¿Imajtintaj “don na” nerqa Rutwan casarakojtin ‘herencian pierdekunanta’? (Rut 4:1, 6).

Unay tiempos uj casado runa mana wawasniyoj wañupojtin, ¿imataj jallpʼasninwan pasaj? ¿Wiñaypajchu familianpa sutin chinkapoj? Chayta Moisespa Leyninpi sutʼinchashan.

Uj runa wañupojtin chayri wajchayasqanrayku jallpʼasninta vendejtin, hermanon chayri qaylla familian chay jallpʼata watejmanta rantikapuyta atej. Ajinamanta chay jallpʼaqa chay familiajllatapuni kananpaj (Lev. 25:23-28; Núm. 27:8-11).

¿Imatá ruwakoj wañupojpa sutin mana chinkananpaj? Hermanon viudanwan casarakoj wawankunejta wañupojpa sutin mana chinkananpaj, chay wawataj jallpʼanta herenciata jina japʼinanpaj. Rutwanpis chay costumbreman jina ruwakorqa. Chay sumaj costumbreqa viudastapis mayta yanapaj (Deu. 25:5-7; Mat. 22:23-28).

Noemij kausayninpi tʼukurina. Qosanqa Elimélec sutikorqa. Jinapis qosanwan, iskaynin wawasninwan wañupojtinku manaña pi qharipis karqachu payta cuidananpaj (Rut 1:1-5). Noemiqa Judaman kutipuspa, ñojchʼan Rutta Boazman kacharqa jallpʼasninkuta rantikapunanta nimunanpaj. Boazqa Elimelecpa qaylla familian karqa (Rut 2:1, 19, 20; 3:1-4). Boaztaj yacharqa paymanta nisqa aswan qaylla familianku kasqantaraj. Chayrayku chay runaraj ninan karqa rantikapunantachus manachus (Rut 3:9, 12, 13). Bibliataj chay runata sutichan “don na” nispalla.

Qallariypeqa don na chay jallpʼasta rantikapuyta munasharqa (Rut 4:1-4). Chayta ruway ashkha qolqepaj kasqanta yachaspapis, yachallarqataj Noemí mayorcitaña kasqanta, niñataj wawasniyoj kayta atisqanta Elimelecpa jallpʼasninta herenciata jina japʼikapunanpaj. Chayrayku Elimelecpa jallpʼasnenqa don naj jallpʼasninman yapakunman karqa. Chayrayku ujta piensarispaqa, rantikapunan kosapuni kaspa jinarqa.

Jinapis don naqa Rutwan casaranan kasqanta reparaspa, manaña chay jallpʼasta rantikapuyta munarqachu. Pay nerqa: “Mana rantiymanchu, ama herenciay pierdekunanpaj”, nispa (Rut 4:5, 6). ¿Imaraykutaj mana rantikapuyta munanmanchu karqa?

Sichus don na chayri mayqen qaylla familiallanpis Rutwan casarakunman karqa chayqa, wawitayojtaj kanman karqa chayqa, chay wawitaqa Elimelecpa jallpʼasninta herenciata jina japʼikapunman karqa. Chanta, ¿imaynatataj don naj herencian pierdekunman karqa? Bibliaqa mana ninchu. Jinapis ichapis kay imasrayku kanman karqa:

• Ñaupaj kaj, Elimelecpa jallpʼasnenqa Rutpa wawanpata kanman karqa, manataj don najpatachu. Chayrayku ichapis yuyarqa chay jallpʼasta rantispaqa qolqellanta pierdenanta.

• Iskay kaj, Noemitawan Ruttawan mantienenan kanman karqa.

• Kinsa kaj, sichus Rutwan don nawan waj wawasniyoj kankuman karqa chayqa, chay wawasninkoqa don naj wawasninwan herenciata partinakunkuman karqa.

• Tawa kaj, sichus don na mana wawasniyojchu karqa chayqa, Rutwan wawitayoj kajtin, chay wawitaqa paypa jallpʼasnintawan Elimecpa jallpʼasnintawan herenciata jina japʼikapunman karqa. Chayrayku don naj jallpʼasnenqa chay wawaj makinman chayanman karqa. Chay wawanejtataj Elimelecpa sutin yuyarisqa kanman karqa, manataj don naj sutinchu. Don naqa mana Noemita yanapayta munarqachu mana herencian pierdekunanpaj. Astawanpis cuentanmanta Boazta nerqa rantikapunanta. Boazqa paypa qhepanpi Noemij jallpʼasninta rantikapunanpaj derechoyoj karqa. Chayrayku Noemij jallpʼasninta rantikaporqa, ‘Mahlonpa herencian sutillanpipuni’ kananta munasqanrayku (Rut 4:10).

Don naqa astawansina munarqa sutinwan herencianwan mana chinkananta. Jinapis qhasillapaj karqa, sutenqa tiempowan chinkaporqa. Chantapis don naj cuentanmanta Boaz Jesucristoj ñaupa tatanman tukorqa, nisunman Mesiaspa ñaupa tatanman. Don nataj convenenciero kasqanrayku chay sumaj oportunidadta pierderqa. Yanapata necesitashajta mana yanapariyta munarqachu. Chaymá llakeyqa (Mat. 1:5; Luc. 3:23, 32).