1, 2. Jehovaj kamachisnin, ¿ima problemaspitaj rikukunku?

APÓSTOL PABLOQA Timoteota kallpacharqa tukuy atisqanta Diospaj llankʼananpaj. Chaytaj kay tiempopi noqanchejtapis kallpachallawanchejtaj (2 Tim. 4:5). Tukuy kallpachakunchej apóstol Pabloj nisqanta kasukunapaj. Jinapis wakin kutisqa mana atikullanchu. Wakin hermanosninchejtaj, astawanraj kallpachakunanku tiyan predicaj llojsinankupaj (2 Tim. 4:2). Imajtinchus wakin hermanosninchejqa, gobiernos mana predicajta saqewanchejchu chay lugarespi tiyakunku. Paykunaqa carcelpi wisqʼasqa kananku kajtinpis, predicallankupuni.

² Jehovaj kamachisnenqa, ashkha problemasniyoj kanchej. Chaytaj ichá mayta llakichiwasunman. Wakin hermanosqa, ashkha horasta trabajananku tiyan familiankuta uywanankupaj. Paykunaqa astawan predicayta munaspapis, semana tukukuytaqa saykʼusqas kashanku. Wakenqa pisillata predicanku, sinchʼi onqosqa kasqankurayku chayri viejitusña kasqankurayku. Paykunamanta wakintaj, ichá ni wasimantapis llojsiyta atinkuñachu. Wakintaj ni imapaj valesqankuta yuyakunku. Mary * sutiyoj hermananchej nin: “Sapa kuti ni imapaj valesqayta yuyakuni. Chayraykutaj ni ima ruway chayawanchu. Chaytaj mayta llakichiwan. Imajtinchus ajina kashaspaqa, ni predicajpis riyta atinichu”, nispa.

3. ¿Imatá kay yachaqanapi yachakusun?

³ Ima problemasniyoj kajtinchejpis, Jehová Diosqa kallpata qowasun aguantanapaj, atisqanchejman jinataj payta sirvinallapajpuni. Kay yachaqanapeqa yachakusun, imaynasmantachus Jehová yanapawasqanchejta. Jinapis ñaupajtaqa, qhawarina imaynatachus Jehová kallpachasqanta Pablotawan, Timoteotawan tukuy atisqankuta predicanallankupajpuni. Paykunaqa, llakiykunapi kaspapis predicallarqankupuni.

4. ¿Ima llakiykunasniyojtaj Pablo karqa?

⁴ Pabloqa imaymana llakiykunasniyoj karqa. Paytaqa varawan seqʼorqanku, rumiswan chʼanqaykorqanku, carcelmantaj wisqʼaykorqanku. Chayrayku Jehovaj yanapanta necesitarqa (2 Cor. 11:23-25). Pabloqa yuyarqa wakin kutis ni imapaj valesqanta. Chayta niytataj mana pʼenqakorqachu (Rom. 7:18, 19, 24). Chantapis Pabloqa onqosqa kasqanrayku, “aychaypi khishkayoj jina kani” nispa nerqa. Chayrayku maytapuni Jehovamanta yanapata mañakorqa (2 Cor. 12:7, 8).

5. Pablo llakiykunasniyoj kaspapis, ¿imastataj ruwallarqapuni?

⁵ Jehovaqa, Pablota yanaparqa llakiykunapi kajtinpis, predicanallanpajpuni. Qhawarina imastachus apóstol Pablo ruwasqanta. Pabloqa, Romapi japʼikusqan wasipi presochasqa kashaspa, sonqo kʼajaywan predicallarqapuni allinpaj qhawasqa judiosman, kamachina wasipi trabajajkunaman ima (Hech. 28:17; Fili. 4:21, 22). Chantapis predicallarqataj Romamanta reypa soldadosninman, payta waturikoj rejkunaman ima (Hech. 28:30, 31; Fili. 1:13). Pabloqa chay tiempollapitaj Jehová yuyaychasqaman jina, wakin cartasta qhelqarqa. Chay cartasqa, chay tiempomanta cristianosta mayta kallpacharqa. Kay tiempopipis kallpachallawanchejpuni. Pabloqa sinchʼi llakiypi kaspapis Jehovata sirvillarqapuni, chaytaj Romamanta hermanosta mayta kallpacharqa. Chayrayku, ‘mana manchachikuspa Diospa Palabranmanta astawan astawan parlasharqanku’ (Fili. 1:14). Pabloqa mana munasqanman jinapunichu Jehovapaj llankʼarqa. Jinapis tukuy atisqanta ruwarqa. Chayrayku nerqa imaspichus rikukusqanqa “sumaj willaykuna willakunallanpajpuni kasqanta” (Fili. 1:12).

6. Kay 2 Corintios 12:9, 10 nisqanman jina, ¿imataj Pablota yanaparqa willanallanpajpuni?

⁶ Pabloqa yacharqa, mana kallpallanwanchu Jehová Diosta sirvisqanta, manaqa Jehová kallpata qosqanwan. Pay nerqa: ‘Diospa atiynenqa pisi kallpayoj kasqaypi astawan rikukun’, nispa (2 Corintios 12:9, 10 leey). Jehovaqa atiyninnejta Pablota kallpacharqa willanallanpajpuni, qhatiykachasqa kajtinpis, wisqʼasqa kajtinpis, chayri waj problemasniyoj kajtinpis.

7. ¿Ima problemastataj Timoteo atipanan karqa Diospaj llankʼayninta juntʼananpaj?

⁷ Joven Timoteopis, Jehová Diospaj llankʼayninta juntʼananpaj, paypa atiyninta necesitallarqataj. Timoteoqa Pablo misionero jina  viajashajtin, paywan khuska rerqa. Chantapis Pabloqa, waj kutispi Timoteota kacharqa wakin congregacionesta waturimunanpaj, kallpacharimunanpaj ima (1 Cor. 4:17). Ichapis Timoteoqa yuyarqa, chayta ruwananpaj niraj wakichisqachu kasqanta. Chayraykuchá Pablo nerqa: “Ama pipis joven kasqaykirayku pisipaj qhawasuchunchu”, nispa (1 Tim. 4:12). Chantapis Timoteoqa chay tiempollapitaj ‘sapa kuti wijsa nanaywan onqoj’ (1 Tim. 5:23). Jinapis Timoteoqa yacharqa, sumaj willaykunata predicananpaj, hermanosnintapis yanapananpaj Jehová atiyninwan yanapananta (2 Tim. 1:7).

8. ¿Imasnejtataj Jehová kay tiempopi kallpachawanchej?

⁸ Kay tiempopipis Jehová Diosqa, payta tukuy sonqo sirvinallapajpuni ‘may sumaj atiyta’ qowanchej (2 Cor. 4:7). Jehovaqa tawa imasnejta kallpachawanchej, yanapawanchejtaj payta tukuy sonqo sirvinallapajpuni. Chaytataj ruwan oracionnejta, Biblianejta, hermanosninchejnejta, predicacionnejta ima. Qhepan parrafospi chaymanta astawan yachakusun.

9. ¿Imaynatá Jehovamanta mañakuy yanapawanchej?

⁹ Jehovaqa oracionnejta kallpachawanchej. Pabloqa Efesios 6:18 versiculopi nerqa: “Sapa pʼunchay Diosmanta mañakuychej”, nispa. Chayta ruwajtinchejqa, Jehová Dios kallpachawasun. Hermanonchej Jonniemanta parlarina. Payqa Boliviapi tiyakun. Payqa repararqa, ashkha problemasniyoj kashajtin Jehová yanapasqanta. Tatasnin, señoran ima ujllapi sinchʼita onqoykorqanku. Chayrayku onqosqa tatasninta, señoranta ima, mana cuidayta atillarqachu. Mamanqa wañuporqapuni, tatanwan señoranwantaj unayninmanraj sanoyaporqanku. Hermano Jonnie nin: “Sinchʼi llakisqa kashaspaqa, Jehovamanta mañakoj kani imapichus yanapata necesitasqayta”, nispa. Jehová Diostaj llakiykunasninta aguantananpaj yanaparqa. Hermano Ronaldmantañataj parlarina. Payqa Boliviallapitaj tiyakun, ancianotaj. Paypa mamanqa cancerwan wañuporqa. Maman cancerniyoj kasqantaqa ñaupaj killallanpi willasqanku. ¿Imataj llakiyninta aguantananpaj yanaparqa? Pay nin: “Jehovawan parlarikusqay mayta yanapawan. Paymanqa imaynachus kashasqayta willarikuni. Paytaj sumajta entiendewan imaynachus kashasqayta. Ni noqapis ajinataqa entiendekunichu”, nispa. Wakin kutisqa sinchʼi llakisqa kashasqanchejrayku, mana yachanchejchu imatachus Jehovamanta mañakunanchejta. Jinapis Jehovaqa munan paywan parlarinanchejtapuni (Rom. 8:26, 27).

10. Hebreos 4:12 nisqanman jina, ¿imaraykutaj Bibliata leena, tʼukurinataj tiyan?

¹⁰ Jehovaqa Biblianejta kallpachawanchej. Noqanchejpis Pablo jina sapa día Bibliata leesunman sinchʼita sayanapaj, sonqochakunapaj ima (Rom. 15:4). Bibliata leerispa tʼukurejtinchejqa, Jehová yanapawasunman reparanapaj imaynamantachus Biblia kausayninchejpi yanapawasqanchejta (Hebreos 4:12 leey). Ñaupaj parrafopi Ronaldmanta parlarerqanchej. Pay nin: “Mayta kusikuni Bibliata sapa chʼisi leeyman yachaykukusqaymanta. Piensarini imaynachus Jehová kasqanpi, imaynatachus kamachisninta munakusqanpi ima. Chaytaj mayta kallpachawan”, nispa.

11. ¿Imaynatataj uj hermananchejta Biblia yanaparqa mana anchata llakikunanpaj?

¹¹ Diospa Palabranta leesqanchejpi tʼukurispaqa, problemasniyoj kajtinchejpis mana llakiykunasninchejwan atipachikusunchu. Qhawarina imaynatachus uj viuda hermanata Biblia yanapasqanta. Paymanqa uj anciano yuyaycharisqa Job librota leerinanta, chaywantaj yanapachikunanta. Hermanaqa Job  librota leeytawan nerqa: “Chanta, ¿imaraykutaj Job ajinata yuyarqari?”, nispa. Chaymantataj paypis reparakorqa Job jinallataj yuyashasqanta. Chaytaj yanaparqa manaña Job jina yuyananpaj, kallpacharqataj qosan wañupusqanmanta mana anchata llakikunanpaj.

12. ¿Imaynatá Jehová hermanosnejta kallpachawanchej?

¹² Jehovaqa hermanosnejta kallpachawanchej. Pabloqa nerqa maytapuni hermanoswan tinkuyta munasqanta purajmanta kallpachanakunankupaj (Rom. 1:11, 12). Hermananchej Marymanta parlarinallapuni. Payqa mayta kusikun hermanoswan hermanaswan kaspa. Pay nin: “Jehovaqa hermanosnejta, hermanasnejta ima maytapuni yanapawarqa. Paykunaqa mana yachallarqankupischu imaynachus kashasqayta. Jinapis parlariwasqankuwan tarjetitasta apachimuwasqankuwan ima, maytapuni kallpachariwarqanku. Chantá yanapallawantaj noqa jina llakiykunasniyoj karqanku, chay hermanaswan parlarisqay. Paykunamantaqa mayta yachakuni. Ancianospis niwanku, congregacionmanta hermanos mayta munakuwasqankuta. Chaytaj mayta kallpachawan”, nispa.

13. ¿Imaynatá reunionesninchejpi purajmanta kallpachanakusunman?

¹³ Reunionesninchejpeqa purajmanta sumajta kallpachanakunchej. Chayrayku reunionesman rispaqa, hermanosninchejta nina mayta munakusqanchejta, imastachus ruwasqankumantapis agradecekuna. Pedro sutiyoj ancianomanta parlarina. Payqa niraj reunión qallarikushajtin, uj hermanaman nerqa: “Hermanitáy, reunionesman jamunaykichejpaj kallpachakusqaykichejqa, maytapuni noqaykuta kallpachawayku. Sojtantin wawitasniykeqa, sumaj vistisqetas tantakuyman jamunku, comentankupunitaj”, nispa. Hermanaqa mayta agradecekuspa, waqay ñawilla hermanoman nerqa: “Hermanóy, chayta niwasqaykeqa maytapuni kallpachawan”, nispa. Chay hermanaj qosanqa mana testigochu karqa.

14. ¿Imaynatá predicacionman riy yanapawanchej?

¹⁴ Jehovaqa predicacionnejta kallpachawanchej. Predicaj rispaqa runas uyariwajtinchejpis manapis, sonqo juntʼasqas, kallpachasqastaj kanchej (Pro. 11:25). Hermananchej Deysiqa, ajinapuni kasqanta repararqa. Hermananchejqa manchay llakisqapuni kasharqa, ujnin familiarnin congregacionmanta qharqochikusqanrayku. Payqa nikoj: “Imaynallamantapis astawan yanaparinay karqa mana qharqochikunanpaj”, nispa. Deysiqa, sapa kuti ajinallatapuni yuyaj. Chayta atipananpajtaj predicacionman risqan yanaparqa. Predicacionman rispaqa, imaynasmantachus runasta yanaparinanpi piensaj. Pay nin: “Ajina llakiypi kashajtiy, Jehovaqa uj estudiota tarinaypaj yanapawarqa, paytaj rato ñauparerqa. Chayqa maytapuni kallpachawarqa. Chayrayku predicaj risqayqa, mayta yanapawarqa”, nispa.

15. ¿Imatá hermananchej Marymanta yachakusunman?

¹⁵ Onqosqa kasqanchejrayku chayri waj imasrayku, mana munasqanchejman jinapunichu predicanchej. Jinapis tukuy atisqanchejta predicanapaj kallpachakojtinchejqa, Jehová mayta kusikun. Hermananchej Marymanta parlarinallapuni. Payqa waj parlaypi kaj congregacionman yanapakoj riporqa. Payqa chay congregacionpi kashaspa, ni imapi yanapakushasqanta yuyarqa. Pay nin: “Reunionespeqa uj tiempota pisillata comentaj kani. Wakin kutistaj uj textollata leej kani. Predicacionpipis tratadosllata jaywaj kani”, nispa. Chayrayku payqa, mana congregacionninmanta wajkuna jinachu yanapakushasqanta yuyarqa. Jinapis manaña ajinata yuyananpaj kallpachakorqa. Payqa repararqa mana chay parlayta sumajta parlajtinpis, Jehovaqa paynejta wajkunata yanapayta atisqanta. Pay nin: “Bibliaj  nisqanqa, entiendenapaj jinalla. Chaytaj yanapan runasta kausayninkuta cambianankupaj”, nispa.

16. Onqosqa kajkunata chayri machitu kajkunata, ¿imataj yanapanman kusiyllawanpuni llakiyninkuta aguantanankupaj?

¹⁶ Onqosqas chayri machitus kasqanchejrayku, mana wasinchejmanta llojsiyta atinchejchu. Jinapis Jehovaqa yachan, may allinpajtaj qhawan predicaytapuni munasqanchejta. Payqa yanapawasunman, pikunachus cuidawanchej chaykunaman predicanapaj, chayri doctoresman predicanapaj. Imatachus kunan ruwasqanchejta ñaupajpi ruwasqanchejwan kikinchasunman chayqa, ichapis llakikullasunman. Chayrayku astawanqa, imaynatachus Jehová kay tiempopi yanapashawasqanchejpi piensarina. Ajinamanta ima llakiytapis kusiywan aguantallasunpuni.

17. Eclesiastés 11:6 nisqanman jina, ¿imaraykutaj predicanallanchejpuni tiyan?

¹⁷ Noqanchejqa Bibliamanta willaspa, mujuta jina tʼakashanchej. Jinapis mana yachanchejchu, mayqen tʼakasqanchejchus wiñananta (Eclesiastés 11:6 leey). Hermananchej Barbaramanta parlarina. Payqa 80 watasniyoj, telefononejta, cartanejtataj predicayta yachan. Hermanaqa ujnin cartanman churaykusqa, 1 de marzo de 2014 watamanta Torremanta Qhawaj revistata. Chay revistapeqa, “¿Imatataj Dios noqanchejrayku ruwarqa?” nisqa yachaqana kashan. Hermanaqa mana yachaspalla, uj qhariwarmiman chay cartata apachisqa. Paykunaqa unayña Jehovaj testigosnin kayta saqepusqanku. Jinapis chay cartapi japʼisqanku revistataqa, kutin kutita leesqanku. Qosa kajtaj reparasqa, Jehovapunipis parlashanman jina. Chaymantataj iskayninku reunionesman riyta qallarerqanku. 27 watas kurajmantataj Jehovaj llajtanman kutiykanporqanku. Hermana Barbaraqa cartasta apachisqanwan wajkunata yanapasqanta yachaspa, may kusisqa, may kallpachasqatajchá kasharqa.

18. ¿Imatá ruwasunman Jehová kallpachanawanchejpaj?

¹⁸ Jehová Diosqa kallpachawanchej oracionnejta, Biblianejta, hermanosninchejnejta, predicacionnejta ima. Chaykunawan yanapachikuspaqa, Jehová Tatanchejpi atienekusqanchejta rikuchishanchej. Imajtinchus payqa kamachisninta yanapayta atin, munantaj. Chantapis Jehovaqa mayta munan kallpachayta “tukuy sonqowan payllapi atienekunku, chaykunata” (2 Cró. 16:9).