1. ¿Imatataj Jehová ruwanqa tukuy sonqo arrepientekojkunawan?

 JEHOVAQA Ruwawajninchej, Leyesta Churapuwajninchej, Juezninchej kaspapis munakuyniyoj Tatanchej (Sal. 100:3; Isa. 33:22). Jehovaqa paypa contranta juchallikusqanchejmanta tukuy sonqo arrepientekojtinchej perdonayta atiwanchej, perdonaytapunitaj munawanchej (Sal. 86:5). Jehovaqa sonqochanawanchejpaj profeta Isaiasnejta nerqa: “Juchasniykichej ancha puka kajtinpis, ritʼi jina yurajman tukonqa”, nispa (Isa. 1:18).

2. Wajkunawan sumaj amigos kayta munanchej chay, ¿imatá ruwananchej tiyan?

² Pantaj runas kasqanchejrayku, parlaspa chayri imatapis ruwaspa pejpa sonqontapis nanachinchejpuni (Sant. 3:2). Jinapis perdonayta yachanchej chayqa, wajkunawan sumaj amigos kayta atisunman (Pro. 17:9; 19:11; Mat. 18:21, 22). Imitallamantapis sonqonchejta nanachinakojtinchej, Jehovaqa perdonanakunanchejta munan (Col. 3:13). Chaytataj ruwananchejpuni tiyan, imaraykuchus Jehovaqa mana michʼakuspa perdonawanchej (Isa. 55:7).

3. ¿Imastataj kay yachaqanapi yachakusun?

³ Kay yachaqanapeqa yachakusun pantaj runas kaspapis, imaynatachus Jehová jina perdonayta atisqanchejta. ¿Ima juchastataj ancianosman willananchej tiyan? ¿Imajtintaj Jehová  munan purajmanta perdonanakunanchejta? Wajkunaj juchankurayku mayta sufrej hermanosmanta, ¿imatá yachakusunman?

4. 1) Uj cristiano jatun juchata ruwajtin, ¿imatataj ruwanan tiyan? 2) Uj cristiano jatun juchata ruwajtin, ¿imatataj ancianos ruwananku tiyan?

⁴ Pillapis jatun juchata ruwajtenqa ancianosman willananchej tiyan. Chay jatun juchasmanta wakenqa 1 Corintios 6:9, 10 versiculospi kashan. Jatuchaj juchasqa Jehová Diospa leyninpa contranpi kashan. Uj cristiano jatun juchata ruwan chayqa, Jehovamanta perdonta mañakunan tiyan, chaymantataj congregacionmanta ancianoswan parlanan tiyan (Sal. 32:5; Sant. 5:14). Ancianosrí, ¿imatataj ruwananku tiyan? Jehová Dioslla juchastaqa perdonasqata perdonayta atin. Chaytataj ruwan Jesús kausayninta qosqanrayku. b Jehovaqa ancianosta churan Bibliawan yanapachikuspa ninankupaj juchallikoj congregacionllapipunichus manachus kananta (1 Cor. 5:12). Chaypajtaj ancianosqa kay tapuykunapi piensarinku: Juchallikoj, ¿ñaupajmantañachu yuyaychakorqa chay juchata ruwananpaj? ¿Juchanta pakaykuytachu munarqa? ¿Unaytañachu chay juchata ruwasharqa? ¿Sutʼipunichu yachakun Jehovaj contranpi juchallikusqanmanta arrepientekusqan? ¿Imastaj rikuchin Jehová juchallikojta perdonasqantapuni? (Hech. 3:19).

5. Imatachus ancianos juchallikojwan ruwasqanku, ¿imaynatataj congregacionta yanapan?

⁵ Ancianosqa juchallikojwan tantakushaspa, kallpachakunku imatachus Jehová cielopi chay juchallikojpaj ninña chayllatataj ninankupaj (Mat. 18:18). ¿Imaynatataj chay ruwakusqan congregacionta yanapan? Mana arrepientekoj juchallikojta congregacionmanta qharqokusqanqa, Jehovaj munasqa kamachisninta jarkʼan chay juchallikojmanta (1 Cor. 5:6, 7, 11-13; Tito 3:10, 11). Juchallikojtataj yanapan arrepientekunanpaj, jinamanta Jehovaj perdonninta tarinanpaj (Luc. 5:32). Ancianosqa tukuy sonqo arrepientekojpaj Jehovamanta mañapunku, payman watejmanta qayllaykunanpaj yanaparinanta (Sant. 5:15).

6. Juchallikoj congregacionmanta qharqochikojtin, ¿Jehová perdonayta atinmanrajchu? Sutʼinchay.

⁶ Juchallikoj ancianoswan tantakushaspa mana arrepientesqachu kashan chayqa, congregacionmanta qharqosqa kanqa. Chantapis juchallikoj gobiernoj churasqan leyesta pʼakin chayqa, ancianosqa mana jarkʼakonqankuchu imatachus autoridades juchallikojwan ruwanankumanta. Jehovaqa leyesta mana kasukojkunata autoridades juzganankuta, castiganankutapis saqen, juchallikusqankumanta arrepientekojtinkupis manapis (Rom. 13:4). Chaywanpis juchallikoj aswan qhepaman pantasqantapuni reparakun, tukuy sonqo arrepientekun, cambiantaj chayqa, Jehovaqa payta perdonananpaj wakichisqa kashan (Luc. 15:17-24). Juchallikoj jatun juchata ruwajtinpis Jehovaqa perdonanqapuni (2 Cró. 33:9, 12, 13; 1 Tim. 1:15).

7. Pillapis contranchejpi jatun juchata ruwaspa perdonta mañakuwajtinchejpis manapis, ¿imatá ruwasunman?

⁷ Juchallikojta Jehová perdonananqa mana noqanchejmantachu kashan, chaymantataj mayta agradecekunchej. Jinapis wakin imastaqa noqanchejpuni ajllananchej tiyan. Wakin kutisqa ichá pillapis contranchejpi jatun juchata ruwanman. Chay ruwasqanmantataj perdonta mañakuwasunman chayri mana.  Imayna kajtinpis chay hermanota perdonasunman. Kallpachakusunmantaj mana paywan phiñasqallapuni kanapaj, nitaj rabiasqa kanapaj. Chaytaj tiempopaj kanman, nitaj atikullanmanchu, astawanraj sonqonchej may nanasqapuni kashan chayqa. La Atalaya 15 de septiembre de 1994 nin: “Juchallikojta perdonaspaqa mana imatachus ruwasqan allillan kasqantachu nishanchej. Payta perdonaspaqa Jehovaj makinman tukuy imata saqepushanchej. Jehovaqa tukuymanta aswan cheqan Juez, maychus tiemponpitaj justiciata ruwanqa”. ¿Imajtintaj Jehová niwanchej perdonanata, maychus kajman jina juzgananpitaj atienekunata?

8. Jehovaj khuyakuyninmanta agradecekunchej chay, ¿imamantaj sonqonchej aysawasun?

⁸ Perdonaspaqa Jehovaman agradecekushanchej. Jesusqa uj rijchʼanachinapi Jehovata uj reywan kikincharqa, pichus kamachinpa mana pagay atina manunta perdonarqa. Chay kamachitaj kamachi masinta mana khuyakusqachu, manun paymanta nisqa aswan pisilla kajtinpis (Mat. 18:23-35). ¿Imatataj Jesús chaywan yachachiwanchej? Jehová mayta khuyakuwasqanchejmanta tukuy sonqo agradecekunchej chayqa, sonqonchej aysawasun wajkunata perdonananchejpaj (Sal. 103:9). Unay watasña Torremanta Qhawaj revistapi inglés parlaypi nerqa: “Runa masinchejta may chhikata perdonaspapis Jehová Cristonejta perdonawasqanchejman, khuyakuwasqanchejman ni jaykʼaj ni kantunmanpis chayasunmanchu”, nispa.

9. ¿Pikunatataj Jehová khuyakun? (Mateo 6:14, 15).

⁹ Perdonajkunaqa perdonasqallataj kanqanku. Jehovaqa khuyakojkunata khuyakullantaj (Mat. 5:7; Sant. 2:13). Jesusqa discipulosninman orakuyta yachachishaspa chayta sutʼita nerqa (Mateo 6:14, 15 leey). Jehovaqa kamachin Jobman chayman rijchʼakojllatataj nerqa. Elifaz, Bildad, Zofarpis parlasqankuwan maytapuni Jobpa sonqonta nanacherqanku. Jehovataj Jobta nerqa paykunapaj mañapunanta. Job chayta ruwajtintaj Jehová bendicerqa (Job 42:8-10).

10. ¿Imajtintaj phiñasqallapuni kay mana allinninchejpajchu? (Efesios 4:31, 32).

¹⁰ Phiñasqallapuni kayqa noqallanchejpajtaj mana allinchu. Phiñasqallapuni kayqa uj llasa qʼepi jina. Jehovataj munan amaña chay llasa qʼepita qʼepinanchejta (Efesios 4:31, 32 leey). Jehová niwanchej: “Ama rabiakuychu, nitaj phiñakuychu”, nispa (Sal. 37:8). Chayta kasukoyqa allinnillanchejpajtaj, imajtinchus phiñasqallapuni kaspaqa onqoykusunman (Pro. 14:30). Wajpaj phiñasqallapuni kajtinchejqa mana paychu sufrenqa, imaynatachus venenota tomaykuspa noqallanchejtaj sufrinchej ajinata. Chayrayku wajkunata perdonaspaqa noqallanchejpajtaj allin kajta tarinchej (Pro. 11:17). Sonqo tiyasqa kanchej, Jehovatapis sirviyta atillanchejpuni.

11. ¿Imatataj Biblia niwanchej vengakuymanta? (Romanos 12:19-21).

¹¹ Jehovalla vengakuyta atin. Jehovaqa mana munanchu contranchejpi juchallikojkunamanta vengakunanchejta (Romanos 12:19-21 leey). Noqanchejqa pantaj runas kanchej, nitaj tukuy imatachu yachanchej. Chayrayku mana Jehová jina allinta juzgayta atinchejchu (Heb. 4:13). Chantapis imaynachus sonqonchej kashasqanman jina, imatapis mana allinta piensarispalla ruwarpasunman. Santiago nerqa: “Phiñakojqa mana Diospa cheqan kayninman jinachu ruwan”, nispa (Sant. 1:20). Jehovaqa cheqan kajman jinapuni imatapis allinchanqa, justiciatapis ruwanqapuni.

12. ¿Imaynamantá rikuchinchej Jehová justiciata ruwananpi atienekusqanchejta?

 ¹² Perdonaspaqa Jehová justiciata ruwananpi atienekushanchej. Jehovaj makinman tukuy imata saqepuspaqa, sutʼita rikuchinchej jucharayku tukuy llakiykuna kajta Jehová chinkachinanpi atienekusqanchejta. Paraisopeqa imaschus sonqonchejta nanachiwasqanchej “manaña yuyarisqachu kanqa, manaña sonqomanpis kutirimonqachu” (Isa. 65:17). Pipis imatapis ruwawajtinchej, ¿atisunmanchu rabianchejta, phiñakuyninchejtapis wijchʼuyta? Qhawarina imaynatachus wakin hermanos chayta ruwasqankuta.

13, 14. ¿Imatataj Tonymanta yachakunchej?

¹³ Ashkha hermanosninchejqa wajkuna mayta ñakʼarichejtinkupis perdonaporqanku. ¿Imaynatá chay paykunata yanaparqa?

¹⁴ Tonymanta parlarina. c Payqa Filipinas suyupi tiyakun. Niraj Jehovaj testigon kashajtin ujnin kuraj hermanonta wañucherqanku. Yacharqataj hermanontaqa José sutiyoj runa wañuchisqanta. Tonyqa manchay phiña runa kasqanrayku vengakuyta munarqa. Josetataj runata wañuchisqanrayku carcelman wisqʼaykorqanku. José carcelmanta llojsimojtinña, Tonyqa juraspa nerqa Joseta tarispa wañuchinanta, chaypajtaj pistolata rantikorqa. Jinallapi Jehovaj testigosninwan Bibliamanta yachakuyta qallarerqa. Pay nin: “Yachakusqayman jina repararqani cambianay kasqanta. Rabiayta wijchʼunay karqa”, nispa. Tonyqa bautizakorqa, aswan qhepamantaj congregacionninpi anciano jina sirviyta qallarerqa. Maytachá tʼukorqa Josepis testigollamantaj tukusqanta yachaspa. Iskayninku tinkuspataj mayta abrazanaykukorqanku, Tonytaj Joseta nerqa perdonasqantaña. Tonyqa nin Joseta perdonaspa maytapuni kusikusqanta. Ajinata perdonasqanrayku Jehovaqa payta bendicerqa.

15, 16. ¿Imatá yachakusunman Petermanta Suemantawan?

¹⁵ 1985 watapi Peterwan Suewan reunionninkupi kasharqanku, jinallapitaj uj bomba phatarqa. Chay bombataqa uj runa salonman churaykusqa. Sueqa ashkha heridasniyoj  karqa. Chayrayku niña muskhiyta aterqachu, niña uyariyta aterqachu, ñawisninmantapis mal karqa. d Paykunaqa tapukullajpuni kanku: “¿Pitaj chay jinatapuni ruwanman karqari?”, nispa. Unay watasninmantaj chay bombata churaykoj runata japʼerqanku, carcelman wisqʼaykuspataj wañunankama chaypi kananta nerqanku. Petertawan Suetawan taporqanku sichus chay runata perdonasqankuta. Paykunataj nerqanku: “Jehovaqa yachachiwanchej rabiasqallapuni kay, phiñasqallapuni kaypis cuerponchejpaj, yuyayninchejpaj, sonqonchejpajpis mana allinchu kasqanta. Chayrayku qallariymantapacha Jehovamanta mañakorqayku yanapanawaykuta, phiñakuyniykuta, rabiaykutapis wijchʼunaykupaj, ajinamanta ñaupajman rinallaykupajpuni”.

¹⁶ ¿Chay hermanosninchej chay runata perdonayta atillarqankuchu? Mana. Paykuna ninku: “Sueqa wakin kutis mal churakullanpuni. Chay kutispitaj chay accidentemanta yuyarikuspa rabiakuykuraj. Jinapis mana chayllapipuni yuyasqaykurayku rabiayku pasapunpacha. Chantapis sonqomantapacha niykuman, chay runa testigoman tukojtin chunka makiwan japʼikunaykuta. Chay pasawasqaykumanta yachakuyku, Bibliaj nisqasninta kasukuspalla sonqo tiyasqa kayta atisqaykuta. Llasa qʼepiykutapis qʼepirachiwaykuman jinapuni. Chantapis aswan qhepaman Jehová imaschus sufrichiwasqanchejta chinkachinanta yachayqa, mayta sonqochawayku”.

17. ¿Imatá hermananchej Myramanta yachakunchej?

¹⁷ Hermananchej Myramanta parlarina. Payqa casada kaspaña, iskay wawitasniyoj kaspaña testigoman tukorqa, qosantaj mana estudiayta munarqachu. Tiemponmantaj qosanqa payta wasancharqa, saqerparerqataj. Pay nin: “Qosay saqerpawajtiyku ni imanakuyta aterqanichu. Ashkhas jina ni pipi confiayta aterqanichu, mayta sonqoy nanawarqa, mayta pesachikorqani, noqa juchayoj kasqayta  yuyarqani, maytataj rabiakorqani”, nispa. Myraj matrimonion tukukapojtinpis, qosan wasanchasqanmanta sonqon nanallarqapuni. Myra nillanpuni: “Killasta ajina kasharqani. Jinapis repararqani chayqa Jehovamanta, wajkunamantapis karunchashawasqanta”. Kunantaj Myraqa nin manaña phiñasqallapunichu kasqanta. Chantapis mana munanchu qosan karqa chayta ima llakiypis qhatirinanta. Astawanpis munan maykʼajllapis testigoman tukunanta. Myraqa aswan qhepaman allin kausay kananpi astawan yuyan. Iskaynin wawasninta Jehovata sirvinankupaj sapallan yanapajtinpis, kunanqa paykunawan familiasninkuwan khuska kusisqa Jehovata sirvishanku.

18. Jehová Tukuy Atiyniyoj Juez kasqanrayku, ¿imata ruwanantataj yachanchej?

¹⁸ Mana noqanchejchu ninanchej kashan imaynatachus wajkuna juzgasqa kanankuta. Chaytaqa Jehová Dioslla ruwanqa Tukuy Atiyniyoj Juez kasqanrayku. Chayta yachaspataj mayta kusikunchej (Rom. 14:10-12). Yachanchej Jehovaqa imachus allin, imatajchus mana allin kasqanman jina cheqantapuni juzgananta (Gén. 18:25; 1 Rey. 8:32). Jehovaqa ni jaykʼaj mana cheqan kajta ruwanmanchu.

19. ¿Imatá Jehová aswan qhepaman ruwanqa?

¹⁹ Jucharayku, pantaj runas kasqanchejrayku, imaymana llakiykunapi rikukunchej, Jehovataj tukuy chayta allinchanqa. Chaytaqa maytapuni suyakushanchej. Payqa tʼirisninchejta sanoyachiwasun, imaschus llakichiwasqanchejtapis qonqachiwasun. Chaytaj mana uj ratollapajchu kanqa (Sal. 72:12-14; Apo. 21:3, 4). Chay imasqa qonqasqata qonqasqa kanqa. Chay tiempo chayamunankamataj, Jehová wajkunata perdonayta atinapaj jina ruwawasqanchejmanta agradecekusqanchejta rikuchinallapuni.