¿IMASPITAJ Jehovaj profetasnin jina kanchej? Chayta yachanapaj, imachus uj profeta kasqantaraj yachana tiyan. Perspicacia para comprender las Escrituras libroqa “Dios munayninmanta” uj profetanejta sutʼinchasqanta nin. Uj profetaqa Diosmanta willaykunata wajkunaman rejsichin. Profetasqa Diospa sutinpi parlarqanku, imachus aswan qhepaman kananta willarqanku, Diospa yachachiyninmanta, kamachiykunasninmanta, juiciosninmanta ima. Mana profetas jina willananchej kajtinpis, Diospa sutinpi parlanchej imaraykuchus Palabranmanta runasman willamunchej (Mat. 24:14).

Chantapis Jehovamanta, imatachus runaspaj munasqanmanta ima willamunchej. Chantapis ‘chaupi cielota phawaj’ angelta yanapakushanchej (Apo. 14:6). Jinapis chʼampaykunapi rikukusqanchejrayku ichá willamuyta mana atillanchejchu. ¿Imastaj chay chʼampaykuna kanku? Ichapis saykʼusqa, llakisqas kashanchej chayri yuyanchej ni imata ruwayta atisqanchejta. Profetaspis ajinapi rikukullarqankutaj. Chaywanpis Jehová kamachisqanta ruwallarqankupuni, ruwayninkuta juntʼanankupajtaj Jehová yanaparqa. Kunantaj wakin profetasmanta parlarina, imaynatachus paykuna jina ruwananchejpitaj tʼukurina.

Wakin kutis ruwanasninchej mayta saykʼuchiwasqanchejrayku, ichá willayman mana riyta atillanchejchu. Tukuypis samarikuyta necesitanchej, Jesuspis, apostolespis samarikorqanku (Mar. 6:31). Chaywanpis Ezequielpi tʼukurina, payqa israelitaswan khuska Babiloniapi presochasqa kashaspa profeta jina llankʼarqa. Jehová Diostaj Jerusalén llajtata uj ladrillopi chayri uj adobepi dibujananta nerqa. Ezequielqa imaynatachus Jerusalén llajta muyuykusqa kananta rikuchinanpaj lloqʼenman 390 diasta siriykorqa, chantá pañamantañataj 40 diasta siriykorqa. Jehová payman nerqa: “Noqa waskhawan wataykusqayki  ama purajman tijraykachakunaykipaj, mashkha pʼunchaytachus [...] juntʼanaykikama”, nispa (Eze. 4:1-8). Ezequielqa uj wata kurajta chayta sapa día ruwarqa. Israelitastaj chayta rikuspa maytachá tʼukorqanku. ¿Imataj Ezequielta yanaparqa ruwayninta mana saykʼuspa ruwananpaj?

Ezequielqa imapajchus profeta jina ajllasqa kasqanta yacharqa. Jehová profetan kananpaj ajllashajtin payman nerqa: “Kasusuchunkupis amapis, yachanqankupuni paykuna ukhupi uj profeta kasqanta”, nispa (Eze. 2:5). Ezequielqa mana qonqarqachu imapajchus profeta kasqanta, Jehová imatachus kamachisqanta tukuy sonqo kasukuspataj cheqa profeta kasqanta rikucherqa. Chantá pay, israelitas ima Jerusalén “enemigoj makinman urmasqanta” uyarerqanku. Israelitastaj paykuna ukhupi uj profeta kasqanta yacharqanku (Eze. 33:21, 33).

Kunanpis Satanaspa sajra pachanta Jehová tumpamantawan chinkachinanta willamunchej. Wakin kuti saykʼuspapis, mayta kallpachakunchej runasman Bibliamanta willamunapaj, revisitasta ruwanapaj, yachachimunapaj ima. Kay sajra pachaj tukukuyninmanta profecías juntʼakushasqanta rikuspataj, mayta kusikunchej Jehová munayninmanta noqanchejnejta runasman willashasqanmanta.

Runas willayninchejta mana uyarisqankurayku ichá wakin kutis llakikunchej, chay llakiyta atipanapajtaj Jehová yanapawanchej. Ajinapi rikukuspataj Jeremiaspi tʼukurina. Israelitasqa payta asipayaj, alqochakoj ima kanku Diosmanta paykunaman willasqanrayku. Chayrayku Jeremiasqa mayta llakikusqanrayku uj kuti nerqa: “Manaña Tata Diospi yuyasajchu, niñataj sutimpipis parlasajchu”, nispa. Jeremiasqa noqanchej jina runalla karqa. Chaywanpis Diospa sutinpi parlallarqapuni. ¿Imaraykú? Pay nerqa: “Sonqoypi nina jina ruphaykuwan, tullusniykamataj chayan. Sonqoyta ñitʼiykukuyta munashaspapis, manapuni atinichu”, nispa (Jer. 20:7-9).

Willayninchejta runas mana uyariyta munasqankurayku llakikusun chayqa, willayninchejpi tʼukurina. Ajinamanta Diospa nisqasnin ‘sonqonchejpi nina jina ruphaykuwasun’, Bibliata sapa pʼunchay leeytaj Diospa sutinpi parlanallapajpuni yanapawasun.

Wakin cristianosqa Diospa llajtanpi waj ruwaykunata japʼinku, imaraykuchus japʼisqankuta mana entiendespataj llakikunku, nitaj yachankuchu imaynatachus juntʼanankutapis. Profeta Oseaspis ajinapisina rikukorqa. Jehová payman nerqa: “Riy warmillikamuy uj phisu warmiwan, wawasniyojtaj kay chay warmiwan, jinamanta phisu warmej wawasnin kanankupaj”, nispa (Ose. 1:2). Casarakunayki kashasqanpi tʼukuriy. ¿Imayná sientekuwaj Jehová nisojtin warmiyki waj qhariswan wasanchasunanta? Oseasqa, Jehovata kasukuspa Gomerwan casarakorqa, uj qhari wawayojtaj karqa. Qhepamantaj Gomerqa uj warmi wawata, uj qhari wawatawan nacechikorqa. Chay wawasnintaj nisina Oseaspajchu karqanku. Jehovaqa Oseasman nerqa warmin “qharisnimpa qhepankuta” ripunanta. Arí, Gomerqa mana uj qharej qhepallantachu rerqa, manaqa ashkha qharispa qhepankuta, chaymantataj Oseasman kutipuyta munarqa. Qan profeta Oseas kawaj karqa chay, ¿saqewajchu karqa warmiyki qanman kutinpunanta? Chayta ruwananta Jehovaqa Oseasman kamacherqa. Chantapis Oseasqa Gomerta ashkha qolqewan rantikaporqa (Ose. 2:7; 3:1-5).

Ichapis Oseas tapurikorqa Jehová kamachisqanta juntʼanan kasqantapunichus manachus. Jinapis Jehovaj nisqanta tukuy sonqo juntʼarqa. Ruwasqanqa yanapawanchej entiendenapaj imaynachus Jehová sientekusqanta israelitas wasanchajtinku. Gómer jinataj wakin israelitaspis Jehovaman kutiporqanku.

Kay tiempopi Jehovaqa ni pitapis “uj phisu warmiwan” casarakunanta ninchu. Chaywanpis Oseas ruwasqanmanta mayta yachakusunman. Payqa  Jehovaj nisqanta juntʼarqa, ajinallatataj noqanchejpis ‘wasimanta wasi, tukuypa rikunankuta ima’ Diospa gobiernonmanta willamunanchej tiyan, mana atillajtinchejpis (Hech. 20:20). Ichapis waj jinasmanta willayta mana atillanchejchu. Sutʼincharinapaj, Bibliamanta ashkha yachakojkuna, yachakushasqanku mayta gustajtinpis, wasimanta wasi ni jaykʼaj rinankuta nerqanku. Jinapis tiempo pasasqanman jina wakin yachakojkunaqa wasimanta wasi willayta qallarerqanku. Paykunamantapis mayta yachakusunman, ¿icharí?

Oseasqa imatachus Jehová nisqanta kasukorqa. Payqa Jehovaman niyta atinman karqa chayta mana ruwananta, nitaj pipis yachanmanchu karqa imatachus ruwasqanta pay mana qhelqajtenqa. Noqanchejpis mayllapipis Jehovamanta parlariyta atisunman, ichá parlarisqanchejtachus manachus ni pi yachanmanchu. Ajinapi rikukorqa Estados Unidosmanta hermananchej Anna, colegionpi profesoran aswan gustasqan yachaqanamanta qhelqanankuta nejtin. Sapa ujtaj tukuy cursopaj sonqonkuman chayananpaj jina sutʼinchananku karqa. Ichá Annaqa chayta ruwayta mana ajllanmanchu karqa, jinapis payqa chay kutipi creesqanmanta sutʼinchayta Jehová payman kamachishasqanta jina qhawarqa. Imatachus compañerosnin ninankupi tʼurisqanraykutaj Jehovamanta yanapata mañakorqa, willariytataj munarqa. Chantá “Kausay jinallamanta rikhurisqanta, ¿imataj rikuchin cheqapuni kasqanta?” nisqata qhelqarqa.

Anna parlarinan kajtintaj, kausay jinallamanta rikhurisqanpi creej compañeran, tukuy imata taporqa. Annaqa imapichus creesqanmanta sumajta sutʼincharqa. Sonqoman chayanapaj jina sutʼinchasqanraykutaj profesoranqa mayta tʼukorqa, uj premiota ima qorqa. Chaymantapachataj chay compañeranwan sapa kuti Diospa ruwasqasninmanta parlarej. Chay kutipi creeyninmanta sutʼinchasqanrayku, nin: “Kunanqa mana manchachikuspa Diosmanta willani”, nispa.

Mana profetas kaspapis, profeta Ezequiel, Jeremías, Oseas jina ruwasun chayqa, imatachus Jehová niwasqanchejta kasukuyta atillasun. Sapallanchejpi chayri familiapi Bibliata estudiashaspa, waj profetasmanta yachakullasunmantaj. Chay profetas ruwasqankupi tʼukurispataj, paykuna jina ruwasunchej.