1, 2. ¿Imaynatataj apóstol Pabloj kausaynin ancianosta yanapanman?

 APÓSTOL Pabloqa hermanosta mayta munakoj, tukuy atisqantataj paykunata yanaparqa (Hech. 20:31). Hermanospis apóstol Pablota mayta munakullarqankutaj. Uj pacha Efesomanta ancianosqa apóstol Pablota manaña ujtawan rikunankuta yacharqanku. Chayraykutaj “tukuyninku mayta waqarikorqanku” (Hech. 20:37). Ancianosninchejpis hermanosta, hermanasta ima mayta munakunku, tukuy imatataj ruwanku paykunata yanapanankupaj (Fili. 2:16, 17). Jinapis ancianosqa wakin kutis congregacionmanta tukuy ruwanasninkuta mana ruwayta atillankuchu. ¿Imastaj paykunata yanapanman?

² Ancianosqa Pablo jinallataj ruwayta atinkuman (1 Cor. 11:1). Payqa mana ángeles jinachu ruwayta aterqa. Apóstol Pabloqa pantaj runa karqa. Chayraykutaj wakin kutis allin kajta ruwananpaj mayta kallpachakunan karqa (Rom. 7:18-20). Payqa wakin llakiykunasniyoj karqa, jinapis hermanosta mana saykʼuspa, kusisqallapunitaj yanaparqa. Ancianospis apóstol Pablo jina ruwaspa, ruwanasninkuta juntʼayta atinkuman, kusisqallapunitaj Jehovata sirvinkuman. Imaynasmantachus chayta ruwayta atisqankuta qhawarina.

3. ¿Imastataj kay yachaqanapi yachakusun?

³ Kay yachaqanapeqa parlarisun, ancianos wakin kutis tawa imasta ruwayta mana atillasqankumanta: 1) Ashkha ruwanasniyoj kaspapis predicanankupaj tiempochakunanku kasqanmanta. 2) Hermanosta, hermanastapis kallpachanankupaj tiempochakunankumanta. 3) Wakin kutis pantajtinku mana desanimakunankumanta. 4) Wajkuna pantajtinkupis munakuywan yanapanallankumantapuni. Yachakullasuntaj imaynatachus apóstol Pablo chay tawa imasta juntʼasqanta, ancianospis imaynatachus Pablo jina juntʼayta atinankuta.

4. ¿Imaraykutaj ancianos predicacionta mana ñaupajman churayta atillankumanchu?

⁴ ¿Imaraykutaj wakin kutis mana atillankumanchu? Ancianos predicacionpi ñaupajpi kaspapis, congregacionpi ashkha ruwanasniyoj kanku. Ashkha ancianosqa Cristiano Kausayninchej tantakuyta kamachinku. Wakintaj Bibliamanta yachaqanapaj nisqa parteta apaykachanku. Chantapis waj discursosta qonankupaj wakichikullankutaj. Paykunaqa mayta kallpachakunku siervos ministerialesta yachachinankupaj, hermanostapis tukuy sonqo kallpachanankupaj (1 Ped. 5:2). Wakintaj Diosta yupaychanapaj wasista ruwaysikuspa, allinchaysikuspa ima yanapakunku. Ancianos chay tukuy imasta ruwaspapis congregacionmanta hermanos jinallataj predicacionta ñaupajman churanku (Mat. 28:19, 20).

5. ¿Imajtintaj nisunman apóstol Pablo predicayta kausayninpi ñaupajmanpuni churasqanta?

⁵ Apóstol Pabloj ruwasqan. Imachus apóstol Pablota predicananpaj sumajta yanapasqanqa, Filipenses 1:10 versiculopi kashan. Chaypi nin: ‘Imaschus aswan allin imas kasqanta reparaychej’, nispa. Pabloqa chay nisqanman jinapuni ruwarqa. Payqa Diosmanta uj llankʼayta japʼerqa. Chaytaj karqa runasman Diosmanta yachachiy. Chaytataj ashkha watasta kausayninpi ñaupajmanpuni churarqa. Pabloqa predicarqa ‘tukuypa rikunanta, wasimanta wasitaj’ (Hech. 20:20). Payqa mana uj horariollapichu predicaj, nitaj semanapi uj diallatachu, payqa ima ratollapis predicajpuni. Pabloqa Atenas llajtapi Silastawan Timoteotawan suyaj jina, may respetasqa runasman sumaj willaykunata willarqa. Paykunamanta wakintaj tukuy sonqo japʼikorqanku (Hech. 17:16, 17, 34). Pabloqa “presochasqa” kashaspapis predicallarqapuni (Fili. 1:13, 14; Hech. 28:16-24).

6. ¿Imasta ruwanankupajtaj apóstol Pablo hermanosta yachacherqa?

⁶ Pabloqa tiemponta manapuni usucherqachu. Payqa wajyarejpuni wajkunata paywan predicaj rinankupaj. Pabloqa ñaupaj kutipi misionero jina rishaspa Juan Marcosta pusarqa, qhepanpitaj Timoteota (Hech. 12:25; 16:1-4). Payqa mayta kallpachakorqa, paykunaman sumajta yachachinanpaj congregacionespi ruwanasta allinta ruwanankupaj, hermanosta kallpacharinankupaj, sumaj yachachejkuna kanankupajtaj (1 Cor. 4:17).

7. ¿Imaynatá ancianos Pablo Efesios 6:14, 15 versiculospi yuyaychasqanman jina ruwankuman?

⁷ ¿Imatá yachakunchej? Ancianosqa wasimanta wasi willamuspapis, Pablo jina mayllapipis kashaspa predicanankupaj wakichisqas kankuman (Efesios 6:14, 15 leey). Ancianosqa runasman Diosmanta willarinkuman rantikoj rispa chayrí trabajonkupi. Diosta yupaychanapaj wasista ruwaysikushaspataj chay  lugarmanta vecinosman, materialesta rantinku chaykunaman predicankuman. Ancianosqa apóstol Pablo jina predicacionpi kashaspa hermanosta, siervos ministerialesta ima aswan wakichisqa kanankupaj yachachinkuman.

8. ¿Imatá wakin kutis ancianos ruwananku tiyan?

⁸ Ancianosqa congregacionpi chayrí circuitopi ashkha ruwanasniyoj kaspapis, predicanankupaj tiempochakunankupuni tiyan. Ancianos ruwanasninkuta sumajta juntʼanankupaj, ichá wakin kutis wakin ruwaykunata manaña japʼikunankuchu kanqa. Paykunaqa allinta piensarispa, orakuspa ima, ichá reparakonqanku waj ruwanastawan japʼikuspaqa, imastachus ruwanankupuni kasqanta niña ruwayta atinankuta. Ancianosqa familiapi Diosta yupaychanapaj tantakuyta sapa semana ruwananku tiyan, predicacionpi ñaupajpi kananku tiyan, wawasninkumanpis sumajta predicayta yachachinanku tiyan. Wakin ancianosqa congregacionpi ruwanasniyojña kaspapis, waj ruwanastawan japʼiykukullanku. Jehovaqa sumajpaj qhawan ancianos ruwanasninkuta sumajta juntʼanankurayku, wakin ruwanasta mana japʼikusqankuta.

9. ¿Imatataj ancianos mana ruwayta atillankumanchu?

⁹ ¿Imaraykutaj wakin kutis mana atillankumanchu? Qhepa pʼunchaykunapi kausakusqanchejrayku, imaymana llakiykunasniyoj kanchej. Chayrayku tukuy necesitanchej kallpachanata, yanapanata, sonqochanata ima. Wakin kutistaj, wakin hermanosqa mana sajra imasta ruwanankupaj yanaparinata necesitanku (1 Tes. 5:14). Ancianosqa mana hermanospa llakiykunasninkuta chinkachiyta atinkuchu. Jinapis Jehovaqa munan mayta kallpachakunankuta ovejitasninta kallpachanankupaj, jarkʼanankupaj ima. ¿Imaynatataj ancianos ashkha ruwanasniyoj kaspapis, hermanosta yanapanankupaj tiempochakunkuman?

10. Kay 1 Tesalonicenses 2:7 nisqanman jina, ¿imaynatá Pablo hermanosta yanaparqa?

¹⁰ Apóstol Pabloj ruwasqan. Payqa wakichisqa karqa hermanosta allinta ruwasqankuta ninanpaj, kallpachananpaj ima. Ancianosqa Pablo jina may sumajtapuni ruwanku, hermanosta munakuywan kallpachaspa (1 Tesalonicenses 2:7 leey). Pabloqa hermanosman nerqa paywan Jehovawan mayta paykunata munakusqankuta (2 Cor. 2:4; Efe. 2:4, 5). Payqa congregacionmanta hermanosta, amigosninta jina qhawarqa. Chayrayku paykunawan karinanpaj tiempochakorqa. Pabloqa sutʼita paykunaman willarqa, imastachus manchachikusqanmanta, pantaj runa kasqanmantapis (2 Cor. 7:5; 1 Tim. 1:15). Apóstol Pabloqa llakiykunasnillanpi anchata yuyananmanta, hermanosta maytapuni yanapayta munarqa.

11. ¿Imaraykutaj Pablo hermanosta yuyaycharqa?

¹¹ Pabloqa wakin kutis hermanosta, hermanasta ima yuyaycharej. Jinapis chaytaqa mana phiñasqa kashasqanraykuchu ruwaj. Payqa hermanosta yuyaycharerqa paykunamanta phutikusqanrayku, ashkha llakiykunamanta jarkʼayta munasqanraykutaj. Payqa entiendenankupaj  jinalla yuyaycharqa, munarqataj hermanos chay yuyaychasqanta japʼikunankuta. Apóstol Pabloqa Corintopi tiyakoj cristianosman ujnin cartanpi mana manchachikuspa yuyaycharerqa. Chay cartata paykunaman apachiytawantaj Titota kacharqa. Pabloqa yachayta munarqa, apachisqan cartata imayna sonqowanchus hermanos japʼikusqankuta. Payqa mayta kusikorqa hermanos chay yuyaychasqanta kasukusqankuta yachaspa (2 Cor. 7:6, 7).

12. ¿Imaynatá ancianos hermanosta kallpacharinkuman?

¹² ¿Imatá yachakunchej? Ancianosqa apóstol Pablo jina, hermanoswan karinankupaj tiempochakunkuman. Chaypajqa reunionesman ñaupajta chayankuman, hermanoswan sumajta parlarinankupaj. Hermanosta kallpacharinapajqa pisi minutoslla necesitakun (Rom. 1:12; Efe. 5:16). Apóstol Pablo jina ruwaj ancianosqa, Bibliawan hermanosta kallpacharinku, Dios paykunata mayta munakusqantataj reparachinku. Chantapis ancianosqa hermanosman sutʼita reparachinku mayta munakusqankuta. Paykunaqa hermanoswan parlarinkupuni, allin imasta ruwasqankumantataj kusikusqankuta ninku. Uj hermanota yuyaycharinanku kajtintaj, Bibliawanpuni yuyaycharinku. Ancianosqa hermanosta sutʼita yuyaycharinku. Imaraykuchus munanku chay yuyaychasqankuwan yanapachikunankuta (Gál. 6:1).

13. ¿Imatataj ancianos pantasqasninkumanta yuyanku?

¹³ ¿Imaraykutaj wakin kutis mana atillankumanchu? Ancianosqa pantaj runas kanku, chayrayku paykunapis wakin kutis pantallankutaj (Rom. 3:23). Wakin kutisqa mayta kallpachakunanku tiyan pantaykuspapis mana chayllapi anchata yuyanankupaj. Imaraykuchus wakenqa pantasqasnillankupi anchata yuyasqankurayku llakikunku. Wakintaj kallpachakunanku tiyan imaspichus pantashasqankuta cambianankupaj. Imajtinchus wakenqa yuyanku pantasqasninku mana chaykamapunichu kasqanta, nitaj cambianankuchu kasqanta.

14. Filipenses 4:13 nisqanman jina, ¿imaynatataj apóstol Pablota kʼumuykukoj sonqo kasqan yanaparqa?

¹⁴ Apóstol Pabloj ruwasqan. Payqa kʼumuykukoj sonqo kasqanrayku sutʼita repararqa, sapallanmanta wakin imasta mana ruwayta atisqanta. Payqa Diospa yanapayninta necesitarqapuni. Pabloqa niraj cristianoman tukushaspa, cristianosta mayta qhatiykacharqa, maytataj sufricherqa. Jinapis aswan qhepaman repararqa chayta ruwasqanqa mana allinchu kasqanta, cambiarqataj (1 Tim. 1:12-16). Payqa Jehovaj yanapayninwan munakuyniyoj, khuyakuyniyoj, kʼumuykukoj sonqo ancianotaj karqa. Chantapis imaspichus pantasqanta sutʼita  yacharqa. Jinapis Jehová perdonasqanpi atienekorqa, nitaj pantasqasnillanpichu yuyarqa (Rom. 7:21-25). Payqa mana yuyarqachu ni imapi pantananta. Astawanpis aswan kʼacha cristiano kananpaj kallpachakorqa, saqerqataj Jehová ruwaykunasninta juntʼananpaj yanapananta (1 Cor. 9:27; Filipenses 4:13 leey).

15. ¿Imatataj Jehová suyan ancianos ruwanankuta?

¹⁵ ¿Imatá yachakunchej? Ancianosqa tukuy runas jina pantaj runasllataj kanku. Jinapis Jehovaqa munan pantasqasninkuta reparakunankuta, sumaj cristianos kanankupajtaj kallpachakunankuta (Efe. 4:23, 24). Ancianosqa Diospa Palabranta sumajta ukhunchananku tiyan, imaynachus kashasqankuta reparakunankupaj, chayman jinataj cambianankupaj. Jehovataj yanapanqa kusisqas kanankupaj, sumaj ancianostaj kanankupaj (Sant. 1:25).

16. Ancianos hermanospa pantasqasnillankuta qhawankuman chay, ¿imatataj ruwankuman?

¹⁶ ¿Imaraykutaj wakin kutis mana atillankumanchu? Ancianosqa congregacionpi hermanosta yanapasqankurayku, aswan sutʼita reparayta atinku imaspichus hermanos pantasqankuta. Jinapis mana allinta qhawarikuspaqa, hermanospa pantasqankumanta phiñakunkuman, mana paykunawan kʼachaschu kankuman, chayrí qhawarankuman. Apóstol Pablo nisqanman jinataj, Satanasqa chaytapuni munarishan (2 Cor. 2:10, 11).

17. ¿Imaynatataj Pablo hermanosta qhawarqa?

¹⁷ Apóstol Pabloj ruwasqan. Pabloqa hermanosmanta allin kajtapuni yuyarqa. Payqa sutʼita yacharqa imaspichus hermanos pantasqankuta. Imajtinchus wakin kutisqa chay pantasqankumanta llakikorqa. Apóstol Pabloqa yacharqa, hermanosqa pantajtinkupis mana sajra runaschu kasqankuta. Payqa hermanosta mayta munakorqa, allin ruwasqasninkutapunitaj qhawarqa. Payqa hermanos allin kajtapuni ruwanankupaj kallpachakushasqankuta rikuspa, repararqa paykunaqa kʼacha sonqoyoj kasqankuta, yanapatataj necesitasqankuta.

18. ¿Imatá yachakunchej Pablo Evodiata Sintiquetawan imaynatachus yanapasqanmanta? (Filipenses 4:1-3).

¹⁸ Qhawarina imaynatachus Pablo Filipos congregacionmanta iskay hermanasta yanaparisqanta (Filipenses 4:1-3 leey). Evodiawan Sintiquewanqa, wakin imaspi mana entiendenakusqankuraykusina phiñanakorqanku. Pabloqa paykunata mana kʼamirparqachu, nitaj nerqachu pichus juchayoj kasqanta. Astawanpis qhawarqa allin imasta ruwasqankuta, chay tiempokama ashkha watastaña Jehovata tukuy sonqo sirvisqankuta ima. Chantapis yacharqa Jehová paykunata mayta munakusqanta. Pabloqa chay hermanaspa allin ruwasqasninkuta qhawasqanrayku, kallpacharerqa allinyakapunankupaj. Pabloqa hermanospa allin ruwasqasninkutapuni qhawaj. Chayrayku kusisqa karqa, chay congregacionmanta hermanoswantaj sumaj amigos karqanku.

19. 1) ¿Imata ruwanankupajtaj ancianos kallpachakunanku tiyan? 2) Fotopi Tantakuna Wasita pichaysikoj ancianomanta, ¿imatá yachakusunman?

 ¹⁹ ¿Imatá yachakunchej? Ancianos, hermanospa allin ruwasqasninkutapuni qhawanaykichejpaj kallpachakuychej. Tukuy hermanos pantaj runas kanku. Jinapis allin imasta ruwanankupaj kallpachakunku (Fili. 2:3). Qankunaqa wakin kutis hermanosta wistʼuykushajtinku yuyaycharinaykichej kanqa. Hermanosqa wakin kutis mana allin imasta ruwanku chayrí parlanku. Jinapis qankunaqa apóstol Pablo jina mayta kallpachakuychej, ama hermanospa pantasqasnillankuta qhawanaykichejpaj. Astawanpis qhawaychej, hermanos Jehovata munakusqankuta, ima kajtinpis Jehovata sirvillasqankutapuni, allin kajtapunitaj ruwayta munasqankuta. Hermanospa allin ruwasqasninkutapuni qhawankichej chayqa, hermanosman rikuchinkichej congregacionpi may munasqa kasqankuta.

20. ¿Imatá ruwankuman ancianos apóstol Pabloj kausayninwan yanapachikunallankupajpuni?

²⁰ Ancianos qankunaqa apóstol Pabloj kausayninmanta estudiaspa mayta yachakullawajchejpuni. Chayrayku Pablomanta astawan yachakunaykichejpajqa, Índice de las publicaciones Watch Tower nisqaman yaykuwajchej. Chaypitaj maskʼawajchej “Pablo” nisqa titulota, chay ukhupitaj “Ejemplo para los ancianos” nisqata. Chaypi kaj referenciasta leerishaspaqa, ichapis kaypi piensariwajchej: “¿Imaynatataj apóstol Pabloj kausaynin yanapawanman, congregacionpi anciano jina kusisqallapuni yanapakunaypaj?”.

21. Ancianos, ¿imaynatá Jehová paypaj llankʼasqaykichejta qhawan?

²¹ Ancianos, Jehovaqa mana suyanchu ni imapi pantanaykichejta. Astawanpis payqa munan ruwanasniykichejta allinta juntʼanaykichejta (1 Cor. 4:2). Jehovaqa mayta kusikorqa apóstol Pablo llankʼayninta sumajta juntʼasqanmanta. Qankuna llankʼayniykichejta sumajta juntʼasqaykichejmantapis kusikullantaj. Jehovaqa ni jaykʼaj “qonqapunchu ruwasqasniykichejta, sutinta munakusqaykichejtapis. Chaytataj Diospaj tʼaqasqa kajkunata yanapaspa rikucherqankichej, kunanpis yanapashallankichejpuni” (Heb. 6:10).