1. ¿Imaraykutaj wakin hermanos sapayakunku?

TUKUY runas wakin kuti sapayakuyta yachanku. Wakenqa uj ratolla sapayakunku, wakintajrí unayta ajinallapuni kanku. Wakintaj ashkha runa chaupipi kaspapis, sapayakunku. Wakin hermanostaj mana mosoj congregacionninkuman yachaykukuyta atillankuchu. Wakenqa familiankuwan sumaj ujchasqa kasqankurayku, karu lugarman ripuspa paykunata mayta faltachanku. Wakintajrí wañupoj familiaresninkuta mayta faltachanku. Wakin hermanostaj, astawanqa niraj unaychu testigo kajkuna, familiaresninku, amigosninku ima paykunata qhesachasqankurayku chayri paykunaman churanakusqankurayku, sapayakunku.

2. ¿Ima tapuykunamantaj kay yachaqanapi kutichisun?

² Jehovaqa sapa ujta sumajta rejsiwanchej, entiendewanchejtaj. Chayrayku payqa llakisqa kashajtinchej yanapayta munawanchej. Kay yachaqanapeqa kay tapuykunaman kutichisun: ¿Imaynatá Jehová yanapawanchej mana sapayakunapaj? Sapayakunchej chay, ¿imatá ruwasunman? ¿Imaynatá yanapasunman congregacionninchejpi sapayakoj hermanosta?

3. ¿Imaynatá Jehová Eliasta yanaparqa?

³ Jehovaqa kamachisninpa allinnintapuni munan. Payqa qayllanchejpi kashan, yachantaj maykʼajchus llakisqa kashasqanchejta (Sal. 145:18, 19). Qhawarina imaynatachus Jehová, profeta Eliasta yanapasqanta. Payqa Israelpi sajra runaspa chaupinkupi tiyakuspapis, Diosta kasukullarqapuni. Diospa  enemigosnenqa kamachisninta mayta qhatiykacharqanku, Eliastapis wañuchiyta munarqanku (1 Rey. 19:1, 2). Eliasqa payllaña Jehovaj profetan kasqanta yuyarqa, chayrayku mayta llakikorqa (1 Rey. 19:10). Jehovataj chay rato Eliasta yanaparqa. Uj angelnejta willacherqa mana sapallanchu kashasqanta, manaqa ashkha israelitasraj pay jina, Diosta kasukushasqankuta (1 Rey. 19:5, 18).

4. Marcos 10:29, 30 nisqanman jina, ¿imaynatá Jehová rikuchin familiasninkuta chayri amigosninkuta saqepojkunata mayta yanapayta munasqanta?

⁴ Jehovaqa payta yupaychananchejrayku ashkha imasta saqesqanchejta yachan. Ichá wakenqa saqerqanchej Diosta mana yupaychaj familiaresninchejta, amigosninchejta ima. Uj kuti, apóstol Pedro tumpa llakisqa jina, Jesusta nerqa: “Yachanki jina, noqaykoqa tukuy imata saqespa qhepaykita jamuyku. ¿Imataj noqaykupaj kanqari?”, nispa (Mat. 19:27). Jesustaj kʼachallamanta discipulosninman nerqa congregacionmanta hermanos familianku jina kananta (Marcos 10:29, 30 leey). Chantapis Tatanchej Jehovaqa, payta sirvejkunata yanapananta nin (Sal. 9:10). ¿Imaynasmantá Jehová yanapawanchej mana sapayakunapaj? Chayta qhepan parrafospi qhawarisun.

5. ¿Imaraykutaj piensarinanchej tiyan Jehová yanapashawasqanchejpi?

⁵ Imaynatachus Jehová Dios yanapashawasqanchejpi piensarina (Sal. 55:22). Ajinamanta mana yuyasunchu sapallanchej kashasqanchejta. Hermana Carolmanta parlarina. * Payqa soltera, familianmantataj sapallan testigo. Pay nin: “Llakiypi kashajtiy Jehová yanapawasqanpi piensarisqayqa, mayta yanapawan mana sapayakunaypaj. Yachanitaj Jehová yanapanallawantapuni”, nispa.

6. Kay 1 Pedro 5:9, 10 nisqan, ¿imaynatataj sapayakoj hermanosta kallpachan?

⁶ Imaynatachus Jehová Dios sapayakoj hermanosta yanapasqanpi piensarina (1 Pedro 5:9, 10 leey). Hermano Hiroshimanta parlarina. Payqa ashkha watastaña familianmanta sapallan testigo kashan. Pay nin: “Congregacionpeqa tukuy hermanos problemasniyoj kanku. Jinapis, Jehovata sirvinankupaj  mayta kallpachakushanku. Chaytaj mayta kallpachawayku familiaykupi sapallayku testigos kajkunata”, nispa.

7. ¿Imaynatataj Diosmanta mañakuy yanapawanchej?

⁷ Diosta yupaychayta amapuni saqenachu. Jehovaman tukuy sonqo willarikuna imaynachus kashasqanchejta (1 Ped. 5:7). Hermana Massielmanta parlarina. Payqa jovencitallaraj, familianmantataj sapallan testigo. Pay nin: “Jehová Diosmanta tukuy sonqo mañakusqayqa, mayta yanapawarqa mana sapayakunaypaj. Payqa tatay jinapuni. Paywanqa sapa día ashkha kutista parlarikoj kani. Imaynachus kashasqaytataj willakoj kani”, nispa.

8. ¿Imaynatá yanapawanchej Diospa Palabranta leey, chaypitaj tʼukuriy?

⁸ Sapa día Bibliata leenapuni. Piensarinataj imaynatachus Jehová ñaupa tiempopi kamachisninta munakusqanpi. Hermananchej Biancamanta parlarina. Paytaqa familiaresnin tukuy imata ninku. Pay nin: “Ñaupa tiempomanta Diospa kamachisnin, kay tiempomanta kamachisninpis, ashkha llakiykunapi rikukorqanku. Noqapis chay jina llakiykunallapitaj rikukuni. Chayrayku paykunaj kausayninkumanta leerisqay, chaypitaj tʼukurisqayqa mayta yanapawan”, nispa. Wakin hermanosqa de memoria yachanku mayta kallpachaj textosta. Chay textosmanta wakenqa kanku Salmo 27:10 chantá Isaías 41:10. Wakin hermanostaj reunionespaj wakichikushaspa, chayri Bibliata leeshaspa grabacionesta uyarinku. Reparankutaj chayta ruwasqankoqa, mana sapayakunankupaj yanapasqanta.

9. ¿Imaynatá yanapawanchej reunionesman mana faltakusqanchej?

⁹ Reunionesman ama faltakunachu. Chaykunapeqa hermanoswan purajmanta kallpachanakunchej, paykunatataj sumajta rejsinchej (Heb. 10:24, 25). Massiel nillanpuni: “Ancha manchiskiri kaspapis, reunionesman manapuni faltakunaypaj chantá ujllatapis comentanaypaj kallpachakorqani. Chaytaj yanapawarqa congregacionpi mana sapallay sientekunaypaj”, nispa.

10. ¿Imaraykutaj Jehovata munakoj hermanoswan amigos kananchej tiyan?

¹⁰ Jehovata munakoj hermanoswan amigos kana. Congregacionpi Jehová Diosta sirviyta ñaupajman churaj hermanoswan amigos kana. Paykunamantaqa mayta yachakusunman noqanchejmanta aswan kuraj chayri sullkʼa kajtinkupis, manachayrí waj culturamanta kajtinkupis. Bibliaqa nin: “Machu runasqa sumaj yachayniyoj kanku”, nispa (Job 12:12). Kuraj kaj hermanospis yachakullankumantaj jovenesmanta. Davidqa Jonatanmanta nisqa aswan sullkʼa karqa. Jinapis paykunaqa sumaj amigos karqanku (1 Sam. 18:1). Paykunaqa  sinchʼi llakiykunapi kaspapis, purajmanta kallpachanakorqanku Jehovata sirvinallankupajpuni (1 Sam. 23:16-18). Hermana Irinamanta parlarina, payqa familianmanta sapallan testigo, nintaj: “Congregacionmanta hermanosninchej, hermanasninchejpis, tatasninchej jina, hermanosninchej jinataj kankuman. Jehovaqa hermanosta churapuwanchej familianchej jina kanankupaj”, nispa.

11. ¿Imatá ruwasunman sumaj amigosniyoj kanapaj?

¹¹ Wakin hermanosqa, mana mosoj amigosta tariyta atillankuchu. Astawanraj manchiskiris kanku chayqa. Hermananchej Ritamanta parlarina. Payqa manchali, familiantaj Bibliamanta yachakushajtin mayta churanakorqanku. Pay nin: “Reparakorqani congregacionmanta hermanospa yanapankuta mayta necesitasqayta”, nispa. Wakin kutisqa, imaynachus kashasqanchejta mana pimanpis willarikuyta atillanchejchu. Jinapis chayta ruwasun chayqa, sumaj amigosta tarisun. Amigosninchejqa mayta kallpachariyta, yanapariyta ima munawanchej. Jinapis sumajta yanaparinawanchejpajqa, willarinanchej tiyan imaynachus kashasqanchejta.

12. ¿Imaynatá hermanoswan hermanaswan predicay yanapawanchej sumaj amigosman tukunapaj?

¹² Hermanoswan hermanaswan predicayqa, yanapawanchej paykunawan sumaj amigos kanapaj. Hermana Carolmanta parlarinallapuni. Pay nin: “Ashkha hermanaswan predicaspa, Jehovaj llajtanpi waj imaspi yanapakuspa ima, paykunawan sumaj amigasman tukorqayku. Jehovaqa watas pasasqanman jina paykunanejta mayta yanapawarqa”, nispa. Jehovata munakoj hermanoswan, hermanaswan amigosman tukoyqa may sumajpuni. Jehovaqa paykunanejta yanapawanchej sapayakojtinchej chayri waj llakiykunapi kajtinchej (Pro. 17:17).

13. ¿Imapajtaj tukuy kallpachakunanchej tiyan?

¹³ Tukuy kallpachakunanchej tiyan congregacionpi munakuy kananpaj, allinta kausakunapaj ima. Ajinamanta ni pi sapayakonqachu (Juan 13:35). Wajkunataqa yanapasunman ruwasqanchejwan, parlasqanchejwan ima. Uj hermana nin: “Bibliamanta yachakushajteyqa, congregacionmanta hermanos familiay jina karqanku. Manachus paykuna yanapawankuman karqa chayqa, nichá Jehovaj testigonman tukuyta atiymanchu karqa”, nispa. Ashkha hermanosqa familiankumanta sapallanku testigos kanku. ¿Imatá ruwasunman paykuna familiankuta jina qhawanawanchejpaj? Chayta qhepan parrafospi qhawarisun.

14. ¿Imatá ruwasunman congregacionman recién jamojkunaj amigosninkuman tukunapaj?

¹⁴ Congregacionman recién jamojkunaj amigosninkuman tukunapaj kallpachakuna. Reunionesninchejman recién jamojkunataqa, tukuy sonqo japʼikuna (Rom. 15:7). Jinapis mana chayllatachu ruwananchej tiyan. Tiempo pasasqanman jina, paykunaj amigosninkuman tukunanchej tiyan. Chayrayku paykunawan kʼachas kana, tukuy sonqotaj yanaparina. Problemasniyoj kashajtinku yanaparina ama kausayninkuman satʼikuspalla. Ichá wakenqa mana willariyta atillawasunchu imaynachus kashasqankuta. Chayrayku ama pʼenqachinapaj jina, nitaj obligaspa jina imastapis tapuykachanachu. Astawanpis kʼachallamanta tapurina, pacienciawantaj uyarina. Ichapis tapurisunman imaynatachus Jehovata rejsisqankuta.

15. Creeypi sinchʼi sayasqa hermanos, ¿imaynatataj congregacionmanta hermanosta yanapankuman?

¹⁵ Congregacionmanta hermanosqa astawan Diosman qayllaykunku, sinchʼi sayasqa  hermanos, ancianos ima, paykunata yanaparejtinku. Hermana Melissamanta parlarina. Paytaqa wawamantapacha mamallan Jehovamanta yachacherqa. Pay nin: “Hermanosqa watas pasasqanman jina, wawankuta jina qhawawarqanku. Imallamantapis parlariyta munajteyqa, mayqen hermanollapis uyariwanpuni. Chaymantataj mayta agradecekuni”, nispa. Hermano Mauriciomantañataj parlarina. Payqa Bibliamanta yachachejnin congregacionmanta qharqochikojtin, mayta sapayakorqa. Pay nin: “Ancianosqa maytapuni yanapariwarqanku. Paykunaqa sapa kuti noqawan parlarinankupaj tiempochakoj kanku, predicacionmanpis acompañawaj kanku. Chantá sapallankupi Bibliata estudiaspa imatachus yachakusqankuta willariwaj kanku, khuskataj pujllarej kayku”, nispa. Kunanqa Melissa jinallataj Mauriciopis, Betelpi Jehovata sirvishanku.

16, 17. ¿Imaynasmantá hermanosta yanaparisunman?

¹⁶ Hermanosta yanapana (Gál. 6:10). Hermano Leomanta parlarina. Payqa misionero, sapallantaj karu lugarpi Jehovata sirvishan. Pay nin: “Yanapata necesitashajtinchejpuni hermanos yanapariwasqanchejqa, may sumaj. Uj kuti autoywan chocakorqani. Wasiymantaj sinchʼi llakisqa chayarqani. Jinallapi uj qhariwarmi hermanos, wasinkuman wajyariwarqanku mikhurinaykupaj. Mana yuyarikunichu imatachus mikhusqaykuta, jinapis yuyarikuni sumajta uyariwasqankuta. Jinamanta manaña anchata llakikorqanichu”, nispa.

¹⁷ Asambleasninchejpeqa tukuypis kusisqa kanchej. Imajtinchus chaypeqa hermanosninchejwan khuska kanchej, imastachus asambleapi yachakusqanchejmantataj parlarikunchej. Jinapis hermananchej Carolmanta parlarinallapuni. Pay nin: “Asambleasman rispaqa, mayta sapayakuni ashkha hermanospa chaupinkupi kashaspapis. Imajtinchus ashkha hermanosqa, familiasninkuwan khuska kashanku. Noqataj sapitallay”, nispa. Wakin hermanosqa señoranku chayri qosanku wañupojtin, asambleasman sapallankuña rispa mayta sapayakunku. Ichá mayqen rejsisqanchej hermanollapis ajina kashan. Jina kajtenqa, qhepan asambleaman noqanchejwan khuska rinanta nisunman.

18. Kay 2 Corintios 6:11-13 nisqanman jina, ¿imatataj ruwasunman?

 ¹⁸ Hermanoswan khuska karinapaj kallpachakuna. Kusirikunapaj imallatapis ruwaspaqa, ama amigosnillanchejtachu wajyarikuna. Manaqa tukuy hermanosta wajyarikuna, astawanraj sapayakoj hermanostaqa. Imajtinchus paykunataqa, tukuy sonqo yanapariyta munanchej (2 Corintios 6:11-13 leey). Hermana Melissamanta watejmanta parlarina. Pay nin: “Hermanos wasinkuman wajyariwajtiyku, chayri mayllamanpis rinaykupaj invitariwajtiyku, mayta kusikoj kayku”, nispa. Ichá noqanchejpis congregacionmanta mayqen hermanollatapis wasinchejman wajyarikusunman.

19. ¿Ima kutispitaj allin kanman hermanosta wasinchejman wajyarikunanchej?

¹⁹ Wakin hermanospa familiaresninkoqa, mana testigos kasqankurayku, wakin fechaspi fiestachakunku. Chay hermanosqa, chay diaspi wasinchejman wajyarikunata mayta necesitanku. Wakin hermanostaj tatanku, mamanku chayri mayqen familiarninkupis wañuporqa chay fechaspi, mayta llakikunku. Chayrayku chay fechaspi chay hermanosta wasinchejman wajyarikojtinchej, paykunaqa mayta agradecekuwasun. Paykunawan karinapaj tiempochakuspaqa, tukuy sonqo yanapariyta munasqanchejta rikuchinchej (Fili. 2:20).

20. ¿Imaynatá yanapawasunman sapayakojtinchej Mateo 12:48-50 versiculospi Jesuspa nisqan?

²⁰ Kay yachaqanapi yachakunchej jina, ashkha imasrayku wakin kutis sapayakunchej. Jinapis Jehovaqa yachan imaynachus kashasqanchejta. Chayrayku payqa hermanosnejta yanapawanchej (Mateo 12:48-50 leey). Noqanchejtaj hermanosninchejta yanapanapaj kallpachakuspa, Jehovaman agradecekusqanchejta rikuchinchej. Wakin kutis llakikojtinchej chayri sapayakojtinchej, Jehovaqa ni jaykʼaj saqerpariwasunchu.