TATASNEYQA 1910 wata qayllata, Tiflis (Georgia) llajtamanta Canadá suyuman ripusqanku. Chaypitaj juchʼuy haciendapi tiyakusqanku. Chayqa Pelly nisqa llajta qayllapi kasharqa, Canadá suyoj inti yaykuynej ladopi, Saskatchewan nisqa lugarpitaj. Noqaqa 1928 watapi nacekorqani, sojta wawasmantataj qonchu puchitu kani. Tatayqa nacekunaypaj sojta killa faltashajtin wañupusqa, mamaytaj wawitallaraj kashajtiy wañuporqa. Pisi tiemponmantaj, kuraj hermanay Lucypis 17 watasniyoj wañupullarqataj. Chayrayku tioy Nick, hermanosniyta noqata ima uywakapuwarqayku.

Uj pʼunchay juchʼuyllaraj kashajtiy, familiayqa uj caballoj chupanta japʼishajta rikuwasqanku. Mayta mancharikusqanku caballo jaytʼarparinawanta yuyaspa. Chayrayku mayta qhaparimuwasqanku kacharinaypaj. Noqatajrí mana paykunata rikorqanichu, nitaj qhaparimuwasqankutapis uyarerqanichu. Walejtachá caballoqa mana imanawarqachu. Chaypi familiayqa lojtʼitu chayri joqʼarita kasqayta repararqanku.

Ujnin rejsisqaykoqa familiayman nerqa, joqʼara runaspaj escuelaman churanawankuta. Tiuytaj chayta ruwarqa, kachawarqataj Saskatoon llajtapi kaj escuelaman. Noqaqa 5 watitayojllaraj karqani, familiaymanta karupi kasqayraykutaj mancharisqa kasharqani. Familiaytaqa fiesta diasllapi chayri vacacionesllapi rikoj kani. Jinapis señas parlayta yachakorqani, wawa masisniywan pujllaspataj kusikoj kani.

Marion sutiyoj kuraj hermanayqa, Bill Danylchuckwan 1939 watapi casarakorqa. Paykunataj Frances sutiyoj hermanayta, noqata ima uywakapuwarqayku. Paykuna ñaupajta Bibliata estudiayta qallarerqanku. Vacacionespi waturikoj rejtiytaj, yachakusqankuta atisqankuman jina yachachiwaj  kanku. Paykunaqa mana señasta yacharqankuchu, chayrayku mana entiendenakuyta atillarqaykuchu. Jinapis repararqanku Jehovamanta maytapuni yachakuyta munasqayta. Noqaqa Bibliaj nisqanta kasushasqankuta repararqani, chayraykutaj paykunawan predicaj llojserqani. Pisi tiemponmanqa bautizakuytaña munarqani. Kay 5 de septiembre de 1941 watapi cuñadoyqa turrilpi bautizawarqa. Yakutaqa uj pujyumanta orqhorqanku, manchay qhasataj karqa.

Kay 1946 watapi vacacionespi wasiyman rejtiy, familiaywan uj jatun tantakuyman rerqayku. Chay tantakoyqa Cleveland llajtapi karqa. Chaytaj Estados Unidospi kashan, Ohio nisqa lugarpi. Tantakuypa ñaupaj dianqa, iskaynin hermanasniy papelitospi qhelqaspa imamantachus parlakushasqanta entiendechiwarqanku. Jinapis qhepan diaqa, yacharqani uj cheqapi joqʼara runastaqa señaspi entiendechishasqankuta. Chaymantaj may kusisqa rerqani. Manchay kusisqa kasharqani Bibliaj yachachisqanta sutʼita entiendesqaymanta.

Iskay kaj Guerra Mundialqa niraj unaychu tukukorqa. Runastaj suyunkuta mayta jatunchaj kanku. Noqarí jatun tantakuymanta kutimuytawan, Jehovallata yupaychasqayta sutʼita rikuchiyta munarqani. Chayrayku escuelaman kutispaqa banderata niña jatuncharqanichu, nitaj himno nacionaltapis takerqanichu, nillataj fiestastapis ruwarqanichu. Chantapis niña chay waj wawaswan iglesiaman rerqanichu. Profesoresneyqa mayta phiñakorqanku, tukuy imatataj ruwarqanku Diosta wasanchanaypaj. Chayta rikuspataj compañerosneyqa tʼukushallarqanku, noqataj Bibliamanta willarerqani. Wakenqa Diospa Palabranta japʼikorqanku, bautizakorqankutaj. Kunankamataj Jehovata yupaychashallankupuni. Paykunamanta wakin kanku: Larry Androsoff, Norman Dittrick, Emil Schneider ima.

Mayllamanpis rispaqa, joqʼara runasman Diosmanta willarejpuni kani. Uj kuti, Montreal llajtapi kashaspa maypichus joqʼara runas tantakoj kanku chayman rerqani. Chaypeqa Eddie Tager nisqa jovenman predicarqani. Payqa pandillero karqa. Jinapis hermanonchejman tukorqa, qayna watataj wañuporqa. Chaykamataj Laval llajtapi señaswan parlaj congregacionpi kasharqa. Montreal llajtallapitaj Juan Ardanez sutiyoj joventa rejserqani. Payqa ñaupa tiempopi Bereamanta runas jina, Bibliata sutʼita entiendenanpaj sumajta ukhuncharqa (Hech. 17:10, 11). Chantá paypis bautizakullarqataj, wañupunankamataj Ottawa llajtapi anciano karqa.

Kay 1950 watapi Vancouver llajtaman riporqani. Joqʼara runasman predicaspa mayta kusikojtiypis, uj kuti uyariyta atej señoraman callepi predicarqani.  Chay señoraqa Chris Spicer sutikorqa. Payqa revistasta sapa killa wasinman apanayta munarqa, qosanwanpis parlarinayta niwarqa. Wasinkuman rejtiy, papelpi qhelqanakuspa unayta parlarerqayku. Chaymanta niña tinkorqaykuchu. Jinapis kay pasaj wataslla, Toronto llajtapi uj jatun tantakuypi tinkorqayku. Qosantaj chay día bautizakunan karqa. Maytapuni kusikorqani. Chaymanta yachakuni mayllapipis Diosmantaqa willanapuni kasqanta. Imaraykuchus mana yachanchejchu, pichus Jehovaj llajtanman yaykunanta.

Chantá Saskatoon llajtaman riporqani. Chay llajtapi uj señoraqa wawasninman Bibliamanta yachachipunayta niwarqa. Wawasnenqa gemelitas karqanku, sutikorqankutaj Jean chantá Joan Rothenberger. Paykunaqa joqʼaritas karqanku, rerqani chay escuelallamantaj risharqanku. Bibliamanta yachakusqankuman jina, paykunapis compañerosninkuman predicayta qallarerqanku, phishqataj Jehovaj testigonman tukorqanku. Paykunamanta ujqa Eunice Colin sutikorqa. Paytaqa escuelayta tukuchashaspaña rejserqani. Payqa uj miskʼita qoriwarqa, amigos kanaykutataj niwarqa. Chay tiempopi mana yuyarqanipischu Euniceta maytapuni munakunayta. Aswan qhepamantaj paywan casarakorqani.

Eunice Bibliamanta yachakuyta qallarejtin, mamanqa directorwan parlamorqa Bibliamanta yachakuyta saqechinanpaj. Directorqa Euniceta tukuy imata nerqa Bibliata niña estudiananpaj, librosnintapis qhechorqa. Jinapis Euniceqa Jehovata nipuni wasancharqachu. Bautizakuyta munashajtenqa, tatasnin nerqanku: “Jehovaj testigonman tukunki chayqa, wasimanta wijchʼusqayku”, nispa. Chaypacha, Euniceqa 17 watasniyojllaraj karqa. Jinapis wasinmanta riporqapuni, uj hermanoj familianwantaj tiyakorqa. Euniceqa Bibliamanta yachakullarqapuni, bautizakorqataj. Paywanqa 1960 watapi  casarakorqayku, tatasnintaj mana jamorqankuchu. Jinapis watas pasasqanman jina, paykunaqa imapichus creesqaykuta reparaspa, imaynatachus wawasniykuta uywasqaykuta rikuspa ima respetawayku.

Noqawan warmiywan joqʼaras kajtiykupis, 7 wawasniykuta uywarqayku. Paykunaqa mana joqʼaraschu kanku, chayrayku paykunata mana uywayta atillarqaykuchu. Jinapis paykunata parlapayanaykupaj, Diosmanta yachachinaykupajpis señasta yachacherqayku. Hermanosqa mayta yanapawarqayku. Uj kuti, uj hermano willariwarqayku ujnin lloqallituyku tantakuypi millayta parlashasqanta. Chayta yachaspa wawaykuta cheqanchayta aterqayku. Kunanqa tawa qhari wawasniy ancianos kanku, familiasninkuwantaj Jehovata sirvishanku. Paykuna sutikunku James, Jerry, Nicholas, Steven ima. Chantapis waway Nicholasqa, warmin Deborawan Gran Bretaña suyumanta Betelpi sirvishan. Paykunaqa señas parlayman tijrachispa yanapakushanku. Waway Steventaj, warmin Shannanwan Estados Unidos Betelpi kikin llankʼayllapitaj yanapakushanku.

Casarakusqaykumanta 40 watasta juntʼanaykupajña kashajtiyku, Euniceyqa cancerwan wañuporqa. Onqosqa kashaspaqa, Dios kausarichimunanta yachasqanrayku nanayninta aguantarqa. Mayta suyakushani Euniceywan tinkukapuyta.

Kay 2012 febrero killapi, urmaspa caderayta pʼakikorqani. Niña imatapis sapallaymanta ruwayta atisqayrayku, ujnin wawaypaman riporqani. Wawaypa familianwan khuska, señas congregacionpi kashayku, Calgary llajtapi. Noqataj anciano jinallapuni sirvishani. Kunanpuni señas congregacionpi kashani. Imajtinchus 1946 watamantapacha, inglés parlaypi kaj congregacionllapi kasharqani. Chay wataspeqa Jehová uj tata jinapuni qhawawarqa paymanta mana karunchakunaypaj (Sal. 10:14). Maytapuni agradecekuni parlasqankuta papelitospi qhelqaspa entiendechiwajkunaman, señaswan entiendechinawankupaj señasta yachakojkunamanpis.

Wakin kutisqa imastachus parlasqankuta nipuni entiendejchu kani, yuyajtaj kani joqʼara runasta ni pí entiendesqanta. Chay kutispi llakiywan atipachikunaypaj jina karqani. Chaywanpis apóstol Pedroj nisqanta yuyarikoj kani. Payqa Jesusman nerqa: “Señor, ¿pimantaj ripusqaykuri? Qanpa nisqasnillayki wiñay kausayman pusan”, nispa (Juan 6:66-68). Ashkha joqʼara hermanos jina, noqapis pacienciakuyta yachakorqani. Jehovapi, llajtanpi ima atienekunaypaj kallpachakorqani. Chaytaj mayta yanapawan. Kunanqa may chhika publicaciones señas parlaypi tiyan. Maytataj kusikuni hermanoswan señaswan parlaspa tantakuykunapi, jatun tantakuykunapipis. Jehovata sirvisqayrayku may kusisqa kausakuni, ashkha bendicionestataj japʼini.