1, 2. 1) ¿Imataj yanapan accidentes mana kananpaj? (Patapi kaj dibujota qhawariy.) 2) Kausayninchejta salvanapaj, ¿imatataj Jehová ruwan?

ESTADOS UNIDOS suyupi, pachaj watasmanta astawanña tren pasan chaykunapi “SAYAY, QHAWAY, UYARIY” nisqa letreros tiyan. ¿Imapajtaj chay letreros? Autos trenwan mana chocakunankupaj. Chay letrerosta autota apaykachajkuna kasukojtinkoqa mana accidentes kanchu, nitaj runaspis accidentespi wañunkuchu.

² Jehovaqa kausayninchejta salvanapaj mana letrerostachu ñankunaman churan. Manaqa wiñay kausayman pusaj ñanpi kanallapajpuni yanapawanchej, kamachiykunasta ima churapuwanchej. Payqa uj sumaj michej jina cheqan ñanta pusashawanchej, mana pantananchejpaj ni pañaman, nitaj lloqʼemanpis (Isaías 30:20, 21 leey).

3. ¿Imaraykutaj wañunchej?

³ Jehová Diosqa qallariymantapacha runasman kamachiykunata qorqa. Sutʼincharinapaj, Edén huertapi kamachiykunata churarqa runas kusisqas, wiñaypajtaj kausakunankupaj (Gén. 2:15-17). Chaywanpis Adanwan, Evawanqa Jehovaj kamachiykunasninta  mana kasukorqankuchu. Evaqa Satanás katarinejta nisqanta kasukorqa, Adantaj warminpa nisqanta. Chayraykutaj Adanwan, Evawan ñakʼarerqanku, wiñaypajtaj wañorqanku. Noqanchejpis wañunchej paykuna mana kusukusqankurayku.

4. 1) ¿Imaraykutaj Jatun Para pasayta mosoj kamachiykunata Jehová qorqa? 2) ¿Imapajtaj chay kamachiykuna yanapawanchej?

⁴ Jehovaqa Noeman kamachiykunata qorqa runas salvakunankupaj. Jatun Para pasaytapis mosoj kamachiykunata qollarqataj, imaraykuchus runasman nerqa animalespa aychankuta mikhuyta atisqankuta, chantapis nillarqataj yawarpi kausay kasqanrayku “yawarniyoj aychata” mana mikhunankuta (Gén. 9:1-4). Chay kamachiykunaqa Jehová kausayta jatunpaj qhawasqanta yachanapaj yanapawanchej. Pay kausayta rikhurichisqanrayku, ruwawasqanchejrayku ima kamachiykunata churayta atin. Sutʼincharinapaj, runa masinchejta mana wañuchinata Jehová niwanchej, kausayta, yawarta ima jatunpaj qhawasqanrayku. Chay kamachiykunata mana kasukojkunatataj castiganqa (Gén. 9:5, 6).

5. ¿Imamantataj yachakusunchej, imaraykutaj?

⁵ Noej tiemponmanta aswan qhepamanpis Jehová Dios llajtanman kamachiykunata qollarqapuni. Kay yachaqanapitaj imaynatachus chayta ruwasqanmanta wakinta qhawarisunchej. Chaytaj Jehovaj kamachiykunasninta kasukunallapajpuni, wiñay kausayman pusaj ñanpi kanallapajpuni ima yanapawasunchej.

6. 1) ¿Imaraykutaj israelitas Moisesman qosqa Leyta necesitarqanku? 2) ¿Imatataj israelitas ruwananku karqa Jehová bendecinanpaj?

⁶ Jehovaqa Moisespa tiemponpi israelitasman imaynatachus kausakunankupaj, imaynatachus payta yupaychanankupaj ima kamachiykunata qorqa. Imaraykuchus israelitasqa iskay pachaj watasmanta astawan Egiptopi esclavos karqanku. Egiptopi runasqa Diospa ñaupaqenpi millay imasta ruwaj kanku, llulla diosesta, wañusqasta ima yupaychaj kanku. Chayrayku israelitasqa Egiptomanta llojsipuytawan mosoj kamachiykunata necesitarqanku. Paykunaqa Moisesman qosqa Leyllata kasukunanku karqa. Wakin yachayniyoj runas nisqankuman jina “ley” palabraqa, “allinta kausanapaj kamachiykunata qoy” “cheqa ñanta rinapaj yanapay chayri pusay” niyta munan. Moisesman qosqa Leyqa israelitasta khuchichakuy juchamanta, muyuyninkupi kaj llulla religionesmanta ima jarkʼarqa. Israelitasqa Jehová paykunata bendecinanta munaspaqa, kamachiykunasninta kasukunanku karqa. Mana kasukojtinkutaj ñakʼarej kanku (Deuteronomio 28:1, 2, 15 leey).

7. 1) ¿Imaraykutaj Dios Leyta israelitasman qollarqataj? 2) ¿Imaraykutaj Ley uywaqenku jina karqa?

⁷ Israelitasqa mosoj kamachiykunata necesitallarqankutaj waj imasrayku. Sutʼincharinapaj, Diospa munaynin juntʼakunanpaj Mesías chayri Cristo kay Jallpʼaman jamunan karqa, Moisespa Leynintaj israelitasta yanaparqa Mesías chayamojtin wakichisqa kanankupaj. Chay Leyqa israelitasta reparacherqa pantaj runas kasqankuta. Chantapis reparachillarqataj juchasninku wiñaypaj pampachasqa kananpajqa uj juntʼa runa paykunarayku wañunanta necesitasqankuta (Gál. 3:19; Heb. 10:1-10). Chantapis chay Leyqa Mesiaspa familianta jarkʼarqa. Mesías chayamojtinñataj Leyqa israelitasta yanaparqa pichus Mesías kasqanta yachanankupaj. Chayrayku Bibliaqa chay Ley uj tiempota ‘uywaqe’ jina kasqanta nin, mayqenchus Cristoman pusarqa (Gál. 3:23, 24).

8. ¿Imaraykutaj Moisesman qosqa Leypi tʼukurinanchej tiyan?

 ⁸ Moisesman qosqa Leyqa noqanchejtapis mayta yanapallawanchejtaj. Imaraykuchus Moisesman qosqa Leypeqa sumaj yuyaychaykunata tarisunman, chaykunapitaj tʼukurisunman. Moisespa Leyninta manaña juntʼananchej kajtinpis, chay Leypi yuyaychakusqanqa imaynatachus kausakunapaj, imaynatachus Jehovata yupaychanapaj ima yanapawanchej. Jehová Diosqa Moisesman qosqa Ley Bibliapi kananta saqerqa, Leymanta yachakunapaj, yuyaychaykunasninman jina kausakunapaj ima. Chantapis mayta agradecekusunman Jesús Moisesman qosqa Leymanta nisqa aswan sumajtaraj yachachiwasqanchejmanta. Sutʼincharinapaj, Jesuspa kay nisqanpi tʼukurisunman: “Qankuna uyarerqankichejña nisqa kasqanta: Ama qhenchachakunkichu khuchichakuspa, nispa. Noqatajrí niykichej: Sichus pipis uj warmita qhawan munapayaspa chayqa, ñapis paywan sonqompi khuchichakunña”, nispa. Rikunchej jina mana qhenchakuyllamantachu jarkʼakunanchej tiyan, manaqa ima sajra yuyaymantapis (Mat. 5:27, 28).

9. ¿Imaraykutaj Jehová mosoj kamachiykunata qollarqapuni?

⁹ Jehovaqa Jesús Mesías kasqanmanta qhepaman mosoj kamachiykunata qollarqataj, munayninmantataj astawan sutʼincharqa. Imaraykuchus 33 watapi Jehovaqa Israel llajtata qhesacharqa, cristiana congregaciontataj llajtan kananpaj ajllarqa.

10. 1) ¿Imaraykutaj cristiana congregación mosoj kamachiykunata necesitarqa? 2) ¿Imaraykutaj Moisespa Leyninwan, Cristoj leyninwan mana kikinchu kanku?

¹⁰ Rikunchej jina Jehovaqa israelitasman Moisesnejta Leyta qorqa imaynatachus kausakuyta, imaynatachus Jehovata yupaychayta ima yachakunankupaj. Jesús kay Jallpʼaman jamusqanmanta qhepaman Jehovaqa mosoj kamachiykunata, mosoj leyesta ima qollarqataj. Imaraykuchus kamachisnenqa manaña uj llajtamantachu kananku karqa, manaqa ashkha llajtasmanta. Paykuna cristiana congregación, Diospa mosoj llajtan ima karqanku, mosoj tratomantaj yaykorqanku. Ajinamanta Jehová rikucherqa “mana wakillantachu allimpaj qhawa[sqanta], manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawa[sqanta]” (Hech. 10:34, 35). Mosoj congregacionqa “Cristoj leyninta” kasukorqa. Imaraykuchus chay leyqa Bibliaj yuyaychaykunasninman jina kashan, nitaj rumipichu qhelqasqas kashanku, manaqa sapa uj cristianoj sonqonpi qhelqasqa kashan. Cristoj leynenqa tukuy cristianosta maypi tiyakojtinkupis yanapan (Gál. 6:2).

11. ¿Ima kamachiykunatataj Jesús qorqa?

¹¹ Cristiana congregacionmanta kajkunaqa Cristoj leyninwan mayta yanapachikorqanku. Niraj mosoj trato qallarishajtin, Jesusqa iskay sumaj kamachiykunata qorqa. Chay iskay kamachiykunamanta ujnenqa Diosmanta runasman willamuy karqa. Ujnintaj cristianos imaynatachus kausakunankumanta karqa. Chay kamachiykuna tukuy cristianospaj kasqanrayku, kay Jallpʼapi kausakuyta chayri cielopi kausakuyta suyakuspapis chay kamachiykunata kasukunanchej tiyan.

12. ¿Imatataj mana judío kajkuna ruwaj kanku, chantá imatataj Jesús yachachisqasninman nerqa?

¹² Ñaupa tiempopi mana judío kajkunaqa, Jehovata sirviyta munaspa Israel llajtaman rinanku karqa (1 Rey. 8:41-43). Chaywanpis Jesusqa yachachisqasninman nerqa runasta paykuna maskʼaj rinanku kasqanta  (Mateo 28:19, 20 leey). Pentecostés 33 watapi Jehovaqa sumaj willaykuna pachantinpi willakunanta munasqanta sutʼita rikucherqa. Chay pʼunchaypeqa mosoj cristiana congregacionmanta 120 cristianos Diospa “espíritu santonwan juntʼasqa karqanku”. Jinapi chay cristianosqa judiosman, judiosman tukojkunaman, waj llajtayojkunaman ima waj parlaykunapi Diosmanta parlayta qallarerqanku (Hech. 2:4-11). Chantá samaritanosmanpis Diosmanta willayta qallarerqanku. Kay 36 watapitaj mana judío kajkunamanpis willayta qallarillarqankutaj. Sutʼita rikunchej cristianosqa pachantinpi willananku kasqanta.

13, 14. 1) ¿Imatataj ruwananchej tiyan Jesuspa mosoj kamachiyninta juntʼanapaj? 2) ¿Imatataj Jesuspa ruwasqanmanta yachakunchej?

¹³ Jesusqa yachachisqasninman ‘uj mosoj kamachiyta’ qollarqataj, purajmanta munakuyta rikuchinankupaj (Juan 13:34, 35 leey). Cheqamantapuni hermanosninchejtaqa sapa pʼunchay munakunanchej tiyan. Kausayninchejtapis hermanosninchejrayku qoyta munananchej tiyan. Kay kamacheyqa Moisesman qosqa Leypi mana karqachu (Mat. 22:39; 1 Juan 3:16).

¹⁴ Jesusqa wajkunata munakusqanta kausayninwan rikucherqa. Sutʼincharinapaj, yachachisqasninta mayta munakusqanrayku kausayninta qorqa. Munantaj tukuy yachachisqasnin pay jina ruwanankuta. Munallantaj noqanchejpis hermanosninchejrayku wañunapaj, ñakʼarinapaj ima wakichisqa kananchejta (1 Tes. 2:8).

15, 16. 1) ¿Imaynatá Jehová llajtanta kay tiempopi yanapashan? 2) ¿Imayna tiempopitaj kausakushanchej?

¹⁵ Jesusqa ‘allin kamachi yuyayniyojta’ churarqa tukuy yachachisqasninman cheqa yachachiykunata mikhunata jina ‘horanpi jaywananpaj’ (Mat. 24:45-47). Chantapis chay ‘allin kamachi yuyayniyojnejta’ sumaj kamachiykunata qollawanchejtaj, chaykunataj imayna tiempopichus kausakushasqanchejman jina tijrakun. ¿Imayna tiempopitaj kausakushanchej?

¹⁶ Qhepa manchay sajra pʼunchaykunapi kausakushanchej. Tumpamantawantaj manchay ñakʼariy tiempo qallarenqa, mayqenchus ni jaykʼaj karqachu (2 Tim. 3:1; Mar. 13:19). Chantapis Kuraj Supay, supaykunasnin ima kay Jallpʼaman wijchʼuchikamunku, kay Jallpʼapitaj ashkha runasta pantachishanku (Apo. 12:9, 12). Noqanchejtaj Jesús kamachiwasqanchejta kasukuspa Jallpʼantinpi Diosmanta runasman willamushanchej. Mana jaykʼaj jinataj may chhika parlaykunapi ashkha runasman willashanchej.

17, 18. ¿Imatá ruwananchej tiyan Diospa llajtan kamachiykunata qowajtinchej?

¹⁷ Diospa llajtanqa runasman willamunapaj ashkha yanapasta qowanchej. ¿Yanapachikushanchejchu chay yanapaswan? Tantakuykunapeqa chay yanapaswan sumajta yanapachikunapaj kamachiykunata qowanchej. ¿Chay kamachiykunata Jehová Diosmanta jinachu japʼikunchej?

¹⁸ Jehová bendecinawanchejpajqa, congregacionnejta kamachiykunata qowasqanchejta kasukunanchej tiyan. Kay tiempopi Diospa kamachiykunasninta kasukusunchej chayqa, manchay ñakʼariy tiempopi kasukuyta atillasun. Chay manchay ñakʼariy tiempopeqa Satanaspa sajra pachan chinkachisqa kanqa (Mat. 24:21). Chay pasasqantawantaj mosoj pachapi kausakunapaj mosoj kamachiykunata necesitallasuntaj. Chaypeqa Kuraj Supay manaña kanqachu.

19, 20. 1) ¿Imatataj Jehová mosoj pachapi qowasunchej? 2) ¿Imaynatataj chay mosoj kamachiykuna yanapawasun?

 ¹⁹ Jehovaqa Israel llajtaman Moisesman qosqa Leyta qorqa. Ashkha watasninmantaj cristiana congregacionman Cristoj leyninta qorqa. Mosoj pachapitaj Biblia nisqanman jina ‘mosoj libros kicharikonqa’ (Apocalipsis 20:12 leey). Chaykunapitaj runaspaj mosoj kamachiykuna kanqa. Chay mosoj librosta ukhunchaspataj imatachus Jehová ruwananchejta munasqanta yachakusunchej. Wañuymanta kausarimojkunapis chay kamachiykunawan yanapachikonqanku. Chay mosoj librospi kamachiykunaqa imatachus Jehová yuyasqanta sutʼita yachanapaj yanapawasunchej. Chantapis Bibliaj yachachiyninta sumajta entiendenapaj yanapallawasuntaj. Chantapis hermanosninchejwan purajmanta munanakusunchej, respetanakusunchej ima (Isa. 26:9). Jesucristoj kamachiyninpeqa ashkha imastachá yachakusunchej, wajkunamanpis chayta willarisunchejchá. Chaytaj, ¡may sumajpuni kanqa!

²⁰ Mosoj libropi kaj kamachiykunata kasukusunchej, waranqa watas tukukuy pruebapi Jehová Diosman cheqa sonqo kasunchej chayqa, “kawsay libro[man]” sutisninchejta qhelqanqa. Chayrayku nisunman wiñay kausayta japʼinanchejqa noqallanchejmanta kashasqanta. Chaypajqa Bibliata leenanchej tiyan, imatachus nisqantapis entiendenanchej tiyan, Jehovaj kamachiykunasnintapis kasukunanchej tiyan. Chaykunata ruwasunchej chayqa manchay ñakʼariy tiempopi mana wañusunchu, Jehová Diosmantapis wiñaypaj yachakullasunpuni (Ecl. 3:11; Rom. 11:33).