1. ¿Imapitaj Satanás uj cazadorman rijchʼakun?

UJ CAZADORQA tukuy imaynasmanta trampasta wakichin monte animalesta japʼinanpaj chayri wañuchinanpaj. Chay trampasmanta ujtaj Job 18:8-10 versiculospi nisqan kashan. Payqa animalesta, sumajta wateqan maynintachus purisqanta, imatachus mikhusqantapis. Chayman jinataj, sumajta yuyaychakuspa mana reparayllata trampasta wakichin. Satanaspis kikillantataj wateqawanchej imastachus ruwasqanchejta, imaschus gustawasqanchejtapis. Chayta yachaytawantaj mana reparananchejpaj jina trampasta wakichin. Jinapis Bibliaqa niwanchej Satanaspa trampasninpi mana urmanapaj, imastachus ruwanata. Trampasninpi urmanchej chaytaj, Bibliaqa nillawanchejtaj chay trampasmanta kacharichikunapaj imastachus ruwanata.

2. ¿Ima iskay trampaswantaj Satanás astawan runasta engañan?

² Satanasqa tukuy trampasninmanta, iskay trampaswan astawan runasta urmachin. Chaykunataj kashanku jatunchakuy, tukuy imata munapayay ima. * Satanasqa ashkha watastaña chay trampaswan runasta engañashan. Payqa pʼesqota japʼej runa jina, runasta urmachinanpaj mana reparayllata sumajta trampasninta wakichin (Sal. 91:3). Jinapis chay trampasninpeqa mana urmananchejchu tiyan. Imaraykuchus Jehovaqa, sutʼita willawanchej mayqenkunachus chay trampas kasqanta (2 Cor. 2:11).

3. ¿Imajtintaj Jehová jatunchakoj runasmanta, tukuy imata munapayaj runasmanta ima Bibliapi qhelqacherqa?

³ Jehovaqa sutʼita willawanchej jatunchakuy, tukuy imata munapayay ima, Satanaspa trampasnin kasqanta. Jinapis chay trampasmanta ayqeyta atinchej. Chayrayku Jehovaqa Bibliapi qhelqacherqa, chay trampaspi urmaj wakin kamachisninpa kausayninkumanta,  mana paykuna jina urmananchejpaj. Kay yachaqanapitaj qhawarisun, Satanasqa unaytaña Jehovata sirvejkunatapis urmachisqanta. Chayrayku Jehovaqa, paykunaj kausayninkumanta Bibliapi qhelqacherqa, mana “paykuna jina ruwananchejpaj” (1 Cor. 10:11). Jehovaqa yachan chay runaspa kausayninkumanta yachakuspa, Satanaspa trampasninmanta jarkʼakuyta atisqanchejta.

4. Jatunchakusun chay, ¿imapitaj rikukusun?

⁴ Satanasqa mayta munan jatunchakunanchejta. Payqa yachan jatunchakuspa pay jina kananchejta, wañunanchejtataj (Pro. 16:18). Chayrayku Pablo nerqa, jatunchakojqa Satanás jina juchachasqa kananta (1 Tim. 3:6, 7). Chaypitaj tukuy cristianos rikukusunman Jehovata unaytaña chayri kunallanraj sirvishaspapis.

5. Eclesiastés 7:16, 20 nisqanman jina, ¿imaynataj jatunchakoj runa?

⁵ Jatunchakoj runaqa payllapi astawan yuyan chayri allinnillanta maskʼan. Satanasqa, noqallanchejpi astawan yuyananchejta munan, astawanraj llakiykunapi chayri problemaspi kajtinchej. Ichá pillapis qhasimanta juchachawarqanchej chayri sufrichiwarqanchej. Satanasqa mayta kusikunman ajinapi rikukuspa Jehovata chayri hermanosninchejta juchachajtinchej. Chantapis mayta munan, problemasninchejta munayninchejman jinalla allinchananchejta, nitaj munanchu Jehová Palabranpi yuyaychasqanman jina allinchanata (Eclesiastés 7:16, 20 leey).

6. ¿Imatataj uj hermanamanta yachakusunman?

⁶ Uj hermanamanta parlarina. Payqa waj hermanospa pantasqasninkuta manapuni aguantayta atejchu. Chayrayku niña chay hermanoswan khuska kayta munajchu. Pay nin: “Congregacionpeqa ni piniyoj jina karqani. Imaraykuchus mana hermanosta perdonayta atillarqanichu. Chayrayku qosayta nerqani waj congregacionman ripunaykuta”, nispa. Paytaqa yanaparqa, marzo de 2016 watamanta JW Broadcasting^® nisqata qhawasqan. Chay videopeqa yuyaychashan wajkuna pantajtinku mana phiñakunapaj imastachus ruwanata. Hermana nillanpuni: “Chay videota qhawaspaqa,  reparakorqani noqa kʼumuykukoj sonqo kanay kasqanta, cambianay kasqantataj. Chay videoqa mayta yanapawarqa Jehová jina yuyanaypaj, payllataj sumaj kamachej kasqanpi piensarinaypaj”, nispa. ¿Imatá kaymanta yachakunchej? Ima problemapi kaspapis, amapuni Jehovamanta qonqakunachu. Astawanpis paymanta mañakuna hermanosta pay jina qhawanapaj yanapanawanchejta. Jehovaqa yachan hermanosninchej imaspichus pantasqankuta. Jinapis paykunata perdonan, munantaj noqanchejpis perdonananchejta (1 Juan 4:20).

7. ¿Imataj rey Uziasta pasarqa?

⁷ Judamanta rey Uziasqa, mayta jatunchakorqa. Chayrayku wajkuna imatachus nisqankuta mana uyarerqachu, mana ruwanan imastataj ruwarparqa. Uziasqa ashkha imasta sumajta ruwarqa. Payqa ashkha guerraspi atiparqa, llajtasta, torresta ima sayaricherqa, chajrastapis sumajta poqocherqa. Dios “payta yanaparqa” (2 Cró. 26:3-7, 10). Jinapis Bibliaqa rey Uziasmanta nin: “Jatun atiyniyojña kaspa, sonqonpi runaykachayta qallarerqa, chayraykutaj mana allinchu rerqa”, nispa. Jehovaqa kamacherqa sacerdoteslla templopi paypaj inciensota qʼoshñichinankuta. Jinapis jatunchakoj rey Uziasqa, chayta ruwaj churakorqa. Jehovataj chay ruwasqanta mana allinpajchu qhawarqa, lepra onqoywantaj castigarqa. Jinamanta rey Uziasqa, wañupunankama lepra onqoyniyoj karqa (2 Cró. 26:16-21).

8. ¿Imaynatá 1 Corintios 4:6, 7 yanapawanchej mana jatunchakunapaj?

⁸ Noqanchejpis ichá rey Uzías jina jatunchakusunman, pantasunmantaj. Hermano Josemanta parlarina. Payqa sumaj negociante karqa. Congregacionpipis sumaj respetasqa anciano karqa. Payqa asambleaspi discursosta qojpuni. Congregacionesta waturej hermanospis wakin imasta payta tapurikoj kanku. Jinapis pay nin: “Noqaqa imatapis ruwayta atisqayman jina, yachasqayman jinataj ruwaj kani. Nitaj Jehovapi piensarejchu kani. Chayrayku imatachus Jehová kamachiwasqanta, yuyaychariwasqanta ima mana kasorqanichu”, nispa. Jinamanta Joseqa jatun juchapi urmarqa, congregacionmantataj qharqochikorqa. Payqa kay qhepa watasllapi Jehovaj llajtanman kutinpun. Pay nillanpuni: “Jehovaqa aswan allinpaj qhawan kasukoj runa kasqanchejta, nitaj ima cargoyojchus kasqanchejtachu”, nispa. Amapuni kayta qonqanachu: Imatachus sumajta ruwayta yachanchej chayri congregacionpi ruwanasta japʼinchej chayqa, Jehovaj yanapaynillanwan  chayta ruwanchej (1 Corintios 4:6, 7 leey). Jatunchakojtinchejqa, Jehovapaj ni imata ruwayta atisunchu.

9. ¿Imatataj Satanaswan Evawan ruwarqanku, Jehovaj qosqanwan mana contentakusqankurayku?

⁹ Tukuy imata astawan munapayaymanta parlaspaqa, ichá Satanaspi piensarinchej. Payqa Jehovaj angelnin kashaspa, payta may kusisqachá sirverqa. Jinapis payqa mana chaywan contentakorqachu. Payqa munarqa Jehová jina yupaychachikuyta. Satanasqa pay jina kananchejta munan. Chayrayku payqa tanqawanchej kapuwasqanchej imaswan mana contentakunanchejpaj. Evawanpis chayta ruwarqa. Jehovaqa Adantawan Evatawan mayta munakorqa. Chayrayku paykunaman nerqa, Edén huertapi kaj tukuynin sachʼasmanta mikhunankuta, uj sachʼallamantataj mana mikhunankuta (Gén. 2:16). Jinapis Satanasqa, Evata engañaykorqa, mana mikhunanku sachʼamanta mikhuykunanpaj. Evataj imatachus Jehová paykunaman qosqanwan mana contentakusqanrayku, chay uj sachʼamantawan mikhuykorqa. Jinamantataj Jehovaj contranpi juchallikorqa, tiemponmantaj wañorqa (Gén. 3:6, 19).

10. ¿Imastataj David ruwarqa imaschus kapusqanwan mana contentakusqanrayku?

¹⁰ Rey Davidmantañataj parlarina. Jehová Diosqa payta ashkha imaspi yanaparqa: qhapajyananpaj, rey kananpaj, guerraspi atipananpaj ima. Davidqa Jehovaman maytapuni agradecekorqa, nerqataj Jehová imaspichus yanapasqanqa mana yupay atina kasqanta (Sal. 40:5). Jinapis uj pachaqa, kapusqan imaswan mana contentakorqachu. Payqa Jehovaj chejnisqan imaspi urmarqa. Davidqa ashkha warmisniyoj kashaspa, waj runaj warminta munapayarqa. Chay warmeqa Betsabé karqa, qosantaj hitita Urías karqa. Davidqa payllapi yuyasqanrayku Betsabewan puñuykorqa, ajinamantataj Betsabeqa onqoj rikhurerqa. Chantapis payqa Betsabej qosanta wañuchicherqa (2 Sam. 11:2-15). ¿Imajtintaj David chay millay juchaspi urmarqa? ¿Nichu yacharqa Jehová rikushasqanta? Davidqa ashkha watasta Jehovata tukuy sonqo sirverqa. Jinapis payllapi yuyayta qallarisqanrayku, kapusqan imaswan mana contentakorqachu. Jinamantataj payqa mayta ñakʼarerqa. Tiemponmantaj Davidqa Jehová Diosman juchanta willakorqa, maytataj pesachikorqa. Jehová perdonasqanmantataj maytapuni agradecekorqa (2 Sam. 12:7-13).

11. Efesios 5:3, 4 nisqanman jina, ¿imatataj ruwasunman mana imatapis astawan munapayanapaj?

 ¹¹ Davidmantaqa, yachakusunman imastachus Jehová qowasqanchejmanta agradecekunatapuni. Ajinamanta mana imatapis astawan munapayasunchu (Efesios 5:3, 4 leey). Imaschus kapuwasqanchejwan sonqo juntʼasqa kausakuna. Estudiosninchejmanqa yachachina, imatachus Jehová paykunaman sapa día qosqanpi piensarinankuta, chaymantataj agradecekunankuta. Chayta ruwanqanku chayqa, Jehovawan semanapi qanchis imasmanta parlarenqanku (1 Tes. 5:18). Noqanchejpis ajinallatataj ruwasunman. Jehová imastachus qowasqanchejpi piensarisun chayqa, payman astawan agradecekusun. Ajinamantataj imaschus kapuwasqanchejwan sonqo juntʼasqa kausakusun. Chayta ruwasun chayqa, mana imatapis astawan munapayasunchu.

12. ¿Imapitaj Judas urmarqa tukuy imata munapayasqanrayku?

¹² Judas Iscariotemantañataj parlarina. Payqa kʼacha runa karqa. Jesustaj payta ajllarqa ujnin apostolnin kananpaj (Luc. 6:13). Confianapaj jina kasqanraykutaj Jesusqa, payta qolqe cajamanta encargadota jina churarqa. Chay qolqeqa predicacionpi gastosninkupaj karqa. Chaytataj kay tiempopi jallpʼantinpi willakunanpaj qolqeta apaykachakun, ajinallatataj apaykachaj kanku. Jesusqa ashkha kutispi apostolesninman nerqa, tukuy imata munapayaymanta allinta qhawarikunankuta (Mar. 7:22, 23; Luc. 11:39; 12:15). Jinapis Judasqa mana chayta kasukorqachu, tiemponmantaj suwakuyta qallarerqa. Qolqeta mayta munapayasqanraykutaj Jesusta wasancharqa (Luc. 6:16).

13. ¿Imaspitaj Judas qolqeta mayta munapayasqan sutʼi rikukorqa?

¹³ Judasqa qolqeta astawan munapayarqa. Chaytaj Jesusta wañuchinanku qayllata sutʼi rikukorqa. Uj kuti, Simón pichus aswan ñaupajta lepra onqoyniyoj karqa chay, Jesusta discipulosnintawan wasinman wajyarikorqa. Chaypeqa kashallarqankutaj Mariawan hermanan Martawan ima. Mikhushajtinkutaj Mariaqa manchay valorniyoj perfumasqa aceitewan Jesuspa umanman jichʼaykorqa. Judaswan chay ujkuna discipuloswantaj, chayta rikuspa mayta phiñakorqanku. Ichapis paykunaqa piensasharqanku, chay aceiteta vendeytawan, chay qolqeta predicacionpi gastosninkupaj apaykachayta. Jinapis Judasqa mana chaymantachu phiñakorqa. Payqa suwa karqa, qolqe cajamantataj suwakuyta munarqa. Chaymanta pisi diasninman, Judasqa anchatapuni qolqeta munapayasqanrayku, Jesusta qolqerayku japʼicherqa (Juan 12:2-6; Mat. 26:6-16; Luc. 22:3-6).

14. ¿Imatataj uj qhariwarmi ruwarqa Lucas 16:13 nisqanta kasukusqankurayku?

¹⁴ Jesusqa yachachisqasninman nerqa: “Qankunaqa mana atinkichejchu ujllapi Diostawan qolqetawan sirviyta”, nispa (Lucas 16:13 leey). Jesús chayta nisqanqa, kay tiempopipis mana cambianchu. Rumania suyumanta uj qhariwarmimanta parlarina. Paykunaqa Jesuspa nisqanta kasukorqanku aswan qhapaj suyupi, pisi tiempollapaj trabajota qhesachaspa. Paykuna ninku: “Bancoman ashkha manu karqayku. Chayrayku qallariypeqa chay trabajota Jehovaj bendicionninta jina qhawarqayku”, nispa. Jinapis chay trabajota japʼejtinkoqa, manaña tiemponku kanmanchu karqa Jehovata sirvinankupaj. Paykunaqa 15 de agosto de 2008 watamanta Torremanta Qhawaj revistapi “Juk sunqullawan Diosman chiqa sunqu kana” nisqa yachanata leeytawan, Jehovata sirviyta ajllarqanku. Paykuna ninku: “Astawan gananaykurayku waj suyuman ripuykuman karqa chayqa, Jehovata mana kausayniykupi ñaupajman churaykumanchu karqa, paymantataj karunchakuykuman karqa”, nispa. Chayrayku paykunaqa mana chay trabajota japʼikorqankuchu. Chanta, ¿imaynatá manunkuta juntʼankuman karqa? Hermanoqa, suyullankupitaj uj  trabajota tarerqa. Chaywantaj manunkuta pagayta atillarqanku. Hermana nin: “Jehovaqa kamachisninta yanapanpuni”, nispa. Kunantaj iskayninku kusisqa Jehovata sirvishanku.

15. ¿Imajtintaj Satanaspa trampasninmanta ayqeyta atisunmanpuni?

¹⁵ Jatunchakushasqanchejta chayri tukuy imata munapayashasqanchejta reparakunchej chay, ¿imatá ruwasunman? Chay trampasmanta kacharichikuna. Apóstol Pabloqa nerqa Satanaspa trampasninpi urmajkunaqa, chay trampasmanta kacharichikuyta atisqankuta (2 Tim. 2:26). Davidtaj chaytapuni ruwarqa. Payqa Natanpa kʼamisqanta japʼikorqa, juchanmantataj mayta pesachikorqa. Ajinamanta payqa Jehovaj amigollanpuni karqa. Amapuni qonqanachu Satanasmanta nisqa, Jehová aswan atiyniyoj kasqanta. Chayrayku Jehová yanapanawanchejta saqesun chayqa, Satanaspa mayqen trampanmantapis ayqeyta atisun.

16. ¿Imatá ruwasunman Satanaspa trampasninpi mana urmanapaj?

¹⁶ Satanaspa trampasninmanta kacharichikuyta atispapis, aswan allin kanman ni jaykʼaj chay trampaspi urmananchej. Chaytataj Jehovaj yanapaynillanwan ruwayta atisun. Jinapis sumajta qhawarikunanchej tiyan mana chay trampaspi urmanapaj. Imajtinchus ashkha watastaña Jehovata sirvejkunapis, jatunchakorqanku chayri tukuy imata munapayarqanku. Ichapis yuyaspa chayri imata ruwaspa, Satanaspa trampasninpi urmanayashanchej. Chayrayku Jehovamanta sapa día mañakuna, chayta sutʼita reparachinawanchejpaj (Sal. 139:23, 24). Amapuni Satanaspa trampasninpi urmanachu.

17. ¿Imataj Satanaswan tumpamantawan kanqa?

¹⁷ Satanasqa may chhika watastaña, ashkha runasta trampasninpi urmachishan. Jinapis pisi tiempomantawan watasqa kanqa, chantataj chinkachisqa kanqa (Apo. 20:1-3, 10). Maytapuni suyakushanchej Satanás chinkachisqa kananta. Chaykamataj allinta qhawarikunallapuni, Satanaspa trampasninpi mana urmanapaj. Tukuy atisqanchejta kallpachakuna mana jatunchakunapaj, nitaj tukuy imata munapayanapaj. Bibliaj kay nisqanta kasukunallapuni: ‘Kuraj Supaypa contranpi sayaykuychej, paytaj qankunamanta ayqenqa’ (Sant. 4:7).