KAY 1922 watapi septiembre killapi, 8 mil runas jina uj jatun tantakuypi kasharqanku. Viernes pʼunchay karqa, intitaj kʼajarimusharqa. Tantakuyta kamachejqa nerqa: “Pikunachus jawaman llojsiyta munankichej chayqa, llojsillawajchej, jinapis ni kutiykamuyta atinkichejchu”, nispa.

Chay tantakoyqa takiykunawan qallarerqa. Chantataj hermano Joseph Rutherford plataformaman wicharerqa. Casi tukuyña tiyasqa kasharqanku, hermano Rutherfordtataj uyariytaña munasharqanku. Wakintaj qʼoñi kasqanrayku puriykachasharqankuraj. Rutherfordtaj uyarinankupaj tiyarikunankuta nerqa. Chantá parlayta qallarerqa. Plataformaj patanpitaj uj jatun letrero maytʼusqa kasharqa. Nisina pipis chayta repararqachu.

Hermano Rutherfordqa kaymanta parlarerqa: “Janaj pacha reinoqa qayllapiña”. Hermanoqa kallpawan uj hora khuskanniyojta parlarqa, imaynatachus unay tiempomanta profetas mana manchachikuspa Diospa Gobiernonmanta willasqankuta. Tukuchananpajña kashajtintaj chaypi kajkunata tapurerqa: “Jesús kamachimushasqantaña, ¿creenkichejchu?”, nispa. Tukuytaj “arí”, nispa kuticherqanku.

Chantá nerqa: “Jina kajtin, Diospa wawasnin jina, ¡watejmanta willamuychej! ¡Qhawariychej, Reyqa kamachishan! Qankunataj willajkunasnin kankichej. Chayrayku Reymanta, reinonmantawan, willamuychej, willamuychej, willamuychejpuni”, nispa.

Plataformaj patanpi letrerotaj, maytʼurakorqa. Chaypi nisharqa “Reymanta, reinonmantawan, willamuychej”, nispa.

Hermano Ray Bopp yuyarikun: “May kusisqas kasharqayku”, nispa. Hermana Anna Gardner nin: “Mayta tʼajllarikusqaykurayku, vigasta kharkaticherqayku”, nispa. Hermano Fred Twarosh nin: “Tukuyniyku ujllapi sayarikorqayku”, nispa. Hermano Evangelos Scouffas yuyarikuspa nin: “Tiyanasniykumanta imapis oqhariwaykuman jina karqa, sayasqa waqay ñawillataj kasharqayku”, nispa.

Chay tantakuypi kajkunamanta casi tukuyninku Diospa Gobiernonmanta predicajña kanku. Jinapis astawan kallpachasqas kasharqanku predicanallankupajpuni. Ethel Bennecoff nerqa: “Bibliamanta Yachaqajkunaqa aswan kusiywan, munakuywantaj predicamorqayku”, nispa. Hermana Odessa Tuck 18 watasniyoj kasharqa. Paytaj, “¿pitataj kachasajri?”, nisqata uyarispa kasukuytapacha munarqa. Pay nerqa: “Mana yacharqanichu maypichus predicanayta, maykʼajchus qallarinayta, imamantatajchus predicanaytapis. Jinapis Isaías jina nerqani. Pay nerqa: ‘Kaypi kani, noqata kachaway ari’”, nispa (Isa. 6:8). Hermano Ralph Leffler nerqa: “Chay diaqa mana qonqanapaj jina karqa. Imaraykuchus chay diamantapacha Diospa  Gobiernonmata Jallpʼantinpi astawan predicakorqa”, nispa.

Cedar Point llajtapi (Ohio, Estados Unidos) jatun tantakuy kasqanqa, yuyarikunapaj jinapuni karqa. Hermano George Gangas nerqa: “Kunanqa ni jaykʼaj jatun tantakuykunaman faltakusajchu”, nispa. Yuyarikusqanman jinataj nipuni faltakorqachu. Hermana Julia Wilcox nerqa: “Publicacionespi chay jatun tantakuymanta parlakojtin, sonqoyqa mayta qhallallarin. Jehovamantaj nini: ‘Mayta agradecekuyki, chay jatun tantakuypi kanaypaj yanapawasqaykimanta’”, nispa.

Ichá noqanchejtapis uj jatun tantakuy sonqochejta kuyurichillarqataj, kallpachawarqanchejtaj Jehová Diosta, Wawan Jesucristotawan astawan munakunapaj. Chaykunamanta yuyarikuspataj Jehovaman ninchej: “Mayta agradecekuyki, chay jatun tantakuypi kanaypaj yanapawasqaykimanta”, nispa.