1. ¿Imatataj runas reparanku tantakuyninchejman primera vez jamuspa? (Fototawan qhawariy).

 UJ QHARIWARMI primera vez tantakuyman jamusqankupi piensarina. Paykunaqa mayta tʼukunku hermanospis hermanaspis kʼachas kasqankumanta, purajmantataj munanakusqankumanta. Wasinkuman kutipushaspataj, señoranqa qosanman nin: “Jehovaj testigosnenqa mana rejsisqanchej runas jinachu kanku. Mayta gustaykuwan paykunawan karikuy”, nispa.

2. ¿Imaraykutaj wakinkuna Jehovata sirviyta saqepunku?

² Diospa llajtanpi hermanospura munanakusqanchejqa allin sutʼitapuni reparakun. Jinapis Jehovaj testigosnenqa pantaj runas kanchej (1 Juan 1:8). Chayrayku hermanosninchejta astawan rejsispaqa, ichapis astawan reparallasuntaj imaspichus pantasqankuta (Rom. 3:23). Llakikunapaj jinataj, wakenqa chayta rikuspa Jehovata sirviyta saqepunku.

3. ¿Imapitaj reparakun pikunachus cheqa cristianos kasqanku? (Juan 13:34, 35).

³ Imatachus kay yachaqanapaj texto nisqanmanta parlarina (Juan 13:34, 35 leey). ¿Imaynatá runas yachananku karqa  pikunachus cheqa cristianos kasqankuta? Munanakusqankuta rikuspa, manataj mana pantaj runas kasqankuta rikuspachu. Chantapis Jesusqa mana nerqachu: “Qankuna yachankichej discipulosniy kasqaykichejta”, nispa. Astawanpis nerqa: “Tukuy yachanqanku discipulosniy kasqaykichejta”, nispa. Ajinamanta Jesusqa sutʼita rikucherqa discipulosninpis waj runaspis, cheqa cristianostaqa tukuy sonqo munanakusqankupi sutʼita reparanankuta.

4. ¿Imatataj wakin runas ichapis tapurikunku?

⁴ Mana testigos kajkunaqa ichapis tapurikunku: “¿Imaraykutaj ninku cheqa cristianostaqa munanakusqankupi reparayta atisqanchejtari? ¿Imaynatá Jesús apostolesninman rikucherqa paykunata munakusqanta? ¿Imaynatá Jesús jina ruwayman?”, nispa. May allin kanman testigosña kajkunapis chay tapuykunapi tʼukurinanchej. Chayqa yanapawasun hermanosninchejta astawan munakunapaj, wakin kutis pantajtinkupis (Efe. 5:2).

5. ¿Imayna munakuymantataj Jesús parlarqa Juan 15:12, 13 versiculospi?

⁵ Jesusqa sutʼita nerqa discipulosnenqa purajmanta munanakunankuta. Chay munakuytaj mana mayqen munakuy jinallachu kanan karqa (Juan 15:12, 13 leey). Payqa discipulosninman kamacherqa: “Purajmanta munanakuychej, imaynatachus noqa munakuykichej ajinata”, nispa. ¿Imayna munakuymantataj parlasharqa? Payllataj nerqa wajkunata noqanchejmanta astawanraj munakunanchejta, kausayninchejtapis hermanosninchejrayku qona kajtenqa, qonanchejta. b

6. ¿Imaynatá Diospa Palabran rikuchin munakuyta yachananchej allin importante kasqanta?

⁶ Diospa Palabran yachachiwanchej munanakoyqa allin importante kasqanta. Ashkha runas ninku kay versiculosqa mayta gustasqanta:  “Diosqa munakuymin” (1 Juan 4:8). “Runa masiykita munakunayki tiyan qan kikiykita jina” (Mat. 22:39). “Munakoyqa ashkha juchasta pʼampan” (1 Ped. 4:8). “Munakoyqa manapuni jaykʼajpis tukukonqachu” (1 Cor. 13:8). Kay versículos, waj versiculospis sutʼita rikuchin munakuyta yachananchejqa allin importante kasqanta.

7. ¿Imaraykutaj Satanás mana runasta ujchayta atinchu purajmanta munanakunankupaj?

⁷ Ashkha runas tapukunku: “¿Imaynapí yachayman mayqenchus cheqa religión kasqanta? Tukuypis ninku ‘noqayku cheqa kajta yachachiyku’ nispa. Jinapis Diosmanta mana kikintachu yachachinku”, nispa. Satanasqa ashkha llulla religionesta rikhurichin. Chaytaj runasta qʼalata chʼipaykun. Jinapis Satanasqa manapuni mundontinmanta runasta ujchayta atinchu purajmanta munanakunankupaj. Chaytaqa Jehovalla ruwayta atin. Imaraykuchus yachanchej munakoyqa paymanta jamusqanta. Paypa espiritunta, bendicionninta ima japʼejkunalla purajmanta munanakuyta atinku (1 Juan 4:7). Chayrayku Jesús nerqa paypa discipulosnillan sonqomantapacha munanakunankuta.

8, 9. Jehovaj testigosninta munanakusqankuta rikuspa, ¿imatataj ashkha runas sutʼita reparanku?

⁸ Jesús nerqa jinapuni, ashkha runasqa cheqa cristianosta purajmanta munanakusqankupi reparanku. Hermanonchej Ian uj jatun tantakuyman primera vez risqanmanta yuyarikullanpuni, chayqa karqa wasin qayllapi kaj estadiopi. Payqa chay ñaupaj killaslla chay estadioman risqa pelotata jaytʼajkunata qhawaj. Pay nin: “Chay jatun tantakuypi kajkunaqa mana chay ujkuna jinachu karqanku. Testigosqa kʼachas karqanku, sumaj vistisqataj, wawasninkupis educados karqanku”, nispa. Pay nillantaj: “Tukuyninku may kusisqas kasharqanku, ni pipis qhaparqachasharqachu. Chayta rikuspataj astawan tʼukorqani, ajina runastapuni tariyta munarqani. Mana yuyarikunichu imastachus discursospi parlamusqankuta, jinapis imaynachus testigos kasqankuta rikusqaytaqa ni jaykʼaj qonqakunichu”, nispa. c Testigosqa munanakusqankurayku ajina kʼachituta kausakunku. Hermanosninchejtaqa mayta munakunchej, chayraykutaj paykunawan kʼachas kanchej, respetanchejtaj.

⁹ Hermano Johnpis tantakuyman primera vez rishaspa, testigos munanakusqankuta reparallarqataj. Pay nin: “Maytapuni tʼukuchiwarqa tukuyninku kʼachas kasqanku. Yuyarqanitaj ‘ni imitapichá pantankuchu’ nispa. Tukuy sonqo munanakusqankoqa sutʼita reparachiwarqa cheqa cristianospuni kasqankuta”, nispa. d Chay experiencias, waj experienciaspis sutʼita rikuchin Jehovaj testigosnenqa cheqa cristianospuni kasqankuta.

10. ¿Ima kutispitaj yachakonqa hermanosninchejta munakusqanchejtachus manachus? (Sutʼinchaynintawan qhawariy).

¹⁰ Qallariypi nerqanchej jina, tukuy hermanosninchej pantaj runas kanku. Ima ratollapis phiñachinawanchejpaj jina imatapis ruwanqanku chayri parlanqanku (Sant. 3:2). e Chay kutispi yachakonqa paykunata munakusqanchejtachus manachus. ¿Imataj yanapawasun mana phiñarpakunapaj, astawanpis munakunallapajpuni? Qhawarina imatachus Jesús ruwasqanta (Juan 13:15).

11. Juanwan Santiagowan, ¿imayna kasqankutataj rikucherqanku sumaj puestosta mañakuspa? (Dibujostawan qhawariy).

¹¹ Jesusqa mana suyarqachu discipulosnin ni imapi pantanankuta. Astawanpis munakuywan yanaparqa cambianankupaj, ajinamantataj Jehovaj ñaupaqenpi allinpaj qhawasqa kanankupaj. Uj pacha Santiagowan Juanwanqa mamankuwan Jesusman nicherqanku Gobiernonpi sumaj puestosta qonanta (Mat. 20:20, 21). Chaypi chay apóstoles rikucherqanku jatunchakusqankuta, wajkunamantataj aswan importantes kayta munasqankuta (Pro. 16:18).

12. ¿Santiagowan Juanllawanchu sumaj puestosta japʼiyta munarqanku?

¹² Mana Santiagowan Juanllawanchu chay kutipi sumaj puestosta japʼiyta munarqanku. Bibliaqa nin, ‘chunka discipulosninpis chayta yachaspa, chay iskay hermanospaj phiñakusqankuta’ (Mat. 20:24). Santiagowan, Juanwan, chay waj apostoleswanqa sinchʼitachá discutej churakorqanku. Ichapis chay waj apostolesqa Santiagotawan Juantawan nerqanku: “¿Pi kasqaykichejtataj yuyakunkichej Diospa Gobiernonpi sumaj puestosta mañakunaykichejpajri? Mana qankunallachu sinchʼita Jesuswan khuska trabajankichej. ¿Nichu noqaykupis chay jina puestosta japʼiyta atillaykutaj imatajri?”, nispa. Chayta nejtinkupis  manapis, chay kutipeqa munanakusqanku niña rikukorqachu.

13. ¿Imaynatá Jesús apostolesninta yanaparqa pantajtinkupis? (Mateo 20:25-28).

¹³ ¿Imatá Jesús chaypacha ruwarqa? Payqa mana phiñakorqachu. Mana nerqachu aswan sumaj apostolesta maskʼamunanta, kʼumuykukoj sonqoyoj runasta, munanakuyta yachaj runasta. Astawanpis allin sonqoyoj kasqankuta yachasqanrayku pacienciawan paykunata reparacherqa (Mateo 20:25-28 leey). Apostolesqa ashkha kutispi discuterqanku mayqenninkuchus aswan importante kasqanmanta. Jinapis Jesusqa munakuywanpuni paykunata reparacherqa (Mar. 9:34; Luc. 22:24).

14. ¿Imayna uywasqataj Jesuspa apostolesnin karqanku?

¹⁴ Jesusqa apostolesninta yanapananpaj imayna uywasqachus kasqankuta yuyarikorqa (Juan 2:24, 25). Leymanta yachachejkunawan fariseoswanqa yachachej kanku sumaj cargosniyoj runasllata allinpaj qhawana kasqanta (Mat. 23:6, “Sinagogas: Jesuspa, discipulosninpa ima tiemponkupi imaynachus kasqankumanta” nisqa yachaqanawan kikinchariy. Chayqa kashan Torremanta Qhawaj 1 de abril de 2010, páginas 16-18). Chay runasqa wajkunamanta aswan importantes kasqankuta yuyakoj kanku (Luc. 18:9-12). f Chayrayku Jesusqa entienderqa imaraykuchus apostolesnin paykunamanta, wajkunamantapis ajinata piensasqankuta (Pro. 19:11). Payqa mana suyarqachu ni imapi pantanankuta, nitaj phiñakojchu pantajtinku. Allin sonqoyoj kasqankuta yachaspa pacienciawan yanaparqa mana jatunchakunankupaj, nitaj paykunallapaj imatapis munanankupaj, astawanqa yanaparqa kʼumuykukoj sonqo kanankupaj, munanakunankupajtaj.

15. ¿Imatá yachakunchej Santiagomantawan Juanmantawan?

¹⁵ Santiagomantawan Juanmantawanqa mayta yachakusunman. Diospa Gobiernonpi sumaj puestosta mañakusqankoqa mana allinchu karqa. Jinapis chay waj apostolesqa chay kutipi pantallarqankutaj, ujchasqa kanankupaj mana kallpachakusqankurayku. Jesustajrí tukuyninkuta kʼachamanta, munakuywantaj yanapaykorqa. ¿Imatá yachakunchej? Wajkuna pantajtinkupis aswan importanteqa mana phiñakunanchej. Chayrayku ujnin hermanonchej pantajtin phiñarikunchej chayqa, kayta tapurikuna: “¿Imajtintaj pantasqan chay jinatapuni phiñachiwan? ¿Imallapipis mejoranay faltashawanchu? ¿Ima problemachu hermanojta kapunman? Phiñakunaypaj jina kajtinpis, ¿nichu aswan allin kanman munakuywan pasachinallay?”, nispa. Wajkunata munakusunpuni chayqa, cheqa cristianos kasqanchejta rikuchisun.

16. ¿Imatawán Jesusmanta yachakusunman?

¹⁶ Jesusmanta yachakullasunmantaj hermanosninchejta entiendenapaj kallpachakuna kasqanta (Pro. 20:5). Jesusqa yacharqa imatachus runas sonqonkupi piensasqankuta, noqanchejtajrí mana yachayta atinchejchu. Jinapis hermanosninchejwan pacienciakuyta atinchej pantajtinku (Efe. 4:1, 2; 1 Ped. 3:8). Chayta ruwanapajtaj paykunata sumajta rejsinanchej tiyan. Uj experienciata qhawarina.

17. ¿Imataj karqa uj superintendente uj hermanota astawan rejsinanpaj kallpachakojtin?

¹⁷ Africapi uj superintendente, uj hermanota  rejsishaspa yuyasqa chay hermanoqa mana kʼachachu kasqanta. Jinapis, ¿chayraykuchu mana parlapayayta munanman karqa? Pay nin: “Paymanta ayqeykachanaymantaqa astawan rejsinaypaj kallpachakorqani”, nispa. Ajinamanta yacharqa chay hermanoqa imayna uywasqachus kasqanta, chayraykutaj waj jina caracterniyoj kasqanta. Pay nillanpuni: “May jinataña cambiananpaj kallpachakusqanta yachaspa, ashkhatañataj cambiasqanta yachaspa, kʼacha hermano kasqanta repararqani. Chayrayku sumaj amigosman paraporqayku”, nispa. Hermanosninchejta aswan sumajta rejsinapaj, entiendenapajtaj kallpachakusun chayqa, paykunata munakuyta atillasun.

18. ¿Imatá tapurikusunman uj hermano phiñachiwajtinchej? (Proverbios 26:20).

¹⁸ Ichapis wakin kutisqa yuyasunman phiñachiwarqanchej chay hermanowan parlarinanchej kasqanta. Jinapis niraj chayta ruwashaspa kayta tapurikuna: “Imachus pasasqanta, ¿allintapunichu yachani? (Pro. 18:13). ¿Al intentopunichu ruwanman karqa? (Ecl. 7:20). ¿Nichu noqapis kikillantataj waj kutispi ruwarqani? (Ecl. 7:21, 22). Sichus hermanowan parlasaj chayqa, ¿nichu allinchanaymantaqa astawan problemallata ruwaykusaj?”, nispa (Proverbios 26:20 leey). Chay tapuykunapi tʼukurispaqa, ichapis reparasunchej aswan allin kasqanta hermanonchejta munakunanchej, phiñachiwasqanchejtataj qonqapunanchej.

19. ¿Imata ruwanapajtaj kallpachakunallapuni tiyan?

¹⁹ Jehovaj testigosnenqa munanakusqankurayku cheqa cristianospuni kasqankuta rikuchinku. Jinapis, ¿imaynatá sapa ujninchej cheqa cristianos kasqanchejta rikuchillasunmantaj? Hermanosninchej pantajtinkupis tukuy sonqo paykunata munakuspa. Chayta rikuspataj ichapis wakenqa cuentata qokunkuman cheqa religión kasqanchejta, noqanchejwan khuskataj munakuyniyoj Diosninchej Jehovata yupaychayta munanqanku. Chayrayku kallpachakunallapuni purajmanta munanakunapaj. Chaypi yachakun cheqa cristianos kasqanchej.