1, 2. 1) Pipis bautizakojtin, ¿imastá rikunchej? 2) ¿Imastá kay yachaqanapi yachakusun?

 ¿MAYKʼAJLLAPIS rikorqankichu bautizakunankupajña kashajkunata? Discursante iskay tapuykunata ruwajtin, paykunaqa jatunmanta “arí” ninku. Familiaresninkuwan amigosninkuwantaj maytapuni kusikunku. Bautizakojkunaqa kusisqa uyitas yakumanta llojsimunku, tukuy chaypi kajkunataj mayta tʼajllarikunku. Sapa semana waranqa waranqa runas bautizakunku. Paykunaqa Jehovaman kausayninkuta qopuspa, bautizakuspa ima, Jehovaj testigosninman tukunku.

² Bautizakuyta yuyashanki chayqa, ‘Jehová Diosta maskʼashanki’. Chaytaj kay laqha mundopi kʼancharichisunki (Sal. 14:1, 2). Kay yachaqanaqa tukuypaj wakichisqa kashan, jovenespajpis kurajkunapajpis. Jehovataqa ashkha imasrayku sirvinchej. Kay yachaqanapitaj kinsamanta yachakusun. Bautizasqaña kajkunatapis kay yachaqanaqa yanapallawasuntaj Jehová Diosninchejta wiñaypaj sirviyta munanallapajpuni.

3. ¿Imaraykutaj Jehovaj kamachisnin cheqa kajta, cheqan kajtawan munakunchej? (Salmo 119:128, 163).

³ Jehovaqa kamachisninman kayta kamacherqa: ‘Cheqa kajta munakuychej’, nispa (Zac. 8:19). Jesustaj cheqan kajta maskʼana kasqanta nerqa (Mat. 5:6). Chaypajtaj imatachus Dios cheqanpaj, allinpaj, llimphupaj qhawan chaykunata tukuy sonqo ruwayta munananchej tiyan. Qanpis munakunkichá cheqa kajta, cheqan kajtapis. Chayrayku chejnikunki llullakuyta, mana allin ruwaykunata, sajra ruwaykunatapis (Salmo 119:128, 163 leey). Llullakojkunaqa Satanás jina ruwanku, paymin kay mundota kamachejqa (Juan 8:44; 12:31). Satanasqa Jehová Diospa santo sutinta chʼichichayta munan. Chayrayku payqa Edén huertapi runas Diospa contranpi oqharikusqankumantapacha, Diosninchejmanta llullasta parlashan. Edenpi nisqanwanqa runasta yuyachiyta  munarqa Jehovaqa sajra llulla kamachej kasqanta, runasmantataj allin imasta jarkʼasqanta (Gén. 3:1, 4, 5). Chay jina millay llullasta parlasqanraykutaj, ashkha runasqa mana allinpajchu Jehovata qhawanku. Wakin runasqa paykunapuni mana munankuchu cheqa kajta ruwayta. Chayraykutaj Satanasqa paykunata ruwachinman tukuy mana cheqan kajta, sajra kajtapis (Rom. 1:25-31).

4. ¿Imaynatá Jehová rikuchin “cheqa kajta parlaj Dios” kasqanta? (Dibujotawan qhawariy).

⁴ Jehovaqa “cheqa kajta parlaj Dios”. Payta munakoj runasmantaj cheqa kajta mana michʼakuspa yachachin (Sal. 31:5). Chayta ruwaspa paykunata yanapan manaña Satanaswan engañachikunankupaj. Chantapis Jehovaqa kamachisninman yachachin honrados kayta, cheqan kajta ruwaytapis. Chaytaj paykunata yanapan paykuna kikinkuta allinpaj qhawakunankupaj, sonqo tiyasqastaj kanankupaj (Pro. 13:5, 6). Qanwanpis ajinallatajchá karqa Bibliata estudiayta qallarisqaykimantapacha. Yachakunkiña Jehovaj ñankunasnillan aswan sumaj kasqanta runaspajpis qanpajpis (Sal. 77:13). Chayrayku Jehovaj cheqan kamachiykunasninta kasukuyta munanki (Mat. 6:33). Munallankitaj cheqa kajman sayakusqaykita rikuchiyta, Diosninchejmanta imastachus Satanás nisqan llulla kasqanta rikuchiytapis. ¿Imaynatá chayta rikuchiwaj?

5. ¿Imatá ruwawaj cheqa kajta, cheqan kajtawan munakusqaykita rikuchinaykipaj?

⁵ Kausayniykipi imastachus ruwasqaykiwanqa kay imasta sutʼita rikuchinki: Satanaspa llullasninta qhesachasqaykita, cheqa kajman sayakusqaykita, Jehová kamachejniyki kananta munasqaykita, cheqan kamachiykunasnintataj kasukuyta munasqaykita. Chayta kausayniykiwan rikuchinaykipajqa, Jehovaman uj oracionpi ninayki tiyan payta wiñaypaj sirvinaykita. Chaymantataj bautizakunayki tiyan Jehovaman kausayniykita qopusqaykita wajkuna rikunankupaj. Cheqa kajta, cheqan kajtawan munakusqaykeqa sonqoykita aysanqapuni bautizakunaykipaj.

6. Salmo 45:4 nisqanman jina, ¿imaraykutaj Jesucristota munakunchej?

⁶ ¿Imaraykutaj Jesucristota munakunki? Wakin razonesqa Salmo 45:4 (leey) versiculopi kashan. Jesusqa cheqa kajta, kʼumuykukoj sonqoyoj kayta, justiciatapis munakun. Sichus qanpis cheqa kajta, cheqan kajtawan munakunki chayqa, Jesustapis munakullankitaj.  Jesusqa mana manchachikuspa cheqa kajman, cheqan kajmanpis sumajta sayakorqa (Juan 18:37). Chanta, ¿imaynatá kʼumuykukoj sonqo kayta munakusqanta rikuchillantaj?

7. Jesús kʼumuykukoj sonqo kasqanmanta, ¿imataj astawan gustasunki?

⁷ Jesusqa nisqasninwan ruwasqasninwan rikuchin kʼumuykukoj sonqo kasqanta. Payqa Tatantapuni jatunchan, nitaj paychu jatunchachikuyta munan (Mar. 10:17, 18; Juan 5:19). ¿Imatá yuyanki Jesús kʼumuykukoj sonqo kasqanmanta? ¿Sonqoykita aysancharí Diospa Wawanta munakunaykipaj, pay jinataj ruwanaykipaj? ¿Imaraykutaj Jesús kʼumuykukoj sonqo? Payqa ajina Jehová kʼumuykukoj sonqo kasqanrayku. Jesustaj Tatanta munakun, tukuy imapitaj Tatanman rijchʼakun (Sal. 18:35; Heb. 1:3). ¿Manachu chayqa Jesusman qayllaykuchisunki?

8. ¿Imaraykutaj mayta kusikunchej Jesús Reyninchej kasqanmanta?

⁸ Jesusqa pimanta nisqapis may sumaj kamachejpuni. Chayrayku Reyninchej kasqanmanta mayta kusikunchej. Jehovapuni paytaqa Rey kananpaj wakicherqa, churarqataj (Isa. 50:4, 5). Chantapis piensarina maytapuni Jesús munakuwasqanchejpi, nitaj chaymanta imatapis mañawasqanchejpi (Juan 13:1). Jesús Reyninchej kasqanrayku, tukuy sonqo payta munakunanchej tiyan. ¿Imaynatá tukuy sonqo munakusqanchejta rikuchisunman? Payllataj nerqa payta munakojkunaqa kamachiykunasninta kasukunankuta (Juan 14:15; 15:14, 15). Jehovaj Wawanpa amigosnin kaytaj, may sumajpuni.

9. ¿Imapitaj Jesuspa bautizakusqanwan cristianospa bautizakusqankuwan rijchʼakunku?

⁹ Jesusqa kamacherqa discipulosnin bautizakunankuta, chaytaj imastachus kamachisqasninmanta ujnin (Mat. 28:19, 20). Paypis bautizakullarqataj. Jesuspa bautizakusqan, discipulosnin bautizakusqankupis wakin imaspi mana kikinchu (“ Jesuspa bautizakusqanwan discipulosninpa bautizakusqankuwan, ¿imapitaj mana kikinchu?” nisqa recuadrota leeriy). Jinapis wakin imaspi rijchʼakunkupuni. Jesusqa bautizakuspa Tatanpa munayninta ruwananta nisharqa (Heb. 10:7). Discipulosninpis ajinallatataj ruwanku. Bautizakuspaqa wajkunaman rikuchinku Jehovaman kausayninkuta qopusqankuta, chaymantapachataj Diospa munayninta ruway paykunapaj aswan importante kasqanta, nitaj munayninkuta ruwaychu. Ajinamanta Yachachejninku Jesús jina ruwashanku.

10. ¿Imaraykutaj Jesusta munakusqanchej bautizakunapaj tanqanawanchej tiyan?

¹⁰ Qanqa yachanki Jesusqa Diospa kʼata Wawan kasqanta, Reyninchej kananpajtaj Dios payta ajllasqanta. Yachallankitaj Jesusqa kʼumuykukoj sonqo kasqanta, tukuy imapitaj Tatan jinapuni kasqanta. Chantapis yachakorqanki Jesusqa yarqhachikojkunata mikhuchisqanta, llakisqasta sonqochasqanta, onqosqastapis sanoyachisqanta (Mat. 14:14-21). Chantapis qanpuni rikunki Jesusqa Diospa llajtanta kay tiempopi ñaupajman apashasqanta (Mat. 23:10). Yachankitaj Diospa Gobiernonmanta Rey kasqanrayku, Jesusqa aswan qhepaman noqanchejpaj sumaj imasta ruwananta. Chanta, ¿imaynatá Jesusta munakusqaykita rikuchiwaj? Pay jina ruwaspa (Juan 14:21). Chaypaj, ¿imatá ñaupajta ruwanayki tiyan? Jehovaman kausayniykita qopuy, bautizakuytaj.

11. ¿Imataj sonqonchejta astawan aysanan tiyan bautizakunapaj, chanta imaraykutaj?

¹¹ ¿Imataj sonqonchejta astawan aysanan tiyan bautizakunapaj? Kutichiyninta tarinchej imatachus Jesús Diospa aswan kuraj kamachiyninmanta nisqanpi. Pay nerqa: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj”, nispa (Mar. 12:30). Qanpis, ¿chaypi nisqanman jinachu Diosta munakunki?

12. ¿Imaraykutaj Jehovata munakunki? (Fotostawan qhawariy).

 ¹² Jehovata munakunapajqa ashkha razones tiyan. Qanqa yachakorqanki pay “kausay yaku juturi” kasqanta, chantá ‘tukuy ima allin kaj regalota, aswan sumaj regalotapis’ pay qowasqanchejta (Sal. 36:9; Sant. 1:17). Ajinapuni, tukuy allin imas kapuwasqanchejqa Jehovamanta jamun. Payqa mana michʼakuspa imatapis qowanchej, maytataj munakuwanchej.

13. ¿Imaraykutaj Jesús noqanchejrayku wañusqan may sumaj regalo?

¹³ Jehová Wawanta kacharichisqa kananchejpaj kachamusqanqa, Jehovamanta may sumaj regalopuni. ¿Imaraykú chayta ninchej? Tʼukurina mashkhatachus Jehovawan Wawanwan munanakusqankupi. Jesús nerqa: “Tatayqa munakuwan”. Chantá nillarqataj: ‘Tatayta munakuni’, nispa (Juan 10:17; 14:31). Munanakusqankutaj astawan astawan sinchʼiyarqa may chhika watas pasasqanman jina (Pro. 8:22, 23, 30). Kaypi tʼukuriy: Jehovaqa saqerqa Wawanta sufrichinankuta, wañuchinankutapis. Chaymantataj maytachá sonqon nanarqa. Jinapis Jehovaqa runasta mayta munakusqanrayku, qantapis munakususqanrayku, munasqa Wawanta qorqa. Ajinamanta tukuy runas wiñaypaj kausakuyta atinanchejpaj (Juan 3:16; Gál. 2:20). Chaymanta aswan jatun razonqa mana kanmanchu Jehovata munakunapaj.

14. ¿Imataj ni imawan kikinchakunmanchu?

 ¹⁴ Jehovamanta astawan yachakusqaykiman jina, astawan payta munakorqanki. Maytachá munashanki kunan, wiñaypajpis Jehovaj aswan sumaj amigonman tukuyta. Chaytataj atinkipuni. Parlasqaykiwan ruwasqaykiwan Jehovaj sonqonta kusichiyta atiwaj. Jehovapuni munakuywan nisunki chayta ruwanaykita (Pro. 23:15, 16). Imatachus kausayniykipi ruwasqaykiwan sutʼita rikuchinki Jehovata munakunkipunichus manachus chayta (1 Juan 5:3). Jehovata kusichinapaj jina kausakoyqa, ni imawan kikinchakunmanchu.

15. ¿Imaynamantá Jehovata munakusqaykita rikuchiwaj?

¹⁵ ¿Imaynamantá Jehovata munakusqaykita rikuchiwaj? Ñaupajtaqa Jehovaman uj oracionpi niy payman kausayniykita qopushasqaykita. Paylla uj kʼata cheqa Diosqa (Sal. 40:8). Chaymantataj Jehovaman sapallaykipi kausayniykita qopusqaykita rikuchinaykipaj, bautizakunayki tiyan. Qallariypi nerqanchej jina, bautizakusqaykeqa may kusiypuni, kausayniykipi tukuy ima ruwasqaykimantataj aswan sumaj. Chay diamantapacha manaña qanpajchu kausanki, manaqa Jehovapaj (Rom. 14:8; 1 Ped. 4:1, 2). Chayta ruway mana atinapaj jinallachu kajtinpis, chayta ruwajtiykeqa sumajta kausakuyta atinki. Qhawarina imaraykuchus.

16. Salmo 41:12 nisqanman jina, ¿ima tʼinkatataj Jehová qonqa payta sirvejkunaman?

¹⁶ Jehovaqa ni pi jina maki juntʼata imatapis qowanchej. Imata payman qojtiykipis, payqa may chhikatawanrajpuni kutichipusonqa (Mar. 10:29, 30). Jehovaqa kunanña, kay sajra mundopiña sumaj kausayta, kusiy kausayta qosonqa, kausayniykipitaj mayta bendecisonqa. Chaytaj qallariynillanraj. Bautizakuytawan may ñantachus puriyta qallarisqaykeqa, mana tukukonqachu. Munasqa Tatayki Jehovata wiñaypaj sirviyta atiwaj. Jehovata munakusqayki, paypis munakususqan wiñallanqapuni, pay jinataj wiñaypaj kausakuyta atinki (Salmo 41:12 leey).

17. ¿Imatataj Jehovaman qoyta atinki?

¹⁷ Kausayniykita Jehovaman qopuspa, bautizakuspapis Tatayki Jehovaman uj sumaj regalota qonki. Tukuy allin imas kapususqan, tukuy kusiyniykipis Jehovamanta jamun. Cielomantawan jallpʼamantawan dueño kajtinpis, paypataqa uj ima mana tiyapunchu. Qantaj chayta payman qoyta atinki. Chaytaj kashan payta tukuy imapi kasukunayki, ni imata suyaspallataj sirvinayki (Job 1:8; 41:11; Pro. 27:11). Chayta ruwayqa may sumajpuni. Chayrayku sichus  bautizakuyta munanki chayqa, astawanqa Jehovata munakusqaykirayku kachun.

18. ¿Ima tapuykunapitaj piensariwaj?

¹⁸ Kunan ima niwajtaj, ¿bautizakunkichu? Chaytaqa qanlla yachanki. Jinapis kayta tapurikuy: “¿Imatá bautizakunaypaj suyashani?”, nispa (Hech. 8:36). Kay yachaqanapeqa kinsa imasrayku bautizakuna kasqanta yachakorqanchej. Ñaupaj kaj karqa cheqa kajtawan cheqan kajtawan munakusqanchejrayku. Kayta tapurikuy: “¿Munanichu rikuyta maypachachus tukuypis cheqa kajta parlanqanku, cheqan kajta ruwanqanku chay día chayamunallantaña?”. Iskay kajtaj kashan Jesucristota munakusqanchejrayku. Kayta tapurikuy: “¿Munanichu Diospa Wawan Reyniy kananta, pay jinataj ruwayta?”. Kinsa kajtaj aswan importante, Jehovata munakusqanchejrayku. Kayta tapurikullaytaj: “¿Munanichu Jehovata sirviyta, ajinamantataj sonqonta kusichiyta?”. Chay tapuykunaman “arí” nispa kutichinki chayqa bautizakullayña, ¿imañataj jarkʼashasunki? (Hech. 16:33).

19. ¿Imaraykutaj bautizakuymanta mana iskayrayanaykichu tiyan? Uj kikinchaywan sutʼinchariy (Juan 4:34).

¹⁹ Bautizakunaykimanta iskayrayashankiraj chayqa, Jesús uj kikinchaymanta parlasqanpi piensariy (Juan 4:34 leey). Jesusqa nerqa Tatanpa munayninta ruwayqa mikhunan jina kasqanta. ¿Imaraykú chayta nerqa? Mikhuna allinninchejpaj kasqanrayku. Jesusqa yacharqa Jehová tukuy imata mañawasqanchejqa allinninchejpajpuni kasqanta. Jehovaqa imachus mana allinninchejpaj kasqanta mana mañawasunmanchu. Paytaj munan bautizakunaykita (Hech. 2:38). Chayrayku bautizakunata kamachisqanta kasukunaykeqa allinniykipajpuni kanqa. May sumaj miskʼi mikhunitata jaywarisojtinkoqa, ¿chay ratocharí mana iskayrayaspa mikhuykuwaj? Bautizakuymantapis amallataj iskayrayaychu.

20. ¿Imatá qhepan yachaqanapi yachakusun?

²⁰ ¿Imaraykutaj wakinkuna manaraj bautizakunkurajchu? Ichapis yuyanku manaraj wakichisqachu kashasqankuta. Jehovaman kausayniykita qopuypis bautizakuypis mana imatapis ajllay jinallachu. Chayrayku sumajta piensariy, wakichisqa kanaykeqa mana uj ratopajchu, maytataj kallpachakunayki tiyan. Jinapis bautizakuytapuni munanki chay, ¿imataj yanapasunkiman wakichisqa kanaykipaj? Chayta qhepan yachaqanapi yachakusun.