1, 2. Bautizakunaykipaj manaraj wakichisqachu kashanki chay, ¿imaraykutaj mana desanimakunaykichu tiyan? (Kay revistaj tapanpi fotosta qhawariy).

 BAUTIZAKUYTA munashanki chayqa mayta felicitayku. ¿Wakichisqañachu kashanki bautizakunaykipaj? Wakichisqaña kashasqaykita yuyanki chay, ancianospis chayllatataj nisunku chayqa, amaña suyaychu bautizakunaykipaj, bautizakullayña. Ajinamanta Jehovata sirvispa kusisqa kausakunki.

² Pero ichapis nisorqanku bautizakunaykipaj manaraj wakichisqachu kashasqaykita. Chayri ichá qan yuyanki manaraj wakichisqachu kashasqaykita. Jina kajtenqa ama desanimakuychu. Joven kajtiykipis, mayorña kajtiykipis bautismoman chayanaykikama ñaupariyta atillawajpuni.

3. ¿Imatataj Etiopiamanta uj autoridad Felipeta nerqa, chanta ima tapuytaj rikhurin? (Hechos 8:36, 38).

³ (Hechos 8:36, 38 leey). Etiopiamanta uj autoridad sumaj willaykunata willaj Felipeta taporqa: “¿Imajtintaj mana bautizakuymanchuri?”, nispa. Chaywanqa sutʼita rikucherqa bautizakuytapuni munasqanta. Jinapis bautizakunanpaj, ¿wakichisqañachu kashanman karqa?

4. ¿Imaynatataj Etiopiamanta autoridad rikucherqa yachakullaytapuni munasqanta?

⁴ Etiopiamanta chay autoridadqa “Jerusalenman Diosta yupaychaj risqa” (Hech. 8:27). Chayta ruwasqanpi reparakun judiomansina tukusqanta. Payqa Hebreo Qhelqasqasta sumajta rejserqa, chaypitaj Jehovamanta yachakorqa. Jinapis astawan yachayta munarqa. Chayrayku Felipewan tinkushajtenqa  profeta Isaiaspa qhelqasqanta leesharqa (Hech. 8:28). Chay qhelqasqataj mana ujta leespa entiendeyta atinapaj jinallachu karqa. Chay autoridadqa mana qallariy yachachiykunallawanchu contentakorqa, manaqa yachakullaytapuni munarqa.

5. ¿Imatá etíope runa ruwarqa yachakusqanwan?

⁵ Chay runaqa Etiopiamanta reina Candacej kamachiyninpi may importante autoridad karqa, “chay reinaj qhapaj kapuyninmantataj cargoyoj karqa” (Hech. 8:27). Chayrayku ashkha ruwaykunasniyojchá karqa, may ocupasqatajchá karqa. Jinapis Jehovata yupaychananpaj tiempochakorqa. Payqa mana cheqa kajta yachakusqallanwanchu contentakorqa. Chay yachakusqanqa chayman jina ruwananpaj tanqarqa. Payqa Etiopiamantapacha Jerusalenpi temploman Jehovata yupaychaj viajarqa. Chayman reyqa karuchá karqa, ashkha qolqepajtajchá karqa. Jinapis Jehovata yupaychayta munaspa ima kajtinpis rerqapuni.

6, 7. ¿Imatataj etíope runa ruwarqa Jehovata astawan munakunanpaj?

⁶ Felipeqa etíope runaman mana yachasqan imasta sutʼincharqa, importante cheqa yachachiykunata. Chaykunamanta ujqa karqa Jesús Mesías kasqan (Hech. 8:34, 35). Chay etíope runaj sonqonqa maytachá kuyurerqa imatachus Jesús payrayku ruwasqanta yachakojtin. Chayrayku, ¿imatá ruwanman karqa? Payqa imaynachus karqa ajinalla kakuyta atinman karqa, respetasqa judioman tukoj runallapuni. Jinapis Jehovatawan Jesustawan munakusqan maytapuni sinchʼiyasqanrayku, bautizakuytapuni munarqa Jesuspa discipulonman tukunanpaj. Felipetaj bautizakunanpaj listoña kashasqanta reparaspa bautizarqa.

⁷ Sichus qanpis chay etíope runa jina ruwanki chayqa, bautizakunaykipaj wakichikuyta atinki. Ajinamanta pay jinallataj mana iskayrayaspa niyta atinki: “¿Imajtintaj mana bautizakuymanchuri?”, nispa. Payqa yachakullarqapuni, yachakusqanman jina ruwarqa, Jehovata munakusqantataj sinchʼiyachillarqapuni. Qhepan parrafospi qhawarisun imaynatachus pay jina ruwanaykita.

8. Juan 17:3 nisqanman jina, ¿imatataj ruwanayki tiyan?

⁸ (Juan 17:3 leey, sutʼinchaynin). Jesuspa nisqan, ¿sonqoykita aysarqachu Bibliata estudiayta qallarinaykipaj? Ajina karqa ashkhaswan. Jesuspa nisqanqa yanapallawanchejtaj yachakunallapajpuni. “Kʼata cheqa Diosta” rejsiytaqa ni jaykʼaj tukusunchu (Ecl. 3:11). Paymantaqa wiñaypaj yachakullasunpuni. Jehovata astawan rejsisqanchejman jinataj, astawan payman qayllaykusun (Sal. 73:28).

9. ¿Imatawantaj ruwananchej tiyan Bibliamanta qallariy yachachiykunata yachakuytawanña?

 ⁹ Jehovamanta yachakuyta qallarejtinchejqa, apóstol Pablo hebreosman cartanpi nerqa jina, ‘qallariy yachachiykunallataraj’ yachakuyta qallarinchej. Pablotaj ‘qallariy yachachiykuna’ nispa mana pisipajchu chay yachachiykunata qhawasharqa. Astawanqa nisharqa wawata alimentanapaj leche jina kasqanta (Heb. 5:12; 6:1). Payqa cristianosta nillarqataj mana chay qallariy yachachiykunallatachu yachakunankuta, manaqa Diospa Palabranmanta pakasqa yachachiykunatapis yachakunallankutataj. Qanpis, ¿maytachu munanki chay yachachiykunata yachakuyta? ¿Maytachu munashanki ñauparillaytapuni, Jehovamanta, munayninmantapis yachakullaytapuni?

10. ¿Imaraykutaj wakin mana estudiayta atillankuchu?

¹⁰ Wakenqa estudiayta ichapis mana atillankumanchu. Qanrí, ¿atillankichu? ¿Escuelapi yachachisorqankuchu leeytawan estudiaytawan? ¿Chayta ruway gustasorqachu? Chayri, ¿nichu librosta rikuyllatapis munanki? Jina kajtenqa, mana qanllachu ajinapi rikukunki. Jehovaqa yanapasunkiman. Payqa ni imapi pantanchu, aswan sumaj Yachachejtaj.

11. ¿Imaraykutaj Jehová ‘Sumaj Yachachej’?

¹¹ Jehovaqa nin ‘Sumaj Yachachej’ kasqanta (Isa. 30:20, 21). Payqa pacienciayoj Yachachej, kʼacha Yachachej, entiendekoj Yachachejtaj. Chantapis pikunamanchus yachachin chaykunapi allin imastapuni qhawan (Sal. 130:3). Payqa ni jaykʼaj mañawasunmanchu imatachus mana ruwayta atisqanchejta. Amapuni qonqakunachu pay ñojtunchejta ruwasqanta, ñojtunchejtaj uj sumaj regalo (Sal. 139:14). Chantapis yachakuyta munanapaj jinapuni ruwawarqanchej, munantaj wiñaypaj yachakunallanchejtapuni, yachakuspataj kusikunanchejta. Chayrayku kunanmantapachaña Bibliaj cheqa yachachiykunasninta “mayta munariyta” yachakunanchej tiyan (1 Ped. 2:2). ¿Imataj chaypaj yanapawasunman? Imatapis ruwayta munasqanchejqa, atinanchejpaj jinalla kanan tiyan. Chantapis Bibliata leenapuni, estudianapunitaj (Jos. 1:8). Jehovaj yanapayninwanqa paymanta leey, yachakuypis astawan astawan gustawasun.

12. ¿Imaraykutaj Jesuspa kausayninmanta, Diosmanta willasqanmantapis estudiananchej tiyan?

¹² Tiempochakuna sapa kuti Jesuspa kausayninpi, Diosmantataj willasqanpi tʼukurinapaj. Jehovata sirvinapajqa, astawanraj kay llakiy tiempospi, Cristota tukuy imapi qhatinanchejpuni tiyan (1 Ped. 2:21). Jesusqa sutʼita discipulosninman nerqa ima llakiykunapichus rikukunankuta (Luc. 14:27, 28). Jinapis yacharqa pay jinallataj Jehovata kasukunallankutapuni (Juan 16:33). Noqanchejpis Jesuspa kausayninmanta estudiana, nikunataj imapichus sapa día pay jina ruwanata.

13. ¿Imatataj Diosninchejmanta mañakunallanchejpuni tiyan, chanta imaraykutaj?

¹³ Estudiaspaqa mana ashkha imasta yachayllatachu munanchej, manaqa munanchej Jehovata rejsiyta, payta munakuyta, paypi creeytapis (1 Cor. 8:1-3). Jehovamanta astawan astawan yachakusqanchejman jina, mañakunallapuni astawan creeyniyoj kananchejpaj yanapanawanchejta (Luc. 17:5). Paytaj tukuy sonqo uyariwasun. Creeyninchej Diosta rejsisqanchejrayku sinchʼi kashan chayqa, ñaupariyta atillasunpuni (Sant. 2:26).

14. ¿Imawantaj Pedro kikincharqa yachakusqanchejman jinapuni ruwana kasqanta? (Dibujotawan qhawariy).

¹⁴ Apóstol Pedroqa nerqa Cristoj discipulosnin yachakusqankuman jinapuni ruwananku kasqanta. Chayta sutʼinchananpajtaj  Noemanta parlarqa. Jehovaqa Noeman nerqa maytapuni parachimunanta, chay tiempomanta tukuy sajra runasta tukurpachinanpaj. Noewan familianwantaj mana chay para kanallantachu yachananku karqa, manaqa imatapis ruwanankupuni karqa salvakunankupaj. Pedroqa niraj Jatun Para kashasqan tiempomanta parlaspa “arca ruwakushajtin” nispa nerqa (1 Ped. 3:20). Noewan familianwanqa Jehovaj nisqanta kasukuspa uj jatun arcata ruwarqanku (Heb. 11:7). Chaymantataj Pedroqa Noej ruwasqanta bautismowan kikincharqa. Pay nerqa: “Chaywan ninakoj bautismomin qankunatapis salvashasunkichej”, nispa (1 Ped. 3:21). Bautizakunaykipaj wakichikusqaykeqa Noewan familianwan watasta arcata ruwasqankuman rijchʼakunman. Pero, ¿imaynatá wakichikuwaj bautizakunaykipaj?

15. ¿Imaynapitaj yachakun tukuy sonqo arrepientekusqanchej?

¹⁵ Imastachus ruwananchejmanta ujqa kashan juchasninchejmanta tukuy sonqo arrepientekuy (Hech. 2:37, 38). Tukuy sonqo arrepientekusqanchejqa cambiasqanchejpi yachakun. ¿Saqepunkiñachu Jehovaj chejnisqan imasta ruwayta? ¿Saqepunkiñachu khuchichakuy kausayta, pitayta, millay imasta parlayta chayri fierosta parlayta? (1 Cor. 6:9, 10; 2 Cor. 7:1; Efe. 4:29). Manaraj chay imasta saqepunkichu chayqa, kallpachakullaypuni qonqanaykipaj. Yanapata chayri yuyaychayta necesitanki chayqa, Bibliamanta yachachisojwan parlariwaj chayri ancianosta tapurikuwaj. Sichus jovenllaraj kanki, tatasnillaykiwanrajtaj tiyakushanki chayqa, paykunawan yanapachikuwaj ima viciotapis qonqapunaykipaj, ajinamantataj bautizakunaykipaj.

16. Jehovata yupaychaypi, ¿imastataj mana saqespa ruwananchej tiyan?

¹⁶ Chantapis Jehovata yupaychaypi ruwanastaqa mana saqespa ruwanaykipuni tiyan. Chaykunataj kashanku reunionesman riy, comentay ima (Heb. 10:24, 25). Predicacionman llojsiyta atispañataj sapa semana predicaypuni. Astawan predicaspaqa aswan kusisqa kanki (2 Tim. 4:5). Sichus jovenllaraj kanki, tatasnillaykiwanrajtaj tiyakushanki chayqa, kayta tapurikuy: “¿Tatasnillaypunichu yuyarichiwanku reunionesman, predicacionmanpis rinay kasqanta? Chayrí, ¿mana  tanqasqallachu tukuy sonqo chayta ruwani?”, nispa. Mana tanqasqalla tukuy sonqo chay imasta ruwanki chayqa, rikuchinki creeyniyoj kasqaykita, Jehovata munakusqaykita, paytataj agradecekusqaykita. Chaykunata ruwaspaqa Diosta tukuy sonqo yupaychasqaykita rikuchishanki. Chaykunataj Jehovamanpis regalosta qoshawaj jina (2 Ped. 3:11; Heb. 13:15). Jehovaqa kusikun munasqanchejrayku regalosta qojtinchej, manataj wajkuna obligawasqanchejraykuchu (2 Cor. 9:7, kikinchay). Tukuypis mayta kusikunchej noqanchejmanta sumajnin kajta Jehovaman qospa.

17, 18. ¿Imataj yanapasonqa bautismoman chayanaykipaj, chanta imaraykutaj? (Proverbios 3:3-6).

¹⁷ Bautizakunaykipaj ñauparishajtiykeqa, jarkʼaykuna rikhurenqa. Ichapis wakenqa asipayasonqanku, chayri creenciasniykirayku qhatiykachasonqanku (2 Tim. 3:12). Chayri ichapis mayta kallpachakushanki uj mana allin imata ruwayta qonqanaykipaj, jinapis wakin kuti chaypi urmankiraj. Manachayrí ichá yuyanki manarajpuni bautizakuyta atisqaykita. Chaytaj desanimachisunkiman. Mana saykʼupunaykipajqa Jehovata munakuy yanapasonqa.

¹⁸ Jehovata munakusqaykeqa imamantapis aswan sumajpuni (Proverbios 3:3-6 leey). Payta tukuy kallpaykiwan munakunki chayqa, ima llakiy kajtinpis payta sirvillankipuni. Bibliaqa ashkha kutispi nin Jehovaqa kamachisninta munakusqanta. Chaytaj niyta munan Jehovaqa ni jaykʼaj kamachisninta saqerparinanta, nisunman paykunata munakunallantapuni (Sal. 100:5). Qantaj Diospa rijchʼayninman jina ruwasqa kanki (Gén. 1:26). Chanta, ¿imaynatataj chay kikin munakuyllatataj rikuchiwaj?

19. ¿Imaynamantá Jehovaman agradecekuwaj imastachus qanpaj ruwapususqanmanta? (Gálatas 2:20).

¹⁹ Ñaupajtaqa agradecekuyta yachanayki tiyan (1 Tes. 5:18). Sapa día kayta tapurikuy: “¿Imaynamantataj kunan día Jehová munakuwasqanta rikuchiwan?”, nispa. Orakushaspataj chay imasmanta agradecekuy. Reparay Jehovaqa munakususqanrayku allin imasta qanpaj ruwapususqanta, imaynatachus apóstol Pablo repararqa ajinata (Gálatas 2:20 leey). Chantá tapurikuy: “Noqarí, ¿munanichu Jehovaman munakuyniyta rikuchillaytataj?”. Jehovata munakusqaykeqa yanapasonqa ima tentaciontapis atipanaykipaj, ima problema kajtinpis aguantanallaykipajpuni,  Diosta yupaychaypi ruwanastapis ruwanallaykipajpuni. Ajinamanta sapa día rikuchinki Tatayki Jehovata munakusqaykita.

20. ¿Imatataj ruwanayki tiyan Jehovaman kausayniykita qopunaykipaj, chanta imajtintaj chayta ruway may sumajpuni?

²⁰ Tiempowanqa Jehovata mayta munakusqayki sonqoykita aysanqa, uj oracionnejta kausayniykita payman qopunaykipaj. Kausayniykita Jehovaman qopuspañataj wiñaypaj paypata kayta atinki. Jehovaman kausayniykita qopuspaqa nishanki kusiy tiempopipis llakiy tiempopipis payta sirvinallaykitapuni. Chaytaqa tukuy kausayniykipi uj kutillata ruwanki. Kausayninchejta Jehovaman qopoyqa mana pujllakuy jinallachu. Jinapis chayta ruwanki chayqa, tukuy ima allin ruwasqaykimanta aswan sumaj kanqa (Sal. 50:14). Satanasqa tukuy imata ruwanqa manaña Jehovata munakunaykipaj, ajinamanta niña payta sirvinaykipaj. Qantaj ama gustunta qoychu (Job 27:5). Tatayki Jehovata mayta munakusqaykeqa yanapasonqa, kausayniykita payman qopushaspa imatachus nisqaykita juntʼanaykipaj, sapa kutitaj payman astawan qayllaykunaykipaj.

21. ¿Imaraykutaj ninchej bautizakoyqa qallariyllaraj kasqanta?

²¹ Kausayniykita Jehovaman qopuspañaqa ancianoswan parlariy bautizakuyta munasqaykimanta. Jinapis mana bautismokamallachu chayanayki tiyan. Chayqa qallariyllaraj Jehovata wiñaypaj sirvinaykimanta. Chayrayku kunanmantapacha Tatayki Jehovata astawan munakuy. Chay munakuyniyki sapa día wiñananpajtaj, sutʼita nikuy imastachus ruwanaykita. Chayqa yanapasonqa bautismoman chayanaykipaj. Bautizakusqayki diataj mana qonqanapaj jina may kusiy pʼunchaypuni kanqa. Jinapis chayqa qallariyllaraj. Jehovata munakusqayki, Wawanta munakusqaykipis, wiñaypaj wiñallachunpuni.