1, 2. 1) ¿Imapí Joshua jina ashkha wawas rikukunku? 2) ¿Ima tapuykunamantaj kutichisun?

JOSHUAQA Jehovaj testigon, paytaj nin: “Tatasneyqa waj suyumanta kanku. Wawitamantapachataj tatasniypa parlayninkuta wasipi, congregacionpipis parlaj kani. Escuelaman risqaytawantaj chay suyupi parlakusqan astawan gustawarqa. Watasninmanqa niña tantakuykunapi yachachikusqanta entienderqanichu, yuyarqanitaj niña tatasniypa lugarninkumantachu kasqayta”, nispa. Joshua jina ashkhas rikukunku.

² Waj suyuman ripojkunaqa 240 millonesmanta astawan kanku. Waj suyumanta kanki chayqa, ¿imatá ruwawaj wawasniyki Jehovata munakunankupaj, ‘cheqa kajpitaj purinallankupajpuni’? (3 Juan 4). ¿Imatá congregacionmanta hermanos ruwankuman paykunata yanapanankupaj?

3, 4. 1) ¿Imatá tatas ruwankuman wawasninku Jehovawan sumaj amigos kanankupaj? 2) ¿Imatá tatas mana suyanankuchu tiyan wawasninku ruwanankuta?

³ Tatas wawasniykichejta yanapaychej qankuna jina Jehovawan sumaj amigos kanankupaj, wiñay kausayta japʼinankupaj ima. Qankunata wawasniykichej Diospa Gobiernonta ñaupajman churajta rikusojtiykichejqa,  Jehová sapa día ni imata faltachinanpi atienekonqanku (Mat. 6:33, 34). Kapuyniyoj kayllata astawan maskʼanamantaqa Diosta sirviyta ñaupajman churanaykichejpaj kallpachakuychej. Pisi imasllawan kausakuychej nitaj manuchakuychejchu. Nillataj qhapaj kayta, chayri “runaswan astawan jatunpaj” qhawachikuyta maskʼaychejchu. Astawanqa “cielopi may kapuyniyoj” kayta maskʼaychej, nisunman Jehovawan allinpaj qhawachikuyta (Marcos 10:21, 22 leey; Juan 12:43).

⁴ Tatas, wawasniykichejpaj tiempochakuychej. Chantá Jehovaj Gobiernonta ñaupajman churasqankumanta allinta ruwasqankuta niychej. Imajtinchus runasqa yuyanku wawas, tatasninkuman qolqeta jaywananku kasqanta, chantá may rejsisqa, qhapaj kayta ima maskʼananku kasqanta. Chayrayku tatas ama yuyaychejchu wawas trabajananku kasqanta, tukuy ima patapi sumajta tiyakunaykichejpaj. Yuyarikuychej “mana wawaschu tatasninkupaj imatapis tantananku tiyan, manaqa tatas wawasninkupaj tantananku tiyan” (2 Cor. 12:14).

5. ¿Imaraykú tatas wawasninkuman sapa kuti Jehovamanta parlananku tiyan?

⁵ Biblia nerqa “imaymana parlayniyoj” runas, tukuy nacionesmanta Diospa llajtanman ujchaykukunankuta (Zac. 8:23, NM). Jinapis wawasniykichej, mana parlayniykichejta entiendejtinkoqa, Jehovamanta yachachiyta mana atillankichejchu. Tatasqa runasman Bibliamanta yachachinanku kajtinpis, wawasninkumanraj yachachinanku tiyan, imaraykuchus wiñay kausayta japʼenqanku Jehovata sumajta rejsejtillanku (Juan 17:3). Chayrayku tatasqa sapa kuti wawasninkuman Jehovamanta yachachinanku tiyan (Deuteronomio 6:6, 7 leey).

6. ¿Yanapanmanchu tatasninkoj parlayninkuta wawas yachasqanku? (8 paginapi kaj dibujota qhawariy).

⁶ Ichapis wawasniykichejqa escuelapi chayri runaswan parlaspa, tiyakushankichej chay lugarmanta parlayta yachakonqanku. Jinapis parlayniykichejta yachakonqanku sapa kuti wawasniykichejwan parlajtiykichej. Wawasniykichej parlayniykichejta yachakojtinkoqa, mana pʼenqakuspa parlarillanqanku, imaynachus kashasqankutapis willarisonqachej. Chantá iskay parlaykunata yachajtinkoqa sumajta tʼukuriyta, wajkunatapis entiendeyta atillanqanku. Predicacionpipis Diosmanta astawan sumajta yachachiyta atenqanku. Carolinaj tatasnenqa waj suyumanta kanku. Pay nin: “Waj parlaypi kaj congregacionpi kayqa may sumaj. Maytataj munani maypichus necesitakun chaypi yanapakuyta”, nispa.

7. ¿Imatataj ruwawajchej wawasniykichej waj parlayta parlajtinku?

⁷ Wawasniykichejqa, ima suyumanchus riporqankichej chay suyumanta costumbresninta, parlayninta ima, pisimanta pisi astawan yachakonqanku. Chayrayku ichapis manaña munankumanchu chayri mana atinkumanchu qankunaj parlayniykichejta parlayta. Ajina kajtin, tiyakushankichej chay lugarpa parlayninta pisillatapis yachakuwajchej. Wawasniykichej waj runaswan imatachus parlasqankuta, imawanchus kusirikusqankuta, tareasninkutapis ruwashasqankutachus manachus yachajtiykichejqa, Jehovaj testigosnin kanankupaj yanapayta atillankichej. Yanapayta atillankichejtaj profesoresninkuwan parlarejtiykichej. Waj parlayta yachakunapajqa tiempochakuna, kallpachakuna, llampʼu sonqotaj kana. Chaytaj mana qhasichu kanqa. Ujnin wawaykichej joqʼara chayri lojtʼitu kasqanpi tʼukuriychej. Paywan parlarinaykichejpaj, ¿manachu makiswan parlayta yachakuwajchej? Kunantaj wawaykichej waj parlayta astawan parlajtin, ¿manachu kallpachakullawajchejtaj parlayninta yachakunaykichejpaj? *

8. ¿Imaynatá tatas wawasninkuta yanapankuman parlayninkuta mana allinta parlajtinkupis?

 ⁸ Ichapis wakin forastero tatasqa mana sumajtachu parlanku, wawasninku parlanku chay parlayta. Chayrayku ichapis “Diospa qhelqasqa palabranta” mana yachachiyta atillanqankuchu (2 Tim. 3:15). Tatasqa ajinapi rikukojtinkupis wawasninkuta yanapankuman Jehovata rejsinankupaj, munakunankupajtaj. Uj anciano Shan sutiyoj nin: “Mamayku sapallan uywawarqayku. Payqa mana parlayniykuta sumajta parlajchu, hermanasniywan, noqawanpis, nillataj mamaykoj parlayninta sumajta parlajchu kayku. Jinapis mamaykoqa kallpachakorqa Bibliata estudiananpaj, Diosmanta mañakunanpaj, yachachinawaykupaj ima. Chayta rikoyqa, yanapawarqayku Jehovata rejsiy may allinpuni kasqanta entiendenaykupaj”, nispa.

9. ¿Imaynatá tatas wawasninkuman Jehovamanta yachachinkuman?

⁹ Ichapis wakin wawasqa Jehovamanta iskay parlaykunapi yachakunanku tiyan. Imaraykuchus escuelapi, wasipipis mana kikin parlaytachu parlanku. Chayrayku wakin tatasqa iskaynin parlaykunapi kaj publicacioneswan, grabacioneswan, videoswan ima wawasninkuta yanapanku. Waj suyumanta tatasqa, wawasninku Jehovaman astawan qayllaykunankupaj mayta kallpachakunanku tiyan.

10. 1) ¿Pitaj ajllan familia ima congregacionmanchus rinanta? 2) ¿Imatá tatas ruwankuman sumajta ajllanankupaj?

¹⁰ Parlayniykichejpi kaj congregación karupi kajtenqa, chaynejllapi kaj congregacionman riwajchej, waj parlaypi kajtinpis (Sal. 146:9). Jinapis parlayniykichejpi kaj congregación chaynejllapi kajtenqa, tata sumajta qhawarinan tiyan, familian mayqen congregacionmanchus rinanta. Tataqa sumajta tʼukurispa, Diosmanta mañakuspa, wawasninta, warminta ima tapuriytawan sumajta ajllanan tiyan (1 Cor. 11:3). Tatasqa sumajta ajllanankupaj Bibliaj yuyaychaykunasninpi tʼukurinanku tiyan.

11, 12. 1) ¿Ima parlayllapipis wawas tantakuykunapi entiendeyta atillankuchu? 2) ¿Imaraykú wakin wawas mana yachayta munankuchu tatasninkoj parlayninkuta?

¹¹ Tatasqa sumajta qhawarinanku tiyan imastachus wawasninku necesitasqankuta. Wawasqa Bibliaj yachachiykunasninta sumajta entiendenankupaj mana tantakuykunallamanchu rinanku tiyan. Astawanqa tantakuypi yachachikusqanta entiendenanku tiyan. Chayrayku ima parlaytachus astawan entiendenku chay parlaypi kaj congregacionman rejtinku aswan sumajta yachakonqanku. Wawasqa tantakuykunapi imatachus nikusqanta mana entiendejtinkoqa, mana yachakonqankuchu (1 Corintios 14:9, 11 leey). Wawasqa mana tatasninkoj parlayninkupipunichu imaynachus kashasqankuta, imatachus yuyasqankuta ninkuman. Wakin wawasqa tatasninkoj parlayninkupi tantakuykunapi kutichinkuman, umallirichiykunata qonkuman, jinapis chayqa mana sonqomantapachapunichu kanman.

¹² Chantapis wawaj sonqonta, yuyayninta ima mana waj qalluta parlayllachu cambianman. Ajinapi Joshuapis rikukorqa, pimantachus qallariypi parlarerqanchej. Kuraj hermanan Estherqa nin: “Wawasqa yachakunankupuni tiyan tatasninkoj parlayninkuta, costumbresninkuta, religionninkuta ima”, nispa. Uj wawa tatasninpa costumbresninkuta mana allinpajchu qhawan chayqa, nillataj tataspa parlayninkuta, religionninkutapis, yachayta munanqachu. Ajinapi rikukuspa, imatachus tatas ruwanankuta qhawarina.

13, 14. 1) ¿Imaraykú Samuel familianwan waj congregacionman riporqanku? 2) ¿Imatá Samuelwan warminwan ruwarqanku Jehovawan amigosllapuni kanankupaj?

¹³ Cristiano tatasqa allinnillankuta maskʼanankumantaqa wawasninkoj allinninkuta maskʼananku tiyan (1 Cor. 10:24). Joshuaj, Estherpa tatanku Samuelqa nin: “Warmiywanqa sumajta  qhawarerqayku, ima parlaypichus cheqa kaj astawan wawasniykoj sonqonman chayasqanta. Jehovamantataj yachayta mañakorqayku. Mañakuyniykoj kutichiynintaj mana munasqaykuman jinapunichu karqa. Wawasniykoj parlayniykupi kaj congregacionpi mana sumajta entiendesqankuta reparaytawan, waj congregacionman riporqayku. Paykunawan predicaj kayku, khuskataj tantakuykunaman rej kayku. Chantá hermanosta mikhurinapaj wajyarej kayku, pasearimunapajpis. Chay imasta ruwasqaykoqa wawasniykuta yanaparqa hermanosta rejsinankupaj. Jehovatataj mana Diosninkuta jinallachu qhawanankupaj, manaqa Tatankuta, Amigonkuta jina. Chayqa may sumajpuni karqa, parlayniykuta yachakunankumanta nisqaqa”, nispa.

¹⁴ Samuel nillanpuni: “Warmiywan tantakuykunaman parlayniykupi rinallaykutaj karqa, Jehovawan amigosllapuni kanaykupaj. Ashkha ruwanasniyoj karqayku, saykʼusqataj kasharqayku. Jinapis Jehovaqa tukuy chay imasta ruwasqaykumanta mayta bendeciwarqayku. Imajtinchus kinsantin wawasniyku Diospaj astawan llankʼashanku. Jehovamantaj may agradecesqas kashayku”, nispa.

15. ¿Imaraykú Kristina escuelapi parlakusqan parlaypi kaj congregacionman riporqa?

¹⁵ Wawasqa wiñasqankutawan, ima parlaytachus sumajta entiendenku chay congregacionpi Jehovata aswan sumajta sirviyta atisqankuta reparakunkuman. Ajina kajtenqa tatasqa ama yuyanankuchu tiyan wawasninku paykunata qhesachashasqanta. Kristina yuyarikun: “Tatasniypa parlayninkuta tumpallata entiendej kani. Tantakuykunapipis, mana entiendeyta atillajchu kani. Chantá 12 watasniyoj kashajtiy, escuelapi yachakusqay parlaypi uj jatun tantakuyman rerqani. Chaypiraj repararqani cheqa kajtapuni yachakushasqayta. Chantá escuelapi yachakusqay parlaypi Jehovamanta mañakuyta qallarerqani. Chaypimá Jehovamanta sonqomantapacha mañakorqani”, nispa (Hech. 2:11, 41). Kristina 18 watasninta juntʼaytawan, tatasninwan parlarerqa waj congregacionman ripunanpaj. Chay congregacionqa chay lugarpi parlakoj qallupi karqa. Kristina nin: “Escuelapi parlakusqan parlayqa Jehovamanta yachakunaypaj, nisqanman jinataj kausakunaypaj yanapawarqa”, nispa. Pisi tiemponmantaj Kristinaqa precursora regular karqa, may kusisqataj kashan.

16. ¿Imaraykú Nadia kusikun tatasninpa congregacionninmanta mana ripusqanmanta?

¹⁶ Joven, ¿munawajchu ima lugarpichus tiyakunki chaypi parlakoj congregacionman ripuyta? Ajina kajtin, ¿imaraykú ripuyta munanki? ¿Jehovaman astawan qayllaykuyta munasqaykiraykuchu? (Sant. 4:8). ¿Tatasniyki mana ñawillankupi purichisunankuta munasqaykiraykuchu? Chayri, ¿congregacionpi ni imata ruwayta munasqaykiraykuchu? Imatachus Nadia nisqanta qhawarina. Payqa Betelpi llankʼashan, nintaj: “Hermanosniywan jovenyashajtiyku, chay lugarpi parlakoj congregacionman ripuyta munarqayku. Tatasniykutaj repararqanku waj congregacionman ripojtiyku, Jehovamanta karunchakunaykuta. Chayrayku tatasniykuta mayta agradecekuyku parlayninkuta yachachinawaykupaj kallpachakusqankumanta, ima congregacionpichus kasharqayku chayllapipuni qhepachiwasqaykumantapis. Chayqa Jehovawan sumaj amigos kanaykupaj yanapawarqayku, waj runasman parlayninkupi Jehovamanta yachachinaykupajpis”, nispa.

17. 1) ¿Pikunatataj Jehová kamachin wawasta cheqa kajmanta yachachinankupaj? 2) ¿Imatá tatas ruwankuman cheqa kajta wawasninkuman yachachinankupaj?

¹⁷ Jehovaqa tatasta kamachin wawasninkuman cheqa kajta yachachinankupaj. Chaytaqa mana kamachinchu abuelosman, nitaj waj runasmanpis (Proverbios 1:8; 31:10, 27, 28 leey). Jinapis ichá tatasqa ima lugarpichus tiyakunku  chaypi parlakoj qalluta mana allinta yachankuchu. Chayrayku yanapata necesitankuman wawasninkoj sonqonkuman chayanankupaj. Wajkuna yanapajtinkupis, tataspuni wawasninkuman Diosmanta yachachinanku tiyan. Ajinamanta wawasninkuta uywanankupaj “Jehová Dios nisqanman jina cheqanchaspa, yachachispataj” (Efe. 6:4). Ichapis ancianosta tapurinkuman familiapi Diosta yupaychanapaj tantakuypi imatachus estudianankuta. Chantá tapurikullankumantaj wawasninku sumaj amigosniyoj kanankupaj imatachus ruwanankuta.

18, 19. 1) ¿Imaynatá jovenesta hermanos yanapankuman? 2) ¿Imatá tatas ruwanankupuni tiyan?

¹⁸ Tatasqa wawasninkuta yanapanankupaj wakin kuti, waj familiata wajyarinkuman familiapi Diosta yupaychanapaj tantakuyninkuman. Ashkha jovenesqa sumaj imasta yachakunku hermanoswan predicaj llojsejtinku chayri imallatapis paykunawan ruwajtinku (Pro. 27:17). Shan, pimantachus qallariypi parlarerqanchej nin: “Hermanos yanapawasqankuta mana qonqanichu. Tantakuypi parlarinaypaj yanapawajtinku, astawan yachakoj kani. Kusirikunaykupajpis imatachus ruwasqayku, mayta gustawaj”, nispa.

¹⁹ Tatasta yanapaj hermanosqa, wawasta yachachinkuman tatasninkuta respetanankuta. Chaytataj ruwankuman, tatasninkumanta sumajta parlaspa, tataspuni Jehovamanta yachachinanku kasqanta jatunpaj qhawaspa. Chantapis hermanosqa chay familiaspa wawasninkuta yanapashaspa, imatachus ruwashasqankuta allinta qhawarikunanku tiyan, congregacionmanta hermanos, jawamanta runaspis ama ima sajratapis parlanankupaj (1 Ped. 2:12). Tatasta hermanos yanapajtinkupis, tataspuni cheqa kajta wawasninkuman yachachinanku tiyan. Tatasqa yachananku tiyan imaynatachus hermanos wawasninkuta yanapashasqankuta.

20. ¿Imaynatá tatas wawasninkuta yanapankuman Jehovaj kamachisninman tukunankupaj?

²⁰ Tatas, Jehovamanta yanapata mañakuychej, tukuy atisqaykichejtataj kallpachakullaychejpuni (2 Crónicas 15:7 leey). Tatas, allinnillaykichejta maskʼanaykichejmantaqa, wawasniykichej allinninkuta maskʼaychej Jehovawan sumaj amigos kanankupaj. Tukuy atisqaykichejta kallpachakuychej Bibliaj nisqan wawasniykichejpa sonqonman chayananpaj. Atienekuychejtaj wawasniykichej Diospa kamachisninman tukunankuta. Wawasniykichej Bibliaj nisqanta ruwajtinku, qankunamanta yachakojtinku ima, apóstol Juan jina kusikunkichej. Pay pikunamanchus Jehovamanta yachacherqa chaykunamanta parlaspa nerqa: “Mana imapis astawan kusichiwanchu, wawasniy cheqa kajpi purishasqankuta uyarisqaymanta nisqaqa”, nispa (3 Juan 4).