Congregacionniykupeqa ashkha hermanos ajllasqa cristianosmanta kajkuna karqanku. Ujnenqa sutikorqa Michel Aboud. Payqa congregacionpi librota estudiakushajtin, chay tantakuypi yachachej. Payqa Bibliamanta yachakusqa Nueva York llajtapi. Chaymantataj 1921 watapi Líbano suyupi predicayta qallarisqa. Yuyarikunipuni imaynatachus iskay hermanasta mayta yanapasqanta, respetasqantataj. Paykunaqa karqanku Anne chantá Gwen Beavor. Galaad Escuelamantataj graduasqas kasqanku. Paykunaqa sumaj amigasniyku karqanku. Ashkha watasninmantaj hermana Annewan Estados Unidospi tinkorqani. Tiemponmantaj Gwen hermanawan tinkullarqanitaj. Payqa Wilfred Gooch hermanowan casarakusqa. Paykunaqa Inglaterramanta Londres sucursalpi sirvisharqanku.

Wawa kashajteyqa Líbano suyupi pisilla testigos karqayku. Jinapis Bibliamanta yachakusqaykutaqa wajkunaman yachacherqayku, religionta kamachejkuna churanakuwajtiykupis. Yuyarikunipuni imaschus chay kutipi pasawasqaykuta.

Uj kuti hermanay Sanawan uj edificiopi predicasharqayku. Chay edificiomanta ujnin pisopi tiyakojkunawan parlarishajtiykutaj, uj cura chamorqa. Pichá payta wajyacherqa. Payqa hermanayta millay imasta nerqa, phiñarikuytawantaj gradasta tanqaykorqa. Jinallapi policías chamorqanku, hermanaytataj atiendecherqanku. Imajtinchus hermanayqa urmaykusqanrayku heridasniyoj kasharqa. Chay curatataj policiaman apakaporqanku. Chaypitaj pistolayoj kasqanta tariparqanku. Policiaspa curajninkutaj chay curata taporqa: “¿Qan curachu kanki chayri pandillerochu kanki?”, nispa.

Yuyarikunipuni uj kuti congregacionniywan karu ranchituman predicaj rinaykupaj uj autota fletakusqaykuta. Sumajta predicasharqayku, jinallapi chay ranchomanta cura yacharkosqa  chaypi predicashasqaykuta. Chay ratotaj runata tantacherqa maqachinawaykupaj. Runasqa rumiswan chʼanqaykuwarqayku, tataypa umantataj juskʼurparqanku. Paypa uyanqa yawarpuru kasharqa. Payqa mamaywan automan kutiporqa, noqaykutaj qhepanta llakisqa rerqayku. Mamayqa tataypa uyanta pichashaspa nerqa: “Jehová, paykunata perdonay, mana yachankuchu imatachus ruwashasqankuta”, nispa.

Waj kutipitaj llajtaykuman kuterqayku familiaresniykuta waturikoj. Awelituypa wasinman chayaspataj uj curawan tinkorqayku. Payqa yacharqa tatasniy Jehovaj testigosnin kasqankuta. Noqaqa sojta watasniyojllaraj kasharqani. Chay curataj tapuwarqa: “¿Imajtintaj mana bautizasqachu kankiri?”, nispa. Noqataj nerqani wawallaraj kasqayta. Bautizakunaypajqa Bibliamanta sumajtaraj yachanay kasqanta, sinchʼi creeyniyojtaj kanay kasqanta. Ajinata kutichejtiytaj phiñarikorqa. Awelituymantaj nerqa: “Kay allchhiykeqa malcriado”, nispa.

Mana sapa kutichu llakiykunapi karqayku. Imajtinchus Líbano suyumanta runasqa kʼachas kanku, wajyarikuytapunitaj yachanku. Chayrayku, sapa kuti sumajta runaswan Bibliamanta parlarej kayku, ashkhasmantaj Bibliamanta yachachej kayku.

Noqa escuelerollaraj kashajtiy, uj joven hermano Venezuela suyumanta chayamorqa. Payqa reunionesniykuman jamoj, hermanay Wafawantaj rejsinakuyta qallarerqa. Tiemponwantaj casarakorqanku, Venezuelamantaj riporqanku. Hermanay Wafaqa cartasta apachimuwaj kayku. Chaypitaj tatayta nerqa Venezuelaman ripunaykuta, mayta faltachawasqaykurayku. Ajinamanta Venezuelaman riporqayku.

Venezuelamanqa 1953 watapi chayarqayku, Caracas llajtapitaj tiyakorqayku, presidente kamachinan wasi qayllapi. Noqaqa wawallaraj karqani. Chayrayku presidente sumaj autonpi choferninwan khuska pasashasqanta rikuspaqa, tʼukulla qhawaj kani. Tatasneyqa chay llajtaman mana yachaykukuyta atillarqankuchu. Imaraykuchus tukuy ima waj jina karqa: mikhuna, cultura, parlaypis. Ñakʼayta yachaykukushajtiykutaj, uj jatun llakiypi rikhurerqayku.

Tatayqa ujllata onqoykorqa, payqa wapu runa karqa, nitaj anchata onqojchu. Chayrayku mana creellarqaykuchu. Paytaqa doctores nerqanku cancerniyoj kasqanta, operarqankutaj. Semananmantaj wañuporqa.

May jina llakisqapuni kasharqayku. Noqaqa 13 watasniyojllaraj karqani. Ni jaykʼaj yuyarqaykuchu tatay wañupunantaqa. Chayrayku niña ujtawan kusisqa kanaykuta yuyarqayku. Mamayqa uj tiempota, tataymanta maytapuni llakikorqa. Jinapis reparakorqayku mana allinchu kasqanta llakisqallapuni qhepakunaykoqa. Jehovaj  yanapayninwantaj llakiyniykuta atiparqayku. 16 watasniyoj bachiller llojserqani, Caracas llajtapi. Repararqanitaj familiayta yanapanaypaj, trabajanay kasqanta.

Chaypacha hermanay Sanaqa, Rubén Araujo hermanowan casarakorqa. Chay hermanoqa Galaad Escuelaman risqa, Venezuelallamantaj kutichimusqanku. Paykunaqa Nueva York llajtaman riporqanku. Familiayqa universidadpi estudianayta munarqa. Chayrayku hermanaywan cuñadoywan ima Nueva Yorkman riporqani chaypi estudianaypaj. Paykunaqa mayta yanapawarqanku Jehová Diosman astawan qayllaykunaypaj. Chantapis congregacionniykupeqa ashkha hermanos Diosta yupaychaypi sinchʼi sayasqa karqanku. Congregacionniykoqa Brooklyn Español sutikorqa. Chay sinchʼi sayasqa hermanosmanta iskayqa, Milton Henschel chantá Frederick Franz karqanku. Paykunaqa Brooklynmanta Betelpi sirvisharqanku.

Universidadpi uj watata jinaña kashaspa, kausayniypi piensarerqani. Torremanta Qhawaj revistapeqa leererqani imaynasmantachus Jehová Diosta astawan sirvinamanta, chaypitaj tʼukurerqani. Congregacionniymanta precursores, betelitas ima kusisqa karqanku. Noqapis paykuna jina kayta munarqani. Jinapis manaraj bautizasqachu karqani. Repararqanitaj Jehovaman kausayniyta qopunay kasqanta. Chaytapunitaj ruwarqani. 30 de marzo de 1957 watapitaj bautizakorqani.

Bautizakuytawanqa precursor kaytapuni munarqani. Jinapis mana atillaymanchu karqa precursor kayta, universidadmantaj riyta. Chayrayku familiaywanqa sapa kuti parlarej kayku cartasnejta universidadta saqepuyta munasqaymanta. Venezuelaman kutipuspataj precursor kayta qallarinaymanta.

Junio de 1957 watapi Caracas llajtaman kutiporqani. Jinapis familiayqa qolqemanta pisisqa kasharqa. Chayrayku paykunaqa yanapata necesitarqanku. ¿Imaynamantataj paykunata yanapayta atiyman karqa? Bancopi trabajota tarerqani, jinapis precursor kaytapuni munarqani. Chaypajpunitaj Venezuelamanqa kuterqani. Chayrayku bancopi trabajota japʼikorqani, precursortaj karqani. Ashkha watasta tiempo completota trabajarqani, precursortaj karqani. Mana tiempoyoj kaspapis kusisqa kasharqani.

Kusisqallataj kasharqani, Sylviawan casarakusqaymanta. Payqa Alemania suyumanta Venezuelaman tatasninwan jampusqa, maytataj Jehovata munakorqa. Tiemponwantaj iskay wawitasniyoj karqayku. Qhari wawaykoqa Michel sutikorqa, warmi wawaykutaj Samira. Mamaypis noqaykuwan tiyakoj jamporqa cuidanaykupaj. Chayrayku precursor kayta saqeporqani familiayta uywanaypaj. Jinapis kusisqallapuni predicarqani. Atispaqa, señoraywan vacacionespi precursor auxiliarta orqhojpuni kayku.

1984 watapi uj paqarin trabajoyman risharqani. Rishaspataj Torremanta Qhawaj revistaj ujnin yachaqananpi piensarerqani. Chay yachaqanaqa imaynatachus vecinosninchej qhawawasqanchejmanta parlasharqa. Chay revistaqa chay kutillaraj llojserqa. Wasista pasaj jinataj piensarerqani: “¿Vecinosniy bancopi trabajaj runata jinallachu rejsiwanku? Chayri, ¿Diosta sumajta sirvej runata jinachu?”, nispa. Sumajta piensarikusqayman jinaqa, bancopi trabajaj runata jinallasina qhawashawarqanku. Chayrayku repararqani Diosta astawan sirvinay kasqanta.

Wawasneyqa escuelallapiraj kasharqanku, nitaj imapis faltawarqaykuchu. Bancopi trabajajkunapis respetawarqanku. Jinapis noqaqa munarqani, Jehová Diospa kamachinta jina qhawanawankuta. Chay diaqa chayllapi piensasharqani. Chayrayku wasipi señoraywan gastosniykumanta parlarikorqayku. Trabajoymanta llojsipojteyqa ashkha qolqeta bonota jina qonawanku karqa. Mana manusniyku karqachu, chayrayku chay qolqeqa pisi imasllawan kausakojtiyku, unaypaj alcanzawaykuman karqa.

Imatachus ruwanaytaqa, mana ajllayta atillarqanichu. Jinapis señoraywan mamaywanqa mayta yanapawarqanku. Jinamanta watejmanta precursor kayta atiyman karqa. Chaymantataj may kusisqa kasharqani. Precursor kanaypaj wakichisqaña kashajtiytaj, uj sumaj willayta willawarqanku.

Uj kuti doctor niwarqayku señoray onqoj kashasqanta. Nipuni yuyarqaykuchu ujtawan wawitayoj kanaykutaqa. Mayta kusikorqayku, pisi tiemponmantaj wawitaykuta maytaña suyasharqayku. Jinapis noqaqa precursor kayta munasqallaypipuni piensasharqani. ¿Atiymanrajchu karqa?

Imastachus ruwayta munasqaykumanta parlariytawan, familiayqa precursor kanaytapuni munarqanku. Wawitaykoqa abril de 1985 watapi nacekorqa. Gabrieltataj suticharqayku. Chay watallapitaj trabajoymanta llojsiporqani, junio killapitaj precursor kayta qallarerqani. Tiemponmantaj Venezuelapi Sucursalta Kamachejkunamanta ujnin karqani. Sucursalqa Caracas llajtamanta 80 kilometrosninpi jina kasharqa. Chayrayku semanapi iskay diata chayri kinsa diata viajanay karqa.

Sucursalqa La Victoria nisqa llajtitapi kasharqa. Chayrayku chayman riporqayku, Betel qayllapi kanaykupaj. Chayman ripuspaqa mana ñaupaj wasiykupi jinachu tiyakorqayku. Familiaytaqa, maytapuni agradecekuni Betelpi sirvinaypaj mayta yanapawasqankumanta. Hermanay Baha niwarqa mamaykuta cuidananta. Wawayku Michelqa casadoña karqa. Jinapis Gabrielwan Samirawanqa noqallaykuwanpuni tiyakusharqanku. Chayrayku paykunaqa Caracasmanta amigosninkuta saqepunanku karqa. Munasqa warmisitaypis juchʼuy llajtitapi tiyakuyman yachaykukunan karqa. Tukuyniykutaj juchʼuy wasipi tiyakuyman yachaykukunayku karqa. Caracas llajtamanta La Victoria nisqa llajtitaman ripuspaqa, ashkha cambiosta ruwarqayku.

Chantapis aswan qhepamanqa, waway Gabriel casarakorqa, Samirataj waj ladoman tiyakoj riporqa. Chantá 2007 watapi señoraytawan Betelpi sirvinaykupaj wajyariwarqayku. Kunankamataj Betelllapipuni kashayku. Kuraj wawayku Michelqa anciano, señoran Monicawan khuskataj precursores jina llankʼashanku. Sullkʼa wawayku Gabrielpis ancianollataj. Paytaj señoran Ambrawan khuska Italiapi sirvishan. Samirataj precursora, wasinmantapachataj Betelpi yanapakushan.

Kausayniypeqa ashkha imasta ajllarqani. Jinapis chayta ruwasqaymantaqa mana pesachikunichu. Maytapuni kusikuni Jehovata tukuy atisqayta sirvisqaymanta. Watas pasasqanman jina, repararqani Jehovaman qayllaykuy may sumajpuni kasqanta. Kausayninchejpi sumaj yuyaywan imatapis ajllajtinchejqa, Jehová sonqo tiyaykuyta qowasun “mayqentachus runas mana entiendeyta atinkuchu, chayta” (Fili. 4:6, 7). Señoraywanqa kusisqa Betelpi sirvishayku. Kausayniykupi imastachus ajllasqaykoqa, sumajpuni karqa. Imajtinchus Jehovaj munayninman jinapuni ruwarqayku.