1, 2. Mateo 24:14 versiculota leespa, ¿imata tapukunanchej tiyan?

JESÚS nerqa kay pʼunchaykunapi Diospa gobiernonmanta sumaj willaykuna tukuy runasman willakunanta (Mat. 24:14). Kay tiempopitaj Jehovaj testigosnenqa Jallpʼantinpi may rejsisqas kanchej Diosmanta willamusqanchejrayku. Wakin runasqa willayninchejta uyariyta munanku. Wakin runastaj mana uyariyta munaspapis, willayninchejta jatunpaj qhawanku. Chaywanpis, ¿imaynatá yachanchej Jesuspa nisqanta noqanchej juntʼashasqanchejta? ¿Chayta nispa jatunchakushanchejchu?

² Ashkha religiones ninku Jesuspa yachachisqanmanta paykuna willashasqankuta. Paykunaqa iglesiapi, telepi, Internetpi parlay, Diosmanta willay kasqanta yuyanku. Wakin runasqa yuyanku imaynatachus Jesusta rejsisqankumanta wajkunaman parlariy, Diosmanta willay kasqanta. Wajkunataj yuyanku yanapata necesitajkunata doctores jina, enfermeras jina, profesores  jina yanapariy, Diosmanta willamuy kasqanta. Chaywanpis, ¿cheqamantapunichu Jesús yachachisqasninman ajinata willanankuta kamacherqa?

3. Mateo 28:19, 20 nisqanman jina, ¿imatataj Jesuspa yachachisqasnin ruwananku tiyan?

³ ¿Imatataj Jesús yachachisqasnin ruwanankuta munarqa? ¿Paykunaman runas qayllaykunankuta suyanankutachu munarqa? Mana. Imaraykuchus Jesusqa kausarimusqanmanta qhepaman ashkha yachachisqasninman nerqa: “Rispa, tukuy laya runasta yachachisqasniyman tukuchimuychej, bautizaspa [...]. Yachachimuychej paykunaman imatachus noqa kamacherqaykichej, chayta paykunapis kasunankupaj”, nispa (Mat. 28:19, 20). Rikunchej jina Jesuspa yachachisqasnenqa, runasta yachachisqasniyman tukuchimunanku karqa, bautizananku karqa, yachachimunanku karqa. Niraj chayta ruwashaspataj, ñaupajtaqa runasta maskʼaj rinanku karqa. Bibliamanta yachaj uj runa, nerqa: “‘Riychej’ nisqa kamachiyta sapa uj creyente kasukunan tiyan, chayta ruwanankupaj mayta kallpachakunanku kajtinpis”, nispa (Mat. 10:7; Luc. 10:3).

4. ¿Imatataj ruwananchej tiyan ‘runa japʼej challwiris’ kanapaj? Sutʼinchay.

⁴ ¿Imatataj Jesús suyarqa yachachisqasninmanta? ¿Munarqachu yachachisqasnin sapallanku willamunankuta chayri uj qotu jina sumaj wakichisqa willanankuta? Sutʼita rikunchej, uj cristianollaqa Jallpʼantinpi mana willamuyta atisqanta. Chayrayku cristianosqa tukuyninku uj qotu jina sumajta wakichikunanku tiyan. Jesusqa yachachisqasninman “runa japʼej challwirista ruwasqaykichej” nishaspa, chaymanta parlasharqa (Mateo 4:18-22 leey). Jesusqa mana parlasharqachu sapa uj yachachisqan, anzuelowan challwata sapallan japʼej runa jina kananta. Mayqenchus suyakun, challwa anzuelota khaniykunanta. Astawanpis Jesusqa, challwata chʼipawan japʼej runasmanta parlasharqa. Chʼipawan challwata japʼinapajtaj astawan llankʼana tiyan, astawan wakichikuna tiyan, ashkha ukhutaj llankʼana tiyan (Luc. 5:1-11).

5. ¿Ima tawa tapuykunamantaj kutichinanchej tiyan, imaraykutaj?

⁵ Pikunachus Diospa gobiernonmanta sumaj willaykunata willashasqankuta yachanapajqa, kay tapuykunaman kutichinanchej tiyan:

• ¿Imamantataj cristianos willananchej tiyan?

• ¿Imaraykutaj willamunanchej tiyan?

• ¿Imaynatataj willamunanchej tiyan?

• ¿Maykunapitaj willamunanchej tiyan, maykʼajkamataj?

Kay tapuykunaj kutichiynenqa, yanapawasunchej pikunachus chay llankʼayta ruwashasqankuta yachanapaj, mayqenchus runasta yanapanman salvakunankupaj. Chantapis yanapallawasuntaj willanallapajpuni (1 Tim. 4:16).

6. ¿Imaynatá yachanchej Jehovaj testigosnin Jesuspa kamachisqanta juntʼashasqanchejta?

⁶ (Lucas 4:43 leey.) Jesusqa “Diospa reinonmanta evangeliota” willarqa. Munantaj yachachisqasninpis chayllamantataj willanankuta. ¿Mayqen religiontaj tukuy runasman Diospa gobiernonmanta willashan? Jehovaj testigosnillan. Willayninchejta mana uyariyta munaj runaspis chayta reparanku. Sutʼincharinapaj, ashkha suyuspi tiyakuytawan, uj jatunchakoj sacerdote, uj hermanoman willasqa, sapa suyupi Jehovaj testigosninta, imamantachus willasqankuta tapurisqanta. Chay sacerdote nerqa: “Manchay wampuspuni  kanku, tukuyninku ‘janaj pacha Reinomanta’ willasqankuta niwarqanku”, nispa. Chay sacerdotej nisqanqa rikuchin mana wampuschu kasqanchejta, manaqa cheqa cristianos kasqanchejta, may ujchasqastaj (1 Cor. 1:10). Kay estudiashanchej revistaqa, Diospa Reinonmanta parlashan. Torremanta Qhawaj Jehová Diospa Reinonmanta willashan, nisqataj sutikun. Kay revistaqa 254 parlaykunapi orqhokun, 59 millones jinataj imprimikun. Jallpʼantinpitaj may rejsisqa.

7. ¿Imaraykutaj ninchej cristiano nichikojkunata kamachejkuna mana Diospa gobiernonmantapunichu willashasqankuta?

⁷ Cristiano nichikojkunata kamachejkunaqa, mana Diospa gobiernonmanta willamunkuchu. Chay gobiernomanta parlanku chayqa, sonqonchej ukhullapi kasqanta ninku (Luc. 17:21). Paykunaqa mana yachachinkuchu Diospa Reinon uj gobierno kasqanta, chay Reinopi Jesús kamachishasqanta ima. Jesusmantataj parlanku Navidadllapi, Pascuallapi. Nillataj yachachinkuchu Diospa gobiernollan runaspa chʼampaykunasninkuta chinkachinanta, sajra kausayta tumpamantawan chinkachinanta ima (Apo. 19:11-21). Sutʼita rikunchej cristiano nichikojkunata kamachejkunaqa, mana yachankuchu imatachus Jesús rey jina Diospa gobiernonpi ruwananta. Jesuspa yachachisqan imachus kasqanta mana entiendesqankuraykutaj, mana entiendenkuchu imaraykuchus runasman willamunanku kasqanta.

8. ¿Imasraykutaj mana willamunanchejchu tiyan?

⁸ Jesuspa yachachisqasnenqa mana qolqeta japʼinanchejraykuchu chayri sumaj wasista ruwananchejraykuchu willamunchej. Jesús yachachisqasninman nerqa: “Qankunaqa kayta mana pagaspalla japʼerqankichej, amallataj pagachikuychejchu”, nispa (Mat. 10:8). Chayrayku Diospa Palabranta willamoyqa mana uj negociochu kanan tiyan (2 Cor. 2:17, NM). Jesuspa yachachisqasnenqa, Diosmanta yachachimusqankumanta mana qolqeta mañanankuchu tiyan (Hechos 20:33-35 leey). Jesuspa kamachisqan sutʼi kajtinpis, casi tukuy iglesias qolqeta mañanku iglesiasninkuta allinta japʼinankupaj, iglesiasninkupi yachachejkunaman paganankupaj, chaypi llankʼajkunaman paganankupaj ima. Chayraykutaj cristiano nichikojkunata kamachejkunaqa mayta qhapajyanku (Apo. 17:4, 5).

9. ¿Imaynatá rikuchinchej Jehovata, runa masinchejtawan munakusqanchejrayku willamusqanchejta?

⁹ ¿Jehovaj testigosnin Tantakuna Wasispi, Jatun Tantakuna Wasispi ima qolqeta mañanchejchu? Mana. Astawanqa Diosmanta willamunchej, runa qolqeta munasqanman jina qosqanwan (2 Cor. 9:7). Runasman Bibliamanta yachachimusqanchejmanta mana uj sueldota japʼispapis, qayna wata 1.930 millones horasta willamorqanchej, sapa killataj runasman 9 millonesmanta astawan yachachimorqanchej. Chayta ruwananchejpajtaj, qolqenchejta may kusiywan churanchej. Uj yachayniyoj runa, Jehovaj testigosninpa llankʼayninkumanta nerqa: “Paykunaqa mana qolqenkuta usuchinkuchu, imaraykuchus mana paganankuchu tiyan pastoresninkuman. Paykunaqa Diosmanta willamuyta, yachachimuyta ima ñaupajman churanku”, nispa. Mana qolqeraykuchu willanchej chay, ¿imaraykutaj willamunchej? Jehovata, runa masinchejta munakusqanchejrayku. Ajinata ruwaspataj Salmo  110:3 (leey) versículo nisqanta juntʼanchej.

10. ¿Imaynasmantataj Jesús, yachachisqasnin ima willarqanku?

¹⁰ ¿Imaynatataj Jesús, yachachisqasnin ima willarqanku? Maypichá runas kaj kanku chayman rej kanku. Sutʼincharinapaj, callespi, mercadospi ima willarqanku. Wasimanta wasipis willallajtaj kanku (Mat. 10:11; Luc. 8:1-3; Hech. 5:42; 20:20). Wasimanta wasi willanankupaj wakichikusqankuraykutaj, tukuy laya runasman willayta aterqanku.

11, 12. Jehovaj testigosnin runasman willamunankupaj kallpachakusqankuwan, iglesiaspi kajkunaj ruwasqankuwan, ¿imapitaj mana kikinchu?

¹¹ ¿Imatataj ruwanku llulla religionmanta kajkuna? ¿Jesús jinachu Diospa gobiernonmanta sumaj willaykunata willamunku? Paykunamanta ashkhasqa, iglesiasninkupi yachachejkunaman paganku. Chay yachachejkunataj, mana Jesuspa yachachisqaninman runasta tukuchinankupajchu willanku. Chayta ruwaspaqa mana Jesús jinachu ruwanku. Manaqa iglesiasninkumanta runas mana ripunallankupaj kallpachakunku. Wakin kutislla iglesiankumanta runasta willaj rinankupaj kallpachanku. Sutʼincharinapaj, 2001 wata qallariyta, papa Juan Pablo II uj cartanejta catolicosman nerqa, apóstol Pablo jina willamunanku kasqanta. Apóstol Pablo nerqa: “Ay noqamanta, manachus evangeliota willasaj chayqa”, nispa. Chantapis chay papa Juan Pabloqa, nillarqataj iglesiamanta tukuyninku Diosmanta willamunanku kasqanta, manataj wakillanchu. Chaywanpis pisi runaslla chay nisqanta kasukorqanku.

¹² Jehovaj testigosnillan, Jesús 1914 watamantapacha Rey jina kamachishasqanmanta willashanchej. Noqanchejqa Jesús kamachiwasqanchejman jina runasman willamuyta kausayninchejpi ñaupajman churanchej (Mar. 13:10). Religionesmanta parlaj uj libro nin: “Jehovaj testigosninpajqa runasman willayqa may sumaj. Paykunaqa yarqhasqasta, sapayakojkunata, onqosqasta yanapanankupaj kallpachakunku. Jinapis kay pachaj tukukuyninmanta, imatachus runas salvakunankupaj ruwanankumanta ima willamuyta mana qonqankuchu”, nispa. Ajinapunitaj, Jehovaj testigosnenqa imaynatachus Jesús, yachachisqasnin ima willarqanku ajinallatataj Diospa gobiernonmanta willamushanchej.

13. ¿Maykunapitaj sumaj willaykuna willakunan tiyan?

¹³ Jesusqa yachachisqasnin “reinomanta evangelio[ta] tukuynejpi” willanankuta, yachachinankuta ima nerqa. Kamacherqataj “tukuy laya runasta” yachachisqasninman tukuchimunankuta (Mat. 24:14; 28:19, 20). Chayrayku cheqa cristianos jina, sumaj willaykunamanta Jallpʼantinpi willamunanchej tiyan.

14, 15. ¿Imaraykutaj nisunman Jehovaj testigosnin Jesuspa nisqanta juntʼashasqankuta? (8 paginapi dibujota qhawariy.)

 ¹⁴ Rikunchej jina, Jesusqa sumaj willaykuna tukuynejpi willakunanta nerqa. ¿Imaraykú chayta ninchej? Estados Unidos suyupi, llulla religionesta kamachejkunaqa 600.000 jinalla kanku. Curastaj Jallpʼantinpi 400.000 jinalla kanku. Chaywanpis Jehovaj testigosnin Estados Unidos suyupi 1.200.000 jina kanku, Jesuspa yachachisqantataj willashanku. Chantapis 8 millonesmanta astawan testigos 240 suyuspi, llajtitaspi ima willashanku. Sutʼita rikunchej, Jehovaj testigosnillan Jallpʼantinpi sumaj willaykunamanta willashasqankuta. Chaytaj cheqamantapuni Jehovata mayta jatunchan (Sal. 34:1; 51:15).

¹⁵ Niraj kay pachaj tukukuynin chayamushajtin, tukuy runasman sumaj willaykunamanta willamunanchej tiyan. Chayta ruwanapajtaj ashkha librosta, revistasta, tratadosta, invitacionesta ima 700 kuraj parlaykunaman tijrachikun, orqhokuntaj. Qayna watataj 4.500 millones publicacionesta jina orqhokorqa. Chantapis Traducción del Nuevo Mundo de las Santas Escrituras nisqa Biblia 130 kuraj parlaykunamanta, 200 millonesmanta astawan imprimikorqa. Chantá Internetpi jw.org nisqapi Bibliamanta yachachiykuna 750 parlaykunamanta astawan kashan. Kay sumaj llankʼaytataj Jehovaj testigosnillan ruwashanchej.

16. ¿Imaynatá yachanchej Jehová atiyninta qowasqanchejta?

¹⁶ ¿Maykʼajkamataj willallasunpuni? Jesusqa kay pachaj tukukuyninkama willakunanta nerqa. Noqanchejtaj kay qhepa pʼunchaykunapi willashallanchejpuni, Jehová atiyninta qowasqanchejrayku (Hech. 1:8; 1 Ped. 4:14). Waj religionesmanta wakin runaspis Diospa atiyninwan kasqankuta ninku. Jinapis chay runas, ¿kay pʼunchaykunapi Diosmanta willashankuchu? Wakenqa Jehovaj testigosnin jina willayta munanku, chaywanpis mana atinkuchu. Wakintaj willanku uj tiempollata. Wakintaj wasimanta wasi purinku, jinapis mana Diospa gobiernonmanta willankuchu. Chayrayku nisunman chay runasqa, mana Jesús ruwarqa chay llankʼaytachu ruwashasqankuta.

17, 18. 1) ¿Imaraykutaj yachanchej Jehovaj testigosnillan sumaj willaykunata willashasqanchejta? 2) ¿Imaynatá chay llankʼayta juntʼanchej?

¹⁷ ¿Pikunataj kay pʼunchaykunapi Diospa gobiernonmanta willashanku? Jehovaj testigosnillan. Imaraykuchus noqanchej Diospa gobiernonmanta sumaj willaykunata willamushanchej. Chantapis runasta maskʼanchej Diosmanta willanapaj. Willamunchejtaj Jehová Diosta, runa masinchejta munakusqanchejrayku, nitaj qolqeta maskʼasqanchejraykuchu. Chantapis tukuy laya runasman, tukuy parlayniyoj runasman ima willanchej. Kay pachaj tukukuyninkamataj mana saykʼuspa Diospa gobiernonmanta willamullasunpuni.

¹⁸ Jehovaj llajtan kay qhepa pʼunchaykunapi imatachus ruwasqanqa tʼukunapaj jina. Chaywanpis, ¿imaynatá sumaj willaykunata Jallpʼantinpi willamunchej? Apóstol Pablo nerqa: “Imaraykuchus Diosqa qankunaman churan munanaykichejta, ruwanaykichejtataj paypa kʼacha munayninrayku”, nispa (Fili. 2:13). Chayrayku Jehovamanta kallpata mañakunallapuni, Diospa gobiernonmanta willamunallapajpuni, mayqentachus Jesucristo kamachiwarqanchej ruwananchejta (2 Tim. 4:5).