1, 2. ¿Imaraykutaj pipis bautizakojtin kausaynin aswan sumaj?

 PILLAPIS bautizakun chayqa Jehovaj familianman yaykumun, chaytaj may kusiypuni. Jehovaj familianmanta kajkunaqa salmista David jinachá ninkuman: “Kusisqamin runaqa patiosniykipi tiyakunanpaj qan ajllajtiyki, qanmantaj qayllaykojta saqejtiyki”, nispa (Sal. 65:4).

² Jehovaqa mana pitapis patiosninman yaykuchimullanchu. Ñaupaj yachaqanapi yachakorqanchej jina, payqa amigosnin kayta munasqankuta rikuchejkunallaman qayllaykun (Sant. 4:8). Pillapis kausayninta Jehovaman qopun, bautizakuntaj chayqa, sumaj amigonman tukun. Paykunamantaj Jehová nin: “Bendicionestataj tʼakaykamusqaykichej ni ima pisisunaykichejkama”, nispa (Mal. 3:10; Jer. 17:7, 8).

3. Jehovaman kausayninchejta qopunchejña, bautizakunchejñataj chay, ¿imatataj ruwananchej tiyan? (Eclesiastés 5:4, 5).

³ Bautizakoyqa qallariyllaraj. Pikunachus Jehovaman kausayninchejta qopunchejña, bautizakunchejñataj chaykunaqa, chayman jina kausakuyta munanchej juchaman tanqasqa kajtinchejpis, chayri creeyninchej pruebaman churasqa kajtinpis (Eclesiastés 5:4, 5 leey). Chantapis Jesús jina ruwananchej tiyan, kamachiykunasnintataj kasukunanchej tiyan (Mat. 28:19, 20; 1 Ped. 2:21). Kay yachaqanataj chayta ruwanapaj yanapawasun.

PROBLEMAS KAJTIN CHAYRI JUCHAMAN TANQASQA KAJTINCHEJ

4. ¿Imaraykutaj Jesuspa discipulosnin ‘ñakʼarina kʼaspi aparisqa’ qhepanta rinanchej tiyan? (Lucas 9:23).

⁴ Ama yuyaychu bautizakusqaykitawan tukuy imapis aswan fácil kananta. Jesusllataj nerqa sapa uj discipulon ‘ñakʼarina kʼaspin aparisqa sapa día’ qhepanta rinanta (Lucas 9:23 leey). ¿Chaywan Jesús nisharqachu discipulosnin sufrispalla kanankuta?  Mana. Chaywanqa nisharqa mana bendicionesllatachu japʼinankuta, manaqa llakiykunapipis rikukunallankutataj. Chaykunamanta wakintaj mayta sufrinankupaj jina kanan karqa (2 Tim. 3:12).

5. ¿Ima bendicionestataj Jesús japʼinanchejta nerqa Diospa Gobiernonta ñaupajman churajtinchej?

⁵ Ichapis qanmanqa familiayki churanakusorqaña, chayri Diospa Gobiernonta ñaupajman churanaykirayku pisi imasllawanña kausakuyta ajllarqanki (Mat. 6:33). Ajina kajtenqa Jehová yachan imastachus payrayku ruwasqaykita (Heb. 6:10). Ichapis sutʼita repararqanki Jesuspa nisqan cheqapuni kasqanta. Pay nerqa: “Cheqatapuni niykichej: Pichus noqarayku jinallataj sumaj willaykunarayku wasinta, hermanosninta, hermanasninta, mamanta, tatanta, wawasninta, jallpʼasnintapis saqen chayqa, kay tiempopi pachaj jinastawanraj japʼenqa: wasista, hermanosta, hermanasta, mamasta, wawasta, jallpʼastawan qhatiykachasqa kaspapis. Jamoj tiempopitaj wiñay kausayta japʼenqa”, nispa (Mar. 10:29, 30). Imastachus Jehovarayku saqesqaykeqa nichá kikinchakunmanchu ima bendicionestachus japʼisqaykiwan (Sal. 37:4).

6. ¿Imaraykutaj bautizakuytawan ‘aychaj sajra munayninwan’ maqanakunallanchejpuni tiyan?

⁶ Bautizakuytawanqa siga kallpachakunayki tiyan ‘aychaj sajra munayninwan’ maqanakunaykipaj (1 Juan 2:16). Chaytaqa ruwanallaykipuni kanqa pantaj runa kasqaykirayku. Ichapis wakin kuteqa apóstol Pablo jina sientekunki. Pay nerqa: “Noqaqa Diospa leyninwan mayta miskʼichikuni, imayna runachus sonqoypi kasqayman jina. Chaywanpis cuerpoypi waj ley kasqanta reparani. Chaytaj yuyayniypi kaj leywan maqanakun, juchaj leyninmantaj presota jina pusawan, mayqenchus cuerpoypi kashan chayman”, nispa (Rom. 7:22, 23). Ichapis wakin kutisqa desanimakunki sajra munayniykiwan maqanakunayki kasqanrayku. Chaywanpis kausayniykita Jehovaman qopushaspa imatachus nisqaykipi tʼukuriy, chaypi kallpata japʼinki juchaman mana urmanaykipaj. Jehovaman imatachus nisqaykeqa juchaman tanqasqa kajtiyki maytapuni yanapasonqa. ¿Imaraykú chayta ninchej?

7. Jehovaman kausayninchejta qopusqanchejrayku, ¿imatá ruwayta munasun?

⁷ Pillapis Jehovaman kausayninta qopun chayqa, pay kikinta qhesachakun. Nisunman sajra munayninta mana ruwananta nin, imastachus ruwayta munasqantapis mana ruwananta nin chay imas Jehovata mana kusichisqanrayku (Mat. 16:24). Chayrayku uj pruebapi kashajtinchej, mana piensananchejrajchu tiyan imatachus ruwananchejpi. Yachasunña Jehovatapuni tukuy sonqo kasukunanchej kasqanta. Jehovaman kausayninchejta qopuspaqa nerqanchejña waj imastaqa mana ruwananchejta. Chayrayku Jehovallatapuni kusichiyta munasun. Job jina kasun, payqa sinchʼi llakiykunapi rikukuspapis nerqa: “Nillasajpuni mana juchayoj kasqayta”, nispa (Job 27:5).

8. Kausayninchejta Jehovaman qopusqanchejpi tʼukuriy, ¿imaynatá yanapawanchej juchaman mana urmanapaj?

⁸ Piensarinanchej tiyan Jehovaj munayninta ruwanata nisqanchejpi. Chay kallpata qowasun ima juchamanpis mana urmanapaj. Jina kajtin, ¿coqueteasunchu pichus casarasqa kajwan? Ni imarayku. Jehovaman kausayninchejta qopushaspaqa nerqanchejña mana chayta ruwananchejta. Ama saqenachu sonqonchejpi sajra munaykuna saphichakunanta. Ajinamanta mana kallpachakushananchejchu kanqa sonqonchejmanta chayta orqhonapaj. Ni imarayku “sajra runaspa ñanninta” japʼirinachu (Pro. 4:14, 15).

9. Kausayninchejta Jehovaman qopusqanchejpi tʼukuriy, ¿imaynatá yanapawanchej payta ñaupajman churanapaj?

⁹ Ichapis uj trabajo noqanchejpaj rikhurinman, chaytaj mana tukuy reunionesman rejta  saqewasunmanchu. Chay kutispi, ¿imatá ruwasun? Yachanchejña imatachus ruwananchejta. Niraj chay trabajo rikhurishajtin, nerqanchejña ajina trabajostaqa mana japʼikunanchejta. Chayrayku mana chay trabajota japʼikullasunchu. Ajinamanta mana piensashananchejrajchu kanqa imatachus ruwananchejpi Jehovata ñaupajman churanallapajpuni. Jesuspa kausaynin mayta yanapawasunman, payqa Tatanta kusichiytapuni munarqa. Noqanchejpis Jehovaman kausayninchejta qopusqanchejrayku, imaschá payta mana kusichinchu chay imasta chay rato qhesachasun, ni tumpitata piensarispa (Mat. 4:10; Juan 8:29).

10. Bautizakusqanchejtawan, ¿imaynatá Jehová yanapawasun Jesuspa qhepallantapuni rinanchejpaj?

¹⁰ Problemaspi kaspapis chayri juchaman tanqasqa kaspapis, rikuchiyta atinchej Jesuspa qhepallantapuni riyta munasqanchejta. Jehovataj chayta ruwanapaj yanapawasun. Payqa Bibliapi niwanchej: “Diostajrí nisqasninta juntʼanpuni. Payqa mana saqenqachu mana aguantay atinata juchaman tanqasqa kanaykichejtaqa. Astawanqa juchaman tanqasqa kashajtiykichej, Diosllataj yanapasonqachej aguantanaykichejpaj”, nispa (1 Cor. 10:13).

¿IMATÁ RUWASUNMAN JESUSPA QHEPALLANTAPUNI RINAPAJ?

11. ¿Imatá ruwasunman Jesuspa qhepallantapuni rinapaj? (Fotostawan qhawariy).

¹¹ Jesusqa Jehovata tukuy sonqo sirverqa, paymanta mañakusqanraykutaj qayllallanpipuni karqa (Luc. 6:12). ¿Imatá ruwasunman bautizakuytawan Jesuspa qhepanta rinallapajpuni? Imaschus Jehovaman astawan qayllaykuchiwanchej chayta ruwayman yachaykukunanchej tiyan, mana saqespataj chayta ruwananchej tiyan. Biblia nin: “Maykamachus  ñauparerqanchej, chayman jinallapuni maychus kajta purinachej”, nispa (Fili. 3:16). Wakin hermanosninchejqa Jehovapaj astawan llankʼayta qallarinku. Ichapis wakenqa rinku Diospa Gobiernonmanta Willajkunapaj Escuelaman, chayri maypichus astawan willajkuna necesitakun chayman ripunku. ¿Qanpis ajinata ruwayta atiwajchu? Jina kajtenqa ruwayta qallariypacha. Jehovaj kamachisnenqa imaynallamantapis paypaj astawan llankʼayta munanchej (Hech. 16:9). Pero ichapis manaraj chayta ruwayta atinkichu. Jina kajtenqa ama yuyaychu chayta ruwayta atejkunamanta nisqa aswan pisi valorniyoj kasqaykita. Aswan sumajqa tukukuykama sinchʼita sayay kashan (Mat. 10:22). Kayta amapuni qonqakuychu: Sichus atisqaykiman jina, imatachus ruwayta yachasqaykiman jinataj, Jehovaman aswan sumaj kajta qonki chayqa, payqa mayta kusikonqa. Ajinamanta bautizakuytawan Jesuspa qhepanta rillankipuni (Sal. 26:1).

12, 13. ¿Imatá ruwawaj Jehovata sirviypi kusiyniyki pisiyashan chay? (1 Corintios 9:16, 17; “ Ama saykʼuspa correllaypuni” nisqa recuadrota qhawariy).

¹² Ichapis reparakunki kikillantapuni orakushasqaykita, predicaspapis Bibliata leespapis niña ñaupajta jinachu kusisqa kasqaykita, manaqa ruwanaykiraykullaña chaykunata ruwashasqaykita. Bautizakusqaykitawan chay pasasunki chayqa, ama yuyaychu Jehová espíritu santonta niña qoshasusqanta. Pantaj runas kasqanchejrayku, wakin kutisqa chay pasawasunmanpuni. Kusikuyniyki pisiyashan chayqa, apóstol Pablopi tʼukuriy. Payqa Jesús jina ruwananpaj mayta kallpachakorqa. Chaywanpis yacharqa wakin kutisqa allin kajta ruwananpaj sonqon mana aysanallanta (1 Corintios 9:16, 17 leey). Pablo nerqa: “Mana ruwayta munajtiypis, chaytaqa ruwanaypuni tiyan. Imaraykuchus chaypaj kamachisqa  kani”, nispa. Payqa wakin kutis mana allinchu sientekuspapis, imatachus Jehovapaj ruwananta nisqanta juntʼaytapuni munarqa.

¹³ Qanpis amapuni sonqoyki imaynachus kashasqanman jinallachu imatapis ruway. Sonqoyki chayta ruwanaykipaj mana aysasojtinpis allin kajtapuni ruway. Ajinamanta tiempowan sonqoykipis chayta ruwayman aysallasonqataj. Imaschus Jehovaman qayllaykuchisunki chay imasta ruwanaykipaj uj sumaj programata ruwakuy. Ajinamanta bautizakuytawan Jesuspa qhepanta rillankipuni. Chayta ruwajtiykeqa congregacionmanta hermanospis kallpachasqa kanqanku (1 Tes. 5:11).

“ALLINTA QHAWARIKULLAYCHEJPUNI”

14. ¿Imatataj sapa kuti qhawarikunanchej tiyan, chanta imaraykutaj? (2 Corintios 13:5).

¹⁴ Bautizakuytawan allin kanman sapa kuti kausayniykita qhawarikunayki, imasta ruwaymanchus yachasqa kasqaykitapis (2 Corintios 13:5 leey). ¿Sapa diachu orakushanki? ¿Sapa diachu Bibliata leeshanki, estudiashanki ima? Tantakuykunaman, predicacionmanpis, ¿nichu faltakushanki? Chay imasta ruwaspa astawan kusiyta tarinaykipaj, astawan yanapachikunaykipajpis kallpachakuy. Kaykunata tapurikuwaj: “Bibliaj qallariy yachachiykunasninta, ¿sumajtachu sutʼinchayta atini? Predicaspa astawan kusiyta tarinaypaj, ¿imatá ruwayman? ¿Oracionesniypi sutʼitachu Jehovaman nini imatachus munasqayta? ¿Orakusqay sutʼitachu rikuchin Jehovapi tukuy sonqo atienekusqayta? ¿Kallpachakunichu ni uj reunionmanpis faltakunaypaj? ¿Imatá ruwayman reunionespi aswan sumajta uyarinaypaj, aswan sumajtataj comentanaypaj?”.

15, 16. ¿Imatá yachakunki Robertmanta?

¹⁵ Imaspichus pantanaykipaj jina kasqaykitapis sumajta qhawarikunallaykitaj tiyan. Chayta ruwanapuni kasqanta reparanchej hermanonchej Robertpa kausayninpi. Pay nin: “20 watasniyoj jina kashaspa khuskan tiempollata trabajaj kani. Uj día, compañeray trabajomanta llojsiytawan wasinman rinaykuta niwarqa. ‘Sapallanchej kasunchej’ nispa pusayta munawarqa. Qallariypeqa mana pʼenqaypi quedanayraykulla wakin imasta nerqani mana rinaypaj. Chaymantaraj sutʼita nerqani ‘mana’ nispa, sutʼincharqanitaj imaraykuchus mana munasqayta”, nispa. Robertqa mana chay compañeranta kasorqachu, chaytaj may sumajpuni. Chaywanpis imatachus ruwasqanpi piensariytawan, reparakorqa aswan sumajta ruwayta atisqanta. Pay nin: “Mana José jinachu chay rato ‘mana’ nerqani. Payqa Potifarpa  warminta chay rato ‘mana’ nerqa (Gén. 39:7-9). Nipuni yuyarqanichu ‘mana’ ninaypaj anchataraj piensanay kasqanta. Chayqa reparachiwarqa Jehovaman qayllaykunaypaj astawanraj kallpachakunay kasqanta”, nispa.

¹⁶ Ichá qanpis juchaman tanqasqa kaspa mana urmarqankichu. Jinapis Robert jina kaypi piensariwaj: “¿Chay ratochu ‘mana’ niyta aterqani?”. Imapipis astawan kallpachakunayki kasqanta reparakunki chayqa, ama desanimakuychu. Astawanpis kusikuy imaspichus pantanaykipaj jina kasqaykita reparakusqaykimanta. Jehovaman chayta willariy, kallpachakuytaj payta tukuy sonqo kasukunallaykipajpuni (Sal. 139:23, 24).

17. ¿Imaynatataj Robertpa ruwasqan Jehovaj sutinta mana chʼichicharqachu?

¹⁷ Robertmantaqa waj imatawan yachakusunman. Pay nillantaj: “Compañerayqa mana kasusqaytawan niwarqa: ‘Pruebata pasanki’, nispa. Tapurerqani imaraykuchus chayta niwasqanta. Paytaj niwarqa imatachus ujnin amigon nisqanta, pichus aswan ñaupajta testigo kasqa. Chay amigonqa nisqa tukuy joven testigos puraj uyas kasqankuta, ima juchamanpis urmanankupaj jina kajtintaj, mana piensarispa chayta ruwallasqankuta. Chayrayku compañerayqa chay amigonta nisqa noqata urmachinawanta. Mayta kusikuni Jehovaj sutinta mana chʼichichasqaymanta”.

18. ¿Imatá ruwayta munanki bautizakuytawan? (“ Iskay sumaj yachaqanas” nisqa recuadrota qhawariy).

¹⁸ Jehovaman kausayniykita qopuspa, bautizakuspapis rikuchinki ima kajtinpis paypa sutinta jatunchayta munasqaykita. Jehovaqa yachan ima problemaspichus rikukushasqaykita, ima juchamanchus tanqasqa kasqaykitapis. Payqa qhawamushan tukuy sonqo kasukunaykipaj kallpachakushasqaykita, bendecisonqataj. Amapuni kaymanta iskayrayaychu: Jehovaqa allin kajta ruwanaykipaj espíritu santonwan kallpachasonqa (Luc. 11:11-13). Jehovaj yanapanwanqa bautizakuytawan Jesuspa qhepanta riyta atillankipuni.