PACHAJ wata qayllata, cristianos ukhupi uj chʼampay rikhurerqa. Wakin cristianosqa congregacionta llulla yachachiykunawan tʼaqanachisharqanku (1 Juan 2:18, 19; 2 Juan 7). Diótrefes sutiyoj cristianoqa apóstol Juanpaj, waj hermanospaj ima ‘sajrata parlasharqa’. Chantapis hermanosta mana wasinman wajyarikuyta munajchu, wajyarikuyta munajkunatapis manallataj wajyarikunankuta saqejchu (3 Juan 9, 10). Chay chʼampaykuna kashajtin, apóstol Juanqa kinsa kaj cartanta qhelqarqa. Chay cartataqa Gayo sutiyoj hermanoman qhelqarqa 98 wata chaynejta.

Congregacionpi chʼampaykuna kajtinpis, Gayoqa Jehová Diosta tukuy sonqo yupaychashallarqapuni. ¿Imaynatá chayta rikucherqa? ¿Imaraykutaj kay tiempopipis Gayo jina ruwananchej tiyan? ¿Imaynatá Juanpa qhelqasqan chaypaj yanapawasunman?

Kinsa kaj Juanta qhelqajqa, pay kikinmanta “kuraj runa” kasqanta nerqa. Chaytaj Gayota reparacherqa, chay cartata apóstol Juan apachimusqanta. Imaraykuchus Gayoqa apóstol Juanpa munasqa yachachisqan karqa. Apóstol Juanqa Gayota nerqa: “Qantaqa cheqamanta munakuyki”, nispa. Chantá nillarqataj: “Diosmanta mañapuyki sanolla kakunaykipaj, tukuy imapitaj allin risunanpaj”, nispa. Chay nisqanqa maytachá Gayota kusicherqa (3 Juan 1, 2, 4).

Gayoqa congregacionmanta ichá ujnin anciano karqa, jinapis Bibliaqa mana chayta sutʼita ninchu. Apóstol Juanqa Gayoman nerqa: “Allinta ruwanki hermanosta yanapaspa, paykunata mana rejsispapis”, nispa. Juan nisqanman jina, Gayoqa Jehovata tukuy sonqo yupaychasqanta rikucherqa, hermanosta wasinman wajyarikuspa. Imaraykuchus Diospa kamachisnenqa, mana rejsisqanku runastapis wajyarikojpuni kanku (Gén. 18:1-8; 1 Tim. 3:2; 3 Juan 5).

Apóstol Juanqa Gayoman nerqa hermanosta wajyarikuspa allinta ruwashasqanta. ¿Imaynatá Juan yacharqa Gayo chayta ruwashasqanta? Ichapis hermanosqa maypichus Juan kasharqa chaymanta, congregacionesman rejtaj kutimojtaj kanku. Ichapis paykuna Juanman willaj kanku, imaynachus hermanos kashasqankuta.

Hermanosqa waj lugaresman rispa, cristiano hermanosninkoj wasinkupi qhepakuyta munaj kanku. Imaraykuchus alojamientosqa mana llimphuchu kaj kanku, nitaj alojakojkunatapis allintachu atiendej kanku. Chay alojamientospi runasqa khuchichakoj kanku. Chayrayku wakin runasqa waj lugaresman rispa amigosninkoj wasinkupi  qhepakoj kanku, hermanostaj cristiano hermanosninkoj wasinkupi.

Apóstol Juanqa Gayota kallpacharqa viajaj cristianosta yanapanallanpajpuni. Nerqataj: “Paykunata allinta kacharpariy, Diosta kusichinapaj jina”, nispa. Chaywan Juanqa Gayoman nisharqa, ñanpaj imatachus necesitasqankuta hermanosman qonanta, maymanchus risharqanku chayman sumajta chayanankupaj. Gayoqa wasinpi qhepakojkunapaj chayta ruwajpuni. Chayta yachanchej hermanos Gayomanta Juanman sumajta parlasqankurayku (3 Juan 3, 6).

Chay hermanosqa ichapis misioneros, congregacionesta waturejkuna chayri Juanpa kachasqasnin karqanku. Pikunachus kasqankuta mana sutʼita yachajtinchejpis, chay hermanosqa sumaj willaykunata willanankurayku viajarqanku. Apóstol Juan nerqa: “Paykunaqa Diospa sutinrayku willaj jamorqanku”, nispa (3 Juan 7). Chayrayku hermanosqa paykunata wasinkuman tukuy sonqo wajyarikunanku karqa. Juan nerqa: “Noqanchejqa chay hermanosta wajyarikunanchejpuni tiyan, ajinamanta yanapakusun cheqa kajmanta willakunanpaj”, nispa (3 Juan 8).

Juanqa mana Gayoman agradecenallanpajchu kinsa kaj cartanta qhelqarqa. Astawanpis Gayota yanapayta munarqa, congregacionpi uj chʼampayta allinchananpaj. Diótrefes sutiyoj cristianoqa hermanosta mana wasinman wajyarikojchu, nitaj hermanos wajyarikunankutapis saqejchu (3 Juan 9, 10).

Cheqa sonqo cristianosqa, atispapis manachá Diotrefespa wasinpi qhepakuyta munankumanchu karqa. Imaraykuchus Diotrefesqa hermanos ukhupi ñaupajpipuni kayta munaj, nitaj Juanpa ima nisqantapis valechejchu. Chantapis apóstol Juanpaj, waj hermanospaj ima sajrata parlaj. Juanqa mana nerqachu Diótrefes llulla yachachej kasqanta. Jinapis Diotrefesqa apostolesta mana kasojchu. Chay imasta ruwasqanwan, niña tukuy sonqochu Diosta yupaychashasqanta rikucherqa. Diótrefes jina jatunchakoj, imatapis paykunallapaj munaj runasqa congregacionta tʼaqanachinkuman. Chayrayku Juanqa Gayoman nerqa: “Ama sajrata ruwajkuna jinaqa ruwaychu”, nispa. Chay yuyaychayta noqanchejpis kasukunanchej tiyan (3 Juan 11).

Juanqa Demetrio cristianomantapis parlallarqataj. Demetrioqa mana Diótrefes jinachu karqa. Astawanqa may kʼacha karqa, tukuy hermanostaj paymanta allinta parlaj kanku. Apóstol Juanqa Gayoman nerqa: “Noqaykupis paymanta allinta parlallaykutaj, yachanki jinataj parlasqaykoqa cheqapuni”, nispa (3 Juan 12). Ichá Demetrioqa Gayoj yanapayninta necesitarqa. Ichapis chayrayku apóstol Juanqa kinsa kaj cartanta Gayoman qhelqarqa, Demetrio imayna runachus kasqanta willananpaj. Ichá Demetrio chay cartata Gayoman aparqa. Demetrioqa Juanpa kachasqan jina chayri ichá congregacionesta waturej jina rerqa. Chaytaj ichá Gayota yanaparqa, Juanpa nisqan cheqapuni kasqanta yachananpaj.

¿Imaraykutaj Juan Gayoman nerqa wajyarikojllapuni kananta? ¿Gayo kallpachanatachu necesitarqa? Diotrefesqa wasinkuman wajyarikojkunata congregacionmanta qharqoyta munasharqa. Chayrayku ichapis Juanqa llakikusharqa Gayo manaña hermanosta wajyarikunanmanta. Chay ajina kajtinpis manapis, Juanqa Gayota kallpachananpaj nerqa: “Pichus allin kajta ruwajqa Diosmantamin”, nispa (3 Juan 11). Chayrayku noqanchejpis allin kajta ruwanallapajpuni kallpachakunanchej tiyan.

 Juanpa cartan, ¿Gayota wajyarikojllapuni kananpaj kallpacharqachu? Arí, kallpacharqa. Chayta yachanchej Juanpa kinsa kaj cartan Bibliaj ujnin libron kasqanrayku. Chaypitaj “allin kajta ruwajkuna jina” ruwanata niwanchej.

Gayomanta pisillata yachanchej. Chaywanpis paymanta mayta yachakusunman.

Uj kaj, noqanchejmanta ashkhas cheqa kajta yachakunchej, karu lugaresmanta jamoj hermanos Diosmanta yachachiwasqanchejrayku. Jinapis mana tukuy hermanoschu sumaj willaykunata willamunankupaj karuman rinku. Chaywanpis Gayo jina ruwasunman, karumanta jamoj hermanosta yanapaspa, kallpachaspa ima. Ichá paykunaqa kankuman congregacionesta waturikoj hermanos. Chantapis maypichus pisi willajkuna kanku, chayman ripoj hermanosta imallawanpis yanaparisunman. Biblia nin: “Kallpachakullaychejpuni wajkunata kʼachamanta japʼikunaykichejpaj”, nispa (Rom. 12:13; 1 Tim. 5:9, 10).

Iskay kaj, congregacionpi ichá pillapis ancianospa nisqankuta mana valechinmanchu. Apóstol Pablota, apóstol Juantapis wakinkunaqa mana valecherqankuchu (2 Cor. 10:7-12; 12:11-13). Ajina chʼampay congregacionpi rikhurejtin, ¿imatataj ruwasunman? Apóstol Pabloqa Timoteoman yuyaycharqa: “Señorpa kamachenqa mana churanakunanchu tiyan. Astawanqa tukuywan kʼacha kanan tiyan, yachachinanpaj wakichisqa. Contranpi ima sajrata ruwajtinkupis aguantakunan tiyan. Chantapis mana kasukojkunata llampʼu sonqowan yuyaychanan tiyan”, nispa. Ima chʼampay kajtinpis llampʼu sonqos kasunchej chayqa, sajrata rimajkunaqa ichapis sajra ruwasqankuta saqenqanku. Chantá “ichapis Diosqa paykuna juchasninkumanta pesachikunankuta saqenqa. Ajinamanta cheqa kajta allinta rejsinankupaj” (2 Tim. 2:24, 25).

Kinsa kaj, churanakuy kajtinpis Jehovata mana wasanchajkunaqa, kallpachanata, allinta ruwashasqankuta ninata ima necesitanku. Apóstol Juanpis Gayota maytachá kallpacharqa, hermanosta wasinman wajyarikuspa allinta ruwashasqanta nispa. Kunanpis ancianosqa, apóstol Juan jinallataj hermanosta mana ‘saykʼunankupaj’ kallpacharinanku tiyan (Isa. 40:31; 1 Tes. 5:11).

Juanpa kinsa kaj cartanqa, griego parlaypi 219 palabrasllawan qhelqakorqa, Bibliaj librosninmantataj aswan juchʼuy librito. Jinapis chay cartaqa kay tiempomanta cristianosta mayta yanapawasunman.