LISA sutiyoj hermana nerqa: “Astawan yanapawarqa hermanos, hermanas kʼacha kasqanku”, nispa. a Payqa Diosta rejsinanpaj imachus astawan yanapasqanmanta parlasharqa. Annepis chayman rijchʼasqallatataj nerqa: “Ñaupajta Diosta rejsiyta munarqani testigos kʼachas kasqankurayku, manataj imatachus yachachisqankuraykuchu”, nispa. Kunantaj chay iskay hermanasqa mayta gustachikunku Bibliata leespa, chaypi tʼukurispa ima. Jinapis Diosta rejsiyta qallarinankupajqa hermanos kʼacha kasqanku paykunata mayta yanaparqa.

¿Imaynatá wajkunaj sonqosninkuta kuyurichinapaj jina kʼachas kasunman? Qhawarina iskaynejmanta chayta ruwayta atisqanchejta: Parlasqanchejwan ruwasqanchejwan ima. Chantá qhawarisun pikunawanchus kʼacha kana kasqanta.

Proverbios 31 capitulopi sumaj warmimanta parlan, ‘kʼachamanta parlasqantataj’ nin (Pro. 31:26). Payqa kʼachamanta parlananpaj sumajtaraj piensarej imastachus ninanta, imaynatachus chayta ninantapis. Tataspis kʼachamanta parlananku tiyan. Ashkha tatasqa yachanku wawasninkuman imallatapis nirparejtinku, mana munakuywantaj parlajtinku sonqosninkuta nanachinankuta, wawasninkutaj mana paykunata kasukuyta munanankuta. Chayrayku tatas kʼachallamanta, munakuywantaj parlarejtinku wawasninkoqa uyarillanqanku, kasukullanqankutaj.

Tatas kajtinchejpis manapis, ¿imaynatá yachakusunman kʼachamanta parlayta? Proverbios 31:26 yuyaychawanchej ‘sumaj yachaywan parlanata’. Chaypajqa sumajta yuyaycharikunanchej tiyan imatapis ninanchejpaj, imaynatachus chayta ninanchejpajpis. Pillawanpis phiñasqa kashajtinchej allin kanman kaypi piensarinanchej: “¿Kay nisqay astawanchu phiñachenqa, sonqontachu tiyaykuchenqa?” (Pro. 15:1). Niraj imatapis nishaspa sumajtaraj piensareyqa may sumajpuni.

Waj proverbiopi nillantaj: “Mana allinta yuyaychakuspa parlarpareyqa espadaj tʼojsisqan jina”, nispa (Pro. 12:18). Allin kanman tʼukurinanchej imatachus nisqanchej, imaynatachus chayta nisqanchejpis wajkunapaj allinchus, manachus kasqanta. Ajinamanta mana imatapis parlarpallasunchu. ‘Kʼachamanta parlayta’ yachakusun chayqa, mana sonqota nanachinapaj jinachu parlasun (Efe. 4:31, 32). Mana allin yuyaykunata orqhospa, kʼarajta parlaytapis qonqaspa, wajkunata yanapanapaj jina parlana, kʼachamantataj. Jehovaqa chaytapuni ruwarqa kamachin Elías mancharisqa kashajtin payta parlapayaspa. Jehovaj sutinpi parlaj angelpa parlasqanqa ‘uj kʼacha parlay jina uyarikamorqa, manchay llanitullataj’ (1 Rey. 19:12). Kʼacha kasqanchejqa mana parlasqallanchejpichu rikukunan tiyan, ruwasqanchejpipis rikukunallantaj tiyan. ¿Imaynatá chayta ruwasunman?

Kʼachamanta parlajtinchej, ruwasqanchejwantaj kʼachas kasqanchejta rikuchejtinchej, Jehová jina ruwanchej (Efe. 4:32; 5:1, 2). Lisa, Jehovaj testigosnin kʼachas kasqankumanta jinata nin: “Waj wasiman  ripunayku kasqanta niwajtiyku, usqhayllata wakichikunayku karqa. Chaypajtaj iskay qhari warmi hermanosqa, trabajonkumanta tiempota orqhokuspa qʼepichaysiwarqayku. Chay kutispi Bibliata niraj estudiasharqanipischu”. Hermanos ajina kʼachas kasqankoqa, Lisaj sonqonta aysarqa Bibliamanta yachakuyta munananpaj.

Annetapis testigos kʼachas kasqanku yanapallarqataj. Pay nin: “Kay mundopi runas imaynachus kasqankurayku mana pipipis confiayta atillajchu kani. Jehovaj testigosninta rejsispataj yanapariyta munawajtinku, ‘¿imajtinpunitaj yanapashawankuri?’ nispa nej kani. Jinapis Bibliamanta yachachiwajniy noqawan may kʼachapuni kasqanrayku, paypi confiayta atillarqani”. ¿Imaynatataj chay payta yanaparqa? Pay nin: “Aswan qhepamantaj imatachus yachakushasqaypi aswan allinta tʼukurerqani”, nispa.

Lisatawan Annetawanqa, hermanos kʼachas kasqanku sonqonkuta kuyuricherqa, jinamantataj Bibliamanta astawan yachakuyta munarqanku. Paykunaqa congregacionmanta hermanos kʼachas  kasqankurayku Jehovapi, llajtanpipis atienekuyta qallarerqanku.

Wakenqa imayna uywasqachus kasqankurayku, maypitajchus tiyakusqankurayku yachasqa kanku kʼachallamanta parlayman, asirikuymanpis. Chaytaj may sumaj. Caracterninkurayku ajina kasqankupis may sumajllataj. Jinapis chay imasraykulla kʼachas kashanchej chayqa, mana Dios jinachu ruwashanchej (Hech. 28:2, kikinchay).

Cheqamantapuni kʼacha kayqa Diospa espiritunpa poqoyninmanta (Gál. 5:22, 23). Chayrayku Jehová jina, Jesús jina kʼachas kanapajqa, Diospa espiritunpa yanapayninta necesitanchej. Chantapis Jesús jina wajkunata yanapariytapuni munanchej. Chayrayku kʼachas kanchej Jehová Diosninchejta, runa masinchejtapis munakusqanchejrayku. Jinamanta sonqomantapacha kʼachas kanchej, Jehovataj chayta allinpaj qhawan.

Noqanchejwan kʼacha kajkunawan, rejsisqasninchejwanpis kʼachas kayta atillanchej (2 Sam. 2:6). Paykunaman agradecekuytapis atillanchejtaj (Col. 3:15). Jinapis noqanchejwan mana kʼacha kajkunawanqa, manallataj kʼachas kayta atillasunmanchu.

Kaypi tʼukurina: Jehovaqa ni pi jina jatun khuyakuyniyoj. Palabranpitaj yachachiwanchej noqanchejpis jatun khuyakuyniyojllataj kananchej kasqanta. Griego Qhelqasqaspi jatun khuyakuyniyoj kanamanta ashkha kutista parlan. ¿Imaynatá Jehová chayta runasman rikuchiwanchej?

Kaypi piensariy: Jehovaqa may chhika runasman imastachus kausanankupaj necesitasqankuta qospa kʼacha kayninta rikuchin (Mat. 5:45). Jehovaqa niraj rejsishajtinchejpis noqanchejwan kʼacha kasqanta rikuchiwarqanchejña (Efe. 2:4, 5, 8). Payqa munasqa kʼata Wawanta tukuy runasrayku qorqa. Apóstol Pablo nerqa ‘Diospa jatun khuyakuynin may jatunpuni’ kasqanrayku Wawannejta kacharichiwasqanchejta (Efe. 1:7). Chantapis pantajtinchejpis payta llakichejtinchejpis, Jehovaqa yuyaychariwanchej, yachachiwanchej ima. Kʼachamanta yachachiwasqanchej, niwasqanchejpis “chhulla para jina” kanku (Deu. 32:2). Ni jaykʼaj pagayta atisunchu noqanchejwan chay jina kʼacha kasqanmanta. Dios jatun khuyakuyninta mana rikuchiwasunmanchu karqa chayqa, mosoj jallpʼapi kausakuyta mana suyakuyta atisunmanchu (1 Ped. 1:13, kikinchay).

Jehová kʼacha kasqanta yachaspaqa payta astawan munakunchej, pay jinataj kʼacha kayta munanchej. Chayrayku wakillanwan kʼachas kanamantaqa, Jehová jina sapa día tukuywan kʼachas kana (1 Tes. 5:15). Tukuy tiempo kʼachas kasun chayqa, chiri diapi nina kʼajaysitu jina kasun. Familianchej, congregacionmanta hermanosninchej, trabajomanta, escuelamanta compañerosninchej, vecinosninchej ima, noqanchejwan karikuyta munanqanku.

Parlasqanchejwan ruwasqanchejwan kʼachas kaspaqa familianchejta, hermanostapis yanapayta atisun. Ichá congregacionninchejmanta pillapis wasinpi, huertanpi ima yanapata necesitanman chayri imatapis rantiripunanchejta. Chantapis predicashaspa rikusunman uj runa yanapata necesitashasqanta. Paytapis yanaparisunman.

Jehová jinallataj noqanchejpis parlasqanchejwan ruwasqanchejwan kʼachas kasqanchejta rikuchinallapuni.