1. Jehovaj llajtanpi kasqanchejrayku, ¿ima bendicionestataj japʼinchej?

 JEHOVAJ llajtanpi kayqa may sumajpuni. Kay qhepa pʼunchaykunapi kausay mayta sajrayajtinpis, Jehová yanapawasqanchejrayku hermanosninchejwan ujchasqa familia jina kanchej (Sal. 133:1). Payqa yanapallawanchejtaj familianchejpipis kusisqa kanapaj (Efe. 5:33–6:1). Chantapis yachayta qowanchej mana llakiywan atipachikunapaj, kusisqallapunitaj kanapaj.

2. ¿Imatá ruwananchej tiyan, chanta imaraykutaj?

² Wakin kutisqa Jehovata yupaychanallapajpuni mayta kallpachakunanchej tiyan. ¿Imarayku? Kay imasrayku: Imatachus wajkuna ruwasqanku, nisqankupis sonqonchejta nanachiwasunman. Chantapis pantajtinchej desanimakusunman, astawanraj kutin kutita kikillantapuni pantajtinchej. Kay yachaqanaqa yanapawasunchej Jehovata sirvinallapajpuni kay imas kajtin: 1) uj hermano sonqonchejta nanachiwajtinchej, 2) qhariwarmi jina mana allintachu kausakojtinchej, 3) pantasqasninchejrayku desanimakojtinchej. Chay kinsantin imaspi yachakusunchej Diospa ñaupa kamachisninmanta.

UJ HERMANO SONQONCHEJTA NANACHIWAJTINCHEJ

3. ¿Imataj wakin kutis pasanman?

³ ¿Imataj pasanman? Wakin kuteqa wakin hermanosninchej phiñachinawanchejpaj jina imatapis ruwankuman. Wakintaj ichapis mana yuyasqanchejman jinachu ruwankuman, chayri sonqonchejta nanachiwasunman. Ancianospis wakin kutisqa pantallankumantaj. Tukuy chay imasrayku wakenqa iskayrayankuman Diospa llajtanpipunichus manachus kashasqankumanta. Chayraykutaj niña hermanoswan ‘khuska’ Jehovata sirviyta munankumanchu. Wakin kutisqa ichapis niña parlankumanchu pikunachus paykunata phiñacherqa chaykunawan,  reunionesmanpis niña riyta munankumanchu (Sof. 3:9). Chayta ruway, ¿allinchu kanman? Qhawarina imatachus Pablomanta yachakusqanchejta, paypis ajinallapitaj rikukorqa.

4. ¿Ima problemaspitaj Pablo rikukorqa?

⁴ Diospa ñaupa kamachin. Apóstol Pabloqa yacharqa hermanosnin pantaj runas kasqankuta. Jerusalén congregacionman riyta qallarejtin, ashkhasqa mana allin ñawiwanchu payta qhawarqanku, manchachikorqankutaj (Hech. 9:26). Aswan qhepamantaj wakinkunaqa sajrata wasanmanta parlarqanku (2 Cor. 10:10). Uj kutitaj rikorqa uj wiñay tukusqa hermano mana allintachu ruwasqanta, chaytaj waj cristianostapis urmachinman karqa (Gál. 2:11, 12). Marcospis mana yuyasqanman jinachu ruwarqa, payqa allin compañeron karqapis (Hech. 15:37, 38). Chayrayku Pabloqa ichapis yuyanman karqa pikunachus phiñacherqanku chaykunamanta karunchakunan kasqanta. Chaywanpis paykunapi allin kajta maskʼallarqapuni, Jehovamantataj mana karunchakorqachu, astawanpis tukuy sonqo sirvillarqapuni. ¿Imataj yanaparqa chayta ruwananpaj?

5. ¿Imataj Pablota yanaparqa mana hermanosninmanta karunchakunanpaj? (Colosenses 3:13, 14; dibujotawan qhawariy).

⁵ Pabloqa hermanosninta mayta munakoj, chayrayku mana pantasqasnillankutachu qhawarqa, astawanpis kʼacha kaykunasninkuta qhawarqa. Ajinata munakusqanrayku perdonayta atillarqa, imaynatachus Colosenses 3:13, 14 (leey) nisqanman jina. Por ejemplo Marcoswanqa allinyakaporqa. Ñaupaj kutipi misionero jina viajashajtin Marcosqa payta saqerparerqa, Pablotaj mana Marcoswan chayrayku phiñasqallapunichu karqa. Aswan qhepamantaj uj kʼachitu cartata colosenses congregacionman apacherqa. Chaypitaj nerqa Marcos may valorniyoj kasqanta, ‘maytataj sonqochasqanta’ (Col. 4:10, 11). Chantapis Romapi presochasqa kashajtin Marcosta nerqa yanapananpaj rinanta (2 Tim. 4:11). Sutʼita reparanchej Pabloqa hermanosninta perdonasqanta, nitaj paykunamanta karunchakusqanta. ¿Imatá Pablomanta yachakunchej?

6, 7. ¿Imataj yanapawasunman hermanosninchejman munakuyninchejta rikuchinallapajpuni pantajtinkupis? (1 Juan 4:7).

⁶ ¿Imatá yachakunchej? Jehovaqa hermanosninchejta, hermanasninchejtapis munakunallanchejtapuni munan (1 Juan 4:7 leey). Congregacionninchejmanta pi hermanollapis imata ruwawanchej chayqa, ama yuyanachu chayta sajra sonqowan ruwawasqanchejta, astawanpis yuyana allin kajta ruwananpaj kallpachakushasqanta (Pro. 12:18). Pantaj runas kajtinchejpis Jehovaqa mayta  munakuwanchej. Payqa pantajtinchej mana saqerpariwanchejchu, nitaj phiñasqallapunichu qhepakun (Sal. 103:9). Ajinata perdonawasqanchejmanta maytapuni agradecekunchej Tatanchej Jehovaman. Chayrayku noqanchejpis hermanosninchejta perdonananchejpuni tiyan (Efe. 4:32–5:1).

⁷ Chantapis kayta mana qonqananchejchu tiyan: Kay mundoj tukukuynin qayllitapiña kasqanrayku, hermanosninchejwan sumaj ujchasqallapuni kananchej kasqanta. Ichapis aswan qhatiykachasqasraj kasun, ichá carcelmanpis chayasun. Chay kutispitaj hermanosninchejta ni jaykʼaj jina astawan necesitasun (Pro. 17:17). Ajinapi rikukorqa Españamanta hermanonchej Josep, payqa anciano. a Paytaqa cuartelman mana riyta munasqanrayku carcelman wisqʼaykorqanku waj hermanostawan khuska. Pay nin: “Tukuyniyku ujllapi kasqaykurayku imapis phiñanakunaykupaj jina kajpuni, chayrayku purajmanta aguantanakunayku karqa, mana michʼakuspataj perdonanakunayku karqa. Chaytaj ujchasqallapuni kanaykupaj yanapawarqayku, mana testigochu kaj presosmanta jarkʼakunaykupajpis. Uj kuteqa makiyta imanarpakorqani, vendasqa kasqanraykutaj mana kuyuchiyta atejchu kani. Sapaymanta ni imata ruwayta atisqayrayku uj hermano ropayta tʼajsapuwaj, waj jinasmantapis yanapariwaj. Hermanosqa mayta necesitashajtiypuni tukuy sonqo munakuyninkuta rikuchiwarqanku”, nispa. Reparanchej jina, mayqen hermanowanpis phiñanakunchej chayqa, kunan allinyakunanchej tiyan.

QHARIWARMI JINA MANA ALLINTACHU KAUSAKOJTINCHEJ

8. ¿Ima problemaspitaj casados rikukunku?

⁸ ¿Imataj pasanman? Bibliapi sutʼita nin jina, tukuy casarakojkunaqa kausayninkupi “llakiykunasniyoj kanqanku” (1 Cor. 7:28). ¿Imarayku? Iskayninku pantaj runas kasqankurayku. Chantapis mana kikin caracterniyojchu kanku, nitaj kikin gustosniyojchu kanku. Ichapis mana kikin lugarmantachu kanku, nitaj kikintachu uywakorqanku. Ichapis noviashajtinku wakin imitasta mana repararqankuchu, tiemponmanraj chayta repararqanku. Chay imasrayku qhariwarmi kausaypi phiñanakunkuman. Ichapis mana reparakuyta munankumanchu iskayninku pantashasqankuta, nitaj khuskachu problemasninkuta allinchankuman, astawanqa paykunapura tumpanakunkuman. Chayri ichapis yuyankuman separakuspalla, divorciakuspalla chayta allinchanankuta. Jinapis chayta ruway, ¿allinchu kanman? b Ñaupa tiempomanta Abigailqa qhariwarmi kausayninpi ajina problemasniyoj karqa. Qhawarina imatachus ruwasqanta.

9. ¿Imapitaj Abigaíl rikukorqa?

⁹ Diospa ñaupa kamachin. Abigailpa qosanqa Nabal karqa. Bibliataj nin payqa millay sajra runa kasqanta, imatapis ruwarparillasqantataj (1 Sam. 25:3). Chay jina runawanqa nichá atikullarqachu kausakuy. Uj kuti Abigailqa qosanmanta librakuyta atinman karqa. Chay kutipi Davidqa Nabalta wañuchiyta munarqa payta, soldadosnintawan insultasqanrayku. Davidqa Israelmanta rey kanan karqa (1 Sam. 25:9-13). Abigailqa ayqekuyta atinman karqa, saqellanmantaj karqa David chayta ruwananta. Jinapis mana chaytachu ruwarqa. Astawanpis Davidmanta mañakorqa Nabalta perdonananta (1 Sam. 25:23-27). ¿Imaraykú chayta ruwarqa?

10. ¿Imataj Abigailta yanaparqa qhariwarmi kausayninpi problemas kajtinpis?

 ¹⁰ Abigailqa Jehovata mayta munakorqa. Chayrayku qhariwarmi kausayta Jehová jinallataj jatunpaj qhawarqa. Yacharqachá imatachus Jehová nisqanta Adantawan Evatawan casarachishajtin (Gén. 2:24). Abigailqa sutʼita yacharqa Diosqa qhariwarmi kausayta may jatunpaj qhawasqanta. Diosta kusichiyta munasqanraykutaj qosanta salvayta munarqa, tukuy wasinpi kajkunatapis. Payqa qosanta mana wañuchinankupaj usqhayllata Davidwan parlamoj rerqa, perdontataj mañakorqa, mana paychu chay juchata ruwajtinpis. Abigailqa mana manchachikoj warmi karqa, wajkunaraykutaj tukuy imata ruwarqa. Chayrayku maytachá Jehová payta munakorqa. Casarasqa kajkuna, ¿imatá Abigailmanta yachakuwajchej?

11. 1) ¿Imatá Jehová munan casados ruwanankuta? (Efesios 5:33). 2) ¿Imatá yachakunki Carmenpa kausayninmanta? (Dibujotawan qhawariy).

¹¹ ¿Imatá yachakunchej? Jehová munan pichus casarasqa kajkunaqa qhariwarmi kausayta jatunpaj qhawanankuta, qosankupata chayri warminkupata caracterninku mana allinchu kajtinpis. Diosqa maytachá kusikun casarasqa kajkuna problemasninkuta allinchanankupaj mayta kallpachakojtinku, may munakuywan, respetowantaj parlarikojtinku (Efesios 5:33 leey). Carmenmanta parlarina. 6 watastaña casarasqa kashajtin, Bibliata estudiayta qallarerqa Jehovaj testigosninwan, bautizakorqataj. Pay nin: “Qosaymanqa chay mana gustarqachu. Phiñakorqa Jehovata sirviyta munasqaymanta, chayrayku insultawaj, saqerparinawantataj niwaj”, nispa. Jinapis Carmenqa mana saykʼorqachu. 50 watastapuni tukuy atisqanta ruwarqa qosanta munakunanpaj, respetananpajpis. Pay nillantaj: “Watas pasasqanman jina qosayta astawan entiendeyta aterqani, munakuywan parlapayaytapis. Yacharqani Jehovaqa casado kausayta may jatunpaj qhawasqanta. Chayrayku tukuy atisqayta ruwarqani qosaymanta mana separakunaypaj. Jehovata munakusqayrayku mana saykʼorqanichu”, nispa. c Qhariwarmi kausayniykipi problemas kajtenqa Jehová yanapallasonqapuni mana saykʼunaykipaj.

PANTASQASNINCHEJRAYKU DESANIMAKOJTINCHEJ

12. ¿Imaynataj kasunman jatun juchapi urmaspa?

¹² ¿Imataj pasanman? Ichapis mayta desanimakusunman uj jatun juchapi urmaspa. Bibliaqa nin juchasninchejrayku ‘sonqo  pʼakisqa, sonqo nanasqa’ kayta atisqanchejta (Sal. 51:17). Ajina pasarqa hermanonchej Robertwan. Payqa watasta kallpachakorqa siervo ministerial kananpaj. Uj jatun juchapi urmaytawantaj reparakorqa Jehovata wasanchasqanta. Pay nin: “Sonqoy maytapuni juchachawarqa, may chhika ladrillospis patayman urmaykamuwanman jina karqa. Wijsaypuni qʼewiwarqa, mayta waqarqani, Jehovamantataj mañakorqani. Yuyarqani niña Dios ujtawan uyarinawanta chay jinata llakichisqayrayku”, nispa. Uj jatun juchapi urmanchej chayqa, sonqo pʼakisqa kasqanchejrayku ichapis yuyasunman Jehová saqerpariwasqanchejta, payta sirviytaj qhasillaña kasqanta (Sal. 38:4). ¿Maykʼajllapis ajinata sientekorqankichu? Jina kajtin apóstol Pedroj kausaynin yanapasonqa. Payqa jatun juchapi urmaspapis mana Jehovamanta karunchakorqachu.

13. ¿Ima jatun juchapitaj Pedro urmarqa, chanta imaraykutaj?

¹³ Diospa ñaupa kamachin. Jesusta wañuchinanku ñaupaj chʼisin, apóstol Pedroqa ashkha imaspi pantarqa, chayraykutaj jatun juchapi urmarqa. Ñaupajta pay nerqa imapis kajtin Jesuspa ladollanpipuni kananta, nitaj chay ujnin apóstoles jinachu saqerparinanta (Mar. 14:27-29). Chantá Getsemaní huertapi kutin kutita puñurparerqa (Mar. 14:32, 37-41). Jesusta japʼishajtinkutaj saqerparerqa (Mar. 14:50). Chaymantataj kinsa kutita nerqa Jesusta mana rejsisqanta, jurarqa ima kanpis (Mar. 14:66-71). ¿Imaynataj Pedro kasharqa jatun juchapi urmasqanta reparakuspa? Manchaytapuni llakikorqa, sonqo nanaytataj waqarikorqa (Mar. 14:72). Uj mashkha horasninman amigon Jesusta kʼaspipi warkhusqata rikuspa, ¿imaynataj sonqon kashanman karqa? Ni imapaj sirvisqantachá yuyarqa.

14. ¿Imataj Pedrota yanaparqa Jehovamanta mana karunchakunanpaj? ( dibujota qhawariy).

¹⁴ Pedroqa ñaupajllamanpuni rerqa, nitaj Jehovamanta karunchakorqachu. ¿Imataj yanaparqa? Mana hermanosninmanta karunchakorqachu, astawanqa paykunawanpuni karqa. Paykunataj maytachá sonqocharqanku (Luc. 24:33). Chantapis Jesusqa kausarimusqantawan Pedroman rikhurerqa, ichapis kallpachananpaj (Luc. 24:34; 1 Cor. 15:5). Nitaj uyanpichu niporqa pantasqanta. Astawanpis Jesusqa amigon Pedroman nerqa sumaj ruwaykunata japʼinanta (Juan 21:15-17). Pedroqa yacharqa jatun juchapi urmasqanta, jinapis mana desanimakorqachu. ¿Imarayku? Payqa sutʼita yacharqa Jesús payta munakusqantaraj. Hermanosninpis payta kallpachallarqankupuni.  Qhawarina imatachus paymanta yachakusqanchejta.

15. ¿Imamantataj Jehová mana iskayrayananchejta munanchu? (Salmo 86:5; Romanos 8:38, 39; fototawan qhawariy).

¹⁵ ¿Imatá yachakunchej? Jehovaqa mana munanchu iskayrayananchejta munakuwasqanchejmanta, perdonanawanchejpajtaj wakichisqa kasqanmanta (Salmo 86:5; Romanos 8:38, 39 leey). Juchallikojtinchejqa sonqonchej juchachawanchejpuni. Chaywanpis amapuni yuyanachu Jehová manaña munakuwasqanchejta, ni jaykʼajtaj perdonanawanchejta, astawanpis chay rato yanapata maskʼana. Robert nillantaj: “Ima tentaciontapis sapallay atipanayta yuyasqayrayku juchaman urmarqani”, nispa. Chaymantaraj reparakorqa ancianoswan parlanan kasqanta. Pay nin: “Paykunaqa Jehová munakullawasqantapuni entiendenaypaj yanapawarqanku. Repararqani ancianospis munakullawasqankutapuni, sutʼitataj rikuchiwarqanku Jehová mana saqerpariwasqanta”, nispa. Robert jinallataj mana iskayrayaspa nisunman Jehová mayta munakuwasqanchejta, juchasninchejtataj perdonawasqanchejta arrepientekojtinchej, yanapata maskʼajtinchej, kallpachakojtinchejtaj mana chay juchapi watejmanta urmanapaj (1 Juan 1:8, 9). Jehová munakuwasqanchejmanta mana iskayrayasunchu chayqa, urmaspapis sayarikusun, Jehovatataj sirvillasunpuni.

16. ¿Imaraykutaj Jehovata mana saykʼuspa sirviyta munallankipuni?

¹⁶ Jehovaqa may valorniyojpaj qhawan payta sirvinapaj mayta kallpachakusqanchejta. Paypa yanapayninwanqa ima kajtinpis mana saykʼusunchu. Kallpachakunallapuni hermanosninchejta munakunapaj, sonqonchejta nanachiwajtinchejtaj perdonanapaj. Casarasqa kanchej chaytaj, tukuy atisqanchejta ruwana ima problema kajtinpis chay rato allinchanapaj. Ajinamanta rikuchisunchej Jehovata mayta munakusqanchejta, casado kausaytataj may jatunpaj qhawasqanchejta. Jatun juchapi urmanchej chaytaj, Jehová Diospa yanapayninta maskʼana, munakuyninta, perdonnintataj japʼikuna, paytataj sirvinallapuni. Chayrayku “mana saykʼuspa allin kajta ruwanallapuni”. Imaraykuchus yachanchej Jehová mayta bendecinawanchejta (Gál. 6:9).