1, 2. ¿Imatataj Pedro yachakorqa?

JESUSPA qanchis yachachisqasnenqa, Galilea qochapi pescasharqanku. Paykunaqa tutantin ni uj pescadollatapis japʼerqankuchu. Sutʼiyaytataj qocha kantupi Jesús paykunata qhawasharqa. Chay kutipaj Jesusqa wañuymanta kausarimorqaña. Paykunatataj nerqa: “Chʼipata canoaj paña ladonman choqaykuychej, chaypitaj japʼinkichej”, nispa. Paykunataj kasukorqanku, “may ashkha pescadosta japʼisqankuraykutaj” mana chʼipata orqhoyta aterqankuchu (Juan 21:1-6).

² Jesusqa yachachisqasninman tʼantatawan pescadotawan jaywarqa mikhurikunankupaj. Chantá Jesusqa, Simón Pedrota tapurerqa: “Juanpa wawan Simón, ¿kaykunamanta astawanchu munakuwanki?”, nispa. Jesusqa yacharqa Pedroman pescadota japʼiy, mayta gustasqanta. Jinapis, ¿Jesustachu astawan munakorqa chayrí negociontachu? Jesusqa chayta yachaytachá munarqa. Pedrotaj nerqa: “Arí Señor, qan yachanki munakususqayta”, nispa (Juan 21:15). Chay kuti Pedroqa tukuy imamanta  nisqa, Jesusta astawan munakunan kasqanta yachakorqa. Chayrayku chay kutimantapacha Pedroqa astawan predicayta qallarerqa, congregacionpitaj sumajta yanapakorqa.

3. ¿Imamantataj allinta qhawarikunanchej tiyan?

³ Jesús imatachus Pedroman nisqanmanta yachakunchej, Jesusta munakunallapajpuni allinta qhawarikuna kasqanta. Jesusqa yacharqa runasqa imaymana llakiykunapi, chʼampaykunapi rikukusqanchejta. Tarpoj runamanta parlashaspa, wakin runas “Diospa Gobiernonmanta willayta” tukuy sonqo japʼikunankuta nerqa. Chantá nillarqataj “kay tiempo kausaymanta llakiykuna, qhapajyayta munapayay ima”, chay runaspa sonqonkuman yaykuspa Diospa palabranta pʼampaykunanta (Mat. 13:19-22; Mar. 4:19). Mana allinta qhawarikojtinchejqa, kay kausaypa llakiykunasnin Jehovata sirvisqanchejta pantachiwasunman. Chayrayku Jesusqa yachachisqasninman nerqa: “Allinta qhawarikuychej, pajtataj sonqoykichej atipachikunman anchata mikhuywan, anchata ujyaywan, kay kausaypa llakiykunasninwan ima”, nispa (Luc. 21:34).

4. ¿Imastá tapurikusunman Jesusta munakusqanchejtachus manachus reparakunapaj? (22 paginapi kaj dibujota qhawariy).

⁴ Predicacionta ñaupajman churaspaqa, Pedro jinallataj noqanchejpis Jesusta munakusqanchejta rikuchisunman. Ajinatachus manachus ruwashasqanchejta reparakunapaj tapurikuna: “¿Imatataj kausayniypi ñaupajman churani? ¿Imataj astawan kusichiwan? ¿Jehovata sirviychu chayri waj imasta ruwaychu?”, nispa. Kay tapuykunaman kutichinapaj parlarisunchej trabajomanta, kusirikuymanta, kapuyniyoj kaymantawan. Imaraykuchus chaykunaqa Jesusta munakusqanchejta pisiyachinman.

5. ¿Imatataj Jehová tatasman kamachin?

⁵ Pedroqa mana gustasqanraykullachu pescaj, manaqa familianta uywananpaj. Kay tiempopi Jehovaqa tatasta kamachin familiankuman imatachus necesitasqankuta qonankuta (1 Tim. 5:8). Chaypajtaj tatasqa trabajananku tiyan. Jinapis kay qhepa pʼunchaykunapi trabajorayku may llakisqa kasunman.

6. ¿Imaraykú trabajo llakichiwasunman?

⁶ Kay tiempopi trabajota mana tariyta atikusqanrayku, ashkhas mana trabajoyoj kashanku. Chayrayku trabajota tarinankupaj tukuy imata ruwanku. Ashkhasqa astawan trabajanku pisillata pagajtinkupis. Empresariostaj pisi trabajadoresllawan ashkha imasta ruwayta munanku. Chayrayku ashkha trabajadores onqosqas, saykʼusqas, llakisqastaj kashanku. Wakintaj manchachikunku trabajonkumanta wijchʼuchikuyta, patronninku astawan ruwanankuta kamachisqanta mana kasukojtinku.

7, 8. 1) ¿Pitataj astawan kasukunchej? 2) ¿Imatá uj hermano ruwarqa Diospa Gobiernonta ñaupajman churananpaj?

⁷ Cristianosqa Jehovata astawan kasukunchej, patronninchejta chayri waj runata kasunamantaqa (Luc. 10:27). Noqanchejqa, Jehovata sirvinapaj, kausakunanchejpaj imalla trabajanchej. Jinapis mana allinta qhawarikojtinchej trabajonchejrayku Diosta niña allintachu sirvisunman. Tailandia suyumanta uj hermanoj kausayninmanta parlarina. Pay nin: “Computadorasta arreglaspa trabajaj kani, chaytaj mayta gustawaj. Jinapis chayllata ruwaspa chʼisiyaj kani. Chayrayku mana tiempoy kapuwarqachu Diosta astawan sirvinaypaj. Chantaraj cuentata qokorqani Diospa Gobiernonta ñaupajman churanaypaj, waj  trabajota maskʼakunay kasqanta”, nispa. ¿Imatá ruwarqa?

⁸ Pay nin: “Uj watata jina yuyaycharikuytawan, heladosta vendej churakorqani. Qallariypi pisillata ganaj kani, chayrayku phutikoj kani. Ñaupaj trabajoymanta compañerosniywan tinkuspa, asipayawaspa niwaj kanku: ‘¿Imaraykú uj sumaj tallerpi computadorasta arreglayta saqepunki, heladosta vendenaykipajri?’, nispa. Chay niwasqankuta mana kasunaypaj, Jehovata astawan sirvinaypajtaj paymanta yanapata mañakorqani. Chantá caserosniyta astawan rejserqani, repararqanitaj ima heladoschus astawan gustasqanta. Pisi tiemponmanqa ruwasqay heladosta, sapa día tukoj kani. Ñaupaj trabajoymanta nisqataj astawan ganaj kani, aswan kusisqataj karqani. Imaraykuchus niña ñaupaj trabajoypi jina anchata llankʼajchu kani. Kunanqa Jehovaman astawan qayllaykuni”, nispa (Mateo 5:3, 6 leey).

9. ¿Imatá tapurikusunman trabajollaman mana qokunapaj?

⁹ Jehovaqa munan sumajta trabajananchejta, trabajonchejwantaj kusikunanchejta (Pro. 12:14). Jinapis mana trabajonchejtachu ñaupajman churananchej tiyan, manaqa Jehová Diosta sirviyta. Imatachus necesitasqanchejmanta parlaspa, Jesús nerqa: “Ñaupajtaqa Diospa Gobiernonta, cheqan kaynintawan maskʼallaychejpuni, chay tukuy imastaqa yapata jina qosonqachej”, nispa (Mat. 6:33). Jesús nisqanman jinachus manachus ruwashasqanchejta reparakunapaj, kaykunata tapurikuna: “¿Imata ruwaspataj astawan kusikuni? ¿Jehová Diosta sirvispachu chayri trabajaspachu?”, nispa. Kay tapuykunaman kutichispa reparakusun trabajonchejtachus chayri Jehová Diosta sirviytachus ñaupajman churashasqanchejta.

10. ¿Imatá Jesuspa nisqanmanta yachakusunman?

¹⁰ Jesusqa yachacherqa imatachus kausayninchejpi ñaupajman churana kasqanta. Uj kuti Jesusqa iskay hermanaspa wasinman rerqa. Paykunaqa María, Marta ima karqanku. Martaqa chay ratopacha Jesuspaj waykʼoj churakorqa. Mariatajrí Jesuspa ñaupaqenpi tiyaykukorqa yachachisqanta uyarinanpaj. Martataj Jesusman nerqa hermanan María yanapaysikunanta. Jesustaj Martaman nerqa: ‘Mariaqa allin kajta ajllakun, chaytaqa mana pipis qhechonqachu’, nispa (Luc. 10:38-42). Jesuspa nisqanmanta mayta yachakusunman. Waj ruwanaswan mana musphanapaj. Jesustataj munakunapaj, “allin kajta” ajllananchej tiyan. Nisunman Jehovawan amigos kasqanchejta, ñaupajman churananchej tiyan.

11. ¿Imatá Biblia nin samarikuymanta, kusirikuymantawan?

¹¹ Tukuypis ashkha ruwanasniyoj kanchej. Chayrayku wakin kutis samarikuyta, kusirikuyta ima necesitanchej. Bibliaqa nin: “Runapajqa chay tukuy imasmanta nisqaqa aswan allimpuni mikhunan, ujyanan, tukuy ruwasqanwan kusikunan ima”, nispa (Ecl. 2:24). Jesusqa repararqa yachachisqasnin samarikuyta necesitasqankuta. Uj kuti diantinta willamusqankutawan, yachachisqasninman nerqa: “Jakuchej chʼinnejman, uj chhikallantapis samarikunaykichejpaj”, nispa (Mar. 6:31, 32).

12. ¿Imaraykú kusirikuyllaman mana qokunanchejchu tiyan?

¹² Kusirikunapaj imata ruwaspapis trabajonchejmanta samarikunchej, llakiykunamantataj qonqapunchej. Jinapis allinta qhawarikunanchej tiyan, kusirikuyllaman  mana qokunapaj. Ñaupa tiempopi ashkha runas ajinata nej kanku: “Mikhuna ari, ujyanataj, imaraykuchus qʼaya wañupusun”, nispa (1 Cor. 15:32). Kunanpis runasqa ajinallatataj ninku. Uj jovenmanta parlarina. Payqa Europamanta karqa, tantakuykunamantaj risharqa. Jinapis kusirikuyllaman qokusqanrayku, tantakuykunaman niña rerqachu. Tiemponmanraj reparakorqa kusirikuyllata maskʼay llakiyllaman chayachisqanta. Chayrayku watejmanta Bibliamanta yachakullarqataj. Tiemponmanqa Diospaj Gobiernonmanta predicayta qallarerqa. Chantá bautizakorqa, nerqataj: “Jehovata sirvispa astawan kusikuni, kay mundoj imasninwan kusirikuymanta nisqaqa. Tiempoyta usuchisqaymanta mayta pesachikuni”, nispa.

13. 1) ¿Imaraykú kusirikuyllaman qokuy mana allinchu? 2) ¿Imatá ruwasunman kusirikuyllamanchus manachus qokushasqanchejta reparakunapaj?

¹³ Kusirikunapaj imata ruwaspapis ama anchata saykʼunachu. Mashkha tiempotachus kusirikunanchej kasqanta reparanapaj, miskʼimanta parlarina. Tukuyninchejman miskʼi mayta gustawanchej, ¿icharí? Jinapis miskʼillata chʼonqasunman chayqa onqoykusunman. Chayrayku mana onqoykunapajqa sumaj mikhunasta mikhunanchej tiyan. Kusirikuywanpis kikillantaj. Kusirikuyllaman qokusun chayqa Jehovamanta karunchakusun. Kusirikuyllamanchus manachus qokushasqanchejta reparakunapaj, anotakusunman semanapi mashkha horastachus tantakuypaj, predicacionpaj, Bibliata estudianapajpis churashasqanchejta. Chantá anotakullasunmantaj pujllanapaj, teleta qhawanapaj, chayri waj imaswan kusirikunapaj, semanapi mashkha horastachus churashasqanchejta. Chay listasta kikincharispa reparasunchej imamanchus tiemponchejta astawan churashasqanchejta (Efesios 5:15, 16 leey).

14. ¿Imataj yanapawasunchej imawanchus kusirikunanchejta allinta ajllanapaj?

¹⁴ Jehovaqa saqewanchej ajllajta imawanchus kusirikunanchejta. Tatasqa ajllayta atinku, familianku imaswanchus kusirikunankuta. Jehovaqa Palabranpi yuyaychaykunata qhelqacherqa imawanchus kusirikunanchejta allinta ajllanapaj. * Jehová Diosqa allin imaswan kusirikunapaj jina ruwawarqanchej (Ecl. 3:12, 13). Kusirikunapajtaj mana uj rejllatachu ajllanchej (Gál. 6:4, 5). Imata ajllaspapis allinta qhawarikunanchej tiyan. Jesús nerqa: “Maypichá valorniyoj imasniyki kashan, chayllapitaj sonqoykipis kanqa”, nispa (Mat. 6:21). Reyninchej Jesucristota munakusun chayqa, Diospa Gobiernonta ñaupajllamanpuni churasun. Chaytataj rikuchisunchej imastachus yuyasqanchejwan, parlasqanchejwan, ruwasqanchejwanpis (Fili. 1:9, 10).

15, 16. 1) ¿Imaraykú tukuy imata munapayaymanta jarkʼakunanchej tiyan? 2) ¿Imatataj Jesús tukuy imata munapayaymanta nerqa?

¹⁵ Kay tiempopi ashkha runas kunallanraj rikhurimoj ropata, celularesta, computadorata, waj imasta ima rantikuyta munanku. Paykunaqa kapuyniyoj kayta, qolqeyoj kayta ima astawan ñaupajman churanku. Cristianostaj allinta qhawarikunanchej tiyan, imastachus ñaupajman churashasqanchejta reparakunapaj. Kayta tapurikunachej: “¿Tantakuykunapaj wakichikuypichu tiemponchejta astawan churanchej?  Chayri, ¿sumaj autota, kunallanraj rikhurimoj ropata rantikullaypichu astawan yuyanchej? ¿Ashkha ruwanasniyoj kasqanchejraykuchu pisillataña Bibliata leenchej chayri Diosmanta mañakunchej?”, nispa. Mana allinta qhawarikojtinchejqa, tukuy imata munapayaypi urmasunman, Jesustataj pisillataña munakusunman. Chayrayku Jesuspa nisqanpi tʼukurina kanman. Pay nerqa: “Allinta qhawarikuychej, tukuy imata munapayaymantataj jarkʼakuychej”, nispa (Luc. 12:15). ¿Imaraykú chayta Jesús nerqa?

¹⁶ Payllataj nerqa: “Mana pipis iskay patronesta ujllapi sirviyta atinmanchu, imaraykuchus ujninta chejnenqa ujnintataj munakonqa, ujninman kʼaskakonqa ujnintataj pisipaj qhawanqa. Qankunaqa mana atinkichejchu ujllapi Diostawan qolqetawan sirviyta”, nispa (Mat. 6:24). Mana atisunmanchu kapuyniyoj kayta astawan maskʼashaspa, Jehová Diosta sumajta sirviyta. Juchasapas kasqanchejrayku, kallpachakunanchej tiyan tukuy imata munapayaypi mana urmanapaj, imaraykuchus chayqa ‘aychanchejpa munaynin’ (Efe. 2:3).

17. 1) ¿Imaraykú wakin runas tukuy imata munapayaypi urmanku? 2) ¿Imatá ruwananchej tiyan tukuy imata munapayaypi mana urmanapaj?

¹⁷ Ashkha runasqa, imastachus munasqallankupi yuyasqankurayku tukuy imata munapayaypi urmanku (1 Corintios 2:14 leey). Chayraykutaj imachus allin, imatajchus mana allin kasqanta ni sutʼita reparankuchu (Heb. 5:11-14). Ichapis astawan tukuy imata munapayanku. Ashkha imasniyojña kajtinkupis, astawanrajpuni munanku (Ecl. 5:10). Chay jina yuyaymantataj jarkʼakusunman, Bibliata sapa día leespa (1 Ped. 2:2). Jesusqa Diospa nisqasninpi tʼukurinanpaj tiempochakorqa. Chayrayku sinchʼita sayarqa Kuraj Supay juchapi urmachiyta munashajtin (Mat. 4:8-10). Tukuy imata munapayaypi mana urmanapaj, Jehová Diospa yuyaychasqanman jina kausakuna. Ajinamanta rikuchisunchej Jesusta mayta munakusqanchejta.

18. ¿Imastá mana ñaupajman churanachu tiyan?

¹⁸ Jesusqa Pedrota tapurerqa: “¿Kaykunamanta astawanchu munakuwanki?”, nispa. Chayta nispaqa Jehová Diosta sirviyta ñaupajman churanan kasqanta yachachisharqa. Pedroj sutenqa “Rumi” niyta munan. Sutinman jinataj Pedroqa Jehovata sirviypi sinchʼita sayarqa (Hech. 4:5-20). Noqanchejpis allinta qhawarikunanchej tiyan Jesusta munakusqanchej ama pisiyananpaj. Chayrayku ama ñaupajman churanachu trabajonchejta, kusirikuyta, nitaj kapuyniyoj kaytapis. Chaykunata mana ñaupajman churasun chayqa, Pedro jinallataj nisunchej: “Arí Señor, qan yachanki munakususqayta”, nispa.