1, 2. 1) ¿Pikunapiraj Mateo 24:12 nisqan juntʼakorqa? 2) ¿Imaynatá ñaupa tiempomanta cristianos munakuyninkuta rikuchillarqankupuni? (Patapi kaj dibujota qhawariy).

JESÚS kay mundoj imasninpa tukukuyninmanta parlashaspa, nerqa: “Ashkhaspa munakuyninku chiriyaponqa”, nispa (Mat. 24:3, 12). Kay palabrasqa ñaupajta, judiospi juntʼakorqa. Imaraykuchus paykunaqa Diospa llajtanmanta kasqankuta nejtinkupis, Diosta munakusqanku chiriyapunanta saqerqanku.

² Jinapis chay tiempomanta ashkha cristianosqa “Cristo Jesusmanta sumaj willaykunata yachachisharqanku, willasharqankutaj”. Chantá Diosta, hermanosta, mana cristiano kajkunatapis munakoj kanku (Hech. 2:44-47; 5:42). Jinapis wakin cristianospa munakuyninku chiriyaporqa.

3. ¿Imaraykú Efesomanta cristianospa munakuyninku chiriyaporqa?

³ Jesucristoqa Éfeso llajtamanta cristianosman nerqa: “Kayta contraykipi nini: Qanqa manaña ñaupajta jinachu  Diosta munakunki”, nispa (Apo. 2:4). Efesomanta cristianosqa chay tiempomanta runas jinallataj aychaj sajra munaynillanta maskʼayman qokusharqanku (Efe. 2:2, 3). Éfeso llajtaqa qhapaj karqa, runastaj qolqe patapi, tukuy imayoj kayta ima maskʼaj kanku. Chantapis runasqa millay kausayniyoj karqanku, nitaj Diospa leyesninta respetajchu kanku. Sonqota kusirichiyllata maskʼaj kanku, Diosta, runastawan munakunankumanta nisqaqa.

4. 1) ¿Imaraykú runaspa munakuyninku chiriyapushan? 2) ¿Imatá kay yachaqanapi yachakusunchej?

⁴ Jesús imatachus munakuymanta nisqanqa, kay tiempopipis juntʼakushallantaj. Kay tiempomanta runasqa Diosta niña munakunkuchu. Dios chʼampaykunata allinchananpi atienekunankumantaqa, kay mundomanta organizacionespi atienekunku. Chayrayku runaspa munakuyninku astawan chiriyapushan. Jehovaj kamachisninpa munakuyninkupis chiriyapullanmantaj, imaynatachus Éfeso llajtamanta cristianospa munakuyninku chiriyaporqa, ajinata. Chayrayku yachakuna imatachus ruwana kasqanta Jehová Diosta, Bibliata, hermanostapis mayta munakunallapajpuni.

5. ¿Imaynatá Diosta munakuy yanapawanchej?

⁵ ¿Pitataj astawan munakunanchej tiyan? Jesús nerqa: “‘Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj’. Chaymin aswan kuraj, ñaupaj kaj kamachisqataj”, nispa (Mat. 22:37, 38). Chantapis Diosta munakoyqa yanapawanchej kamachisqasninta kasukunapaj, sajra kajta chejninapaj, ima llakiyta aguantanapajpis (Salmo 97:10 leey). Jinapis Kuraj Supay, sajra mundon ima tukuy imata ruwashanku Diosta manaña munakunapaj.

6. ¿Imapitaj rikukunku Diosta mana munakojkuna?

⁶ Kay mundomanta runasqa Diosta munakunankumantaqa, ‘paykunallata munakunku’ (2 Tim. 3:2). Runasqa kaykunallata maskʼanku: ‘Aychaj sajra munayninta, ñawispa rikusqanta munapayayta, kapuyninkumanta runaykachayta’ ima (1 Juan 2:16). Apóstol Pabloqa cristianosman nerqa aychaj sajra munayninta maskʼay mana allinchu kasqanta. Pay nerqa: “Aychaj munayninpi yuyayqa wañuyman pusan. [...] Aychaj munayninpi yuyajkunaqa Diospa enemigosnin kanku”, nispa (Rom. 8:6, 7). Qhapajyayman qokojkuna chayri aychaj sajra munaynillanta ruwajkunaqa sonqo pʼakisqas qhepakunku, llakiykunawantaj ñakʼarinku (1 Cor. 6:18; 1 Tim. 6:9, 10).

7. ¿Ima yuyaykunamantataj jarkʼakunanchej tiyan?

⁷ Diospi mana creejkuna, kausay jinallamanta rikhurisqanta nejkunapis, runasta creechiyta munanku kausay jinallamanta rikhurisqanta, ajinamanta Diosta niña munakunankupaj. Yuyachiytataj munanku wampuslla Diospi creesqankuta. Ashkha runasqa cientificospa nisqankuta creenku, Diospi creenankumantaqa (Rom. 1:25). Chay runas jina yuyasun chayqa Jehovamanta karunchakusunman, payta munakusqanchejpis chiriyapunman (Heb. 3:12).

8. 1) ¿Imastaj wakin kuti llakichiwasunman? 2) ¿Imatá Salmo 136 niwanchej?

 ⁸ Kay mundo Kuraj Supaypa atiyninpi kasqanrayku, tukuypis wakin kuti llakiypi rikukusunman (1 Juan 5:19). Llakiywan atipachikojtinchejtaj Diospi creesqanchej, munakusqanchej ima pisiyanman. Ichapis llakiypi kashanchej machitus kasqanchejrayku, onqosqa kasqanchejrayku chayri qolqe pisiwasqanchejrayku. Llakikullasunmantaj wakin imasta mana sumajta ruwayta atisqanchejrayku. Chayri wakin imas mana munasqanchejman jina ruwakusqanrayku. Ajinapi rikukojtinchej ama yuyanachu Jehová saqerpariwasqanchejta. Astawanqa Salmo 136:23 nisqanta yuyarikuna. Chaypi Jehovamanta nin: ‘Kʼumuykuchisqa kashajtinchej noqanchejmanta yuyarikorqa, imaraykuchus khuyakuynenqa wiñaypaj’, nispa. Chayrayku mana iskayrayasunmanchu Jehová mañakusqanchejta uyarisqanmanta, yanapanawanchejmantataj (Sal. 116:1; 136:24-26).

9. ¿Imatá Pablo ruwarqa Jehovata munakunallanpajpuni?

⁹ Pabloqa mana qonqaporqachu Dios paywanpuni kasqanta, chaytaj mayta kallpacharqa. Pay nerqa: “Jehová Diosmin yanapawajneyqa, mana manchachikusajchu. ¿Imanawanqataj runari?”, nispa (Heb. 13:6). Pabloqa Jehová Diospi atienekusqanrayku mana llakiyninwan atipachikorqachu. Imaymana llakiykunapi rikukuspapis Jehovallapipuni atienekorqa. Astawanpis presochasqa kashaspa, hermanosta kallpachananpaj cartasta qhelqarqa (Efe. 4:1; Fili. 1:7; File. 1). Pablo jatun llakiykunapi rikukojtinpis, Jehovata munakullarqapuni. Imaraykuchus sonqochaj Diospi atienekorqa, ‘pichus sonqochawanchej tukuy llakiyninchejpi’ (2 Cor. 1:3, 4). ¿Imaynatá Pablo jina Jehovata munakullasunmanpuni?

10. ¿Imatá ruwasunman Jehovata munakunallapajpuni?

¹⁰ Pabloqa Jehovata munakunallapajpuni imatachus ruwanata nerqa. Pay hermanosman nerqa: “Mana saykʼuspa Diosmanta mañakuychej”, nispa (1 Tes. 5:17; Rom. 12:12). Jehovamanta mañakuspaqa paywan parlarinchej (Sal. 86:3). Jehovaman sonqomantapacha tukuy imata willarinchej chayqa, payman astawan qayllaykunchej (Sal. 65:2). Chantapis mañakusqanchejman kutichiwasqanchejta reparaspa, Jehovata astawan munakunchej. Rikunchejtaj Jehovaqa “wajyakojkunaj qayllampi” kashasqanta (Sal. 145:18). Jehová munakuwasqanchejta, yanapawasqanchejta yachayqa, ima llakiytapis atipanapaj yanapawanchej.

11, 12. ¿Imatá ruwasunman cheqa kajta astawan munakunapaj?

¹¹ Noqanchejqa cheqa kajta munakunchej. Cheqa kajtaj Diospa Palabran. Jesusqa Tatanman nerqa: “Palabraykeqa cheqapuni”, nispa (Juan 17:17). Cheqa kajta munakunapajqa, Bibliataraj estudiananchej tiyan (Col. 1:10). Astawanpis Salmo 119 nisqanman jina ruwananchej tiyan (Salmo 119:97-100 leey). Bibliapi imatachus leesqanchejpi tʼukurinanchej tiyan. Imaynatachus Bibliaj nisqanman jina kausakunanchejpi tʼukurejtinchejqa, cheqa kajta astawan munakusunchej.

¹² Salmista nillarqataj: “Nisqasniykeqa  may miskʼimin simiypeqa; abeja miskʼimantapis aswan miskʼiraj”, nispa (Sal. 119:103). Bibliamanta orqhosqa publicacionesqa, miskʼi mikhuna jina kanku. Miskʼi mikhunataqa mana usqhay usqhayllatachu mikhunchej. Ajinallatataj publicacionestapis mana usqhay usqhayllatachu leena, manaqa allinllawan. Ajinamanta “sumaj kʼacha palabrasta” yuyarikuyta atisunchej, wajkunatapis yanapariyta atisunchej (Ecl. 12:10).

13. 1) ¿Imataj Jeremiasta yanaparqa Diospa Palabranta munakunanpaj? 2) ¿Imatá Jeremías ruwarqa Diospa Palabranta munakusqanrayku?

¹³ Profeta Jeremiasqa, Diospa Palabranta munakorqa. Pay nerqa: “Parlamushawajtiyki, chay parlasqaykita mikhukorqani, chaytaj sonqo qhallallay, kusiytaj sonqoy ukhupi kawarqa, imaraykuchus qampatamin kani Tata Dios, Tukuy Atiyniyoj Diosníy”, nispa (Jer. 15:16). Jeremiasqa Diospa Palabranta munakoj, chaypitaj tʼukurej. Chayrayku payqa jatunpaj qhawarqa Jehovaj sutinpi parlayta, nisqasnintataj willayta. Noqanchejpis Diospa Palabranta munakojtinchejqa, may jatunpaj qhawasunchej Jehovaj testigosnin jina rejsichikuyta, Gobiernonmantataj kay tiempopi runasman willayta.

14. ¿Imatawan ruwasunman Diospa Palabranta astawan munakunapaj?

¹⁴ ¿Imatawan ruwasunman Diospa Palabranta munakunapaj? Tantakuykunaman mana faltakuspa rinanchej tiyan. Jehovaqa Torremanta Qhawaj revistawan yanapawanchej Palabranmanta yachakunanchejpaj. Chayrayku tantakuypaj chay revistata sumajta estudiananchej tiyan. Wakichikushaspaqa tukuy textosta maskʼasunman. Torremanta Qhawaj revistata jw.org nisqapi chantá JW Library nisqapi ashkha parlaykunapi tarisunman. Chaypitaj Bibliamanta textosta ñitʼiykuspalla leeyta atisunman. Tantakuypaj revistata imaynamanta wakichikushaspapis Bibliaj textosninta sumajta leerina, chaypitaj tʼukurina. Ajinamanta  Diospa Palabranta astawan munakusun (Salmo 1:2 leey).

15, 16. 1) ¿Imatá ruwananchej tiyan Juan 13:34, 35 nisqanman jina? 2) Jehovata, Bibliata ima munakojtinchej, ¿pikunata munakullasuntaj?

¹⁵ Jesusqa wañupunan pʼunchaymanta ñaupaj chʼisinpi, yachachisqasninman nerqa: “Uj mosoj kamachiyta qoykichej: Purajmanta munanakuychej. Imaynatachus noqa munakorqaykichej ajinallatataj qankunapis purajmanta munanakuychej. Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:34, 35).

¹⁶ Hermanosninchejta munakojtinchejqa Jehovata munakushasunman jina. Chayrayku Diosta mana munakuspaqa mana hermanosninchejta munakuyta atisunchu. Hermanosninchejta mana munakuspataj nillataj Diosta munakuyta atisunchu. Apóstol Juan nerqa: “Sichus pipis rikushasqan hermanonta mana munakun chayqa, manallataj Diostapis munakunchu, pitachus mana rikusqantaqa”, nispa (1 Juan 4:20). Chantapis Jehovata, hermanosta ima munakojtinchejqa, Bibliata munakushasunman jina. Imaraykuchus Bibliaqa kamachiwanchej Diosta, hermanosta ima tukuy sonqo munakunanchejta (1 Ped. 1:22; 1 Juan 4:21).

17. ¿Imaynasmanta hermanosta munakusqanchejta rikuchisunman?

¹⁷ (1 Tesalonicenses 4:9, 10 leey). ¿Imaynatá rikuchisunman hermanosta munakusqanchejta? Machitu hermanosta tantakuykunaman pusaspa chayri viuda hermanasta wasinkupi yanaparispa (Sant. 1:27). Llakisqas, sonqo pʼakisqas chayri chʼampaykunapi rikukoj hermanosqa, kallpachananchejta, sonqochananchejta, yanapananchejta ima necesitanku (Pro. 12:25; Col. 4:11). ‘Creeypi hermanosninchejta’ munakusqanchejta rikuchina, parlasqanchejwan, ruwasqanchejwan ima (Gál. 6:10).

18. Hermanoswan phiñanakojtinchej, ¿imataj yanapawasunchej allinyakunapaj?

¹⁸ Bibliaqa kay qhepa pʼunchaykunapi, ashkha runas paykunallapi yuyanankuta, qolqeta munakunankuta ima nerqa (2 Tim. 3:1, 2). Chayrayku cristianosqa Jehovata, Palabranta, hermanostapis astawan munakunapaj kallpachakunanchej tiyan. Jinapis juchasapa kasqanchejrayku ichapis wakin kuti hermanoswan phiñanakusunman. Jinapis hermanosta munakusqanchejrayku, usqhayllata chay chʼampayta allinchasunchej (Efe. 4:32; Col. 3:14). Chayrayku amapuni saqenachu munakuyninchej chiriyapunanta. Astawanqa Jehovata, hermanosta, Palabrantapis tukuy sonqo munakunallapuni.