1. ¿Imatataj Jehovaj kamachisnin wakin kutis yuyankuman?

 JEHOVÁ Dios ‘kamachisninmanta kusikusqanta’ yachayqa may sumajpuni (Sal. 149:4). Chaywanpis wakenqa ichapis wakin kuti desanimakunkuman, yuyankumantaj: “Yachani Jehovaqa tukuy kamachisninta allinpaj qhawasqanta, pero noqataqa nisina allinpajchu qhawawanman”, nispa. Ñaupa tiempomanta Diospa ashkha kamachisninpis wakin kutisqa ajinallatataj yuyarqanku (1 Sam. 1:6-10; Job 29:2, 4; Sal. 51:11).

2. ¿Pikunatataj Jehová allinpaj qhawan?

² Bibliaqa sutʼita niwanchej pantaj runas kajtinchejpis, Jehová Diosqa allinpaj qhawayta atiwasqanchejta. ¿Imatá chaypaj ruwananchej tiyan? Rikuchinanchej tiyan Jesucristopi creesqanchejta, bautizakunanchejtaj tiyan (Juan 3:16). Ajinapi tukuyman rikuchinchej juchasninchejmanta arrepientekusqanchejta, Diosmantaj kausayninchejta qopusqanchejta munayninta ruwanapaj (Hech. 2:38; 3:19). Jehovaqa maytapuni kusikun amigosnin kananchejpaj chay imasta ruwasqanchejmanta. Imatachus Jehovaman nisqanchejta juntʼanapaj sumajta kallpachakusun chayqa, payqa allinpaj qhawawasun, amigonta jinataj (Sal. 25:14).

3. ¿Ima tapuykunamantaj kay yachaqanapi kutichisun?

³ Chanta, ¿imajtintaj wakinkuna yuyankuman Jehová mana allinpajchu paykunata qhawasqanta? ¿Imaynasmantá Dios rikuchiwanchej allinpaj qhawawasqanchejta? ¿Imataj yanapawasunman allinpaj qhawawasqanchejmanta mana iskayrayanapaj?

¿IMAJTÍN WAKIN YUYANKU JEHOVÁ MANA ALLINPAJCHU PAYKUNATA QHAWASQANTA?

4, 5. ¿Imamantataj mana iskayrayasunmanchu pisipaj qhawakojtinchejpis?

⁴ Noqanchejmanta ashkhasqa juchʼuymantapacha pisipaj qhawakorqanchej (Sal. 88:15). Adrián sutiyoj hermano nin: “Juchʼuymantapachapuni  yuyaj kani ni imapaj valesqayta. Wawallaraj kashaspaqa Jehovamanta mañakoj kani familiay paraisopi kausakunanpaj, noqataj mana chaypaj jinachu kasqayta yuyaj kani”, nispa. Tonymantañataj parlarina. Mana testigo tatasnin imaynatachus uywasqankumanta nin: “Paykunaqa ni jaykʼaj niwajchu kanku munakuwasqankuta, nitaj niwajchu kanku ‘allinta ruwanki wawáy’ nispa. Chayrayku yuyaj kani ni imawan paykunata kusichiyta atisqayta”, nispa.

⁵ Sichus wakin kutis pisipaj qhawakuyta yachanchej chayqa, yuyarikuna Jehová llajtanman pusamuwasqanchejta (Juan 6:44). Allin imasta ruwasqanchejta noqanchej mana reparakojtinchejpis, Jehovaqa chayta reparan, yachantaj imaynachus kasqanchejta (1 Sam. 16:7; 2 Cró. 6:30). Chayrayku may valorniyojpaj qhawawasqanchejta niwanchej chayqa, mana llullakushawanchejchu (1 Juan 3:19, 20).

6. ¿Imaynataj Pabloj sonqon kasharqa juchasninpi yuyajtin?

⁶ Ichapis wakinninchejtaqa sonqonchej juchachallawanchejpuni niraj Jehovata rejsishaspa imastachus ruwasqanchejmanta (1 Ped. 4:3). Wakintaj ichapis unaytaña Jehovata tukuy sonqo sirvishanku. Jinapis sajra munayninkuwan maqanakushallankupuni. Noqanchejrí, ¿ajinallapitajchu rikukushanchej? Jina kajtenqa, maytachá sonqochawasunman Jehovaj ñaupa kamachisninpis ajinallataj sientekusqankuta yachay. Apóstol Pabloqa pantasqasninpi tʼukurispa nerqa: “¡Ay, imanallasajtaj!”, nispa (Rom. 7:24). Payqa juchasninmanta arrepientekuspañapis bautizakuspañapis, “apóstoles ukhupi aswan juchʼuypaj” qhawakullarqapuni, juchasapasmantataj pay “aswan juchasapa” kasqanta yuyarqa (1 Cor. 15:9; 1 Tim. 1:15).

7. Sichus arrepientekunchejña chay, ¿imamantataj mana iskayrayananchejchu tiyan?

⁷ Tatanchej Jehovaqa arrepientekojtinchej perdonanawanchejta niwanchej (Sal. 86:5). Paytaj nisqanta juntʼanpuni. Chayrayku tukuy sonqo arrepientekunchej chayqa, perdonawasunpuni (Col. 2:13).

8, 9. Jehovata ni imawan kusichiyta atisqanchejta yuyanchej chay, ¿imataj yanapawasunman amaña ajinata yuyanapaj?

⁸ Tukuyninchej aswan sumaj kajta Jehovaman qoyta munanchej. Chaywanpis ichapis wakenqa yuyankuman ni ima ruwasqankuwan Diosta kusichiyta atisqankuta. Amanda sutiyoj hermana nin: “Jehovaman aswan sumaj kajta qonaypajqa, paypaj astawan astawan llankʼanay kasqanta yuyayta yachani. Chayrayku ashkha kutispeqa mana atisqay imasta ruwayta munani. Chayta mana ruwayta atispataj mana allinpajchu qhawakuni, yuyanitaj Jehovapis manallataj allinpajchu qhawawasqanta”, nispa.

⁹ Jehovata ni imawan kusichiyta atisqanchejta yuyanchej chay, ¿imataj yanapawasunman amaña ajinata yuyanapaj? Yuyarikuna payqa mana sajrachu kasqanta. Yachan imatachus ruwayta atisqanchejta, ni jaykʼajtaj mañawasunmanchu mana ruwayta atisqanchejtaqa. Payman aswan sumajnin kajta qoshanchej chayqa, jatunpis juchʼuypis kachun, may valorniyojpaj qhawan. Piensarinallataj Jehovaj ñaupa tiempo kamachisninpi, paykunaqa Jehovata tukuy sonqo sirverqanku. Ujnenqa karqa Pablo. Payqa may chhika watasta karusta viajarqa, ashkha congregacionestataj rikhuricherqa. Pero chaymantaqa kausaynin cambiasqanrayku, niña ñaupajta jina predicayta aterqachu. ¿Chayrayku niñachu Jehová allinpaj qhawarqa? Mana ajinachu karqa. Pabloqa atisqanta ruwallarqapuni, Jehovataj bendecillarqapuni (Hech. 28:30, 31). Ajinallatataj noqanchejpis mana tukuy tiempochu atisun kikillantapuni Jehovapaj llankʼayta. Chaywanpis payqa mana mashkhatachus paypaj ruwasqanchejtachu qhawan, manachayqa imaraykuchus chayta ruwasqanchejta. ¿Imaynaspitaj reparanchej Jehová noqanchejmanta kusikusqanta? Chayta qhawarina.

 ¿IMAYNASMANTÁ JEHOVÁ RIKUCHIWANCHEJ ALLINPAJ QHAWAWASQANCHEJTA?

10. ¿Imatataj Jehová Palabrannejta niwanchej? (Juan 16:27).

¹⁰ Biblianejta. Jehovaqa mayta munan kamachisninman munakusqanta, allinpaj qhawasqantataj rikuchiyta. Biblia nisqanman jina, payqa iskay kutispi Jesusta nerqa munasqa Wawan kasqanta, paytataj allinpaj qhawasqanta (Mat. 3:17; 17:5). ¿Qanpis munawajchu Jehová chayllatataj nisunanta? Mana cielomantapachachu parlamuwajtinchejpis Palabrannejta parlawanchej. Imastachus Jesús discipulosninman munakuywan nisqanta leespaqa, Jehovapis kikillantataj nishawasunman jina sientenchej (Juan 16:27 leey). Jesusqa Tatan jinapuni imatapis ruwaj. Paytaj discipulosnin pantaj runas kajtinkupis, paykunata nejpuni munakusqanta. Chayta leespataj yuyarikuna Jehovapis kikillantataj noqanchejta nishawasqanchejta (Juan 15:9, 15).

11. ¿Imaraykutaj llakiykunapi rikukuspa mana yuyananchejchu tiyan Jehová niña allinpajchu qhawawasqanchejta? (Santiago 1:12).

¹¹ Ruwasqannejta. Jehovaqa ni ima faltanawanchejpaj tukuy ima necesitasqanchejta qoyta munawanchej. Chaywanpis wakin kuteqa Job jina llakiykunapi rikukunanchejta saqen (Job 1:8-11). Pruebaspi rikukuspaqa ama yuyanachu Jehová niña munakuwasqanchejta. Astawanpis pruebaspi kaspaqa, rikuchiyta atinchej Jehovata mayta munakusqanchejta, paypitaj atienekusqanchejta (Santiago 1:12 leey). Ajinamanta reparayta atisun Jehovaqa aguantanapaj yanapashawasqanchejta, munakuwasqanchejtataj.

12. ¿Imatá yachakunchej Dimitrimanta?

¹² Asiamanta Dimitri sutiyoj hermanonchejmanta parlarina. Payqa trabajonta pierderqa. Ashkha killastaña waj trabajota mana tarikuyta atisqanrayku, astawan predicananta nikorqa Jehovapi atienekusqanta rikuchinanpaj. Chaywanpis killas pasallarqapuni, nipunitaj waj trabajota tariyta aterqachu. Chaymantataj onqoykusqanrayku camallapiña kanan karqa. Chayrayku yuyarqa mana allin tatachu, mana allin qosachu kasqanta, Jehovatapis niña kusichisqanta. Imillitantaj uj chʼisi, Isaías 30:15 versiculopi imatachus nisqanta uj papelpi imprimipusqa. Chay textopitaj nin: “Kallpataqa japʼinkichej sonqo tiyasqalla kaspa, noqapitaj atienekuspa”, nispa. Chaymantataj tatanman apaspa nisqa: “Papi, llakisqa kaspa kay textota qhawarinki”, nispa. Dimitriqa reparakorqa Jehovaqa familianman mana faltachishasqanta ropata,  mikhunata, wasitapis. Pay nin: “Sonqo tiyasqalla kanay karqa, Diosniypitaj siga atienekunay karqa”, nispa. Qanpis ajinallapitaj rikukushanki chayqa, ama iskayrayaychu Jehová qanmanta llakikusqanmanta, aguantanaykipajtaj kallpata qosunanmanta.

13. ¿Imaynamantataj Jehová allinpaj qhawawasqanchejta reparachillawanchejtaj?

¹³ Hermanosnejta. Jehovaqa hermanosninchejpa sonqonkuta kuyurichinman necesitashajtinchejpuni kallpacharinawanchejpaj. Ajina karqa Asiamanta uj hermananchejwan. Payqa mana trabajoyoj rikhurerqa, manchaytataj onqoykorqa. Chaymantataj qosanqa jatun juchata ruwasqanrayku, niña ancianochu karqa. Chaytaj maytapuni hermananchejta llakicherqa, chayrayku nerqa: “Mana entiendeyta aterqanichu imaraykuchus chay imas pasashawasqanta, ‘¿Imatachu mana allinta ruwani?’ nispa yuyaj kani. Jehovataj niña allinpajchu qhawawasqanta yuyaj kani”, nispa. Hermananchejqa yachayta munarqa Jehová munakullasqantapunichus manachus. Chaypajtaj paymanta mañarikorqa, Jehovataj chay mañakusqanman kuticherqa. Pay nin: “Ancianos noqawan parlarerqanku, reparachiwarqankutaj Jehová munakullawasqantapuni”, nispa. Tiemponmantaj watejmanta Jehovamanta yanapayninta mañakorqa. Jehovataj kutichillarqataj. Pay nin: “Chay diapacha congregacionniymanta ashkha hermanos uj cartata apachimuwarqanku. Chayta leespataj repararqani Jehová uyariwasqanta”, nispa. Reparanchej jina, Jehovaqa wajkunanejta munakuyninta rikuchiwanchej (Sal. 10:17).

14. ¿Imatawán Jehová hermanosninchejnejta ruwan allinpaj qhawawasqanchejta rikuchinawanchejpaj?

¹⁴ Jehovaqa allinpaj qhawawasqanchejta rikuchillawanchejtaj hermanoswan yuyaycharichiwajtinchej. Ñaupa cristianospa tiemponkupi, Diosqa apóstol Pablowan 14 cartasta cristianosman qhelqacherqa. Chaykunapitaj sutʼita,  pero munakuywan paykunaman yuyaycharerqa. ¿Imaraykutaj Jehová chay yuyaychaykunata qorqa? May kʼacha, munakuyniyojtaj kasqanrayku. Chantapis “imaynatachus uj tata munasqa wawanta kʼamin ajinata” Jehovapis cheqanchawanchej (Pro. 3:11, 12). Chayrayku pillapis Bibliawan yuyaychariwanchej chayqa, ama yuyanachu Diosninchej niña allinpajchu qhawawasqanchejta. Astawanpis chayqa reparachiwanchej pay munakullawasqanchejtapuni (Heb. 12:6). ¿Imastaj reparachillawanchejtaj Jehová allinpaj qhawawasqanchejta?

¿IMAYNASMANTÁ JEHOVÁ RIKUCHILLAWANCHEJTAJ ALLINPAJ QHAWAWASQANCHEJTA?

15. ¿Pikunamantaj Jehová espíritu santonta qon, chanta imamantataj mana iskayrayasunmanchu?

¹⁵ Jehovaqa espíritu santonta qon pikunatachá allinpaj qhawan chaykunaman (Mat. 12:18). Kayta tapurikusunman: “¿Espíritu santoj poqoyninmanta kʼacha kaykunata rikuchinichu?”, nispa. Ñaupajmanta nisqa, ¿aswan pacienciayojchu kanchej? Espíritu santoj poqoyninmanta kʼacha kaykunata kausayninchejpi rikuchishanchej chayqa, Jehovaqa allinpajpuni qhawawasun (“ Kaykuna kanku espiritoj poqoynin” nisqa recuadrota qhawariy).

16. 1 Tesalonicenses 2:4 nisqanman jina, ¿pikunawantaj Jehová sumaj willaykunata willachin, chayta yachaspa imayná sientekunki?

¹⁶ Jehovaqa pikunatachá allinpaj qhawan chaykunawan sumaj willaykunata willachin (1 Tesalonicenses 2:4 leey). Jocelyn sutiyoj hermana ajina kasqanta repararqa. Uj día payqa may llakisqapuni rijchʼarikorqa. Pay nin: “Ni imata ruwanaypaj kallpay karqachu. Chaywanpis precursora jina sirvishasqayrayku chay diaqa predicanay karqa. Chayrayku Jehovamanta mañarikuytawan predicaj rerqani”, nispa. Chay paqarin Jocelynqa Mary sutiyoj uj kʼacha señorawan parlarerqa, paytaj Bibliata estudiayta munarqa. Uj mashkha killasninmantaj, chay señoraqa Jocelynman nisqa paywan parlarerqa chay paqarenqa, Diosmanta yanapata mañakushasqanta. ¿Imatá chaypi Jocelyn repararqa? Pay nin: “Jehovapis ‘munakuyki wawáy’ nispa nishawanman jina karqa”, nispa. Yachanchej jina, predicajtinchej mana tukuy runaspunichu uyariwanchej. Chaywanpis sutʼita nisunman Jehovaqa mayta kusikusqanta sumaj willaykunata wajkunaman willarinapaj tukuy atisqanchejta kallpachakojtinchej.

17. ¿Imatá yachakunchej imatachus Vicky nisqanmanta? (Salmo 5:12).

¹⁷ Jehovaqa Wawanta kachamorqa maychus  necesitakusqan preciota pagananpaj, nintaj chayqa pikunatachus allinpaj qhawan chaykunallata yanapananta (1 Tim. 2:5, 6). Noqanchejtaj kacharichiypi creespapis bautizasqaña kaspapis, ichapis yuyasunmanraj Jehovaqa mana allinpajchu qhawawasqanchejta. Jina kajtin, ¿imatá ruwasunman? Yuyarikuna mana sonqonchejpipunichu atienekunanchej kasqanta, manachayqa Jehovapipuni. Payqa pikunachus kacharichiypi creenku chaykunata cheqan runaspaj qhawan, bendecinantataj nin (Salmo 5:12 leey; Rom. 3:26). Vicky sutiyoj hermananchejtaqa maytapuni yanaparqa kacharichiypi tʼukurisqan. Payqa mana creeyta atillajchu Jehová payta munakusqanta. Chaywanpis nerqa: “Jehovaqa may chhika unaytaña noqawan pacienciakorqa. Chaywanpis Jehovaman kaytapis nishayman jina karqa: ‘Noqaqa mana munakunawaykipaj jinachu kani. Wawaykej wañuynenqa mana juchasniyta pʼampanmanchu’, nispa”. Noqanchejpis Vicky jinallataj Jehová kacharichiwasqanchejpi tʼukurisun chayqa, reparallasuntaj Jehová munakuwasqanchejta, nitaj iskayrayasunchu allinpaj qhawawasqanchejmanta.

18. Tatanchej Jehovata munakullasunpuni chay, ¿imamantataj mana iskayrayasunmanchu?

¹⁸ Kay yachaqanapi yachakusqanchejman jina ruwanapaj kallpachakojtinchejpis, ichapis wakin kuteqa uj chhikata desanimakusunmanraj, iskayrayasunmantaj Jehová allinpaj qhawawasqanchejmanta. Ajina pasawasunman chayqa, yuyarikuna Diosninchejqa “pikunachus payta munakullankupuni” chaykunata allinpaj qhawasqanta (Sant. 1:12). Chayrayku Jehovaman qayllaykunallapuni, reparanataj imaynasmantachus Jehová allinpaj qhawawasqanchejta rikuchiwasqanchejta. Amapunitaj qonqakunachu payqa “mana karupichu” kashasqanta “sapa ujninchejmanta” (Hech. 17:27).