tukuy edadniyoj yachachisqasninmanta parlashanchej. Paykunaqa kuraj runasña chayri machitusña kaspapis ‘wawas jina’ kanku. Imajtinchus Jesuspa yachachisqanmanta wawas jina yachakushallankupuni (Mat. 18:3). Chantapis paykunaqa mana kikinchu kanku, imajtinchus tukuy ladomanta kanku, tukuy laya culturasniyojtaj. Jinapis tukuyninku Cristopi creenku. Cristotaj paykunata mayta munakun (Mat. 18:6; Juan 1:12).

5. ¿Imaynataj Jehová sientekun pillapis sufrichiwajtinchej chayri imallatapis ruwawajtinchej?

⁵ Jehová Diosqa “juchʼuykunamanta” kajkunata may allinpaj qhawan. Chayta astawan entiendenapaj, wawitasta munakusqanchejrayku imastachus ruwasqanchejpi piensarina. Wawitasqa may kʼachitus kanku. Paykunaqa pisi kallpitayoj kanku, manaraj imatapis sumajta ruwayta yachankuchu, manataj kuraj runas jina yuyaysituyojrajchu kanku. Chayrayku paykunata tukuy imamanta jarkʼayta munanchej. Uj runata sufrichisqankuta rikuspaqa sonqonchej nanawanchej. Uj wawitata sufrichisqankuta rikuspataj, astawanraj sonqonchej nanawanchej, rabiakunchejtaj. Jehová Diospis ajinallatataj tukuy imamanta kamachisninta jarkʼayta munawanchej. Payqa pillapis sufrichiwajtinchej chayri imallatapis ruwawajtinchej mayta llakikun, rabiakuntaj (Isa. 63:9; Mar. 9:42).

6. Kay 1 Corintios 1:26-29 nisqanman jina, ¿imaynatataj qhawanku mundomanta runas Jesuspa discipulosninta?

⁶ ¿Imajtintaj nillasunmantaj Jesuspa discipulosnin ‘juchʼuykuna’ jina kasqankuta? Kay mundomanta runasqa qhapajkunata, may rejsisqa kajkunata, atiyniyojkunata ima aswan sumajpaj qhawanku. Jinapis Jesuspa discipulosnintaqa ‘juchʼuykunata’ jina, pisipajtaj qhawanku (1 Corintios 1:26-29 leey). Chaywanpis Jehovaqa paykunata may valorniyojpaj qhawan.

7. ¿Imaynatá munan Jehová hermanosninchejta qhawananchejta?

⁷ Jehová Diosqa tukuy kamachisninta munakuwanchej, unaytaña chayri kunallanraj payta sirvishajtinchejpis. Jehová Diosqa tukuy hermanosninchejta allinpaj qhawan, noqanchejpis ajinallatataj qhawananchej tiyan. Chayrayku ‘tukuy hermanosta munakuna’, manataj wakillantachu (1 Ped. 2:17). Chantapis wakichisqa kayta munanchej hermanosninchejta jarkʼananchejpaj, cuidananchejpaj ima. Hermanonchejta phiñarpachisqanchejta chayri sonqonta nanarpachisqanchejta reparanchej chayqa, ama ninachu “payqa imitallamantapis phiñakullanpuni, qonqashanqachá” nispa. ¿Imaraykutaj wakin hermanos phiñakunkuman? Ichapis wakenqa pisipaj qhawakunku imayna uywasqaschus kasqankurayku. Wakinkunataj mosojllaraj kasqankurayku, manaraj yachakunkuchu wajkuna pantajtinku perdonananku kasqanta. Imayna kajtinpis, mayta kallpachakuna hermanosninchejwan allinyakunapaj. Chantá imamantapis usqhayllata phiñakoj runaqa, reparakunan tiyan mana ajina kananpaj kallpachakunan kasqanta. Chaytaqa ruwananpuni tiyan paypa allinninrayku, wajkunaj allinninraykutaj.

8. ¿Imaraykutaj Jesusta discipulosnin taporqanku pichus cielopi kaj Gobiernopi aswan kuraj kasqanta?

⁸ Jesuspa discipulosnenqa payta taporqanku: “¿Pitaj cielopi kaj Gobiernopi aswan kurajri?”, nispa (Mat. 18:1). Chayrayku Jesusqa “juchʼuykunamanta” parlarqa. Imajtinchus chay tiempomanta judiosqa, mayta munarqanku allinpaj qhawasqa kayta, qhapaj jinataj qhawasqa kayta. Uj yachayniyoj runa  nin: “Runasqa mayta munaj kanku jatunpaj qhawasqa kayta, may rejsisqa kayta, sumaj respetasqa kayta ima”, nispa.

9. ¿Imatataj Jesuspa discipulosnin ruwananku karqa?

⁹ Judiosqa maytapuni jatunchakoj kanku. Chayrayku Jesusqa yacharqa discipulosnin mayta kallpachakunanku kasqanta mana judíos jina yuyanankupaj. Jesús nerqa: “Astawanpis qankunamanta kurajpaj qhawasqa kajqa, sullkʼa jina kachun, kamachej kajtaj, kamachi jina kachun”, nispa (Luc. 22:26). “Sullkʼa jina” kanapajqa, ‘wajkunata noqanchejmanta aswan kurajta jina qhawananchej’ tiyan (Fili. 2:3). Chayta ruwanapaj kallpachakusun chayqa, mana wajkunata pantachisunchu.

10. ¿Imaraykutaj Pabloj yuyaychasqanta sumajta japʼikunanchej tiyan?

¹⁰ Tukuy hermanos, hermanaspis noqanchejmanta nisqa, imallatapis aswan sumajtapuni ruwanku. Chaytataj reparanchej, allin imasta ruwasqankuta rikuspa. Apóstol Pabloqa Corintomanta hermanosman yuyaychashaspa nerqa: “Qanrí, ¿imapitaj wajkunamanta aswan sumaj kankiri? Chantá, ¿imataj tiyapusunki mana Diosmanta japʼisqaykiri? Japʼerqanki chaypis, ¿imaraykutaj jatunchakunki manapis japʼiwajchu jinari?”, nispa (1 Cor. 4:7). Noqanchejpis chayta sumajta japʼikunanchej tiyan. Chayrayku mayta kallpachakuna ama wajkunawan jatunchachikunapaj, nitaj wajkunata pisipaj qhawanapaj. Wakin hermanosqa sumajta umallirichinku. Wakin hermanastaj ashkha runasman Bibliamanta yachachinku. Jinapis chayta ruwayta atisqankumantaqa Jehovata jatunchananku tiyan.

11. ¿Imatá Jesuspa kikinchayninmanta yachakunchej?

¹¹ Jesusqa discipulosninman wajkunata ama pantachinankuta niytawan, paykunaman uj kikinchaywan sutʼincharqa. Chay kikinchayqa karqa uj reymanta, kamachinmantawan. Reyqa kamachinpa may chhika manunta perdonasqa, ni imawan juntʼayta atisqanrayku. Aswan qhepamantaj chay kamacheqa, waj kamachi masinta mana perdonayta munasqachu pisi manulla kajtinpis. Chayrayku reyqa, chay mana khuyakoj kamachita carcelman wisqʼaykuchisqa. ¿Imatá kay kikinchaymanta yachakunchej? Jesús nerqa: “Kikillantataj cielopi kaj Tatayqa qankunata ruwasonqachej, manachus sapa ujniykichej tukuy sonqo hermanoykichejta perdonankichej chayqa”, nispa (Mat. 18:21-35).

12. Hermanonchejta mana perdonasunmanchu chay, ¿imaynataj congregacionmanta hermanos sientekunkuman?

¹² Chay sajra kamacheqa, kamachi masinta mana perdonasqanrayku, mana payllachu llakiypi rikhurerqa, manaqa wajkunapis. Payqa mana kamachi masinta khuyarikorqachu, carcelmantaj wisqʼaykucherqa manunta juntʼanankama. Chantá pay imatachus ruwasqanta rikoj kamachistapis llakichillarqataj. Jesús nerqa: “Kamachi masisnintaj chayta rikuspa mayta llakikusqanku”, nispa (Mat. 18:29-31). Noqanchejpis ajinallatataj ruwasqanchejwan wajkunata llakichisunman. Sonqonchejta nanachiwanchej chay hermanota chayri chay hermanata mana perdonayta munaspaqa, llakichisunman, mana munakusunmanchu, nitaj parlapaytapis munasunmanchu. Arí, wajkunawan mana allinpi kaspaqa, congregacionmanta waj hermanostapis llakichisunman.

13. ¿Imatataj uj precursoramanta yachakunchej?

¹³ Hermanosninchejta perdonanchej chayqa, tukuypis kusisqa kanchej. Cristina sutiyoj hermanamanta parlarina. Payqa precursora. Paytaqa congregacionninmanta uj hermana, mayta sonqonta nanachej. Pay nin: “Wakin kuti parlasqanwanqa, maytapuni sonqoyta nanachiwaj. Predicacionpeqa mana paytawan kachanawankuta munarqanichu. Chayrayku niña  predicacionman riyta munarqanichu”, nispa. Cristinaqa maychus kajllamanta phiñakushasqanta yuyarqa. Jinapis payqa hermanata perdonaporqa, nitaj sonqo nanasqa kasqallanpichu yuyarqa. Payqa La Atalaya del 15 de octubre de 1999 watamanta, “Perdonemos de corazón” nisqa yachaqanata leeriytawan, llampʼu sonqowan chayman jina ruwarqa. Ajinamanta hermanata perdonaporqa. Pay nillanpuni: “Kunan reparani tukuy cambianapaj kallpachakushasqanchejta. Reparallanitaj Jehovaqa sapa día tukuy sonqo perdonawasqanchejta. Perdonaspaqa uj llasa qʼepitapis qʼepirakuyman jina sientekuni, watejmantataj kusisqa kani”, nispa.

14. 1) Mateo 18:21, 22 nisqanman jina, ¿imatataj mana ruwayta atillanmanchu karqa Pedro, chanta imatataj yachakunchej Jesuspa kutichisqanmanta? 2) ¿Imatá ruwasunman Pedro jina mana perdonayta atinchejchu chay?

¹⁴ Yachanchej perdonananchejpuni kasqanta. Jinapis wakin kuteqa perdonayta mana atillanchejchu. Apóstol Pedropis wakin kutis nisina perdonayta atillarqachu (Mateo 18:21, 22 leey). Kinsa imas yanapawasunman perdonayta yachanapaj. Ñaupaj kaj, tʼukurina mashkha kutistachus Jehová perdonawasqanchejpi (Mat. 18:32, 33). Jehovaqa sapa kuti perdonawanchej mana perdonanapaj jina kajtinchejpis (Sal. 103:8-10). Chantapis purajmanta munanakunallanchejtaj tiyan. Chayrayku ama yuyanachu, munaspalla hermanosninchejta perdonananchej kasqanta, manaqa perdonananchejpuni tiyan (1 Juan 4:11). Iskay kaj, perdonaspaqa, sonqonchejta nanachiwarqanchej chay hermanota yanapanchej, congregacionpi ujchasqa kanchej, Jehovawan allinpi kanchej, kusisqataj kanchej (2 Cor. 2:7; Col. 3:14). Kinsa kaj, Jehová Diosqa kamachiwanchej wajkunata perdonanata, chayrayku paymanta yanapata mañakuna. Ama saqenachu Satanás hermanospurata phiñanachinawanchejta (Efe. 4:26, 27). Mana Satanaspa trampanpi urmanapajqa, Jehovaj yanapantapuni necesitanchej.

15. Colosenses 3:13 nisqanman jina, ¿imatá ruwasunman uj hermano chayri uj hermana ruwasqanwan phiñachiwajtinchej?

¹⁵ Uj hermano chayri uj hermana ruwasqasninwan mayta phiñachiwanchej chay, ¿imatá ruwasunman? Mayta kallpachakuna paywan allinyakapunapaj. Jehovamantaj willarikuna imaynapunichus kashasqanchejta. Chantá Jehovamanta mañakuna chay hermanota bendecinanpaj. Mañakunallataj yanapata chay hermanota pay jina qhawananchejpaj (Luc. 6:28). Manapuni hermanota perdonayta atinchejchu chaytaj, piensarina imaynamantachus paywan parlarinapi. Astawanpis piensarina hermanoqa mana sonqonchejta nanachiyta munawasqanchejraykuchu imatapis ruwasqanpi (Mat. 5:23, 24; 1 Cor. 13:7). Hermanowanqa allinyakuyta munaspa parlana. Jinapis manapuni noqanchejwan allinyakuyta munanchu chay, ¿imatá ruwasunman? Biblia nin: “Ujkuna ujkunawan aguantanakullaychejpuni”, nispa. Chayrayku paywan pacienciakunallapuni (Colosenses 3:13 leey). Ni imarayku hermanopaj phiñasqallapuni kanachu. Imaraykuchus ajinallapuni kasunman chayqa, Jehovamanta karunchakusunman. Ni ima pantachinawanchejta saqenachu. Ajinamantaqa tukuy imamanta nisqa, Jehovata astawan munakusqanchejta rikuchisun (Sal. 119:165).

16. ¿Imatataj sapa ujninchej ruwananchejpuni tiyan?

¹⁶ May agradecesqa kashanchej Jehovata sumaj ujchasqa sirvisqanchejmanta. Imaraykuchus “uj tropalla”, “uj michejniyojllataj” kanchej (Juan 10:16). Organizados para hacer la voluntad de Jehová nisqa libropi, 165 paginapi nin: “Ujchasqallapuni kanapajqa mayta kallpachakunanchej tiyan”, nispa. Chay libropi nillanpuni: “Hermanosninchejta Jehová jina qhawasun chayqa, paykunawan allintapuni kausakusun”, nispa. Jehová Diosqa “juchʼuykunamanta” kajkunata, mayta munakuwanchej. Noqanchejpis ajinallatataj hermanosninchejta munakunanchej tiyan. Jehovaqa yachan, may allinpajtaj qhawan imastachus hermanosninchejta yanapanapaj, cuidanapaj ima ruwasqanchejta (Mat. 10:42).

17. ¿Imata ruwanapajtaj kallpachakunanchej tiyan?

¹⁷ Hermanosninchejtaqa munakunchej. Chayrayku “mayta kallpachakuna hermanonchejta ama pantachinapaj, nitaj urmachinapaj” (Rom. 14:13). Paykunataqa noqanchejmanta aswan kurajta jina qhawana, tukuy sonqotaj perdonana. Ama saqenachu wajkunaj ruwasqasninku pantachinawanchejta. Astawanpis “tukuy imata ruwana wajkunawan allinpi kausakunapaj, jinallataj purajmanta kallpachanakunapajpis” (Rom. 14:19).